1. Sa unsang paagi makagahin tag panahon uban kang Jehova?

 GANAHAN tang makig-uban sa mga tawo nga atong gimahal. Ang malipayong magtiayon ganahang mogahin ug panahon sa usag usa. Ang mga batan-on ganahang makig-uban sa ilang suod nga mga higala. Ug kitang tanan malipayng makig-uban sa mga igsoon sa kongregasyon. Pero labaw sa tanan, ganahan tang mogahin ug panahon uban sa atong Diyos. Mahimo nato kana pinaagi sa pag-ampo kaniya, pagbasa sa iyang Pulong, ug pagpamalandong sa iyang katuyoan ug nindot nga mga hiyas. Bililhon gyod kaayo ang atong panahon uban kang Jehova!—Sal. 139:17.

2. Nganong malisdan ta usahay sa paggahin ug panahon uban kang Jehova?

² Bisag ganahan tang mogahin ug panahon uban kang Jehova, dili ni kanunayng sayon. Busy kaayo ta, maong malisdan tingali ta sa pag-eskedyul ug panahon para sa espirituwal nga mga kalihokan. Ang trabaho, mga responsibilidad sa pamilya, ug ubang importanteng mga kalihokan dakog makuha sa atong panahon maong usahay mobati ta nga tungod sa atong ka-busy, wala na tay panahon sa pag-ampo, pagtuon, o pagpamalandong.

3. Unsay laing makahurot sa atong panahon?

³ Naa pay laing butang nga makahurot sa atong panahon. Kon dili ta mag-amping, basin ma-busy na ta sa mga kalihokan nga dili ra sayop pero makakuha sa panahon nga angay unta natong gamiton sa pagpakigsuod kang Jehova. Tagda pananglitan ang paglingawlingaw. Makahatag natog kaayohan ang pagrelaks usahay. Pero bisan ang maayong kalingawan puwedeng makahurot  sa atong panahon, nga gamay na lay mabilin para sa espirituwal nga mga kalihokan. Angay natong hinumdoman nga ang paglingawlingaw dili mao ang pinakaimportante.—Prov. 25:27; 1 Tim. 4:8.

4. Unsay atong hisgotan niining artikuloha?

⁴ Niining artikuloha, atong hisgotan kon nganong kinahanglan tang magtakdag hustong mga prayoridad. Hisgotan sab nato kon unsay himoon aron magamit sa kinamaayohang paagi ang atong panahon uban kang Jehova ug kon unsay mga kaayohan sa maalamong paggamit sa atong panahon.

5. Sa unsang paagi ang tambag sa Efeso 5:15-17 makatabang sa usa ka batan-on sa pagpili sa kinamaayohang paagi sa pagkinabuhi?

⁵ Pilia ang kinamaayohang paagi sa pagkinabuhi. Ang mga batan-on sagad maghunahuna kon unsa ang kinamaayohang paagi sa pagkinabuhi. Ang mga guidance counselor sa eskuwelahan ug dili Saksing mga membro sa pamilya magdasig tingali nila nga moeskuwela sa unibersidad aron makakuhag trabaho nga dakog suweldo. Kanang klaseha sa edukasyon posibleng makahurot sa ilang panahon. Sa laing bahin, ang Saksing mga ginikanan ug ang mga igsoon sa kongregasyon magdasig tingali sa mga batan-on nga gamiton ang ilang kinabuhi sa pag-alagad kang Jehova. Unsay makatabang sa usa ka batan-on nga nahigugma kang Jehova sa paghimog kinamaayohang desisyon? Makabenepisyo siya sa pagbasa sa Efeso 5:15-17 ug pagpamalandong niana. (Basaha.) Human mabasa kining tekstoha, ang batan-on puwedeng mangutana sa iyang kaugalingon: ‘Unsa “ang kabubut-on ni Jehova”? Unsang desisyon ang makapalipay niya? Unsang desisyon ang makatabang nako nga magamit sa kinamaayohang paagi ang akong panahon?’ Hinumdomi nga nagkinabuhi ta sa “daotang mga adlaw,” ug kining sistemaha nga gimandoan ni Satanas hapit nang taposon. Maalamon nga gamiton nato ang atong kinabuhi sa paagi nga makapasuod nato kang Jehova.

