1-2. Nganong motambong tag Memoryal kada tuig?

 HALOS 2,000 ka tuig kanhi, gihatag ni Jesus ang iyang kinabuhi para nato, nga nagpaposible nga makabaton tag kinabuhing walay kataposan. Sa gabii una siya mamatay, gisugo ni Jesus ang iyang mga sumusunod nga hinumdoman ang iyang sakripisyo pinaagig simpleng seremonya gamit ang tinapay ug bino.​—1 Cor. 11:23-26.

² Gituman nato ang sugo ni Jesus kay gimahal nato siya pag-ayo. (Juan 14:15) Kada tuig, sa mga semana una ug human sa Memoryal, gipakita nato ang atong apresasyon pinaagi sa paggahin ug panahon sa pag-ampo ug pagpamalandong sa mga kaayohan nga madawat sa mga tawo tungod sa iyang kamatayon. Malipay pod ta nga mohimog dugang pa sa ministeryo, nga mangimbitar ug daghan kutob sa mahimo sa pagtambong niining espesyal nga okasyon. Ug siyempre, dili gyod ta gusto nga naay makapugong nato sa pagtambong sa Memoryal.

3. Unsay atong hisgotan niining artikuloha?

³ Niining artikuloha, atong hisgotan ang tulo ka paagi nga ang katawhan ni Jehova naningkamot pag-ayo sa paghandom sa kamatayon ni Jesus: (1) pagsaulog niini sa paagi nga gitudlo ni Jesus, (2) pag-imbitar sa uban sa pagtambong sa Memoryal, ug (3) pagsaulog niini bisan pa sa lisod nga mga kahimtang.

4. Unsa nga mga pangutana ang matubag kada tuig sa Memoryal, ug nganong importante kaayo nga mahibaloan nato ang tubag niana nga mga pangutana? (Lucas 22:19, 20)

⁴ Kada tuig sa Memoryal, makadungog tag binase sa Bibliya nga pakigpulong nga maghatag ug klarong tubag sa pipila ka pangutana. Atong makat-onan kon nganong gikinahanglan sa mga tawo ang lukat ug kon sa unsang paagi ang kamatayon sa usa ka tawo magtabon sa sala sa daghan. Mapahinumdoman ta kon unsay gisimbolohan sa tinapay ug bino ug kon kinsay angayng mokaon ug moinom niini. (Basaha ang Lucas 22:19, 20.) Ug mapamalandong pod nato ang nindot nga kaugmaon niadtong naglaom nga magpuyo sa yuta hangtod sa hangtod. (Isa. 35:5, 6; 65:17, 21-23) Angay gyod natong pabilhan kini nga mga kamatuoran. Binilyon ang wala makahibalo ani, ug wala nila masabti kon unsa ka importante ang halad ni Jesus. Wala pod sila magsaulog sa Memoryal sa iyang kamatayon sa paagi nga iyang gitudlo. Ngano?

5. Human mamatay ang kadaghanan sa mga apostoles, giunsa pagsaulog sa mga tawo ang kamatayon ni Jesus?

⁵ Wala madugay human mamatay ang kadaghanang apostoles ni Jesus, naay dili tinuod nga mga Kristohanon nga nahimong bahin sa kongregasyon. (Mat. 13:24-27, 37-39) Nagsulti silag “tinuis nga mga butang aron ipahilayo ang mga tinun-an ug danihon ngadto kanila.” (Buh. 20:29, 30) Ang usa sa “tinuis nga mga butang” nga anam-anam nga gitudlo sa dili tinuod nga mga Kristohanon mao nga wala ihalad ni Jesus ang iyang lawas “kausa alang sa tanang panahon aron mopas-an sa mga sala sa daghan,” sama sa giingon sa Bibliya. Nagtudlo sila nga kinahanglang balikbalik niyang ihalad ang iyang kaugalingon. (Heb. 9:27, 28) Daghan karon ang nagtuo niining bakak nga pagtulon-an. Pirme silang magsimba​—usahay kada adlaw—​aron mangalawat panahon sa Eukaristiya. b Ang ubang relihiyon talagsa ra kaayong maghandom sa kamatayon ni Jesus, ug kadaghanan sa membro nila wala kaayo makasabot sa kahulogan sa halad ni Jesus. Ang uban tingali makapangutana, ‘Tinuod ba gyod nga ang kamatayon ni Jesus nagpasabot nga mapasaylo ang akong mga sala?’ Nganong nakapangutana sila ana? Naay uban nga naimpluwensiyahan niadtong nagtuo nga dili mapasaylo ang atong mga sala pinaagi sa kamatayon ni Jesus. Sa unsang paagi gitabangan sa tinuod nga mga sumusunod ni Jesus ang mga tawo nga masabtan ang kahulogan sa iyang halad ug ang hustong paagi sa paghandom sa iyang kamatayon?

