1-2. (a) Unsa tingali atong bation dihang mamalandong ta sa kinabuhi ug ministeryo ni Jesus? (b) Unsay atong hisgotan niining artikuloha?

 KON mamatyan tag minahal, mingawon kaayo ta niya. Sa primero, masakitan tingali tang maghunahuna adtong panahon nga hapit na siyang mamatay, ilabina kon nag-antos siya. Pero paglabay sa panahon, mobati na tingali tag kalipay dihang maghunahuna ta sa mga butang nga iyang gitudlo o sa iyang gihimo o gisulti nga nakadasig o nakapalipay nato.

² Sa samang paagi, maguol ta dihang magbasa ta bahin sa pag-antos ug kamatayon ni Jesus. Sa mga semana una ug human sa Memoryal, maggahin gyod tag panahon sa pagpamalandong kon unsa ka importante ang iyang halad lukat. (1 Cor. 11:24, 25) Pero malipay gyod tang mamalandong sa tanang gisulti ug gihimo ni Jesus samtang dinhi siya sa yuta. Makapadasig pod ang paghunahuna kon unsa nay iyang ginahimo karon ug kon unsa pay iyang himoon sa umaabot. Ang pagpamalandong niini ug sa iyang gugma kanato magpalihok nato nga ipakita ang atong apresasyon sa praktikal nga mga paagi, sama sa atong hisgotan niining artikuloha.

3. Nganong mapasalamaton kaayo ta sa lukat?

³ Mobati gyod tag apresasyon kon mamalandong ta sa kinabuhi ug kamatayon ni Jesus. Sa ministeryo ni Jesus, gitudloan niya ang mga tawo bahin sa maayong mga butang nga himoon sa Gingharian sa Diyos. Naapresyar gyod nato ni nga mga kamatuoran  bahin sa Gingharian. Mapasalamaton ta sa lukat kay tungod ani, naposible nga masuod ta kang Jehova ug Jesus. Kadtong magpakitag pagtuo kang Jesus duna poy paglaom nga mabuhi sa walay kataposan ug makita pag-usab ang ilang namatay nga mga minahal. (Juan 5:28, 29; Roma 6:23) Wa gyod tay gihimo nga makaingon ta nga angayan tang modawat niini nga mga panalangin, ug di gyod nato mabayran ang Diyos ug ang Kristo sa ilang gihimo para nato. (Roma 5:8, 20, 21) Pero puwede natong ipakita nga mapasalamaton kaayo ta. Sa unsang paagi?

4. Giunsa pagpakita ni Maria Magdalena ang iyang apresasyon sa gihimo ni Jesus para niya? (Tan-awa ang hulagway.)

⁴ Konsideraha ang pananglitan sa Hudiyong babaye nga si Maria Magdalena. Nag-antos gyod siya kay gisudlan siyag pito ka demonyo. Mibati gyod tingali siya nga wala nay solusyon ang iyang kahimtang. Busa hunahunaa kon unsa ka dako ang iyang pasalamat dihang gipahigawas siya ni Jesus sa impluwensiya sa mga demonyo! Ang iyang apresasyon nagpalihok niya nga mahimong sumusunod ni Jesus ug gamiton ang iyang panahon, kusog, ug materyal nga mga butang sa pagsuportar sa ministeryo ni Jesus. (Luc. 8:1-3) Bisag mapasalamaton kaayo si Maria sa gihimo ni Jesus para niya, wala tingali niya masabti nga dili pa to ang kinadak-ang butang nga himoon ni Jesus. Ihatag ni Jesus ang iyang kinabuhi para sa katawhan, “aron ang tanan nga magpakitag pagtuo kaniya” makabaton ug kinabuhing walay kataposan. (Juan 3:16) Pero gipakita ni Maria ang iyang apresasyon kang Jesus pinaagi sa iyang pagkamaunongon. Samtang nag-antos si Jesus sa estaka sa pagsakit, si Maria nagtindog sa duol aron ipakita ang iyang gugma kang Jesus ug hupayon ang uban nga naa pod didto. (Juan 19:25) Pagkamatay ni Jesus, si Maria ug ang duha pa ka babaye nagdalag humot nga mga yerba aron ihaplas sa lawas ni Jesus una siya ilubong. (Mar. 16:1, 2) Gigantihan pag-ayo ang pagkamaunongon ni Maria. Nakita ug naestorya niya ang nabanhawng si Jesus ​—pribilehiyo nga wala madawat sa kadaghanang tinun-an.​—Juan 20:11-18.

