1. Nganong mobati tag kahadlok usahay?

 KITANG tanan mobatig kahadlok usahay. Siyempre, tungod sa atong pagtuon sa Bibliya, dili na ta mahadlok sa patay, sa mga demonyo, ug sa umaabot. Pero nagpuyo pa ta sa panahon nga punog “makalilisang nga mga talan-awon,” sama sa giyera, krimen, ug sakit. (Luc. 21:11) Basin mahadlok pod ta sa mga tawo, apil na sa gobyerno o bisan sa mga membro sa pamilya nga supak sa matuod nga pagsimba. Ang uban nabalaka nga dili nila malahutay ang pagsulay nga ilang giatubang karon o kaha ang ilang maatubang sa umaabot.

2. Unsay kahimtang ni David dihang didto siya sa Gat?

² Si David nakaatubang ug mga situwasyon nga nakapahadlok niya. Pananglitan, dihang gipangita siya ni Haring Saul aron patyon, si David miikyas ngadto sa Gat nga siyudad sa mga Filistehanon. Nahibaloan sa hari sa Gat, si Akis, nga si David ang banggiitang sundalo nga nakapatay ug “tinagpulo ka libo” ka Filistehanon. ‘Nahadlok pag-ayo’ si David. (1 Sam. 21:​10-12) Nabalaka siya kon unsaon siya ni Akis. Unsay gihimo ni David?

3. Sumala sa Salmo 56:​1-3, 11, giunsa pag-atubang ni David ang iyang kahadlok?

³ Sa Salmo 56, gisulti ni David ang iyang gibati dihang didto siya sa Gat. Makita nato niini nga salmo ang kahadlok ni David, pero gipakita pod niini kon giunsa niya pag-atubang ang iyang kahadlok. Dihang siya nahadlok, si David misalig kang Jehova. (Basaha ang Salmo 56:​1-3, 11.) Wala gyod siya masayop sa iyang pagsalig kang Jehova. Sa tabang ni Jehova, nakahunahuna si David ug talagsaon ug epektibong estratehiya: Nagpakaaron-ingnon siyang buang! Tungod ana, gisamokan si Akis kang David ug gipapahawa siya, maong nakaikyas siya.—1 Sam. 21:13–22:1.

4. Sa unsang paagi nato mapalig-on ang atong pagsalig kang Jehova? Iilustrar.

 ⁴ Maatubang pod nato ang atong kahadlok kon mosalig ta kang Jehova. Pero sa unsang paagi nato mapalig-on ang atong pagsalig kang Jehova, ilabina dihang mahadlok ta? Konsideraha ni nga ilustrasyon: Dihang mahibaloan nimo nga naa kay sakit, mahadlok tingali ka sa primero. Pero makuhaan ang imong kahadlok kon mosalig ka sa imong doktor. Basin daghan na siyag natabangan nga pasyente nga parehas nimog sakit. Tingali maminaw siya nimo, maong bation nimo nga nakasabot siya sa imong mga gikabalak-an. Ug basin mosugyot siyag paagi sa pagtambal nga misaler sa uban. Sa susama, mapalig-on nato ang atong pagsalig kang Jehova kon atong hunahunaon ang iyang mga nahimo, ginahimo, ug himoon pa sa umaabot. Mao nay gibuhat ni David. Samtang atong hisgotan ang pipila sa iyang giingon sa Salmo 56, hunahunaa kon unsa poy imong himoon aron mapalig-on ang imong pagsalig kang Jehova ug maatubang ang imong kahadlok.

UNSA NAY NAHIMO NI JEHOVA?

5. Aron maatubang ang iyang kahadlok, unsay gipamalandong ni David? (Salmo 56:​12, 13)

⁵ Dihang nameligro ang kinabuhi ni David, nagpokus siya sa kon unsa nay nahimo ni Jehova. (Basaha ang Salmo 56:​12, 13.) Sa tibuok kinabuhi ni David, kanay pirme niyang gihimo. Pananglitan, may mga higayon nga namalandong siya sa kalalangan ni Jehova, nga nagpahinumdom niya sa dakong gahom ug gugma ni Jehova sa mga tawo. (Sal. 65:​6-9) Gipamalandong pod ni David ang gihimo ni Jehova para sa uban. (Sal. 31:19; 37:​25, 26) Ug ilabina niyang gipamalandong kon unsa nay gihimo ni Jehova para niya. Gitabangan ug giproteksiyonan ni Jehova si David sukad sa gamay pa siya. (Sal. 22:​9, 10) Seguradong ang pagpamalandong ni David nakapalig-on sa iyang pagsalig kang Jehova!