6. Niadtong 1872, unsay nasabtan sa usa ka grupo sa mga estudyante sa Bibliya?

⁶ Sa ulahing bahin sa ika-19ng siglo, naay grupo sa mga estudyante sa Bibliya nga gipangunahan ni Charles Taze Russell, ug gitun-an nila pag-ayo ang Kasulatan. Gusto nilang mahibaloan kon unsa gyoy kahulogan sa halad ni Jesus ug kon unsaon paghandom ang iyang kamatayon. Pagka-1872, nasabtan nila sa ilang pagtuon sa Bibliya nga si Jesus naghalad sa iyang kaugalingon ingong lukat para sa tanan. Wala nila itago ang ilang nakat-onan. Ila ning gitudlo sa uban pinaagig mga libro, newspaper, ug magasin. Dayon, sama sa mga Kristohanon sa unang siglo, nagsugod sila pagsaulog sa Memoryal kausa kada tuig.

7. Sa unsang paagi nakabenepisyo ta sa pagtuon nga gihimo kaniadto sa mga estudyante sa Bibliya?

⁷ Nakabenepisyo ta sa pagtuon nga gihimo sa maong mga Kristohanon kaniadto. Ngano? Sa tabang ni Jehova, nasabtan nato ang kamatuoran bahin sa halad ni Jesus ug kon unsay napaposible tungod ani. (1 Juan 2:1, 2) Nakat-onan  pod nato nga naay duha ka paglaom nga gitudlo ang Bibliya para sa mga tawo nga nakapalipay sa Diyos​—imortal nga kinabuhi sa langit para sa pipila ug kinabuhing walay kataposan dinhi sa yuta para sa minilyon. Mas masuod ta kang Jehova samtang atong pamalandongon ang iyang dakong gugma kanato ug ang mga benepisyo nga atong madawat tungod sa halad ni Jesus. (1 Ped. 3:18; 1 Juan 4:9) Busa sama sa gihimo sa matinumanong mga igsoon kaniadto, imbitahon pod nato ang uban nga saulogon ang Memoryal sumala sa paagi nga gitudlo ni Jesus.

8. Unsay gihimo sa katawhan ni Jehova aron maimbitar ang uban sa Memoryal? (Tan-awa ang hulagway.)

⁸ Ang katawhan ni Jehova dugay nang nangimbitar sa uban sa pagtambong sa Memoryal. Niadtong 1881, ang mga igsoon sa United States giimbitar nga magtigom sa balay sa usa ka brader sa Allegheny, Pennsylvania para anang espesyal nga okasyon. Sa ulahi, matag kongregasyon na ang magsaulog sa Memoryal. Niadtong Marso 1940, ang mga magmamantala giingnan nga puwede silang mangimbitar ug mga interesado sa ilang teritoryo. Pagka-1960, sa unang higayon, ang Bethel nagsuplay ug inimprentang mga imbitasyon sa mga kongregasyon. Sukad niadto, binilyon nga imbitasyon sa Memoryal ang napanagtag. Nganong naningkamot gyod ta nga maimbitar ang uban?

