1. Sama kang Haring David, unsa tingali ipangutana sa pipila kanato?

KITANG tanan gustog kalmado ug malinawon nga kinabuhi. Walay usa nato ang gustong mabalaka. Pero usahay, mobati tingali tag grabeng kabalaka. Gani, ang pipila ka alagad ni Jehova makapangutana tingali sa gisukna ni Haring David kang Jehova: “Hangtod kanus-a ko mag-antos, ug magmagul-anon ang akong kasingkasing adlaw-adlaw?”​—Sal. 13:2.

2. Unsay atong hisgotan niining artikuloha?

² Bisag kitang tanan mabalaka usahay, duna tay mahimo aron makontrolar ang atong gibati. Niining artikuloha, hisgotan una nato ang pipila ka butang nga makapabalaka tingali kanato. Dayon hisgotan nato ang unom ka praktikal nga paagi nga makatabang nato sa pagpabiling kalmado dihang mag-atubang ug mga problema.

3. Unsang mga butanga ang makapabalaka nato, ug mapugngan ba nato kana?

³ Daghang butang ang makapabalaka nato ug dili nato mapugngan nga mahitabo ang pipila niini. Pananglitan, dili nato mapugngan ang pagsaka sa presyo sa pagkaon, sinina, ug puy-anan kada tuig; dili sab nato makontrolar kon kanus-a ta tentalon sa atong mga kauban sa trabaho o sa eskuwelahan sa paghimog dili matinud-anon o imoral nga mga buhat. Ug dili nato mapugngan ang mga tawo sa paghimog krimen diha sa atong  dapit. Nag-atubang ta niini nga mga problema kay nagkinabuhi ta sa kalibotan diin ang panghunahuna sa kadaghanan wala ibase sa mga prinsipyo sa Bibliya. Si Satanas, ang Diyos niining kalibotana, nahibalo nga dunay pipila nga dili moalagad kang Jehova tungod sa “mga kabalaka sa kinabuhi niini nga sistema sa mga butang.” (Mat. 13:22; 1 Juan 5:19) Dili ikatingala nga kining kalibotana puno kaayog makapa-stress nga mga kahimtang!

4. Unsa tingali atong bation dihang mag-atubang tag grabeng mga problema?

⁴ Tungod sa grabeng mga problema, basig magsige na lang tag kabalaka. Pananglitan, mabalaka tingali ta nga ang atong kita dili makasapar sa atong mga panginahanglan, o kaha masakit ta ug dili makatrabaho o mawad-an pa ganig trabaho. Mabalaka sab tingali ta nga dili ta makapabiling matinumanon dihang tentalon sa pagsupak sa balaod sa Diyos. Sa dili madugay, palihokon ni Satanas ang mga tawong ilalom sa iyang pagmando sa pag-atake sa katawhan sa Diyos, busa mabalaka tingali ta kon unsay atong buhaton dihang mahitabo kana. Makapangutana tingali ta, ‘Sayop ba nga mabalaka ko nianang mga butanga?’

5. Unsay gipasabot ni Jesus dihang siya miingon: “Ayaw na mog kabalaka”?

⁵ Nahibalo ta nga giingnan ni Jesus ang iyang mga sumusunod: “Ayaw na mog kabalaka.” (Mat. 6:25) Gipasabot ba ni Jesus nga dili na gyod ta angayng mabalaka sa bisan unsa? Wala! Kon buot hunahunaon, ang pipila sa maunongong mga alagad ni Jehova kaniadto mibatig kabalaka, pero wala sila mawad-i sa pag-uyon ni Jehova. * (1 Hari 19:4; Sal. 6:3) Sa pagkatinuod, gipasaligan ta ni Jesus. Dili niya gustong mabalaka ta pag-ayo sa atong mga panginahanglan nga maapektohan na hinuon ang atong pag-alagad sa Diyos. Busa, unsay atong buhaton dihang mobati tag kabalaka?​—Tan-awa ang kahong “ Kon Unsaon Ni Paghimo.”

6. Sumala sa Filipos 4:6, 7, unsay makatabang nato sa pagpabiling kalmado?

⁶ (1) Pag-ampo pirme. Ang mga Kristohanon nga nag-atubang ug problema makaampo kang Jehova alang sa tabang. (1 Ped. 5:7) Ingong tubag sa imong mga pag-ampo, mahimong madawat nimo “ang kalinaw nga gikan sa Diyos, nga labaw sa tanang [tawhanong] pagsabot.” (Basaha ang Filipos 4:6, 7.) Ihatag ni Jehova ang maong kalinaw pinaagi sa iyang gamhanan nga balaang espiritu.​—Gal. 5:22.

