1-3. Ngano tingaling mohilak ang mga alagad ni Jehova?

 KANUS-A ang kataposang higayon nga mihilak ka? Usahay, mohilak ta tungod sa kalipay. Pero sagad, mohilak ta tungod sa kaguol. Pananglitan, mohilak tingali ta dihang mamatyag minahal. Si Lorilei, sister nga taga-United States, misulat: “Usahay, maguol kaayo ko sa kamatayon sa akong anak nga babaye nga morag wala nay makahupay nako. Nianang mga panahona, morag di na gyod nako maagwanta ang akong kaguol.” *

² Mohilak pod tingali ta tungod sa ubang rason. Si Hiromi, payunir sa Japan, miingon: “Usahay maguol ko kay ang mga tawo dili interesado sa mensahe sa Bibliya. May mga panahon nga maghilak kong mag-ampo kang Jehova nga tabangan kong makakaplag ug tawo nga nangita sa kamatuoran.”

³ Mobati ba ka usahay ug ingon niana? Daghan ang mobatig ingon niana. (1 Ped. 5:9) Gusto natong ‘moalagad kang Jehova uban ang pagsadya,’ pero usahay mohilak ta tungod kay namatyan ta, naluya, o nakasinatig lisod nga kahimtang nga nagsulay sa atong pagkamaunongon sa Diyos. (Sal. 6:6; 100:2) Unsay atong buhaton kon malumsan ta sa maong mga pagbati?

4. Unsay atong hisgotan niining artikuloha?

⁴ Duna tay makat-onan kang Jesus. May mga higayon nga nakasinati sab siyag makapaguol nga mga kahimtang nga tungod niana siya “mihilak.” (Juan 11:35; Luc. 19:41; 22:44; Heb. 5:7) Atong hisgotan ang maong mga hitabo ug tan-awon kon unsay atong makat-onan niana. Susihon sab nato kon unsay atong mahimo dihang makaatubang tag mga situwasyon nga makapahilak nato.

5. Unsay atong makat-onan bahin kang Jesus diha sa Juan 11:32-36?

⁵ Sa tingtugnaw sa 32 C.E., ang suod nga higala ni Jesus nga si Lazaro nasakit ug namatay. (Juan 11:3, 14) Si Lazaro may duha ka igsoon, si Maria ug Marta, ug gimahal pag-ayo ni Jesus kining pamilyaha. Si Maria ug Marta naguol pag-ayo sa pagkamatay sa ilang minahal nga igsoon. Human mamatay si Lazaro, si Jesus mibiyahe paingon sa baryo sa Betania, diin nagpuyo si Maria ug Marta. Dihang nahibaloan ni Marta nga nagsingabot si Jesus, migula dayon siya aron sa pagsugat kaniya. Imadyina ang kaguol nga gibati ni Marta dihang siya miingon: “Ginoo, kon dinhi pa ka, dili unta mamatay ang akong igsoon.” (Juan 11:21) Dayon, dihang nakita ni Jesus si Maria ug ang uban nga nanghilak, siya “mihilak.”—Basaha ang Juan 11:32-36.

6. Nganong mihilak si Jesus?

⁶ Nganong mihilak si Jesus? Ang Pagtugkad sa Kasulatan nag-ingon: “Tungod sa kamatayon sa iyang higala nga si Lazaro ug sa kaguol sa mga igsoong babaye ni Lazaro, si Jesus ‘miagulo ug mihilak.’” * Tingali gihunahuna ni Jesus ang pag-antos sa iyang minahal nga higalang si Lazaro dihang nasakit kini ug ang gibati ni Lazaro dihang naamgohan niya nga hapit na siyang mamatay. Seguradong mihilak sab si Jesus dihang nakita niya nga naapektohan pag-ayo si Maria ug Marta sa kamatayon sa ilang igsoon. Kon namatyan kag suod nga higala o membro sa pamilya, seguradong mibati sab kag ingon niana. Konsideraha ang tulo ka leksiyon nga imong makat-onan niini nga hitabo.

