1. Unsang lisod nga situwasyon ang nasinati ni David?

 SI David nagtagotago kay gusto siyang patyon ni Saul, ang gamhanang hari sa Israel. Dihang si David nagkinahanglag pagkaon, mihapit siya sa siyudad sa Nob, diin nangayo siyag lima lang ka tinapay. (1 Sam. 21:1, 3) Sa ulahi, siya ug ang iyang mga sundalo nanago sa usa ka langob. (1 Sam. 22:1) Nganong nahitabo man ni kang David?

2. Sa unsang paagi gipameligro ni Saul ang iyang kaugalingon? (1 Samuel 23:16, 17)

² Si Saul nasina pag-ayo kang David kay daghan ang ganahan kang David ug daghang gubat ang iyang nadaog. Nahibalo sab si Saul nga gisalikway siya ni Jehova ingong hari sa Israel tungod sa iyang pagkamasinupakon ug nga gipili ni Jehova si David nga mopuli niya. (Basaha ang 1 Samuel 23:16, 17.) Pero kay si Saul pa man gihapon ang hari sa Israel, duna siyay daghang kasundalohan ug mga tigsuportar, busa kinahanglang moikyas si David. Naghunahuna kaha si Saul nga mapugngan niya ang Diyos sa paghimo kang David nga hari? (Isa. 55:11) Walay giingon ang Bibliya, pero makaseguro ta niini: Gipameligro ni Saul ang iyang kaugalingon. Kadtong makig-away sa Diyos mapildi gyod!

3. Unsay gibati ni David bisan pa sa iyang lisod nga kahimtang?

³ Si David dili ambisyoso. Dili siya ang midesisyon nga mahimong hari sa Israel. Si Jehova ang nagpili niya. (1 Sam. 16:1, 12, 13) Si Saul nag-isip kang David ingong mortal nga kaaway. Pero wala basola ni David si Jehova sa kapeligrohan nga iyang nasinati; wala pod siya moreklamo nga gamay ra siyag  pagkaon ug nagtagotago na lang sa langob. Hinunoa, posible nga samtang nagtagotago siya sa maong langob nga gikomposo niya ang nindot nga awit sa pagdayeg nga naglakip sa mga pulong sa atong temang teksto: “Kadtong nagapangita kang Jehova dili makulangan ug maayong mga butang.”—Sal. 34:10.

4. Unsang mga pangutana ang atong hisgotan, ug nganong importante kini?

⁴ Usahay, daghan sa mga alagad ni Jehova karon ang walay igong pagkaon ug ubang mga panginahanglan. * Ilabinang tinuod ni panahon sa nahitabong pandemic. Ug mosamot kalisod ang kahimtang samtang magkaduol ta sa “dakong kasakitan.” (Mat. 24:21) Busa, maayong hisgotan nato kining upat ka pangutana: Sa unsang diwa nga si David ‘wala makulangi ug maayong mga butang’? Nganong angay tang magmakontento? Nganong makasalig ta nga si Jehova mag-atiman kanato? Ug sa unsang paagi makapangandam ta karon para sa umaabot?

5-6. Sa unsang paagi ang Salmo 23:1-6 makatabang nato nga masabtan kon unsay gipasabot ni David dihang miingon siya nga ang mga alagad ni Jehova “dili makulangan ug maayong mga butang”?

⁵ Unsay gipasabot ni David dihang siya miingon nga ang mga alagad ni Jehova “dili makulangan ug maayong mga butang”? Makakuha tag ideya pinaagi sa pagkonsiderar sa susamang pamulong nga naa sa ika-23 nga Salmo. (Basaha ang Salmo 23:1-6.) Gisugdan ni David ang maong salmo pinaagi sa pag-ingon: “Si Jehova ang akong Magbalantay. Walay makulang kanako.” Sa sunod nga mga bersikulo niana nga salmo, gihisgotan ni David ang mga butang nga importante kaayo—ang abundang espirituwal nga mga panalangin nga iyang natagamtam kay gidawat niya si Jehova ingong iyang Magbalantay. Si Jehova nagtultol kaniya “sa mga dalan sa pagkamatarong,” ug Siya maunongong nagsuportar kang David sa maayo ug dili maayong mga panahon. Nahibalo si David nga ang iyang kinabuhi diha sa “lunhaw nga mga sibsibanan” ni Jehova wala magpasabot nga dili siya makaatubang  ug mga problema. Usahay, madismayar tingali siya nga mora bag naglakaw siya “sa ngiob kaayo nga walog,” ug dunay makig-away kaniya. Pero kay si Jehova ang iyang Magbalantay, si David ‘dili mahadlok.’

