Naay mga nagdako sa kultura diin daghan sa mga lalaki ang nagpakaubos sa mga babaye. Pananglitan, si Hans, nga tigdumala sa sirkito sa Bolivia, miingon: “Ang pipila ka lalaki nagdako sa kultura nga nagdasig nila nga mahimong mapahitas-on kaayo. Kini nga mga lalaki naghunahuna nga mas labaw sila kay sa mga babaye, ug sagad wala silay pagtahod nila.” Si Shengxian, ansiyano sa Taiwan, miingon: “Sa among lugar, daghang lalaki ang naghunahuna nga ang mga babaye dili angayng mohatag sa ilang opinyon ngadto sa mga lalaki. Kon isulti sa lalaki ang opinyon sa babaye, mawad-ag pagtahod ang ubang lalaki kaniya.” Gipakita sa ubang lalaki ang ilang pagpihigpihig sa mga babaye sa mga paagi nga dili kaayo mailhan. Pananglitan, mosulti silag mga joke bahin sa mga babaye nga nagpakitag kawalay pagtahod.

Makapalipay kay bisag unsa pang kultura ang gidak-an sa usa ka lalaki, puwede siyang magbag-o. Madaog niya ang pagbati nga ang mga lalaki mas labaw kay sa mga babaye. (Efe. 4:​22-24) Mahimo ni niya pinaagi sa pagsundog sa ehemplo ni Jehova. Niining artikuloha, atong hisgotan kon giunsa pagtratar ni Jehova ang mga babaye, kon sa unsang paagi ang mga brader makakat-on sa pagtratar sa mga babaye sama sa pagtratar ni Jehova kanila, ug kon sa unsang paagi ang mga ansiyano manguna sa pagpakitag pagtahod sa mga sister.

GIUNSA PAGTRATAR NI JEHOVA ANG MGA BABAYE?

Si Jehova naghatag ug hingpit nga ehemplo kon unsaon pagtratar ang mga babaye. Ingong maluluy-ong Amahan, gimahal niya ang iyang tawhanong pamilya. (Juan 3:16) Ug ang matinumanong mga sister, samag pinalangga niyang mga anak. Hisgotan nato kon sa unsang paagi gipakita ni Jehova ang iyang gugma ug pagtahod sa mga babaye.

Patas ang iyang pagtratar nila. Gibuhat ni Jehova ang lalaki ug babaye sumala sa iyang larawan. (Gen. 1:27) Wala niya himoa ang mga lalaki nga mas brayt o mas hawod kay sa mga babaye. Ug pareho lang  ang iyang pagtratar sa mga lalaki ug mga babaye. (2 Cron. 19:7) Parehong gilalang ni Jehova ang lalaki ug babaye nga may katakos nga masabtan ang mga kamatuoran sa Bibliya ug masundog ang iyang nindot nga mga hiyas. Patas sab ang iyang panglantaw sa iyang matinumanong mga alagad—lalaki man sila o babaye. Ug parehas niya silang gihatagan ug paglaom nga mabuhi sa walay kataposan—sa paraisong yuta man o didto sa langit ingong mga hari ug saserdote. (2 Ped. 1:1) Klaro nga si Jehova walay pagpihigpihig sa mga babaye.

Naminaw siya kanila. Si Jehova interesado sa gibati ug gikabalak-an sa mga babaye. Pananglitan, naminaw siya sa mga pag-ampo ni Raquel ug ni Ana, ug iya ning gitubag. (Gen. 30:22; 1 Sam. 1:​10, 11, 19, 20) Gipasulat pod ni Jehova diha sa Bibliya ang mga asoy bahin sa mga lalaki nga naminaw sa mga babaye. Pananglitan, gisunod ni Abraham ang instruksiyon ni Jehova nga maminaw sa iyang asawa nga si Sara. (Gen. 21:​12-14) Si Haring David naminaw kang Abigail. Gani, gibati niya nga gipadala ni Jehova si Abigail aron estoryahon siya. (1 Sam. 25:​32-35) Si Jesus, nga hingpit nga nagsundog sa mga hiyas sa iyang Amahan, naminaw sa iyang inahan nga si Maria. (Juan 2:​3-10) Kini nga mga pananglitan nagpakita nga ang usa ka paagi nga si Jehova nagpakitag pagtahod sa mga babaye maoy pinaagi sa pagpaminaw kanila.

