1. Nganong ang Memoryal ang pinakaimportanteng adlaw kada tuig? (Lucas 22:​19, 20)

 PARA sa katawhan ni Jehova, ang Memoryal sa kamatayon sa Kristo ang pinakaimportanteng adlaw kada tuig. Mao ra ni ang okasyon nga espesipikong gisugo ni Jesus nga saulogon sa iyang mga sumusunod. (Basaha ang Lucas 22:​19, 20.) Eksayted kaayo ta sa Memoryal tungod sa daghang rason. Konsiderahon nato ang pipila niini.

2. Unsa ang pipila ka rason kon nganong eksayted ta sa Memoryal?

² Ang Memoryal makatabang nato nga mapamalandong ang bili sa halad lukat. Magpahinumdom ni kon unsaon nato pagpakita ang atong apresasyon sa halad ni Jesus. (2 Cor. 5:​14, 15) Kahigayonan pod ni nga “magdinasigay” ta sa mga igsoon. (Roma 1:12) Kada tuig, daghang dili aktibo ang manambong. Ang uban nila napalihok pa gani nga mobalik kang Jehova kay mahigugmaon silang giabiabi. Ug daghang interesado ang nadasig nga magtuon sa Bibliya tungod sa ilang nakita ug nadungog. Mao diay nga espesyal kaayo para nato ang Memoryal.

3. Sa unsang paagi ang Memoryal makapahiusa nato sa atong mga igsoon sa tibuok kalibotan? (Tan-awa sab ang hulagway.)

³ Hunahunaa sab kon sa unsang paagi ang Memoryal makapahiusa nato sa atong mga igsoon sa tibuok kalibotan. Ang mga Saksi ni Jehova sa tibuok kalibotan magtigom inigsalop sa adlaw sa ilang lugar. Makadungog tag pakigpulong nga magpasiugda sa kaimportante sa lukat. Mokanta tag duha ka awit sa pagdayeg, mopasa ug mga emblema, ug kinasingkasing nga moingon ug “amen” sa upat ka pag-ampo. Nianang adlawa, mao ni ang himoon sa tanang kongregasyon. Ma-imagine ba nimo ang kalipay ni Jehova ug Jesus dihang ilang makita nga  nagkahiusa ta sa pagpasidungog kanila niining paagiha?

4. Unsay atong hisgotan niining artikuloha?

⁴ Niining artikuloha, atong hisgotan kini nga mga pangutana: Unsaon nato pag-andam ang atong kasingkasing para sa Memoryal? Unsaon nato pagtabang ang uban nga makabenepisyo niini? Ug unsaon nato pagtabang ang mga dili aktibo? Ang mga tubag ani nga mga pangutana makatabang nato nga maandam niining sagrado nga okasyon.

UNSAON NATO PAG-ANDAM ANG ATONG KASINGKASING PARA SA MEMORYAL?

5. (a) Nganong angay tang mamalandong sa bili sa lukat? (Salmo 49:​7, 8) (b) Unsay imong nakat-onan sa video nga Nganong Namatay si Jesus?

⁵ Usa sa pinakaimportanteng mga paagi nga maandam nato ang atong kasingkasing para sa Memoryal mao ang pagpamalandong sa bili sa halad lukat ni Jesu-Kristo. Kon kita ra, dili gyod nato malukat ang atong kaugalingon gikan sa sala ug kamatayon. (Basaha ang Salmo 49:​7, 8; tan-awa sab ang video nga Nganong Namatay si Jesus?) a Busa gihikay ni Jehova nga ihatag sa iyang pinanggang Anak nga si Jesus ang iyang kinabuhi para nato. Dako gyod to nga sakripisyo para kang Jehova ug Jesus. (Roma 6:23) Kon pamalandongon nato pirme ang kadako sa ilang gisakripisyo, mas maapresyar nato ang lukat. Atong konsiderahon ang pipila sa lisod nga mga butang nga kinabubut-ong gihimo ni Jehova ug Jesus aron mahatag ang lukat. Pero hisgotan una nato kon unsa ang lukat ug kon nganong gikinahanglan kini.