6. Dihang mahadlok ta, unsay makatabang nato nga mosalig kang Jehova?

⁶ Dihang mahadlok ka, pangutan-a ang kaugalingon, ‘Unsa nay nahimo ni Jehova?’ Pamalandonga ang iyang mga gilalang. Pananglitan, dihang atong ‘panid-an pag-ayo’ kon giunsa  pag-atiman ni Jehova ang mga langgam ug bulak—nga wala lalanga sumala sa iyang larawan ug dili makasimba niya—molig-on ang atong pagsalig nga iya pod tang atimanon. (Mat. 6:​25-32) Pamalandonga pod ang nahimo ni Jehova para sa iyang mga magsisimba. Puwede nimong tun-an ang usa ka karakter sa Bibliya nga nagpakitag talagsaong pagtuo, o puwede pod kang magbasa ug eksperyensiya sa mga alagad ni Jehova sa modernong panahon. a Dugang pa, pamalandonga kon giunsa ka pag-atiman ni Jehova. Sa unsang paagi ka niya gikabig sa kamatuoran? (Juan 6:44) Giunsa niya pagtubag ang imong mga pag-ampo? (1 Juan 5:14) Sa unsang paagi ka nakabenepisyo kada adlaw tungod sa halad lukat sa iyang pinanggang Anak?—Efe. 1:7; Heb. 4:​14-16.

7. Sa unsang paagi ang eksperyensiya ni propetang Daniel nakatabang kang Vanessa aron mawala ang iyang kahadlok?

⁷ Si Vanessa, b sister nga taga-Haiti, nakaatubang ug makapahadlok nga situwasyon. Naay lalaki sa ilang lugar nga nagsigeg pamugos nga sugton siya ni Vanessa. Magsige nig panawag ug text niya kada adlaw, pero wala gyod mosugot si Vanessa. Nahimong mas agresibo ang lalaki ug gibaharan pa gani siya. “Nahadlok ko,” miingon si Vanessa. Unsay iyang gihimo? Mihimo siyag praktikal nga mga paagi aron maproteksiyonan ang iyang kaugalingon. Naay ansiyano nga mitabang niya nga moreport sa mga awtoridad. Pero gihunahuna pod niya kon giunsa pagpanalipod ni Jehova ang iyang mga alagad sa una. “Nahunahunaan dayon nako si propetang Daniel,” miingon si Vanessa. “Gihulog siya sa bangag nga naay mga leyon bisag wala siyay sala. Pero giproteksiyonan siya ni Jehova. Gihangyo nako si Jehova nga siya nay bahala sa tanan. Human adto, wala na ko mahadlok.”—Dan. 6:​12-22.

UNSAY GINAHIMO NI JEHOVA KARON?

8. Sa unsa kombinsido si David? (Salmo 56:8)

⁸ Bisag nameligro pag-ayo si David dihang didto siya sa Gat, wala siya magpadala sa iyang kahadlok. Hinuon, nagpokus siya sa kon unsay ginahimo ni Jehova para niya niadtong panahona. Nakita ni David nga gigiyahan ug giprotektahan siya ni Jehova ug nga nasabtan Niya ang iyang gibati. (Basaha ang Salmo 56:8.) Gisuportahan pod siya sa iyang mga higala, sama ni Jonatan ug sa hataas nga saserdote nga si Ahimelek, kinsa nagmaunongon niya ug naghatag niyag praktikal nga tabang. (1 Sam. 20:​41, 42; 21:​6, 8, 9) Ug bisag naningkamot si Haring Saul nga patyon siya, wala gyod ni molampos. Kombinsido si David nga nahibalo gyod si Jehova sa iyang pagsulay ug kon unsay epekto niana sa iyang emosyon.

9. Unsay makita ni Jehova sa matag usa kanato?

⁹ Kon nag-atubang kag pagsulay nga nakapahadlok nimo, hinumdomi nga nakita ni Jehova ang pagsulay ug ang imong gibati tungod niana. Pananglitan, nakita ni Jehova dili lang ang pagdaogdaog nga nasinatian sa mga Israelinhon sa Ehipto kondili apil na pod ang “ilang mga kasakit.” (Ex. 3:7) Si David miawit nga nakita ni Jehova ang iyang “kasakitan” ug “grabeng kagul-anan.” (Sal. 31:7) Ug dihang nakita sa Diyos nga nag-antos ang iyang katawhan—bisag resulta ni sa ilang dili maayong mga desisyon—“siya nasakitan.” (Isa. 63:9) Dihang mahadlok ka, makasabot si Jehova sa imong gibati ug gusto kaayo siyang motabang nimo aron mawala ang imong kahadlok.

