1. Unsay imong gibati tungod sa gugma sa Diyos?

SI APOSTOL Juan misulat: “Ang Diyos gugma.” (1 Juan 4:8) Kini nga mga pulong nagpahinumdom nato sa importanteng kamatuoran: Ang Diyos, ang Tinubdan sa kinabuhi, mao sab ang Tinubdan sa gugma. Gihigugma ta ni Jehova! Tungod sa iyang gugma, kita mobating may kasegurohan, malipayon, ug kontento.

2. Sumala sa Mateo 22:37-40, unsa ang duha ka kinadak-ang sugo, ug ngano tingaling malisdan ta sa pagtuman sa ikaduha?

² Para sa mga Kristohanon, importante kaayo ang pagpakitag gugma. Kini usa ka sugo. (Basaha ang Mateo 22:37-40.) Kon mailhan nato pag-ayo si Jehova, dili ta maglisod sa pagtuman sa unang sugo. Tungod kana kay si Jehova hingpit. Siya mahunahunaon ug maayo kaayo kanato. Pero basig maglisod tag tuman sa ikaduhang sugo. Ngano? Tungod kay ang atong mga igsoon​—nga apil sa atong kinasuorang isigkatawo—​dili hingpit. Busa usahay, sila tingali mosulti o mobuhat ug mga butang nga makapasakit kanato. Nahibalo si Jehova nga malisdan ta niini, busa gigiyahan niya ang pipila ka magsusulat sa Bibliya nga iapil ang espesipikong tambag kon ngano ug kon sa unsang paagi angay natong ipakita ang gugma sa usag usa. Ang usa sa maong mga magsusulat mao si Juan.​—1 Juan 3:11, 12.

3. Unsay gipasiugda ni Juan?

³ Sa iyang mga sinulat, gipasiugda ni Juan nga ang mga Kristohanon kinahanglang magpakitag gugma. Gani, sa iyang asoy bahin sa kinabuhi ni Jesus, mas kadaghan gigamit ni Juan ang pulong nga “gugma” ug “gihigugma” kon itandi sa tulo pa ka magsusulat sa Ebanghelyo. Si Juan mga 100 anyos dihang gisulat niya  ang iyang asoy sa Ebanghelyo ug ang iyang tulo ka sulat. Ang maong mga sinulat nagpakita nga kinahanglang gipalihok sa gugma ang tanan natong buhaton. (1 Juan 4:10, 11) Pero wala dayon makakat-on niana si Juan.

4. Pirme bang nagpakitag gugma si Juan?

⁴ Sa dihang batabata pa si Juan, may mga higayon nga wala siya magpakitag gugma. Pananglitan, usa ka higayon niana, si Jesus ug ang iyang mga tinun-an mibiyahe paingon sa Jerusalem agi sa Samaria. Sa usa ka gamayng lungsod sa Samaria, wala sila abiabiha. Unsay reaksiyon ni Juan? Gipangutana niya si Jesus kon puwede bang magpakanaog ug kalayo gikan sa langit aron laglagon ang tibuok lungsod! (Luc. 9:52-56) Sa laing higayon, si Juan wala magpakitag gugma sa iyang kaubang mga apostoles. Dayag nga giingnan niya ug sa iyang igsoong si Santiago ang ilang inahan nga hangyoon si Jesus nga hatagan silag prominenteng posisyon tupad kaniya sa Gingharian. Dihang nahibaloan sa ubang apostoles ang gihimo ni Santiago ug Juan, puwerte nilang sukoa! (Mat. 20:20, 21, 24) Pero bisan pa sa tanang kasaypanan ni Juan, gimahal siya ni Jesus.​—Juan 21:7.

5. Unsay atong hisgotan niining artikuloha?

⁵ Niining artikuloha, hisgotan nato ang ehemplo ni Juan ug ang pipila sa iyang gisulat bahin sa gugma. Samtang ato ning himoon, makakat-on ta kon unsaon pagpakitag gugma sa atong mga igsoon. Makat-onan sab nato ang usa ka importanteng paagi nga ikapakita sa usa ka ulo sa pamilya nga gimahal niya ang iyang pamilya.