6. Unsa ang lukat, ug nganong gikinahanglan kini?

⁶ Ang lukat maoy kantidad nga ibayad aron makuhag balik ang usa ka butang. Ang unang tawo, si Adan, hingpit dihang siya gilalang. Dihang nakasala siya, giwala niya ang kahigayonan para niya ug sa iyang mga anak nga mabuhi sa walay kataposan. Aron mabalik ang giwala ni Adan, gihalad ni Jesus ang iyang hingpit nga kinabuhi. Sa tibuok kinabuhi ni Jesus sa yuta, “siya walay nahimong sala ug walay panglimbong sa iyang baba.” (1 Ped. 2:22) Dihang namatay si Jesus, ang iyang hingpit nga kinabuhi maoy katumbas gyod sa kinabuhi nga giwala ni Adan.—1 Cor. 15:45; 1 Tim. 2:6.

7. Unsang mga pagsulay ang giatubang ni Jesus dihang dinhi siya sa yuta?

⁷ Si Jesus nagmasinugtanon gyod sa iyang langitnong Amahan bisan pa sa daghang pagsulay nga iyang giatubang sa dinhi pa siya sa yuta. Sa bata pa siya, kinahanglan siyang magpasakop sa iyang dili hingpit nga ginikanan bisag natawo siyang hingpit. (Luc. 2:51) Dihang tin-edyer na siya, kinahanglan niyang suklan ang presyur nga mahimong dili masinugtanon o dili matinumanon. Ug sa hamtong na si Jesus, kinahanglan niyang suklan ang mga tentasyon ni Satanas nga Yawa, apil na ang direktang mga pag-atake sa iyang pagkamaunongon sa Diyos. (Mat. 4:​1-11) Si Satanas determinado sa pagtental kang Jesus aron makasala siya ug dili niya mahatag ang lukat.

8. Unsa pang mga pagsulay ang giatubang ni Jesus?

⁸ Sa ministeryo ni Jesus dinhi sa yuta, daghan pa siyag giatubang nga pagsulay. Gilutos siya ug gisulayag patay sa iyang mga kaaway. (Luc. 4:​28, 29; 13:31) Kinahanglan pod niyang pailoban ang pagkadili-hingpit sa iyang mga sumusunod. (Mar. 9:​33, 34) Dihang gihusay siya, gipaantos siya ug gipakaulawan. Dayon gipatay siya ingong kriminal. Sakit gyod kaayo to ug makauulaw. (Heb. 12: 1-3) Kinahanglan niyang lahutayon ang kataposang bahin sa iyang pagsulay nga wala ang tabang ug proteksiyon ni Jehova. b—Mat. 27:46.

9. Unsay atong gibati bahin sa halad ni Jesus? (1 Pedro 1:8)

⁹ Klaro nga dako kaayo ang gibayad ni Jesus aron mahatag ang lukat. Dili ba mas molalom ang atong gugma kang Jesus dihang mamalandong ta sa tanang sakripisyo nga kinabubut-on niyang gihimo para nato?—Basaha ang 1 Pedro 1:8.

10. Unsa ka dakong sakripisyo para kang Jehova ang paghatag sa lukat?

¹⁰ Komosta sa bahin ni Jehova? Unsay kinabubut-on niyang gisakripisyo aron mahatag ni Jesus ang lukat? Suod kaayo ang relasyon ni Jehova ug Jesus ingong amahan ug anak; wala nay molabaw sa ilang kasuod. (Prov. 8:30) Busa hunahunaa kon unsay gibati ni Jehova dihang iyang nakita ang daghan kaayong pagsulay nga giantos ni Jesus dinhi sa yuta. Seguradong nasakitan gyod si Jehova nga nagtan-aw sa iyang anak nga gidaogdaog, gisalikway, ug gipaantos.