10. Nganong kombinsido ka nga nakita ka ni Jehova ug tabangan ka niya nga makaya ang bisan unsang pagsulay?

 ¹⁰ Dihang mag-atubang kag makapahadlok nga pagsulay, dili tingali nimo makita kon sa unsang paagi ka ginatabangan ni Jehova. Busa hangyoa siya nga tabangan kang makita kana. (2 Hari 6:​15-17) Dayon hunahunaa: Naa bay pakigpulong o komento diha sa tigom nga nakapalig-on nimo? Naa bay publikasyon, video, o original song nga nakadasig nimo? Naa bay nag-share nimog makapahupay nga punto o teksto? Usahay, malimot tingali ta kon unsa ka dako ang gugma sa mga igsoon kanato ug kon sa unsang paagi ta napalig-on sa espirituwal nga pagkaon nga atong nadawat. Pero kini maoy talagsaon kaayong mga regalo gikan kang Jehova. (Isa. 65:13; Mar. 10:​29, 30) Pamatuod ni nga gimahal ta niya. (Isa. 49:​14-16) Pamatuod pod ni nga makasalig gyod ta niya.

11. Unsay nakatabang kang Aida nga mawala ang iyang kahadlok?

¹¹ Si Aida, nga taga-Senegal, namalandong kon giunsa siya pagtabang ni Jehova dihang nag-atubang siyag pagsulay. Kay siya ang kinamagulangan, nagdahom ang iyang ginikanan nga manginabuhi siya para nila ug para sa iyang kaugalingon. Pero dihang nagpasimple siya sa iyang kinabuhi aron makapayunir, naglisod siya sa pinansiyal. Nasuko pag-ayo ang iyang pamilya ug gisultihan siyag sakit nga mga pulong. “Nahadlok ko nga dili nako matabangan ang akong ginikanan ug isalikway ko sa tanan,” siya miingon. “Gibasol pa gani nako si Jehova kay iyang gitugotan nga mosamot ang kahimtang.” Dayon nakadungog siyag pakigpulong sa tigom. “Ang speaker miingon nga nakita ni Jehova ang tanang kasakit sa atong kasingkasing. Tungod sa tambag sa mga ansiyano ug sa uban, anam-anam kong napasaligan sa gugma ni Jehova. Nabalik ang akong pagsalig kang Jehova ug nagmalinawon ang akong hunahuna kay nakita nako nga gitubag niya ang akong mga pag-ampo.” Sa ngadtongadto, si Aida nakakitag trabaho nga makasuportar sa iyang pagpayunir ug makatabang sa panginahanglan sa iyang ginikanan ug sa uban. “Nakakat-on ko nga bug-os mosalig kang Jehova,” siya  miingon. “Karon, dihang mag-ampo ko, sagad mawala ang akong kahadlok.”

UNSAY HIMOON NI JEHOVA SA UMAABOT?

12. Base sa Salmo 56:​9, sa unsa masaligon si David?

¹² Basaha ang Salmo 56:9. Gipakita niini nga bersikulo ang laing paagi nga nakatabang kang David aron mawala ang iyang kahadlok. Bisag nameligro gihapon ang iyang kinabuhi, gipamalandong niya kon unsa pay himoon ni Jehova para niya sa umaabot. Nahibalo si David nga luwason siya ni Jehova sa hustong panahon. Kon buot hunahunaon, gisulti na ni Jehova nga si David ang sunod nga hari sa Israel. (1 Sam. 16:​1, 13) Para kang David, ang tanang gisaad ni Jehova seguradong matuman.

13. Unsay seguradong buhaton ni Jehova?

¹³ Unsay gisaad ni Jehova nga iyang himoon para nimo? Wala siya magsaad nga dili ta makasinatig mga problema karon. c Pero bisag unsa pang pagsulay ang atong maatubang niining sistemaha, wad-on kana ni Jehova sa umaabot nga bag-ong kalibotan. (Isa. 25:​7-9) Ang atong Maglalalang gamhanan kaayo, ug kaya niyang banhawon ang mga patay, ayohon ang atong pisikal ug emosyonal nga kasakit, ug laglagon ang tanan natong kaaway.—1 Juan 4:4.