6. Unsay gipili ni Maria, ug nganong maalamon to nga desisyon?

⁶ Pagtakdag hustong mga prayoridad. Aron magamit nato ang atong panahon sa kinamaayohang paagi, kinahanglan tingali tang modesisyon tali sa duha ka butang nga dili sayop. Makita nato ni sa nahitabo dihang mibisita si Jesus sa balay ni Maria ug Marta. Seguradong eksayted kaayo si Marta nga abiabihon si Jesus, maong nag-andam siyag daghang pagkaon. Pero si Maria milingkod sa tiilan ni Jesus ug naminaw sa iyang gitudlo. Dili ra sayop ang gihimo ni Marta, pero “gipili ni Maria ang kinamaayohang bahin.” (Luc. 10:38-42, footnote) Ngadtongadto, wala na tingali mahinumdom si Maria kon unsang mga pagkaon ang gidalit niadtong panahona, pero makaseguro ta nga wala gyod siya malimot sa gitudlo ni Jesus. Sama nga gipabilhan ni Maria ang panahon nga makauban si Jesus, pabilhan sab nato ang atong panahon uban kang Jehova. Unsay atong himoon aron magamit sa kinamaayohang paagi ang atong panahon uban kang Jehova?

7. Nganong angay natong gahinag panahon ang pag-ampo, pagtuon, ug pagpamalandong?

⁷ Ilha nga ang pag-ampo, pagtuon, ug pagpamalandong maoy bahin sa atong pagsimba. Dihang moampo ta, nakig-estorya ta sa atong langitnong Amahan, kinsa nahigugma pag-ayo kanato. (Sal. 5:7) Dihang magtuon ta sa Bibliya, nagkuha tag “kahibalo [bahin] sa Diyos,” ang Tinubdan sa tanang kaalam. (Prov. 2:1-5) Dihang mamalandong ta, atong gihunahuna pag-ayo ang nindot nga mga hiyas ni Jehova  ug ang makapahinganghang mga butang nga iyang himoon para nato ug sa tanang katawhan. Mao gyod ni ang kinamaayohang paagi sa paggamit sa atong panahon. Pero unsay atong mahimo aron mapahimuslan nato ang panahon nga atong gigahin para niana?

8. Unsay atong makat-onan sa paggahin ni Jesus ug panahon didto sa kamingawan?

⁸ Kon posible, pangitag hilom nga lugar. Konsideraha ang ehemplo ni Jesus. Sa wala pa niya sugdi ang iyang ministeryo dinhi sa yuta, migahin una siyag 40 ka adlaw didto sa kamingawan. (Luc. 4:1, 2) Nianang hilom nga lugar, si Jesus nag-ampo kang Jehova ug namalandong sa kabubut-on sa iyang Amahan para niya. Nakatabang nâ nga maandam si Jesus sa mga pagsulay nga hapit na niyang atubangon. Unsay imong makat-onan kang Jesus? Kon dako ang inyong pamilya, malisdan tingali ka usahay sa pagpangitag hilom nga lugar sa inyong balay. Kon mao, puwede kang mangitag hilom nga lugar sa gawas. Mao nay ginahimo ni Julie dihang gusto niyang mogahin ug panahon sa pag-ampo kang Jehova. Siya ug ang iyang bana nagpuyo sa usa ka gamayng apartment sa France, ug lisod ang pagpangitag lugar nga puwede siyang mag-inusara ug walay makabalda niya. “Busa moadto ko sa parke kada adlaw,” miingon si Julie. “Didto, puwede kong mag-inusara, walay makabalda nako, ug makaampo gyod ko kang Jehova.”

9. Bisan pa sa iyang busy nga eskedyul, giunsa pagpakita ni Jesus nga importante kaniya ang iyang relasyon kang Jehova?

⁹ Si Jesus busy kaayog kinabuhi. Panahon sa iyang ministeryo sa yuta, ang mga tawo magsigeg sunodsunod niya, ug gusto nilang tanan nga makauban siya. Dihay higayon nga “ang tanan sa siyudad nagtapok diha sa pultahan” aron makita siya. Bisan pa niana, giseguro ni Jesus nga makagahin siyag panahon uban kang Jehova. Sayo pa sa buntag, siya miadto sa “mingaw nga dapit” aron mag-ampo sa iyang Amahan.—Mar. 1:32-35.

10-11. Sumala sa Mateo 26:40, 41, unsang importante kaayong tambag ang gihatag ni Jesus sa iyang mga tinun-an sa tanaman sa Getsemane, pero unsay nahitabo?

¹⁰ Sa kataposang gabii ni Jesus sa yuta, dihang natapos na ang iyang ministeryo, nangita na pod siyag hilom nga lugar aron mamalandong ug mag-ampo. Ingon ana ang kahimtang sa tanaman sa Getsemane. (Mat. 26:36) Nianang higayona, gihatagan ni Jesus ang iyang mga tinun-an ug importante kaayong tambag bahin sa pag-ampo.