7. Unsay angay natong hinumdoman dihang mag-ampo sa Diyos?

⁷ Dihang mag-ampo ka kang Jehova, isulti kaniya ang tanan nimong gibati. Magmaespesipiko. Isulti kaniya ang problema ug kon unsay imong gibati niana. Kon posibleng masulbad ang problema, pangayog kaalam aron mahibaloan kon unsay imong buhaton ug kusog sa pagbuhat niana. Kon wala kay mahimo sa pagsulbad sa problema, pangayog tabang kang Jehova aron dili ka sobrang mabalaka niana. Kon espesipiko ang imong mga pag-ampo, sa ngadtongadto mas makita nimo kon giunsa nâ pagtubag ni Jehova. Kon dili dayon matubag ang imong ginaampo, ayawg surender. Gawas nga gusto ni Jehova nga magmaespesipiko ka sa imong mga pag-ampo, gusto pod niya nga magpadayon ka sa pag-ampo.​—Luc. 11:8-10.

8. Unsay angay natong iapil sa atong mga pag-ampo?

⁸ Sa dihang itugyan nimo kang Jehova ang imong mga kabalaka pinaagi sa pag-ampo, ayaw gyod kalimot sa pagpasalamat. Maayong  hunahunaon ang mga panalangin nga atong nadawat, bisan dihang lisod kaayo ang atong kahimtang. Kon usahay dili nimo masulti ang imong grabeng pagbati, hinumdomi nga tubagon ni Jehova ang imong pag-ampo bisag moingon lang kag ‘Palihog tabangi ko!’​—2 Cron. 18:31; Roma 8:26.

9. Unsay atong buhaton aron mobati tag tinuod nga kasegurohan?

⁹ (2) Salig sa kaalam ni Jehova, dili sa imong kaalam. Sa ikawalong siglo B.C.E., ang katawhan sa Juda nahadlok nga atakehon sa mga Asiryanhon. Kay dili nila gustong masakop sa mga Asiryanhon, nagpakitabang sila sa paganong mga Ehiptohanon. (Isa. 30:1, 2) Gipasidan-an sila ni Jehova nga ang ilang pagsalig sa mga Ehiptohanon moresultag katalagman. (Isa. 30:7, 12, 13) Pinaagi kang Isaias, gisultihan ni Jehova ang katawhan kon unsay ilang buhaton aron mobati silag tinuod nga kasegurohan. Ang propeta miingon: “Mahimo mong kusgan kon magpabilin mong kalmado ug mosalig mo” kang Jehova.​—Isa. 30:15b.

10. Sa unsa tingali nga mga kahimtang nga ikapakita nato ang atong pagsalig kang Jehova?

¹⁰ Unsaon nato pagpakita ang atong pagsalig kang Jehova? Tagda ang pipila ka pananglitan. Ibutang ta nga gitanyagan kag trabaho nga mas dakog suweldo, pero kinahanglan kang motrabahog mas daghang oras ug malimitahan ang imong mahimo sa pag-alagad kang Jehova. O kaha duna kay kauban sa trabaho nga nakagusto nimo pero dili siya bawtismadong alagad sa Diyos. O unsa man kon ang usa ka minahal nga membro sa pamilya mohatag nimog ultimatum: “Ako o ang imong Diyos?” Sa matag usa niana nga kahimtang, lisod ang pagdesisyon, pero hatagan ka ni Jehova sa giya nga imong gikinahanglan. (Mat. 6:33; 10:37; 1 Cor. 7:39) Ang pangutana mao, Mosalig ba ka kang Jehova ug mosunod sa iyang giya?