Misalig siya kanila. Pananglitan, misalig si Jehova kang Eva sa pagtabang nga maatiman ang tibuok yuta. (Gen. 1:28) Pinaagi ana, gipakita niya nga giisip niya si Eva, dili ingong mas ubos kang Adan, kondili ingong katimbang sa iyang bana. Misalig pod si Jehova sa babaye nga mga propeta nga si Debora ug Hulda sa pagpasidaan sa iyang katawhan, apil na sa usa ka maghuhukom ug usa ka hari. (Mag. 4:​4-9; 2 Hari 22:​14-20) Karon, misalig si Jehova sa Kristohanong mga babaye sa paghimo sa iyang buluhaton. Kining matinumanong mga sister nag-alagad ingong mga magmamantala, payunir, ug misyonaryo. Mitabang sila sa pag-design, pagtukod, ug pagmentinar sa mga Kingdom Hall ug mga pasilidad sa branch. Ang uban nila nag-alagad sa Bethel ug sa mga remote translation office. Kini nga mga sister samag dakong panon nga gigamit ni Jehova sa pagtuman sa iyang kabubut-on. (Sal. 68:11) Klaro nga wala isipa ni Jehova ang mga babaye ingong huyang o walay abilidad.

SA UNSANG PAAGI ANG MGA BRADER MAKAKAT-ON SA PAGTRATAR SA MGA BABAYE SAMA SA PAGTRATAR NI JEHOVA KANILA?

Mga brader, aron mahibaloan kon gitratar ba nato ang mga sister sama sa pagtratar ni Jehova kanila, kinahanglang matinud-anon natong susihon ang atong panghunahuna ug binuhatan. Ug aron mahimo nato na, nagkinahanglan tag tabang. Sama nga ang X-ray machine maka-detect kon naa bay sakit sa kasingkasing ang usa ka tawo, ang maayong higala ug ang Pulong sa Diyos makatabang nato nga makita kon naa ba tay negatibong pagbati bahin sa mga babaye diha sa atong kasingkasing. Unsay atong mahimo aron madawat na nga tabang?

Pangutan-a ang usa ka maayong higala. (Prov. 18:17) Makatabang kon moduol ta sa usa ka kasaligang higala kinsa nailhan nga buotan ug makataronganon. Puwede nato siyang pangutan-on: “Unsay imong hunahuna sa pagtratar nako sa mga sister? Makaingon kaha sila nga gitahod nako sila? Unsa pa kahay puwede nakong pauswagon sa akong pagtratar kanila?” Kon naay isulti ang imong higala nga puwede nimong pauswagon, likayi nga mangatarongan. Hinuon, paningkamot nga mahimo ang gikinahanglang mga kausaban.

Tun-i ang Pulong sa Diyos. Ang pinakamaayong paagi aron mahibaloan nato kon maayo ba ang atong pagtratar sa mga sister mao ang paggamit sa Pulong sa Diyos sa pagsusi sa atong kinaiya ug binuhatan. (Heb. 4:12) Samtang atong tun-an ang Bibliya, makakat-on ta bahin sa mga lalaki nga maayog pagtratar sa mga babaye, ug sa mga lalaki nga wala naghimo niana. Dayon, puwede natong ikompara kini nga mga pananglitan sa atong paagi sa pagtratar sa mga babaye. Dugang pa, kon ikompara nato ang lainlaing teksto sa Bibliya, malikayan nato nga gamiton ang usa ka teksto aron suportahan ang usa ka sayop nga ideya bahin sa mga babaye. Pananglitan, ang 1 Pedro 3:7 nag-ingon nga ang asawa angayng ‘pasidunggan . . . ingong mas huyang nga sudlanan.’ a Nagpasabot ba ni nga siya ubos—dili kaayo brayt  o abilidaran—kay sa lalaki? Wala! Kay kon ikompara nato ang giingon ni Pedro nianang sa Galacia 3:​26-29, mabasa nato nga dili lang mga lalaki ang gipili ni Jehova nga magmando uban ni Jesus didto sa langit kondili apil pod ang mga babaye. Kon atong tun-an ang Pulong sa Diyos ug pangutan-on ang usa ka maayong higala sa iyang ikasulti bahin sa pagtratar nato sa mga babaye, makakat-on ta sa pagpakitag hustong pagtahod sa mga sister.