⁶ Busa matubag na ang pangutanang, Sa unsang diwa nga si David ‘wala makulangi ug maayong mga butang’? Sa espirituwal nga diwa, nabatonan niya ang tanan niyang gikinahanglan. Ang iyang kalipay wala magdepende sa materyal nga mga butang. Kontento si David sa gitagana ni Jehova. Ang importante kaniya mao ang panalangin ug proteksiyon gikan sa iyang Diyos.

7. Sumala sa Lucas 21:20-24, unsang lisod nga kahimtang ang giatubang sa mga Kristohanon sa unang siglo nga nagpuyo sa Judea?

⁷ Sa mga pulong ni David, makita nato nga importante kaayo nga duna tay hustong panglantaw sa materyal nga mga butang. Siyempre, puwede natong kalipayan ang bisan unsang materyal nga mga butang nga atong nabatonan, pero dili nato nâ himoong pinakaimportante sa atong kinabuhi. Kana ang hinungdanong kamatuoran nga nasabtan sa mga Kristohanon sa unang siglo nga nagpuyo sa Judea. (Basaha ang Lucas 21:20-24.) Gipasidan-an sila ni Jesus nga moabot ang panahon nga ang siyudad sa Jerusalem ‘libotan sa nagkampong kasundalohan.’ Dihang mahitabo kana, kinahanglan silang “moikyas ngadto sa kabukiran.” Kon moikyas sila, maluwas ang ilang kinabuhi. Pero daghan silag kinahanglang biyaan. Pipila ka tuig kanhi, ang Bantayanang Torre nag-ingon: “Gibiyaan nila ang mga umahan ug kabalayan, nga wala gani magkuha sa ilang mga kabtangan gikan sa ilang kabalayan. Masaligon sa panalipod ug pagpaluyo ni Jehova, ilang giuna ang pagsimba kaniya kay sa laing mga butang nga morag hinungdanon tingali.”

8. Unsang importanteng leksiyon ang atong makat-onan sa nahitabo sa mga Kristohanon sa unang siglo nga nagpuyo sa Judea?

⁸ Unsang importanteng leksiyon ang atong makat-onan sa nahitabo sa mga Kristohanon sa unang siglo nga nagpuyo sa Judea? Ang mao ra gihapon nga Bantayanang Torre nag-ingon: “Mahimong dunay mga pagsulay sa unahan bahin sa kon unsaon nato paglantaw ang materyal nga mga butang; kini ba ang labing hinungdanong butang, o ang kaluwasan nga modangat sa tanan nga dapig sa Diyos mao ang labi pang hinungdanon? Oo, ang atong pagkalagiw maglangkit tingali ug pipila ka kalisdanan ug mga [sakripisyo]. Magmaandam kita sa pagbuhat sa bisan unsa nga gikinahanglan, sama sa . . . unang-siglong mga [Kristohanon nga] mikalagiw gikan sa Judea.” *

9. Sa unsang paagi nadasig ka sa tambag ni apostol Pablo sa mga Hebreohanon?

⁹ Maimadyin ba nimo kon unsa ka lisod para sa maong mga Kristohanon nga biyaan ang halos tanan nilang nabatonan ug magsugod ug bag-ong kinabuhi? Nagkinahanglan silag pagtuo nga itagana ni Jehova ang ilang pangunang mga panginahanglan. Pero dihay nakatabang nila. Lima ka tuig una likosi sa mga Romano ang Jerusalem, gihatagan ni apostol Pablo ang mga Hebreohanon ug maayong tambag: “Ayaw ninyog higugmaa ang kuwarta, hinuon magmakontento mo kon unsay naa ninyo. Kay siya nag-ingon: ‘Dili gyod ka nako biyaan, ug dili gyod ka nako talikdan.’ Busa dili ta mahadlok, hinuon moingon ta: ‘Si Jehova ang akong magtatabang; dili ko mahadlok. Unsay mabuhat sa tawo kanako?’” (Heb. 13:5, 6) Walay duhaduha nga kadtong nagpadapat sa tambag ni Pablo sa wala pa mosulong ang mga Romano mas daling naka-adjust sa simpleng kinabuhi sa ilang bag-ong puy-anan. Segurado  sila nga itagana ni Jehova ang ilang pangunang mga panginahanglan. Ang giingon ni Pablo nagpasalig kanato nga itagana sab ni Jehova ang atong mga panginahanglan.