7. Unsay atong makat-onan bahin kang Jehova sa paghilak ni Jesus alang sa iyang mga higala?

⁷ Nakasabot si Jehova sa imong gibati. Si Jesus mao “ang eksaktong larawan” sa iyang Amahan. (Heb. 1:3) Dihang mihilak si Jesus, iyang gipakita ang pagbati sa iyang Amahan. (Juan 14:9) Kon namatyan kag minahal, makaseguro ka nga nakita ug nasabtan ni Jehova  ang kaguol nga imong gibati. Gusto niyang ayohon ang imong dugmok nga kasingkasing.—Sal. 34:18; 147:3.

8. Nganong makaseguro ta nga banhawon ni Jesus ang atong mga minahal?

⁸ Gusto ni Jesus nga banhawon ang imong mga minahal. Sa wala pa mohilak si Jesus, iyang gipasaligan si Marta: “Mabanhaw ang imong igsoon.” Si Marta mituo kang Jesus. (Juan 11:23-27) Ingong matinumanong magsisimba ni Jehova, seguradong nahibalo si Marta sa pagpamanhaw nga gihimo sa mga propetang si Elias ug Eliseo gatosan ka tuig kanhi. (1 Hari 17:17-24; 2 Hari 4:32-37) Ug posibleng nahibaloan niya ang pagpamanhaw nga gihimo ni Jesus. (Luc. 7:11-15; 8:41, 42, 49-56) Sa susama, makaseguro ka nga makita nimo pag-usab ang imong mga minahal nga namatay. Ang paghilak ni Jesus dihang gihupay niya ang iyang naguol nga mga higala nagpamatuod nga gusto gyod niyang banhawon ang mga patay!

9. Sama kang Jesus, sa unsang paagi makatabang ka niadtong namatyag minahal? Paghatag ug pananglitan.

⁹ Makatabang ka niadtong namatyag minahal. Si Jesus wala lang mohilak uban kang Marta ug Maria; siya naminaw ug naghupay sab kanila. Mahimo sab nato kana alang niadtong namatyag minahal. Si Dan, ansiyano nga nagpuyo sa Australia, miingon: “Pagkamatay sa akong asawa, nagkinahanglan kog tabang. Daghang magtiayon ang andam maminaw nako adlaw ug gabii. Pasagdan ko nila nga mapakita ang akong kaguol, ug dili sila maulaw dihang mohilak ko. Tabangan sab ko nila sa mga buluhaton, sama sa paghinlo sa akong sakyanan, pagpamalit, ug pagluto dihang dili ko makahimo niana. Ug pirme silang mag-ampo uban nako. Tinuod gyod silang mga higala ug mga igsoon nga ‘masaligan panahon sa kalisdanan.’”—Prov. 17:17.

10. Unsang hitabo ang girekord sa Lucas 19:36-40?

¹⁰ Si Jesus miadto sa Jerusalem sa Nisan 9, 33 C.E. Samtang nagpaingon siya sa siyudad, ang katawhan nagtapok ug ilang gibuklad ang ilang mga besti diha sa dalan aron dawaton siya ingong ilang Hari. Makapalipay gyod to nga okasyon! (Basaha ang Lucas 19:36-40.) Busa ang iyang mga tinun-an wala tingali magdahom sa sunod nga nahitabo. “Dihang duol na [si Jesus] sa Jerusalem, siya mitan-aw sa siyudad ug mihilak.” Dayon, gitagna ni Jesus ang ngilngig nga panghitabo nga hapit nang masinati sa katawhan sa Jerusalem.—Luc. 19:41-44.

11. Nganong mihilak si Jesus alang sa katawhan sa Jerusalem?

¹¹ Naguol si Jesus kay nahibalo siya nga bisan pa sa mainitong pag-abiabi kaniya, kadaghanan sa mga Hudiyo dili modawat sa mensahe sa Gingharian. Tungod niana, ang Jerusalem malaglag ug ang mga Hudiyo nga wala mamatay mahimong binihag. (Luc. 21:20-24) Makapaguol nga sama sa giingon ni Jesus, kadaghanan sa mga tawo nagsalikway kaniya. Sa inyong lugar, unsay reaksiyon sa kadaghanang tawo sa mensahe sa Gingharian? Kon pipila ra ang midawat sa kamatuoran bisan pa sa imong mga paningkamot sa pagtudlo niana, unsay imong makat-onan sa paghilak ni Jesus? Konsideraha ang tulo pa ka leksiyon.