SA UNSANG PAAGI ANG MGA ANSIYANO MAKAPAKITAG PAGTAHOD SA MGA SISTER?

Ang mga brader sa kongregasyon makakat-on pod kon unsaon pagpakitag pagtahod sa mga sister pinaagi sa pagsunod sa ehemplo sa mahigugmaong mga ansiyano. Sa unsang paagi ang mga ansiyano makahatag ug maayong ehemplo nianang bahina? Konsideraha ang pipila ka pananglitan.

Ilang komendahan ang mga sister. Si apostol Pablo naghatag ug maayong ehemplo nga masundog sa mga ansiyano. Gikomendahan niya ang pipila ka sister sa iyang sulat sa kongregasyon sa Roma, ug daghan ang nakadungog bahin niini. (Roma 16:12) Ma-imagine ba nimo kon unsa ka malipayon ang maong mga sister dihang gibasa ang sulat ni Pablo sa kongregasyon? Sa susama, ang mga ansiyano kanunayng andam nga mohatag ug komendasyon sa mga sister tungod sa ilang maayong mga hiyas ug sa ilang ginahimo para kang Jehova. Makatabang ni nga mobati ang mga sister nga gitahod ug giapresyar gyod sila. Ang makapadasig nga mga pulong sa usa ka ansiyano basig mao gyoy gikinahanglan niini nga mga sister samtang naningkamot sila nga mag-alagad kang Jehova nga matinumanon.—Prov. 15:23.

Dihang mohatag ug komendasyon sa mga sister, ang mga ansiyano maningkamot nga mahimong sinsero ug espesipiko. Ngano? Ang sister nga si Jessica miingon: “Malipay mi dihang sultihan mi sa mga brader ug ‘very good.’ Pero mas maapresyar namo kon espesipiko ang komendasyon sa mga brader, sama sa pagpasalamat namo kay gitudloan namo ang mga bata nga magpuyo panahon sa tigom, o kay naningkamot mi nga masundo ang Bible study aron  makatambong siya sa tigom.” Busa kon espesipiko ang ihatag nga komendasyon sa mga ansiyano, mobati ang mga sister nga gikinahanglan ug gipabilhan sila sa kongregasyon.

Ilang paminawon ang mga sister. Ilhon sa mapainubsanong mga ansiyano nga dili lang sila ang naay maayong mga ideya. Ang maong mga ansiyano magdasig sa mga sister nga isulti ang ilang mga sugyot, ug maminaw sila pag-ayo. Pinaagi ana, madasig ang mga sister ug makabenepisyo pod ang mga ansiyano. Sa unsang paagi? Ang ansiyano nga si Gerardo, nga nag-alagad sa Bethel, miingon: “Namatikdan nako nga kon mangayo kog sugyot sa mga sister, mas mahimo nakog maayo ang akong trabaho. Sagad, mas taas silag eksperyensiya sa trabaho kay sa ubang brader.” Diha sa kongregasyon, daghang sister ang nag-alagad ingong payunir, busa daghan silag nahibaloan bahin sa mga tawo nga nagpuyo sa ilang lugar. Ang ansiyano nga si Bryan miingon: “Ang atong mga sister daghag nindot nga hiyas ug mga skill nga gikinahanglan sa organisasyon. Busa makabenepisyo gyod ta sa ilang eksperyensiya!”