10. Unsang “sekreto” ang gisulti ni Pablo kanato?

¹⁰ Si Pablo naghatag ug susamang tambag kang Timoteo nga mapadapat sab kanato. Siya misulat: “Busa kon duna tay makaon ug masul-ob, kita magmakontento na niini.” (1 Tim. 6:8) Nagpasabot ba ni nga di ta puwedeng mokaon ug lami nga pagkaon, mopuyo sa nindot nga balay, o mopalit ug bag-ong sinina matag karon ug unya? Dili kanay punto ni Pablo. Ang gipasabot ni Pablo mao nga angay tang magmakontento sa materyal nga mga butang nga atong nabatonan. (Filip. 4:12) Kanay “sekreto” ni Pablo. Ang pinakaimportante nato mao ang atong relasyon sa atong Diyos, dili ang bisan unsang materyal nga butang nga atong gipanag-iya.—Hab. 3:17, 18.

11. Unsay atong makat-onan bahin sa pagkakontento diha sa giingon ni Moises ngadto sa mga Israelinhon?

¹¹ Ang atong gihunahuna nga mga panginahanglan lahi tingali sa gihunahuna ni Jehova. Konsideraha kon unsay gisulti ni Moises sa mga Israelinhon human sa ilang 40 ka tuig nga paglibotlibot sa kamingawan: “Gipanalanginan mo ni Jehova nga inyong Diyos sa tanan ninyong gibuhat. Nahibalo siya pag-ayo sa inyong paglakaw niining dako nga kamingawan. Sulod sa 40 ka tuig, giubanan mo ni Jehova nga inyong Diyos ug walay butang nga nakulang ninyo.” (Deut. 2:7) Nianang 40 ka tuig, gitagana ni Jehova ang mana ingong pagkaon sa mga  Israelinhon. Ang ilang mga sinina—ang mismong mga sinina nga ilang dala pagbiya nila sa Ehipto—wala gyod madunot. (Deut. 8:3, 4) Bisag ang pipila naghunahuna nga dili pa to igo, gipahinumdoman ni Moises ang mga Israelinhon nga nabatonan nila ang tanan nilang gikinahanglan. Si Jehova malipay kon kita magmakontento—kon apresyahon nato bisan ang simple niyang mga tagana, nga mag-isip niana ingong panalangin ug magpasalamat kaniya.

12. Unsay nagpakita nga si David misalig kang Jehova, dili sa iyang kaugalingon?

¹² Si David nahibalo nga si Jehova maunongon ug nahigugma pag-ayo niadtong mga nagmahal Kaniya. Bisag nameligro ang iyang kinabuhi dihang gikomposo niya ang ika-34 nga Salmo, lig-on kaayo ang iyang pagtuo maong segurado siya nga ang “anghel ni Jehova” nagkampo “libot” kaniya. (Sal. 34:7) Tingali, gitandi ni David ang anghel ni Jehova sa usa ka sundalo nga nagkampo diha sa kapatagan, nga kanunayng nagbantay enkasog dunay moabot nga kaaway. Bisag si David banggiitang manggugubat ug gisaaran siya ni Jehova nga mahimong hari, wala siya mosalig sa iyang kaugalingong abilidad sa paggamit ug lambuyog o espada aron mapildi ang kaaway. (1 Sam. 16:13; 24:12) Masaligon si David nga ipadala ni Jehova ang Iyang anghel sa ‘pagluwas niadtong mga nahadlok Kaniya.’ Siyempre, dili ta magdahom nga protektahan ta ni Jehova sa milagrosong paagi. Pero nahibalo ta nga kadtong mosalig kang Jehova dili gyod makaagom ug permanenteng kadaot.

13. Dihang moatake ang Gog sa Magog, nganong maghunahuna sila nga dali ra tang pildihon, pero sa unsa ta makasalig? (Tan-awa ang hulagway sa atubangan sa magasin.)