11. Unsang mga asoy sa Bibliya ang puwede natong tun-an aron makapabilin tang kalmado bisan pa sa mga pagsupak?

¹¹ (3) Tun-i ang maayo ug dili maayong mga pananglitan. Ang Bibliya dunay daghang asoy nga nagpasiugda sa kaimportante sa pagpabiling kalmado ug pagsalig kang Jehova. Samtang tun-an nimo kini nga mga asoy, matikdi kon unsay nakatabang sa mga alagad sa Diyos sa pagpabiling kalmado bisan pa sa grabeng mga pagsupak. Pananglitan, dihang ang mga apostoles gibaoran sa korte suprema sa mga Hudiyo nga mohunong sa pagsangyaw, wala sila mahadlok. Hinunoa, sila maisogong miingon: “Kinahanglan namong sugton ang Diyos ingong magmamando imbes ang mga tawo.” (Buh. 5:29) Bisan human sila bunali, ang mga apostoles wala mahadlok. Ngano? Tungod kay nahibalo sila nga si Jehova dapig kanila. Nalipay siya kanila. Busa, nagpadayon sila sa pagsangyaw sa maayong balita. (Buh. 5:40-42) Sa susama, dihang hapit nang patyon ang tinun-ang si Esteban, siya nagpabiling malinawon ug kalmado kaayo nga ang iyang nawong nahimong “sama sa nawong sa anghel.” (Buh. 6:12-15) Ngano? Tungod kay segurado siya nga nalipay si Jehova kaniya.

12. Base sa 1 Pedro 3:14 ug 4:14, nganong puwede gihapon tang magmalipayon bisag gilutos?

¹² Ang mga apostoles dunay klarong ebidensiya nga si Jehova nag-uban kanila. Gihatagan niya silag gahom sa paghimog mga milagro. (Buh. 5:12-16; 6:8) Dili ingon niana ang atong kahimtang karon. Apan pinaagi sa iyang Pulong, si Jehova mahigugmaong nagpasalig kanato nga dihang kita mag-antos tungod sa pagkamatarong, siya malipay kanato ug ang iyang espiritu anaa kanato. (Basaha ang 1 Pedro 3:14; 4:14.) Busa dili ta angayng mabalaka kon unsay atong buhaton dihang lutoson ta sa umaabot. Hinunoa, kinahanglang buhaton nato ang atong kinamaayohan karon sa  pagpalig-on sa atong pagsalig nga si Jehova makatabang ug makaluwas kanato. Sama sa unang mga tinun-an, kinahanglang mosalig ta sa saad ni Jesus: “Hatagan mo nakog mga pulong ug kaalam nga dili malalis o masupak sa tanan ninyong kaaway.” Gipasaligan sab ta niya: “Pinaagi sa inyong paglahutay, maluwas ang inyong kinabuhi.” (Luc. 21:12-19) Ug ayaw gyod kalimti nga si Jehova mahinumdom bisan sa kinagamyang detalye sa iyang mga alagad nga namatayng matinumanon kaniya. Gamiton niya ang maong kahibalo sa pagbanhaw kanila.

13. Sa unsang paagi makabenepisyo ta sa pagkonsiderar sa mga kasinatian niadtong wala makapabiling kalmado ug wala mosalig kang Jehova?

¹³ Makakuha sab tag leksiyon sa mga kasinatian niadtong wala makapabiling kalmado ug wala mosalig kang Jehova. Ang pagsusi nianang dili maayong mga ehemplo makatabang nato nga malikayan ang mga sayop nga ilang nahimo. Pananglitan, sa sayong bahin sa pagmando ni Haring Asa sa Juda, siya misalig kang Jehova dihang gisulong siya sa usa ka dakong panon sa kasundalohan, ug gihatagan siya ni Jehova ug kadaogan. (2 Cron. 14:9-12) Pero sa ulahi, dihang ang mas gamayng panon sa kasundalohan ni Haring Baasa sa Israel misulong kaniya, gibayran ni Asa ang mga Siryanhon aron tabangan siya imbes mosalig kang Jehova alang sa kaluwasan, sama sa iyang gihimo kaniadto. (2 Cron. 16:1-3) Ug sa hapit na siyang mamatay dihang grabe siyang nasakit, wala siya mosalig sa tabang ni Jehova.​—2 Cron. 16:12.