¹¹ Tagda kon unsay nahitabo. Pag-abot nila sa tanaman sa Getsemane, gabii na kaayo, tingali lapas na sa tungang gabii. Giingnan ni Jesus ang mga apostoles nga ‘magpadayon sa pagbantay,’ ug siya milakaw aron mag-ampo. (Mat. 26:37-39) Pero samtang nag-ampo si Jesus, sila nakatulog. Dihang nakita niya sila nga nangatulog, giawhag na pod niya sila nga ‘magpadayon  sa pagbantay ug sa pag-ampo.’ (Basaha ang Mateo 26:40, 41.) Siya nahibalo nga sila na-stress ug gikapoy pag-ayo, ug mabination niyang giila nga “luya ang unod.” Bisan pa niana, duha pa ka higayon nga si Jesus milakaw aron mag-ampo, ug pagbalik niya, naabtan niya ang iyang mga tinun-an nga nangatulog pag-usab imbes mag-ampo.—Mat. 26:42-45.

12. Unsay atong mahimo kon usahay mobati ta nga dili ta makaampo tungod sa grabeng stress o kakapoy?

¹² Pilia ang hustong panahon. Usahay, mobati tingali ta nga dili ta makaampo tungod sa grabeng stress o kakapoy. Kon nahitabo nâ kanimo, wala ka mag-inusara. Unsay imong mahimo? Ang pipila naanad nga mag-ampo kang Jehova human sa tibuok adlawng buluhaton. Nakita nila nga mas maayong mag-ampo sa sayong kagabhion dihang dili kaayo sila kapoy. Nakita pod sa uban nga dunay epekto ang ilang posisyon dihang mag-ampo. Pero komosta kon nabalaka o naguol kaayo ka ug tungod niana dili na ka makaampo? Isulti kang Jehova ang imong gibati. Makaseguro ka nga makasabot ang atong maluluy-ong Amahan.—Sal. 139:4.

13. Sa unsang paagi ang mga gadyet makabalda tingali sa atong panahon uban kang Jehova?

¹³ Ayaw pagpabalda dihang magtuon ka. Ang pag-ampo dili lang maoy paagi nga mapalig-on ang atong relasyon kang Jehova. Ang pagtuon sa Pulong sa Diyos ug pagtambong sa mga tigom makatabang sab nato nga mas masuod sa Diyos. Duna ba kay mahimo aron mapahimuslan pag-ayo ang panahon nga imong gigahin sa pagtuon ug sa pagtambong sa mga tigom? Pangutan-a ang kaugalingon, ‘Unsay sagad makabalda nako panahon sa tigom o dihang magtuon ko?’ Ang mga tawag ba, email, o text message diha sa imong cellphone o sa ubang gadyet? Karon, daghan ang duna niining mapuslanong mga gamit. Ang pipila ka researcher miingon nga dihang maningkamot ta nga magpokus, mahimong mabalda ta kon naa ra sa duol ang cellphone. “Dili ka makapokus sa imong gibuhat,” miingon ang usa ka propesor sa psychology. “Ang imong hunahuna naglatagaw.” Sa dili pa magsugod ang mga asembliya ug kombensiyon, sagad pahinumdoman ta nga i-adjust ang atong mga gadyet sa setting nga dili makadisturbo sa uban. Mahimo ba sab nato nâ dihang mag-inusara ta aron ang atong mga gadyet dili makadisturbo nato ug sa atong panahon uban kang Jehova?

14. Sumala sa Filipos 4:6, 7, sa unsang paagi tabangan ka ni Jehova nga makapokus?

¹⁴ Hangyoa si Jehova nga tabangan ka nga  makapokus. Kon mamatikdan nimo nga naglatagaw ang imong hunahuna panahon sa tigom o sa imong pagtuon, hangyoa si Jehova nga tabangan ka. Kon duna kay gikabalak-an, dili tingali sayon nga kalimtan kana ug magpokus sa espirituwal nga mga butang, pero importante kaayo nga buhaton nimo kana. Hangyoa si Jehova nga hatagan kag kalinaw nga magbantay dili lang sa imong kasingkasing kondili sa imo pong “hunahuna.”—Basaha ang Filipos 4:6, 7.

15. Unsa ang usa ka benepisyo sa paggahin ug panahon uban kang Jehova?

¹⁵ Kon mogahin kag panahon sa pagpakig-estorya, pagpaminaw, ug paghunahuna bahin kang Jehova, makabenepisyo ka pag-ayo. Sa unsang paagi? Una, makahimo kag mas maayong mga desisyon. Ang Bibliya nagpasalig nato nga “ang naglakaw uban sa mga maalamon mahimong maalamon.” (Prov. 13:20) Busa kon mogahin kag panahon uban sa Tinubdan sa kaalam, si Jehova, mahimo kang mas maalamon. Mas masabtan nimo kon sa unsang paagi mapalipay nimo siya ug malikayan ang paghimog mga desisyon nga makapasakit kaniya.