6. Giunsa pagpakita ni Jehova ang iyang gugma kanato?

⁶ Sagad maghunahuna ta nga ang gugma maoy mainit nga pagbati nga ipakita pinaagig mabinationg mga pulong. Pero aron mahimong tinuod ang gugma, kinahanglang ubanan nig mga buhat. (Itandi ang Santiago 2:17, 26.) Pananglitan, gimahal ta ni Jehova. (1 Juan 4:19) Ug gipahayag niya ang iyang gugma pinaagi sa nindot nga mga pulong nga narekord sa Bibliya. (Sal. 25:10; Roma 8:38, 39) Pero kombinsido ta nga gimahal ta sa Diyos dili lang tungod sa iyang giingon kondili tungod sab sa iyang gibuhat. Si Juan misulat: “Kini ang paagi nga ang gugma sa Diyos gipakita kanato: Gipadala sa Diyos ang iyang bugtong nga Anak dinhi sa kalibotan aron makabaton kitag kinabuhi pinaagi kaniya.” (1 Juan 4:9) Gitugotan ni Jehova nga ang iyang minahal nga Anak mag-antos ug mamatay para kanato. (Juan 3:16) Magduhaduha pa ba ta nga gimahal ta ni Jehova?

7. Unsay gihimo ni Jesus aron pamatud-an ang iyang gugma kanato?

⁷ Gipasaligan ni Jesus ang iyang mga tinun-an  nga gimahal niya sila. (Juan 13:1; 15:15) Iyang gipamatud-an ang kalawom sa iyang gugma kanila ug kanato dili lang pinaagi sa iyang gisulti kondili sa iya pong gibuhat. “Walay usa nga may gugma nga labaw pa kay niini,” miingon si Jesus, “nga ang usa andam mohatag sa iyang kinabuhi alang sa iyang mga higala.” (Juan 15:13) Sa dihang atong hunahunaon ang gihimo ni Jehova ug Jesus para nato, unsay angayng epekto niini kanato?

8. Base sa 1 Juan 3:18, unsay angay natong himoon?

⁸ Mapamatud-an nato nga atong gihigugma si Jehova ug Jesus pinaagi sa pagtuman sa ilang mga sugo. (Juan 14:15; 1 Juan 5:3) Ug gisugo ta ni Jesus nga higugmaon ang usag usa. (Juan 13:34, 35) Angay natong ipakita ang atong gugma sa mga igsoon dili lang sa pulong kondili sa buhat usab. (Basaha ang 1 Juan 3:18.) Unsay atong mahimo aron mapamatud-an nga gihigugma nato sila?

9. Unsay gihimo ni Juan tungod sa iyang gugma?

⁹ Puwede untang magpabilin si Juan uban sa iyang amahan ug makakuwarta pinaagi sa pagtrabaho diha sa negosyo sa ilang pamilya sa pagpangisda. Pero iyang gigamit ang nahibiling bahin sa iyang taas nga kinabuhi sa pagtabang sa uban nga makakat-on sa kamatuoran bahin kang Jehova ug Jesus. Ang kinabuhi nga gipili ni Juan dili sayon. Siya gilutos, ug sa hinapos nga bahin sa unang siglo dihang siya tigulang na, siya gibilanggo. (Buh. 3:1; 4:1-3; 5:18; Pin. 1:9) Bisan dihang gipriso siya tungod sa pagsangyaw bahin kang Jesus, gipamatud-an ni Juan nga gimahal niya ang uban. Pananglitan, samtang didto siya sa isla sa Patmos, iyang gisulat ang pinadayag nga iyang nadawat ug gipadala kini sa mga kongregasyon aron ilang mahibaloan kon unsay “kinahanglang mahitabo sa dili madugay.” (Pin. 1:1) Ug posible nga human siya buhii gikan sa Patmos, gisulat ni Juan ang iyang Ebanghelyo bahin sa kinabuhi ug ministeryo ni Jesus. Nagsulat sab siyag tulo ka sulat aron dasigon ug palig-onon ang iyang mga igsoon. Sa unsang paagi masundog nimo ang pag-una ni Juan sa kaayohan sa uban?

10. Sa unsang paagi nimo mapamatud-an nga gimahal nimo ang mga tawo?

¹⁰ Mapamatud-an nimo nga imong gimahal ang mga tawo sa paagi nga gigamit nimo ang imong kinabuhi. Gusto sa kalibotan ni Satanas nga gamiton nimo ang imong panahon ug kusog para sa imong kaugalingon, nga maningkamot nga mahimong dato o inila. Hinunoa, ang mga Kristohanon sa tibuok kalibotan nga nag-una sa kaayohan sa uban naggahin ug dakong panahon sa pagsangyaw sa maayong balita ug pagtabang sa mga tawo nga masuod kang Jehova. Ang pipila nakahimo pa gani sa pagsangyaw ug pagpanudlo sa bug-os panahon.