14. Unsay puwede natong pamalandongon?

¹⁴ Dihang mahadlok ka, pamalandonga ang himoon ni Jehova sa umaabot. Hunahunaa kon unsay imong bation dihang laglagon na si Satanas, dihang ang mga daotan mawala na ug ang yuta mapunog matarong nga mga tawo, ug dihang ang atong pagkadili-hingpit anam-anam nga mawala kada adlaw. Sa 2014 nga rehiyonal nga kombensiyon, naay pasundayag nga nagpakita kon unsay puwede natong pamalandongon bahin sa atong paglaom. Gihisgotan sa usa ka amahan uban sa iyang pamilya kon unsa kahay pagkabalay sa 2 Timoteo 3:​1-5 kon nagtagna ni bahin sa kinabuhi sa Paraiso: “Sa bag-ong kalibotan moabot ang labing malipayong mga panahon. Kay ang mga tawo unya mahigugmaon na sa uban, mahigugmaon sa espirituwal nga bahandi, makasaranganon, mapainubsanon, magadayeg na sa Diyos, masinugtanon sa mga ginikanan, mapasalamaton, maunongon, may dakong gugma sa ilang pamilya, daling ikasabot, dili na mabutangbutangon, may pagpugong sa kaugalingon, malumo, mahigugmaon sa pagkamaayo, kasaligan, mapinasakopon, dili garboso, mahigugmaon sa Diyos imbes mahigugmaon sa kalipayan, naay tinuod nga diyosnong debosyon; ug angay kang makigsuod niini nga mga tawo.” Ginahisgotan ba ninyo sa inyong pamilya o sa mga igsoon sa kongregasyon kon unsa unyay kinabuhi sa bag-ong kalibotan?

15. Bisag nahadlok si Tanja, unsay nakatabang niya sa pag-atubang niana?

¹⁵ Naatubang ni Tanja, sister sa North Macedonia, ang iyang kahadlok pinaagi sa pagpamalandong sa umaabot nga mga panalangin. Ang iyang ginikanan supak kaayo sa iyang pagtuon sa Bibliya. Siya miingon: “Ang uban sa mga butang nga akong gikahadlokan nahitabo gyod. Kulatahon ko ni Mama kada uli nako gikan sa tigom. Gibaharan pod ko sa akong ginikanan nga patyon ko nila kon mahimo kong Saksi ni Jehova.” Sa ulahi, gipalayas si Tanja sa ilang balay. Giunsa ni niya pag-atubang? Siya miingon: “Pirme nakong gihunahuna kon unsa unya ka malipayon ang akong kinabuhi hangtod sa hangtod kon dili ko mobiya kang Jehova. Gipamalandong pod nako ang mga panalangin nga ihatag ni Jehova sa bag-ong kalibotan puli sa mga butang nga posibleng  mawala kanako niining sistemaha, ug malimtan na nako ang tanang pait nga eksperyensiya.” Nagmatinumanon gyod si Tanja. Ug sa tabang ni Jehova, nakakita ra siyag kapuy-an. Karon, minyo na siya sa usa ka matinumanong brader ug malipayon silang nag-alagad sa bug-os panahon.

PALIG-ONA ANG IMONG PAGSALIG KARON

16. Unsay makatabang nato nga magpabiling maisogon dihang matuman na ang gitagna sa Lucas 21:​26-28?

¹⁶ Panahon sa dakong kasakitan, ang mga tawo “panguyapan tungod sa kahadlok.” Pero ang katawhan sa Diyos magpabiling lig-on ug maisogon. (Basaha ang Lucas 21:​26-28.) Ngano? Kay nakakat-on na ta sa pagsalig kang Jehova. Si Tanja, nga gihisgotan ganina, miingon nga ang iyang pait nga mga kasinatian nakatabang niya sa pag-atubang sa ubang lisod nga mga situwasyon. “Nakat-onan nako nga walay situwasyon nga dili kayang maniobrahon ni Jehova para sa atong kaayohan,” siya miingon. “Usahay, morag kontrolado sa uban ang situwasyon. Pero ang tinuod, limitado ra ang ilang mahimo kay mas gamhanan si Jehova. Ug bisag lisod ang pagsulay, matapos ra ni.”

17. Sa unsang paagi ang tinuig nga teksto sa 2024 makatabang nato? (Tan-awa ang hulagway sa atubangan sa magasin.)

¹⁷ Daghang butang karon ang makapahadlok nato. Pero sama kang David, dili ta angayng magpadaog sa atong kahadlok. Ang atong tinuig nga teksto sa 2024 maoy pag-ampo ni David kang Jehova: “Dihang mahadlok ko, mosalig ko nimo.” (Sal. 56:3) Bahin niini nga bersikulo, ang usa ka reperensiya nag-ingon nga si David “wala magsigeg hunahuna sa iyang mga gikahadlokan o magsigeg hinuktok sa iyang mga problema. Hinuon, misalig siya nga tabangan siya sa iyang Manluluwas.” Hunahunaa ang atong tinuig nga teksto niining tuiga, ilabina dihang mag-atubang kag makapahadlok nga mga situwasyon. Pamalandonga ang mga nahimo na ni Jehova, ang iyang ginahimo, ug ang iyang himoon sa umaabot. Dayon, sama kang David, makaingon pod ta: “Sa Diyos ako mosalig; dili ko mahadlok.”—Sal. 56:4.