5. Unsaon nato pagpakita ang atong apresasyon sa tanang gihimo ni Jehova ug Jesus para nato?

⁵ Mapakita pod nato ang atong apresasyon sa tanang gihimo ni Jehova ug Jesus para nato pinaagi sa paggamit sa atong panahon, kusog, ug materyal nga mga butang sa pag-alagad kang Jehova. Pananglitan, puwede tang moboluntaryo sa pagtukod ug pagmentinar sa mga dapit sa pagsimba.

6. Nganong makaingon ta nga ang lukat regalo para sa matag usa kanato?

⁶ Kon pamalandongon nato kon unsa ka dako ang gugma ni Jehova ug Jesus kanato, mapalihok ta nga higugmaon pod sila. (1 Juan 4:10, 19) Mas higugmaon pa gyod nato sila dihang atong masabtan nga si Jesus namatay para sa matag usa kanato. Nasabtan kini ni apostol Pablo ug iyang gipahayag ang iyang apresasyon diha sa iyang sulat ngadto sa mga taga-Galacia. Siya miingon: ‘Ang Anak sa Diyos nahigugma nako ug nagtugyan sa iyang kaugalingon alang kanako.’ (Gal. 2:20) Tungod sa lukat, naa nay basehanan si Jehova sa pagkabig nimo aron mahimo ka niyang higala. (Juan 6:44) Di ba makapatandog sa kasingkasing nga naay nakitang maayo si Jehova nimo ug dako kaayo siyag gisakripisyo aron mahimo ka niyang higala? Seguradong mas nakapalalom ni sa imong gugma kang Jehova ug Jesus. Busa maayong pangutan-on nato ang atong kaugalingon, ‘Unsaon nako pagpakita ang maong gugma?’

7. Sama sa makita sa hulagway, unsaon nato pagpakita ang atong gugma kang Jehova ug Jesus? (2 Corinto 5:14, 15; 6:1, 2)

⁷ Ang atong gugma sa Diyos ug sa Kristo magpalihok nato nga ipakita ang atong gugma sa uban. (Basaha ang 2 Corinto 5:14, 15; 6:1, 2.) Ang usa ka paagi nga mapakita nato ang atong gugma mao ang madasigong pagsangyaw  sa maayong balita. Sangyawan nato ang tanan. Dili ta mamilig sangyawan bisag unsa pay ilang rasa, tribo, edukasyon, o kahimtang sa kinabuhi. Nianang paagiha, gisuportahan nato ang katuyoan ni Jehova nga “ang tanang matang sa tawo maluwas ug makakat-on sa tukmang kahibalo sa kamatuoran.”​—1 Tim. 2:4.

8. Unsaon nato pagpakita ang atong gugma sa mga igsoon?

⁸ Mapamatud-an pod nato ang atong gugma sa Diyos ug sa Kristo pinaagi sa pagpakita sa atong gugma sa mga igsoon. (1 Juan 4:21) Magpakita tag personal nga interes kanila ug tabangan sila dihang naa sila sa kalisdanan. Hupayon nato sila dihang mamatyan sila, duawon dihang masakit sila, ug himoon ang atong maarangan sa pagdasig nila dihang maluya sila. (2 Cor. 1:3-7; 1 Tes. 5:11, 14) Padayon nato silang iampo kay nahibalo ta nga “ang pangamuyo sa tawong matarong dunay gamhanang epekto.”​—Sant. 5:16.

9. Unsay laing paagi nga atong mapakita ang atong gugma sa mga igsoon?

⁹ Mapakita pod nato ang atong gugma sa mga igsoon pinaagi sa pagpaningkamot nga makigdait kanila. Maningkamot ta nga sundogon ang ehemplo ni Jehova sa pagpasaylo. Kon gitugotan ni Jehova nga mamatay ang iyang Anak para sa atong mga sala, dili ba angay pod nga andam tang magpasaylo sa mga igsoon dihang makasala sila nato? Dili nato gustong sundogon ang daotang ulipon diha sa usa sa mga ilustrasyon ni Jesus. Bisan pag gipapas na sa iyang agalon ang iyang dakong utang, wala pasayloa sa maong ulipon ang iyang isigkaulipon nga wala makabayad sa gamayng utang niini. (Mat. 18:23-35) Kon ikaw ug ang usa ka igsoon wala magkasinabot, puwede kaha nga mouna kag duol niya aron makigdait sa dili pa motambong sa Memoryal? (Mat. 5:23, 24) Kon imo nang himoon, imong gipamatud-an ang imong dakong gugma kang Jehova ug Jesus.