12. Unsay atong makat-onan bahin kang Jehova sa paghilak ni Jesus alang sa katawhan?

¹² Gimahal ni Jehova ang mga tawo. Ang paghilak ni Jesus nagpahinumdom nato nga gimahal pag-ayo ni Jehova ang mga tawo. “Dili niya gusto nga naay malaglag kondili gusto niya nga ang tanan maghinulsol.” (2 Ped. 3:9) Karon, ikapakita nato nga gimahal nato ang atong isigkatawo pinaagi sa padayong  pagpaningkamot nga matandog ang ilang kasingkasing sa maayong balita.—Mat. 22:39.

13-14. Giunsa pagpakita ni Jesus ang iyang kaluoy sa mga tawo, ug sa unsang paagi maugmad nato ang maong hiyas?

¹³ Si Jesus nagkugi sa ministeryo. Gipakita niya ang iyang gugma sa katawhan pinaagi sa kanunayng pagtudlo kanila. (Luc. 19:47, 48) Unsay nagpalihok niya sa paghimo niana? Si Jesus naluoy kanila. Dihay mga higayon nga daghan kaayo ang gustong maminaw kang Jesus nga siya ug ang iyang mga tinun-an “wala na makakaon.” (Mar. 3:20) Ug dihang may gustong makig-estorya kang Jesus panahon sa kagabhion, andam siyang makigkita niini. (Juan 3:1, 2) Kadaghanan niadtong naminaw kang Jesus wala mahimong iyang mga tinun-an. Pero ang tanan nga nakadungog kaniya nahatagag bug-os nga pamatuod. Karon, gusto natong hatagan ang tanan ug kahigayonan nga makadungog sa maayong balita. (Buh. 10:42) Aron mahimo kana, kinahanglan tingali tang mohimog kausaban sa atong paagi sa pagsangyaw.

¹⁴ Magmaandam sa paghimog mga kausaban. Kon dili nato duawon ang mga tawo sa lainlaing panahon, basin dili nato maabtan kadtong maminaw sa maayong balita. Ang payunir nga si Matilda miingon: “Kami sa akong bana moduaw sa mga tawo sa lainlaing higayon. Sa sayo sa buntag, manangyaw mi sa mga negosyohanan. Sa udto, diin daghan ang naa sa kadalanan, mag-cart witnessing mi. Pagkahapon, mamalaybalay mi kay mas daghan mig maabtang tawo sa ilang balay nianang panahona.” Imbes mosangyaw lang sa panahon nga kombenyente nato, kinahanglang mosangyaw ta sa panahon nga posibleng daghan tag maestorya. Kon ato nang himoon, makaseguro ta nga malipay si Jehova.

15. Sumala sa Lucas 22:39-44, unsay nahitabo sa kataposang gabii una mamatay si Jesus?

¹⁵ Sa lawom nang gabii sa Nisan 14, 33 C.E., si Jesus miadto sa tanaman sa Getsemane. Didto, gibubo niya ang iyang kasingkasing kang Jehova. (Basaha ang Lucas 22:39-44.)  Niadtong lisod nga panahon, si Jesus “nangamuyo . . . sa kusog nga tingog nga inubanag mga luha.” (Heb. 5:7) Unsay giampo ni Jesus sa kataposang gabii una siya mamatay? Nangayo siyag kusog sa pagpabiling maunongon kang Jehova ug sa pagbuhat sa Iyang kabubut-on. Gidungog ni Jehova ang kinasingkasing nga pag-ampo sa iyang Anak ug nagpadala siyag anghel sa pagpalig-on kaniya.

16. Nganong naguol kaayo si Jesus samtang nag-ampo didto sa tanaman sa Getsemane?

¹⁶ Seguradong mihilak si Jesus samtang nag-ampo didto sa tanaman sa Getsemane kay naguol kaayo siya sa paghunahuna nga isipon siya sa mga tawo ingong tigpasipala. Nahibalo sab siya kon unsa ka bug-at ang iyang responsibilidad—ang pagbindikar sa ngalan sa iyang Amahan. Kon nag-atubang kag lisod nga situwasyon nga nagsulay sa imong pagkamaunongon kang Jehova, unsay imong makat-onan sa paghilak ni Jesus? Konsideraha ang tulo pa ka leksiyon.