11. Sa unsang paagi gipamatud-an sa maunongong mga magmamantala nga ilang gihigugma si Jehova ug ang mga igsoon?

¹¹ Daghang maunongong Kristohanon ang kinahanglang motrabaho nga bug-os panahon aron masuportahan ang ilang kaugalingon ug ang ilang pamilya. Bisan pa niana, maunongong gisuportahan niini nga mga magmamantala ang organisasyon sa Diyos kutob sa ilang maarangan. Pananglitan, ang pipila nagtabang sa disaster relief, ang uban nagboluntaryo sa mga proyekto sa pagpanukod, ug ang tanan dunay kahigayonan nga moamot para sa tibuok kalibotang buluhaton. Ila kining gihimo tungod sa ilang gugma sa Diyos ug sa isigkatawo. Kada semana, atong gipamatud-an nga atong gimahal ang mga igsoon pinaagi sa pagtambong sa mga tigom ug pagpakigbahin niana. Bisag gikapoy tingali ta, motambong ta. Bisag gikulbaan tingali ta, mokomento ta. Ug bisag naa tay kaugalingong mga problema,  dasigon nato ang uban una ug human sa tigom. (Heb. 10:24, 25) Mapasalamaton gyod ta sa mga gihimo sa atong minahal nga mga igsoon!

12. Unsay laing paagi nga gipamatud-an ni Juan nga gimahal niya ang iyang mga igsoon?

¹² Gipamatud-an ni Juan nga gimahal niya ang iyang mga igsoon dili lang pinaagi sa paghatag ug komendasyon kondili sa paghatag pod ug tambag. Pananglitan, sa mga sulat ni Juan, iyang gikomendahan ang mga igsoon sa ilang pagtuo ug maayong mga buhat, pero gihatagan sab niya sila ug seryosong tambag bahin sa sala. (1 Juan 1:8–2:1, 13, 14) Sa susama, kinahanglan natong komendahan ang atong mga igsoon tungod sa maayong mga butang nga ilang gihimo. Pero kon ang usa ka igsoon mosugod sa pagpakitag dili maayong panghunahuna o binuhatan, makapakita ta niyag gugma pinaagi sa pagsulti niya sa lumo nga paagi kon unsay kinahanglan niyang madunggan. Nagkinahanglag kaisog ang pagtambag sa usa ka higala, pero ang Bibliya nag-ingon nga ang tinuod nga managhigala makapahait, o makatul-id, sa usag usa.​—Prov. 27:17.

13. Unsay dili nato angayng himoon?

¹³ Usahay, mapamatud-an nato ang atong gugma sa mga igsoon pinaagi sa kon unsay dili nato buhaton. Pananglitan, dili ta mahiubos dayon sa ilang isulti. Tagda ang nahitabo sa hinapos nga bahin sa kinabuhi ni Jesus dinhi sa yuta. Giingnan niya ang iyang mga tinun-an nga aron makabaton silag kinabuhi, kinahanglan silang mokaon sa iyang unod ug moinom sa iyang dugo. (Juan 6:53-57) Daghan sa iyang mga tinun-an ang gingil-aran sa iyang giingon, maong mibiya sila kaniya. Pero miunong niya ang iyang tinuod nga mga higala, apil si Juan. Wala nila masabti ang giingon ni Jesus, ug tingali nakurat pod sila niana. Pero ang maunongong mga higala ni Jesus wala maghunahuna nga sayop ang iyang giingon ug wala sila mahiubos. Hinunoa, misalig sila kaniya kay nahibalo sila nga siya nagsulti sa kamatuoran. (Juan 6:60, 66-69) Importante gyod nga dili dayon ta mahiubos sa isulti sa atong mga higala! Hinunoa, hatagan nato silag kahigayonan nga ipatin-aw kon unsay ilang buot ipasabot.​—Prov. 18:13; Eccl. 7:9.

14. Nganong dili nato angayng tugotan ang pagdumot nga motubo sa atong kasingkasing?

¹⁴ Giawhag pod ta ni Juan nga dili magdumot sa atong mga igsoon. Kon dili nato sundon ang maong tambag, basig maimpluwensiyahan ta ni Satanas. (1 Juan 2:11; 3:15) Nahitabo ni sa pipila sa hinapos sa unang siglo C.E.  Nianang panahona, naningkamot si Satanas nga ang katawhan sa Diyos magdumtanay ug magkabahinbahin. Sa dihang gisulat ni Juan ang iyang mga sulat, may mga tawong nagsundog kang Satanas nga nahimong membro sa kongregasyon. Pananglitan, si Diotrefes nagpahinabog grabeng pagkabahinbahin diha sa usa ka kongregasyon. (3 Juan 9, 10) Wala siyay tahod sa mga ansiyano nga gipadala sa nagamandong lawas. Misulay pa gani siya nga papahawaon sa kongregasyon kadtong nag-abiabi sa mga igsoon nga dili niya ganahan. Pagkaarogante! Si Satanas naningkamot gihapon nga magkabahinbahin ang katawhan sa Diyos karon. Hinaot dili nato tugotan ang pagdumot nga makapabulag nato sa usag usa.