9-10. Kinsay makabenepisyo sa atong pagpangimbitar para sa Memoryal? (Juan 3:16)

⁹ Gusto nato nga kadtong motambong sa unang higayon makakat-on kon unsay gihimo ni Jehova ug Jesus para natong tanan. Usa na  ka rason nga mangimbitar ta para sa Memoryal. (Basaha ang Juan 3:16.) Nanghinaot ta nga ang ilang makita ug madungog sa Memoryal makadasig nila nga mokat-on ug dugang ug mahimong mga alagad ni Jehova. Pero naa pay uban nga makabenepisyo sa pagtambong.

¹⁰ Ato pong imbitahon kadtong wala na mag-alagad kang Jehova. Ato nang himoon aron pahinumdoman sila nga gimahal gihapon sila sa Diyos. Daghan ang modawat sa atong imbitasyon ug lipay kaayo ta nga makita sila. Ang pagtambong sa Memoryal magpahinumdom nila kon unsa sila ka malipayon niadtong nag-alagad pa sila kang Jehova. Kanay nahitabo kang Monica. c Nakabalik siya sa pag-alagad panahon sa COVID-19 nga pandemic. Human makatambong sa Memoryal sa 2021, siya miingon: “Kini nga Memoryal espesyal kaayo para nako. Human sa 20 ka tuig, kini ang unang higayon nga nakasangyaw kog balik ug nakaimbitar sa uban para sa Memoryal. Gihimo gyod nako ang akong maarangan kay mapasalamaton kaayo ko sa gibuhat ni Jehova ug Jesus para nako.” (Sal. 103:1-4) Dawaton man sa mga tawo ang atong imbitasyon o dili, magkugi ta sa pagpangimbitar para sa Memoryal kay nahibalo ta nga gipabilhan ni Jehova ang atong mga paningkamot.

11. Giunsa pagpanalangin ni Jehova ang atong mga paningkamot sa pagpangimbitar para sa Memoryal? (Haggeo 2:7)

¹¹ Gipanalanginan gyod ni Jehova ang atong mga paningkamot sa pagpangimbitar para sa Memoryal. Sa 2021, bisan pa sa mga restriksiyon tungod sa COVID-19 nga pandemic, ang nanambong maoy 21,367,603. Kini ang kinatas-ang attendance ug halos duha ug tunga ka pilo ni sa gidaghanon sa mga Saksi ni Jehova sa tibuok kalibotan. Siyempre, dili lang interesado si Jehova sa gidaghanon sa nanambong. Interesado siya sa matag usa nga mitambong. (Luc. 15:7; 1 Tim. 2:3, 4) Kombinsido ta nga dihang mangimbitar ta sa uban, si Jehova nagtabang nato nga makaplagan kadtong sinserog kasingkasing.​—Basaha ang Haggeo 2:7.

12. Nganong lisod usahay ang pagsaulog sa Memoryal? (Tan-awa ang hulagway.)

¹² Gitagna ni Jesus nga sa kataposang mga adlaw, makaatubang tag daghang kalisdanan​—pagsupak sa pamilya, paglutos, gubat, kamatay, ug uban pa. (Mat. 10:36; Mar. 13:9; Luc. 21:10, 11) Tungod ana, malisdan tingali ta usahay sa paghandom sa kamatayon ni Jesus. Unsay gihimo sa atong mga igsoon aron makasaulog sila sa Memoryal bisan pa sa maong mga kalisdanan, ug giunsa sila pagtabang ni Jehova?