14. Unsang leksiyon ang atong makuha sa mga sayop ni Asa?

¹⁴ Sa sinugdan, si Asa misalig kang Jehova dihang nag-atubang ug mga problema. Pero sa ulahi, wala siya modangop sa Diyos alang sa tabang. Hinunoa, mipili siya nga sulbaron ang mga problema nga siyasiya ra. Sa sinugdan, morag misaler ang plano ni Asa sa pagpangayog tabang sa mga Siryanhon aron moatras ang Israel. Pero wala magdugay ang kalinaw sa Juda. Giingnan siya ni Jehova pinaagi sa usa ka propeta: “Kay ikaw misalig sa hari sa Sirya ug wala mosalig kang Jehova nga imong Diyos, ang kasundalohan sa hari sa Sirya nakaikyas sa imong kamot.” (2 Cron. 16:7) Dili ta angayng maghunahuna nga masulbad nato ang atong mga problema bisag walay giya ni Jehova pinaagi sa iyang Pulong. Bisan sa mga higayon nga angay tang modesisyon dayon, kinahanglan nga kalmado tang mosalig kang Jehova, ug tabangan ta niya sa paghimog hustong desisyon.

15. Unsay puwede natong himoon dihang magbasa sa Bibliya?

¹⁵ (4) Pagmemoryag mga teksto. Dihang makabasa kag mga teksto nga nagpakita kon unsa ka importante ang pagpabiling kalmado ug pagsalig kang Jehova, paningkamoti nga mamemorya kana. Mahimong makatabang nimo ang pagbasag kusog o pagsulat niana ug pagbalikbalik ug basa niana. Si Josue gisugo nga regular nga basahon sa hinay nga tingog ang basahon sa Balaod aron siya molihok nga maalamon. Ang iyang mabasa makatabang sab nga mawala ang kahadlok nga iya tingaling gibati diha sa iyang pagpanguna sa katawhan sa Diyos. (Jos. 1:8, 9) Daghang teksto sa Bibliya ang makahatag nimog kalinaw sa hunahuna ug kasingkasing dihang naa ka sa mga situwasyon nga sagad makapabalaka o makapahadlok nimo.​—Sal. 27:1-3; Prov. 3:25, 26.

16. Sa unsang paagi gigamit ni Jehova ang kongregasyon aron tabangan ta nga magpabiling kalmado ug mosalig kaniya?

¹⁶ (5) Pakig-uban sa katawhan sa Diyos. Si Jehova naggamit sa atong mga igsoon aron tabangan ta nga magpabiling kalmado ug mosalig kaniya. Sa atong mga tigom, makabenepisyo ta sa mga pakigpulong, komento, ug  makapadasig nga panag-estoryahay uban sa atong mga igsoon. (Heb. 10:24, 25) Madasig pod kaayo ta dihang atong isulti sa kasaligang mga higala diha sa kongregasyon ang atong mga kabalaka. “Ang maayong pulong” gikan sa usa ka higala makatabang nga mamenosan ang atong kabalaka.​—Prov. 12:25.

17. Sumala sa Hebreohanon 6:19, sa unsang paagi ang paglaom sa Gingharian magpalig-on kanato bisan pa sa lisod nga mga kahimtang?

¹⁷ (6) Hupting lig-on ang imong paglaom. Ang atong paglaom sa Gingharian magsilbing “angkla sa atong kinabuhi,” nga magpalig-on kanato bisan pa sa lisod o makapabalakang mga kahimtang. (Basaha ang Hebreohanon 6:19.) Palandonga ang saad ni Jehova nga sa umaabot wala na tay angayng kabalak-an. (Isa. 65:17) Imadyina ang imong kaugalingon sa malinawong bag-ong kalibotan diin wala nay makapaguol nga mga kahimtang. (Miq. 4:4) Molig-on sab ang imong paglaom dihang isulti nimo kini sa uban. Magkugi diha sa buluhatong pagsangyaw ug paghimog tinun-an. Kon buhaton nimo kana, mabatonan nimo ang ‘seguradong paglaom hangtod sa kataposan.’​—Heb. 6:11.

18. Unsay atong madahom sa umaabot, ug sa unsang paagi molampos ta sa pag-atubang niana?

¹⁸ Samtang magkaduol ang kataposan niining sistemaha sa mga butang, masinati nato ang dugang mga problema nga makapabalaka kanato. Ang atong tinuig nga teksto sa 2021 makatabang nato sa pag-atubang sa maong mga problema ug sa pagpabiling kalmado, dili pinaagi sa atong kaugalingong kusog, kondili sa atong pagsalig kang Jehova. Niining tuiga, ipakita nato sa atong mga binuhatan nga may pagtuo ta sa saad ni Jehova: “Mahimo mong kusgan kon magpabilin mong kalmado ug mosalig mo.”​—Isa. 30:15.