15. Unsay angayng hinumdoman sa ulo sa pamilya?

¹⁵ Ang usa ka importanteng paagi nga mapamatud-an sa ulo sa pamilya nga gimahal niya ang iyang pamilya mao ang pagtagana sa ilang materyal nga panginahanglan. (1 Tim. 5:8) Pero kinahanglan niyang hinumdoman nga ang materyal nga mga butang dili makatagbaw sa espirituwal nga panginahanglan sa iyang pamilya. (Mat. 5:3) Matikdi ang ehemplo nga gipakita ni Jesus para sa mga ulo sa pamilya. Sumala sa Ebanghelyo ni Juan, samtang si Jesus himalatyon diha sa estaka sa pagsakit, naghunahuna gihapon siya sa iyang pamilya. Si Juan nagtindog uban sa inahan ni Jesus, si Maria, sa dapit diin gilansang si Jesus. Bisag nag-antos sa grabeng kasakit, gihangyo ni Jesus si Juan nga atimanon si Maria. (Juan 19:26, 27) Si Jesus dunay mga igsoon nga seguradong makaatiman sa pisikal nga mga panginahanglan ni Maria. Pero dayag nga wala pay usa nila nga nahimong iyang tinun-an. Busa giseguro ni Jesus nga matagan-an ang pisikal ug espirituwal nga panginahanglan ni Maria.

16. Unsay mga responsibilidad ni Juan?

¹⁶ Si Juan daghag responsibilidad. Ingong usa sa mga apostoles, siya nanguna sa buluhatong pagsangyaw. Posible sab nga minyo siya, busa kinahanglan niyang tagan-an ang materyal ug espirituwal nga panginahanglan sa iyang pamilya. (1 Cor. 9:5) Unsay makat-onan sa mga ulo sa pamilya karon kang Juan?

17. Nganong importante nga matagan-an sa ulo sa pamilya ang espirituwal nga panginahanglan sa iyang pamilya?

¹⁷ Ang brader nga ulo sa pamilya daghan tingalig bug-at nga responsibilidad. Pananglitan, kinahanglan magkugi siya sa iyang sekular nga trabaho aron dili mapasipalahan si  Jehova. (Efe. 6:5, 6; Tito 2:9, 10) Ug posibleng duna siyay mga responsibilidad sa kongregasyon, sama sa pag-shepherding ug pagpanguna sa buluhatong pagsangyaw. Sa samang higayon, importante nga regular siyang magtuon sa Bibliya uban sa iyang asawa ug mga anak. Maapresyar gyod nila ang iyang mga paningkamot nga matagan-an sila sa pisikal, emosyonal, ug espirituwal.​—Efe. 5:28, 29; 6:4.

18. Sa unsa segurado si Juan?

¹⁸ Si Juan taas ug kinabuhi ug daghag eksayting nga kasinatian. Nasinati pod niya ang daghang kalisdanan nga makapahuyang unta sa iyang pagtuo. Pero kanunay niyang gihimo ang iyang maarangan sa pagtuman sa mga sugo ni Jesus, apil na ang sugo nga higugmaon ang iyang mga igsoon. Tungod niana, segurado si Juan nga gimahal siya ni Jehova ug Jesus, ug nga hatagan nila siyag kusog nga iyang gikinahanglan aron malahutay ang bisan unsang kalisdanan. (Juan 14:15-17; 15:10; 1 Juan 4:16) Si Satanas o ang iyang kalibotan wala gyod makapugong kang Juan nga mobati, mopahayag, ug mopakitag gugma.

19. Unsay gidasig sa 1 Juan 4:7 nga atong buhaton, ug ngano?

¹⁹ Sama kang Juan, nagkinabuhi ta sa kalibotan nga gimandoan ni Satanas, ang madumtanong diyos niining sistemaha. (1 Juan 3:1, 10) Gusto niya nga dumtan nato ang atong mga igsoon, pero dili nâ mahitabo gawas kon tugotan nato siya. Hinaot magmadeterminado ta nga higugmaon ang atong mga igsoon, ipahayag ang maong gugma pinaagi sa pulong, ug pamatud-an ang maong gugma pinaagi sa buhat. Kon buhaton nato kana, malipay ta nga nahimo tang bahin sa pamilya ni Jehova, ug mahimong makapatagbaw ang atong kinabuhi.​—Basaha ang 1 Juan 4:7.