16. Sa unsang paagi ang paggahin ug panahon uban kang Jehova makapauswag sa imong pagpanudlo?

¹⁶ Ikaduha, mahimo kang mas maayong magtutudlo. Dihang magdumalag pagtuon sa Bibliya, ang usa sa atong pinakaimportanteng mga tumong mao ang pagtabang sa atong study nga masuod kang Jehova. Kon kanunay tang makigkomunikar sa atong langitnong Amahan, mas molalom ang atong gugma kaniya ug mahimo tang mas epektibo sa pagtudlo sa atong study nga mahigugma kaniya. Hunahunaa ang ehemplo ni Jesus. Gipaila niya ang iyang Amahan sa makapadasig ug mahigugmaong paagi mao nga ang iyang matinumanong mga sumusunod nakakat-on sab sa paghigugma kang Jehova.—Juan 17:25, 26.

17. Nganong ang pag-ampo ug pagtuon makapalig-on sa atong pagtuo?

¹⁷ Ikatulo, mas molig-on ang imong pagtuo. Konsideraha kon unsay mahitabo dihang mangayo ka sa Diyos ug giya, paghupay, o tabang. Matag higayon nga tubagon ni Jehova ang maong mga pag-ampo, mas molig-on ang imong pagtuo kaniya. (1 Juan 5:15) Unsa pay makapalig-on sa imong pagtuo? Ang personal nga pagtuon. Hinumdomi nga “ang usa ka tawo motuo lang human siya makadungog sa pulong.” (Roma 10:17) Pero aron molig-on ang pagtuo, labaw pa ang gikinahanglan kay sa pagkuha lang ug kahibalo. Unsa pay kinahanglan natong buhaton?

18. Nganong kinahanglan tang mamalandong?

¹⁸ Kinahanglan tang mamalandong sa atong  nakat-onan. Konsideraha ang eksperyensiya sa magsusulat sa Salmo 77. Naguol siya kay gibati niya nga siya ug ang iyang mga isigka-Israelinhon nawad-an sa pag-uyon ni Jehova. Nabalaka kaayo siya maong dili na siya makatulog. (Bersikulo 2-8) Unsay iyang gibuhat? Iyang giingnan si Jehova: “Akong pamalandongon ang tanan nimong kalihokan ug hunahunaon pag-ayo ang imong mga pakiglabot.” (Bersikulo 12) Siyempre, nahibalo pag-ayo ang salmista sa mga butang nga gihimo ni Jehova para sa Iyang katawhan kaniadto, pero naghunahuna gihapon siya: “Nakalimot na ba ang Diyos sa pagpakitag pag-uyon, o nawala na ba ang iyang kaluoy tungod sa iyang kasuko?” (Bersikulo 9) Gipamalandong sa salmista ang mga kalihokan ni Jehova ug ang iyang pagpakitag kaluoy kaniadto. (Bersikulo 11) Unsay resulta? Ang salmista nakombinsir nga dili biyaan ni Jehova ang Iyang katawhan. (Bersikulo 15) Sa susama, ang imong pagtuo mas molig-on kon pamalandongon nimo ang mga butang nga gibuhat ni Jehova alang sa iyang katawhan ug alang kanimo.

19. Unsa pay benepisyo sa paggahin ug panahon uban kang Jehova?

¹⁹ Ikaupat, ug ang labing importante, mas molalom ang imong gugma kang Jehova. Labaw kay sa bisan unsang hiyas, ang gugma magpalihok nimo sa pagtuman kang Jehova, paghimog mga sakripisyo aron mapalipay siya, ug sa paglahutay sa bisan unsang mga kalisdanan. (Mat. 22:37-39; 1 Cor. 13:4, 7; 1 Juan 5:3) Wala nay mas bililhon pa kay sa suod, mahigugmaong relasyon uban kang Jehova!—Sal. 63:1-8.

20. Unsay imong buhaton aron maseguro nga duna kay panahon uban kang Jehova?

²⁰ Hinumdomi nga ang pag-ampo, pagtuon, ug pagpamalandong maoy bahin sa atong pagsimba. Sama kang Jesus, pangitag hilom nga mga lugar ug higayon nga makauban si Jehova. Ayaw pagpabalda. Hangyoa si Jehova nga tabangan kang makapokus dihang makigbahin ka sa espirituwal nga mga kalihokan. Kon gamiton nimo ang imong panahon karon sa kinamaayohang paagi, panalanginan ka ni Jehova ug walay kataposang kinabuhi sa bag-ong kalibotan.—Mar. 4:24.