¹³ Sa dili madugay, masulayan ang atong pagsalig sa katakos ni Jehova sa pagpanalipod kanato. Dihang ang Gog sa Magog, ang alyansa sa kanasoran, moatake sa katawhan sa Diyos, daw mameligro ang atong kinabuhi. Kinahanglang kombinsido ta nga si Jehova makaluwas kanato ug nga luwason gyod ta niya. Ang kanasoran maghunahuna tingali nga sama tag makaluluoyng mga karnero nga walay tigpanalipod. (Ezeq. 38:10-12) Wala tay armas ug wala ta mabansay sa pagpakiggubat. Maghunahuna ang kanasoran nga dali ra tang pildihon. Dili nila makita ang atong makita pinaagi sa atong mata sa pagtuo—ang daghan kaayong anghel nga nagkampo libot sa katawhan sa Diyos nga andam sa pagdepensa kanato. Siyempre, ang kanasoran dili makakita kanila kay wala silay pagtuo sa Diyos. Makurat gyod sila dihang ang langitnong kasundalohan makig-away para kanato!—Pin. 19:11, 14, 15.

14. Unsay atong mahimo karon aron makapangandam ta para sa umaabot?

¹⁴ Unsay atong mahimo karon aron makapangandam ta para sa umaabot? Una, kinahanglang duna tay hustong panglantaw sa materyal nga mga butang kay moabot gyod ang panahon nga kinahanglan nato ning biyaan. Angay pod tang magmakontento ug kalipayan nato pag-ayo ang atong relasyon kang Jehova. Kon mas mailhan nato ang atong Diyos, mas makombinsir ta sa iyang katakos sa pagpanalipod kanato dihang moatake na ang Gog sa Magog.

15. Sa batan-on pa si David, unsang mga eksperyensiya ang nagtudlo niya nga dili gyod siya pakyason ni Jehova?

¹⁵ Konsideraha kon unsa pay nakatabang kang David nga makatabang pod nato nga makapangandam sa mga pagsulay. Si David miingon: “Tilawi ug tan-awa nga si Jehova maayo; malipayon ang tawo nga modangop kaniya.” (Sal. 34:8) Ang maong mga pulong nagpakita kon nganong nahibalo si David nga makasalig siya sa tabang ni Jehova. Si David kanunayng misalig kang Jehova, ug wala gyod siya pakyasa  sa iyang Diyos. Sa batan-on pa si David, nakig-away siya sa higanteng Filistehanon nga si Goliat ug giingnan niya ang maong bangis nga manggugubat: “Niining adlawa mismo itugyan ka ni Jehova sa akong kamot.” (1 Sam. 17:46) Sa ulahi, si David nag-alagad sa hari nga si Saul, kinsa kadaghan misulay sa pagpatay kaniya. Pero “si Jehova nag-uban” kang David. (1 Sam. 18:12) Kay naeksperyensiyahan ni David ang tabang ni Jehova kaniadto, segurado siya nga tabangan sab siya ni Jehova sa iyang giatubang nga mga problema.

16. Sa unsang mga paagi ‘matilawan’ nato ang pagkamaayo ni Jehova?

¹⁶ Kon mosalig ta sa giya ni Jehova karon, mas molig-on ang atong pagsalig sa iyang katakos sa pagluwas kanato sa umaabot. Gikinahanglan ang lig-ong pagtuo ug bug-os nga pagsalig kang Jehova aron makabaton tag kaisog sa paghangyo sa atong amo nga mobakasyon aron motambog asembliya o kombensiyon, o kaha sa paghangyo nga usbon ang atong eskedyul sa trabaho aron makatambong sa tanang tigom ug makagahin ug dugang panahon sa ministeryo. Ibutang ta nga ang atong amo wala mosugot ug nawad-an tag trabaho. Duna ba tay pagtuo nga dili gyod ta biyaan o talikdan ni Jehova ug nga kanunay gyod ta niyang tagan-an sa atong pangunang mga panginahanglan? (Heb. 13:5) Daghan niadtong naa sa bug-os panahong pag-alagad ang makaasoy ug mga eksperyensiya kon giunsa sila pagtabang ni Jehova sa panahon nga gikinahanglan kaayo nila siya. Si Jehova kasaligan.

17. Unsa ang tinuig nga teksto para sa 2022, ug nganong haom kini?

¹⁷ Kay si Jehova nagauban kanato, wala tay rason nga mahadlok kon unsay mahitabo sa umaabot. Dili gyod ta biyaan sa atong Diyos kon kanunay natong unahon ang iyang kabubut-on. Aron pahinumdoman ta nga kinahanglan tang mangandam karon para sa umaabot nga mga pagsulay ug padayong mosalig nga dili gyod ta biyaan ni Jehova, gipili sa Nagamandong Lawas ang Salmo 34:10 ingong atong tinuig nga teksto para sa 2022: “Kadtong nagapangita kang Jehova dili makulangan ug maayong mga butang.”