Konsiderahon sa maalamong mga ansiyano ang sugyot sa mga sister. Ngano? “Ang opinyon ug eksperyensiya sa usa ka sister makatabang sa brader nga makita ang katibuk-ang situwasyon, ug makatabang pod ni niya nga mas masabtan ang pagbati sa uban,” miingon ang ansiyano nga si Edward. (Prov. 1:5) Kon dili posible nga masunod ang gisugyot sa sister, puwede gihapon siyang pasalamatan sa iyang obserbasyon ug sa pagsulti niya sa iyang nahibaloan.

Ilang bansayon ang mga sister. Ang maalamong mga ansiyano mangita pod ug kahigayonan nga mabansay ang mga sister. Pananglitan, puwede nilang tudloan ang mga sister kon unsaon pagdumala ug mga tigom alang sa pagsangyaw enkasog walay bawtismadong brader nga makadumala. Puwede pod nilang bansayon ang mga sister sa pag-operate ug mga tool o machine aron makatabang sila sa pagmentinar sa atong mga pasilidad ug sa mga construction project. Sa Bethel, gibansay sa mga overseer ang mga sister sa pag-atiman sa lainlaing asaynment sama sa maintenance, purchasing, accounting, computer programming, ug uban pa. Dihang bansayon sa mga ansiyano ang mga sister, gipakita nila nga ila silang giisip ingong kasaligan ug naay katakos sa paghimo sa mga asaynment.

Gigamit sa daghang sister ang pagbansay nga ilang nadawat sa mga ansiyano aron tabangan ang uban. Pananglitan, gigamit sa pipila ka sister ang pagbansay nga ilang nadawat sa construction aron tabangan ang uban sa pagtukod pag-usab sa ilang mga balay human sa kalamidad. Naa poy mga sister nga naggamit sa mga skill nga ilang nakat-onan sa pagsangyaw sa publiko aron bansayon ang ubang sister niini nga paagi sa pagsangyaw. Unsay gibati sa mga sister bahin sa mga ansiyano nga nagbansay nila? Ang sister nga si Jennifer miingon: “Dihang miboluntaryo ko sa usa ka proyekto sa pagtukod ug Kingdom Hall, naggahin gyod ug panahon ang usa ka overseer aron bansayon ko. Namatikdan niya ang akong mga paningkamot, ug gikomendahan ko niya. Ganahan kong magtrabaho uban niya kay gibati nako nga gipabilhan ug gisaligan ko.”

MGA BENEPISYO SA PAGTRATAR SA MGA SISTER NGA SAMAG ATONG PAMILYA

Sama kang Jehova, gimahal nato ang atong matinumanong mga sister mao nga gitratar nato sila nga samag atong pamilya. (1 Tim. 5:​1, 2) Proud kaayo ta nila ug pribilehiyo nato nga mag-alagad uban nila. Ug malipay kaayo ta dihang ilang bation ang atong gugma ug suporta. Ang sister nga si Vanessa miingon: “Mapasalamaton kaayo ko kang Jehova kay bahin ko sa iyang organisasyon nga daghag mga brader nga nakadasig kaayo nako.” Ang usa ka sister nga taga-Taiwan miingon: “Mapasalamaton kaayo ko nga si Jehova ug ang iyang organisasyon nagpabili pag-ayo sa mga babaye ug sa among mga pagbati. Kini nakapalig-on sa akong pagtuo ug nakatabang nako nga mas maapresyar ang pribilehiyo nga mahimong bahin sa organisasyon ni Jehova.”

Seguradong proud kaayo si Jehova dihang makita niya ang matinumanong Kristohanong mga lalaki nga naningkamot sa pagsundog sa iyang panglantaw ug pagtratar sa mga babaye! (Prov. 27:11) “Daghang lalaki sa kalibotan ang wala gyoy pagtahod sa mga babaye,” miingon ang ansiyano sa Scotland nga si Benjamin. “Mao nga dihang naay babaye nga mosulod sa Kingdom Hall, gusto nato nga bation nila nga lahi gyod ta sa kalibotan.” Hinaot nga maningkamot ta nga sundogon si Jehova pinaagi sa pagtratar sa atong minahal nga mga sister uban ang gugma ug pagtahod nga angay gyod nilang madawat.—Roma 12:10.