11. Paghatag ug pananglitan nga nagpakita kon unsay gibati ni Jehova dihang gipatay si Jesus.

¹¹ Bisan kinsang ginikanan nga namatyag anak nahibalo gyod kon unsa ka sakit ang bation tungod niana. Dako tag pagtuo sa pagkabanhaw, pero dili na makapawala sa kasakit nga atong bation dihang mamatyan tag minahal. Kini nga pananglitan magtabang nato nga masabtan kon unsay gibati ni Jehova dihang nagtan-aw siya sa iyang pinanggang Anak nga nag-antos ug namatay niadtong Nisan 14, 33 C.E. c—Mat. 3:17.

12. Unsay puwede natong himoon sa mga semana una pa ang Memoryal?

¹² Sugod karon hangtod sa Memoryal, puwede kaha nimong himoong project sa personal nga pagtuon o sa Pamilyahanong Pagsimba ang bahin sa lukat? Gamita ang Giya sa Pagpanukiduki Para sa mga Saksi ni Jehova o ang ubang publikasyon aron makakat-on kag dugang bahin ani nga topiko. d Paningkamoti pod nga masunod nimo ang eskedyul sa pagbasa sa Bibliya sa Memoryal nga naa sa Atong Kristohanong Kinabuhi ug Ministeryo—Workbook sa Tigom. Ug sa adlaw sa Memoryal, ayaw kalimti ang pagtan-aw sa espesyal nga programa sa Morning Worship. Dihang andamon nato ang atong kasingkasing para sa  Memoryal, mas makatabang ta sa uban nga makabenepisyo pod niini.—Esd. 7:10.

TABANGI ANG UBAN NGA MAKABENEPISYO

13. Unsay una natong himoon sa pagtabang sa uban aron makabenepisyo sa Memoryal?

¹³ Unsaon nato pagtabang ang uban nga makabenepisyo sa Memoryal? Siyempre, ang unang paagi mao ang pag-imbitar kanila. Gawas pa niadtong maestorya nato sa ministeryo, puwede natong ilista ang mga tawo nga gusto natong imbitahon. Apil ani atong mga paryente, kauban sa trabaho, schoolmate, ug uban pa. Bisan kon makulangan tag inimprenta nga imbitasyon, puwede tang mag-share ug link sa electronic version. Basin pa diayg daghan ang modesisyon nga motambong!—Eccl. 11:6.

14. Paghatag ug pananglitan kon unsa ka epektibo ang pagpangimbitar niadtong personal natong nailhan.

¹⁴ Ayaw pakamenosa kon unsa ka epektibo ang pagpangimbitar niadtong personal natong nailhan. Usa ka adlaw, nasorpresa ang usa ka sister dihang ang iyang dili Saksi nga bana malipayong miingon nga siya mokuyog niya sa Memoryal. Nganong nasorpresa ang asawa? Tungod kay kadaghan na niyang giimbitar kaniadto ang iyang bana pero wala gyod siya motambong. Unsay nakapalahi niining higayona? “Nakadawat kog imbitasyon,” ang bana miingon. Giimbitar diay siya sa ansiyano nga iyang kaila. Ang iyang bana mitambong nianang tuiga ug sa daghang tuig human niana.

15. Unsay maayong hinumdoman dihang mangimbitar ta sa Memoryal?

¹⁵ Hinumdomi nga kadtong atong imbitahon naa tingali mga pangutana—ilabina kon wala pa sila makatambong sa atong mga tigom. Busa maayong hunahunaon nato daan kon unsay posible nilang ipangutana aron makapangandam ta sa pagtubag niana. (Col. 4:6) Pananglitan, ang uban tingali mangutana: ‘Unsay naa ana nga okasyon?’ ‘Unsa na ka dugay?’ ‘Unsa poy sul-obon?’ ‘Naa ba nay entrance fee?’ ‘Mangolekta ba mog kuwarta didto?’ Dihang naa tay imbitahon sa Memoryal, puwede nato siyang ingnon, “Naa ba kay mga pangutana?” ug dayon tubaga ang iyang mga  pangutana. Puwede pod natong gamiton ang mga video nga Paghinumdom sa Kamatayon ni Jesus ug Unsay Ginahimo Diha sa Kingdom Hall? aron masabtan niya kon sa unsang paagi nato ginahimo ang atong mga tigom. Ug ang leksiyon 28 sa librong Mabuhi Ka Hangtod sa Hangtod! daghag nindot nga punto nga puwede natong i-share.