13. Giunsa pagpanalangin ni Jehova ang kaisog ug determinasyon ni Artem sa pagsaulog sa Memoryal bisag gipriso siya?

¹³ Pagkapriso. Ang mga igsoon nga napriso tungod sa ilang pagtuo naningkamot sa paghandom sa kamatayon ni Jesus. Ingon ana ang nahitabo kang Artem. Sa mga semana una pa ang Memoryal sa 2020, napriso siya sa 17 metro kuwadrado (183 sq ft) nga selda ug usahay, lima sila niana nga selda. Bisag napriso, nakakita siyag paagi nga makakuhag mga emblema para sa Memoryal. Nagplano pod siyang mopakigpulong para sa iyang kaugalingon. Pero ang mga kauban niya sa selda kusog kaayong manigarilyo ug mamalikas. Unsay iyang gihimo? Gihangyo niya sila nga kon puwede, dili usa sila mamalikas ug manigarilyo sulod sa usa ka oras. Nakurat si Artem kay misugot sila nga dili manigarilyo ug mamalikas panahon sa Memoryal. Si Artem miingon, “Estoryahan unta nako silag dugang bahin sa Memoryal.”  Ugaling lang miingon sila nga dili sila interesado sa maong okasyon. Pero human nila makita ug madungog si Artem nga nagsaulog sa Memoryal, sila nay nangutana bahin ani.

14. Unsang mga paningkamot ang gihimo aron masaulog ang Memoryal bisan pa sa COVID-19 nga pandemic?

¹⁴ COVID-19 nga pandemic. Tungod sa pandemic, ang katawhan ni Jehova dili aktuwal nga makatambong sa Memoryal. Pero wala na makapugong nila sa pagsaulog sa Memoryal. d Ang mga kongregasyon nga naay Internet naghimo sa Memoryal pinaagig videoconference. Pero komosta kadtong minilyon nga walay Internet? Sa ubang nasod, ang mga sangang buhatan naghimog kahikayan aron ma-broadcast ang pakigpulong diha sa TV o sa radyo. Girekord pod nila ang pakigpulong sa kapig 500 ka pinulongan aron bisan kadtong naa sa hilit nga mga lugar makasaulog gihapon sa Memoryal. Ug gihatod sa mga brader ang mga recording ngadto sa mga igsoon anang mga lugara.

15. Unsay imong makat-onan sa Bible study nga si Sue?

¹⁵ Pagsupak sa pamilya. Para sa uban, ang pinakalisod nga babag sa pagsaulog sa Memoryal  mao ang pagsupak sa pamilya. Konsideraha ang nahitabo sa Bible study nga si Sue. Niadtong 2021, sa adlaw una pa ang Memoryal, giingnan ni Sue ang nag-study niya nga tungod sa pagsupak sa ubang membro sa iyang pamilya, dili siya makatambong sa Memoryal. Gibasa sa nag-study niya ang Lucas 22:44. Dayon giingnan niya si Sue nga dihang mag-atubang tag mga kalisdanan, kinahanglang sundogon nato ang ehemplo ni Jesus pinaagi sa pag-ampo kang Jehova ug pagsalig Kaniya sa bug-os. Pagkasunod adlaw, giandam ni Sue ang mga emblema ug mitan-aw siyag espesyal nga programa sa Morning Worship diha sa jw.org. Ug pagkagabii, samtang nag-inusara sa iyang kuwarto, naminaw siya sa Memoryal diha sa iyang cellphone. Human ana, misulat si Sue sa nag-study niya: “Nadasig gyod ko sa imong gisulti gahapon. Naningkamot ko nga motambong sa Memoryal ug gitabangan gyod ko ni Jehova. Puwerte nakong lipaya ug mapasalamaton kaayo ko!” Sa imong hunahuna, kon ingon ana ang imong kahimtang, makatabang pod ba si Jehova nimo?

16. Nganong makasalig ta nga panalanginan ni Jehova ang atong mga paningkamot sa pagtambong sa Memoryal? (Roma 8:31, 32)

¹⁶ Gipabilhan gyod ni Jehova ang atong mga paningkamot sa paghandom sa kamatayon ni Jesus. Makaseguro gyod ta nga panalanginan ta niya dihang ipakita nato ang atong apresasyon sa iyang gihimo para nato. (Basaha ang Roma 8:31, 32.) Busa magmadeterminado ta nga motambong sa Memoryal niining tuiga ug maningkamot nga mas makapakigbahin sa espirituwal nga mga kalihokan sa mga semana una ug human sa Memoryal.