17. Unsay atong makat-onan bahin kang Jehova sa iyang tubag sa kinasingkasing nga mga pag-ampo ni Jesus?

¹⁷ Si Jehova maminaw sa imong mga pangamuyo. Siya naminaw sa kinasingkasing nga mga hangyo ni Jesus. Ngano? Tungod kay ang pangunang tumong ni Jesus mao ang pagpabiling maunongon sa iyang Amahan ug ang pagbindikar sa Iyang ngalan. Kon ang atong pangunang tumong mao ang pagpabiling maunongon kang Jehova ug pagbindikar sa iyang ngalan, iyang tubagon ang atong mga pag-ampo alang sa tabang.—Sal. 145:18, 19.

18. Sa unsang mga paagi nga si Jesus samag buotan ug masinabtanon nga higala?

¹⁸ Si Jesus makasabot sa imong gibati. Kon maguol ta, malipay ta dihang hupayon ta sa usa ka higala nga nakasabot sa atong gibati, ilabina kadtong nakaatubang ug kalisdanan nga susama sa atoa. Ingon niana nga higala si Jesus. Nahibalo siya kon unsay bation sa usa dihang maluya ug magkinahanglag tabang. Nakasabot siya sa atong kahuyangan, ug paneguroon niya nga madawat nato ang tabang ‘dihang gikinahanglan’ nato kini. (Heb. 4:15, 16) Sama nga gidawat ni Jesus ang tabang sa anghel didto sa tanaman sa Getsemane, kinahanglan nga andam sab tang modawat sa tabang nga itagana ni Jehova, pinaagi man sa publikasyon,  video, pakigpulong, o makapadasig nga pagbisita gikan sa usa ka ansiyano o hamtong nga higala.

19. Sa unsang paagi mapalig-on ka dihang mag-atubag lisod nga situwasyon nga magsulay sa imong pagkamaunongon sa Diyos? Paghatag ug pananglitan.

¹⁹ Si Jehova maghatag nimog “kalinaw nga gikan sa Diyos.” Sa unsang paagi si Jehova magpalig-on kanato? Dihang moampo ta, madawat nato “ang kalinaw nga gikan sa Diyos, nga labaw sa tanang pagsabot.” (Filip. 4:6, 7) Ang kalinaw nga gikan kang Jehova makahatag natog kalmadong kasingkasing ug makatabang nato nga makahunahunag tarong. Mao nay naeksperyensiyahan sa sister nga si Luz. Siya miingon: “Pirme kong maguol. Tungod ani, mobati ko usahay nga wala ko higugmaa ni Jehova. Pero dihang mahitabo nâ, isulti dayon nako kang Jehova ang akong gibati. Ang pag-ampo nakatabang nga moarang-arang ang akong pagbati.” Sama kang Luz, mabatonan nato ang kalinaw pinaagi sa pag-ampo.

20. Unsang mga leksiyon ang atong nakat-onan sa paghilak ni Jesus?

²⁰ Makapahupay ug praktikal gyod ang mga leksiyon nga atong nakat-onan sa paghilak ni Jesus! Napahinumdoman ta nga angay natong tabangan ang atong mga higala nga namatyag minahal ug mosalig nga tabangan ta ni Jehova ug Jesus dihang mamatyan ta. Nadasig ta nga mosangyaw ug manudlo nga may kaluoy tungod kay si Jehova nga Diyos ug si Jesu-Kristo nagpakita niining nindot nga hiyas. Ug nahupayan ta sa pagkahibalo nga si Jehova ug ang iyang minahal nga Anak nakasabot sa atong gibati ug sa atong mga kahuyangan, ug gusto nilang motabang nato sa paglahutay. Hinaot padayon natong ipadapat ang atong nakat-onan hangtod moabot ang panahon nga tumanon na ni Jehova ang nindot kaayo niyang saad nga iyang “pahiran ang matag luha sa [atong] mga mata”!—Pin. 21:4.