16. Unsa pa tingali ang mga pangutana niadtong motambong sa Memoryal?

¹⁶ Human sa Memoryal, ang bag-ong mga interesado naa pa tingali mga pangutana. Basin matingala sila kon nganong pipila ra (kon naa man gani) ang miambit sa mga emblema. Basin mangutana pod sila kon kapila nato ginasaulog ang Memoryal. Ug gusto tingali nilang mahibaloan kon ingon ana ba pirme ang ginahimo sa tanang tigom sa mga Saksi ni Jehova. Bisag daghan niini nga mga punto gihisgotan na panahon sa pakigpulong sa Memoryal, kinahanglan tingali silag dugang eksplinasyon. Ang artikulo diha sa jw.org nga “Nganong Lahig Paagi ang mga Saksi ni Jehova sa Pagsaulog sa Panihapon sa Ginoo Kay sa Ubang Relihiyon?” makatabang nato sa pagtubag sa uban nilang pangutana. Gusto natong himoon ang tanan natong maarangan—sa dili pa, panahon, ug human sa Memoryal—sa pagtabang niadtong “nakiling sa pagdawat sa kamatuoran” aron makabenepisyo sila niini nga okasyon.—Buh. 13:48.

TABANGI ANG MGA DILI AKTIBO

17. Sa unsang paagi matabangan sa mga ansiyano ang mga dili aktibo? (Ezequiel 34:​12, 16)

¹⁷ Sa dili pa, panahon, ug human sa Memoryal, sa unsang paagi matabangan sa mga ansiyano ang mga dili aktibo? Ipakita ang imong gugma kanila. (Basaha ang Ezequiel 34:​12, 16.) Sa dili pa ang Memoryal, paningkamoti nga daghan kag makontak nga mga dili aktibo. Pasaligi sila nga gimahal nimo sila ug nga gusto nimo silang tabangan sa bisan unsang paagi. Imbitaha sila sa Memoryal. Kon motambong sila, abiabiha sila pag-ayo. Human sa Memoryal, padayong kontaka kining minahal nga mga igsoon, ug ihatag kanila ang bisan unsang espirituwal nga tabang nga ilang  gikinahanglan aron makabalik kang Jehova.—1 Ped. 2:25.

18. Sa unsang paagi kitang tanan makatabang sa mga dili aktibo? (Roma 12:10)

¹⁸ Ang tanan diha sa kongregasyon makatabang sa mga dili aktibo nga mitambong sa Memoryal. Unsaon nato na paghimo? Pakitaan nato silag gugma, kaayo, ug pagtahod. (Basaha ang Roma 12:10.) Hinumdomi nga kining minahal nga mga igsoon nagduhaduha tingali nga motambong ug tigom. Basin nahadlok sila nga dili sila abiabihon sa kongregasyon. e Maong mag-amping ta sa atong mga ipangutana ug isulti kanila aron dili sila maulawan o masakitan. (1 Tes. 5:11) Atong hinumdoman nga mga igsoon nato sila. Malipay ta nga makauban nato sila pag-usab sa pagsimba kang Jehova.—Sal. 119:176; Buh. 20:35.

19. Unsay mga kaayohan sa paghinumdom sa kamatayon ni Jesus?

¹⁹ Dili gyod ikatingala kon nganong gisugo ta ni Jesus nga saulogon ang Memoryal sa iyang kamatayon kada tuig. Dihang motambong ta sa Memoryal, makabenepisyo ta ug ang uban sa daghang paagi. (Isa. 48:​17, 18) Mas molawom ang atong gugma kang Jehova ug Jesus. Mapakita nato kon unsa ka dako ang atong apresasyon sa ilang gihimo para nato. Mas masuod ta sa mga igsoon. Ug matabangan nato ang uban nga mahibalo kon unsaon nga madawat pod nila ang mga panalangin nga gipaposible sa lukat. Busa himoon nato ang tanan natong maarangan aron maandam ta sa Memoryal niining tuiga—ang pinakaimportanteng adlaw sa tuig!