10-11. Sa unsang paagi mapakita sa mga ansiyano nga ilang gihigugma si Jehova ug Jesus? (1 Pedro 5:1, 2)

¹⁰ Sa unsang paagi mapakita sa mga ansiyano nga ilang gihigugma si Jehova ug Jesus? Usa ka importanteng paagi mao ang pag-atiman sa mga karnero ni Jesus. (Basaha ang 1 Pedro 5:1, 2.) Klaro nang gisulti ni Jesus kang apostol Pedro. Human ilimod ni Pedro si Jesus sa tulo ka higayon, seguradong gusto gyod niya nga pamatud-an ang iyang gugma kang Jesus. Human sa pagkabanhaw ni Jesus, iyang gipangutana si Pedro: “Simon nga anak ni Juan, gihigugma ba ko nimo?” Makaseguro ta nga gusto gyong himoon ni Pedro ang tanan aron pamatud-an ang iyang gugma sa iyang Agalon. Giingnan ni Jesus si Pedro: “Bantayi ang akong gagmayng mga karnero.” (Juan 21:15-17) Ug mao gyod nay gihimo ni Pedro. Mahigugmaon niyang giatiman ang mga karnero sa Ginoo, nga nagpamatuod sa iyang gugma kang Jesus.

¹¹ Mga ansiyano, sa mga semana una ug human sa Memoryal, unsaon ninyo pagpakita nga importante kaninyo ang giingon ni Jesus kang Pedro? Mapakita ninyo kon unsa ka dako ang inyong gugma kang Jehova ug Jesus pinaagi sa regular nga pag-shepherding sa mga igsoon ug sa paghimog espesyal nga paningkamot aron tabangan ang mga dili aktibo nga mobalik kang Jehova. (Ezeq. 34:11, 12) Puwede pod ninyong abiabihon ang mga Bible study ug ubang interesado nga motambong sa Memoryal. Gusto nato nga bation niining potensiyal nga mga tinun-an nga nalipay ta nga naa sila.

12. Nganong makapalig-on nato ang pagpamalandong sa giingon ni Jesus sa gabii una siya mamatay? (Juan 16:32, 33)

¹² Sa gabii una mamatay si Jesus, iyang giingnan ang iyang mga tinun-an: “Sa kalibotan makaagom mog kasakitan, apan magmalig-on  kamo! Gidaog na nako ang kalibotan.” (Basaha ang Juan 16:32, 33.) Unsay nakatabang kang Jesus nga dili mahadlok sa iyang mga kaaway ug magpabiling matinumanon hangtod sa kamatayon? Misalig siya kang Jehova. Kay nahibalo siya nga ang iyang mga sumusunod makaatubang pod ug mga pagsulay, iyang gihangyo si Jehova nga bantayan sila. (Juan 17:11) Nganong makapalig-on ni nato? Kay si Jehova mas gamhanan kay sa atong mga kaaway. (1 Juan 4:4) Makita niya ang tanan. Kombinsido ta nga kon mosalig ta kang Jehova, tabangan ta niya nga magmalig-on ug dili mahadlok.

13. Sa unsang paagi nagpakitag kaisog si Jose nga taga-Arimatea?

¹³ Konsideraha ang nahitabo kang Jose nga taga-Arimatea. Tinahod siya sa mga Hudiyo ug membro siya sa Sanhedrin, ang korte suprema sa mga Hudiyo. Pero panahon sa ministeryo ni Jesus, si Jose wala magmaisogon. Si Juan miingon nga “tinun-an siya ni Jesus apan gitago niya kini kay siya nahadlok sa mga Hudiyo.” (Juan 19:38) Bisan pag interesado si Jose sa mensahe sa Gingharian, wala niya ipakita sa uban nga nagtuo siya kang Jesus. Tingali nahadlok siya nga dili na siya tahoron sa komunidad. Pero ang Bibliya nag-ingon nga human mamatay si Jesus, si Jose “maisogong miatubang kang Pilato ug gipangayo ang lawas ni Jesus.” (Mar. 15:42, 43) Wala na itago ni Jose nga siya tinun-an ni Jesus.

14. Unsay angay nimong himoon kon naa kay kahadlok sa tawo?

¹⁴ Mibati ba pod kag kahadlok sama kang Jose? Diha sa eskuwelahan o trabahoan, maulaw ba ka usahay nga magpaila ingong Saksi ni Jehova? Nagduhaduha ba ka nga mahimong magmamantala o magpabawtismo kay nabalaka ka kon unsay hunahunaon sa uban? Ayawg tugoti nga ang maong mga pagbati magpugong nimo sa paghimo kon unsay husto. Pag-ampo nga kinasingkasing kang Jehova. Hangyoa siya nga hatagan kag kaisog sa pagbuhat sa iyang kabubut-on. Dihang makita nimo kon giunsa pagtubag ni Jehova ang imong mga pag-ampo, mahimo kang mas lig-on ug mas maisogon.​—Isa. 41:10, 13.

15. Kay nalipay ang mga tinun-an nga nagpakita si Jesus kanila, unsay ilang gihimo? (Lucas 24:52, 53)

¹⁵ Naguol pag-ayo ang mga tinun-an dihang namatay si Jesus. Hunahunaa ang ilang situwasyon. Wala lang sila mawad-ig minahal nga higala, kondili mibati sab sila nga nawad-an silag paglaom. (Luc. 24:17-21) Pero dihang nabanhaw  si Jesus ug mipakita kanila, migahin siyag panahon nga tabangan sila nga masabtan kon sa unsang paagi niya gituman ang tagna sa Bibliya. Gihatagan sab niya silag importanteng buluhaton. (Luc. 24:26, 27, 45-48) Dihang miadto na si Jesus sa langit 40 ka adlaw sa ulahi, ang kaguol sa mga tinun-an napulihag dakong kalipay. Nalipay sila kay buhi ang ilang Agalon ug kay tabangan niya sila sa pagtuman sa ilang bag-ong buluhaton. Ang ilang kalipay nagpalihok kanila nga dili mohunong sa pagdayeg kang Jehova.​—Basaha ang Lucas 24:52, 53; Buh. 5:42.

16. Unsaon nato pagsundog ang mga tinun-an ni Jesus?

¹⁶ Unsaon nato pagsundog ang mga tinun-an ni Jesus? Magmalipayon ta sa pagsimba kang Jehova dili lang sa mga semana una ug human sa Memoryal kondili sa tibuok tuig. Nagpasabot ni nga unahon nato ang Gingharian sa Diyos diha sa atong kinabuhi. Pananglitan, daghan ang nag-adjust sa ilang eskedyul sa trabaho aron makasangyaw, makatambong ug tigom, ug mahimong regular sa ilang pamilyahanong pagsimba. Ang uban midesisyon nga dili magbaton sa materyal nga mga butang nga giisip sa uban nga importante aron mas magamit sila sa kongregasyon o makatabang sa lugar nga gamay rag magmamantala. Bisan pag kinahanglan natog paglahutay aron padayong makaalagad kang Jehova, siya nagsaad nga dagaya ta niyang panalanginan kon unahon nato ang Gingharian diha sa atong kinabuhi.​—Prov. 10:22; Mat. 6:32, 33.

17. Unsay determinado nimong himoon? (Tan-awa ang hulagway.)

¹⁷ Naghinamhinam ta sa pagsaulog sa Memoryal sa Martes, Abril 4. Pero dili kay nianang adlawa lang ta mamalandong sa kinabuhi ug kamatayon ni Jesus ug sa gugma nga gipakita niya ug ni Jehova kanato. Pahimuslan nato ang tanang kahigayonan sa paghimo niana sa mga semana una ug human sa Memoryal. Pananglitan, paggahig panahon sa pagbasa ug pagpamalandong sa mga hitabo nga gihisgotan sa chart nga “Kataposang Semana ni Jesus sa Yuta,” diha sa Apendise B12 sa Bag-ong Kalibotang Hubad. Samtang magbasa, matikdi ang mga teksto nga makadugang sa imong apresasyon, gugma, kaisog, ug kalipay. Dayon paghunahunag espesipikong mga paagi nga mapakita nimo ang imong apresasyon. Makaseguro ka nga pabilhan ni Jesus ang tanan nimong ginahimo aron hinumdoman siya sa mga semana una ug human sa Memoryal.​—Pin. 2:19.