1-2. Unsa nga mga kalisdanan ang posibleng maatubang sa matinumanong mga alagad ni Jehova?

 ANG atong kinabuhi puwedeng kalit nga mausab tungod sa usa ka makapaguol nga panghitabo. Pananglitan, ang matinumanong brader nga si Luis a nadayagnos nga naay dili komon nga klase sa cancer. Giingnan siya sa doktor nga pipila ka bulan na lang ang iyang kinabuhi. Si Monika ug ang iyang bana busy sa espirituwal nga mga kalihokan. Pero usa ka adlaw, nahibaloan ni Monika nga ang iyang bana, nga usa ka ansiyano, pipila ka tuig na diay nga doble ug pagkinabuhi. Si Olivia, nga tagsaanong sister, napugos nga mobakwet tungod sa nagsingabot nga kusog nga bagyo. Pagbalik niya, naguba na ang iyang balay tungod sa bagyo. Kalit kaayo nga nausab ang kinabuhi niini nga mga indibiduwal. Maka-relate ba ka sa ilang naeksperyensiyahan? Nakaatubang ba kag kalisdanan nga morag kalit nga nahugno ang imong kalibotan?

² Ingong matinumanong mga alagad ni Jehova, makaatubang tag mga kalisdanan ug masakit sama sa masinatian sa tanang tawo. Basin kinahanglan pod tang molahutay sa pagsupak o paglutos gikan niadtong nagdumot sa katawhan sa Diyos. Bisag dili pugngan ni Jehova nga mahitabo kanato ang maong mga kalisdanan, nagsaad siya nga tabangan ta niya. (Isa. 41:10) Pinaagi sa iyang tabang, makapabilin tang malipayon, makahimog maayong mga desisyon, ug makapabiling maunongon kaniya bisan sa pinakalisod nga mga situwasyon. Niining artikuloha, hisgotan nato ang upat ka paagi nga tabangan ta ni Jehova sa lisod nga mga panahon sa atong kinabuhi. Konsiderahon pod nato kon unsay kinahanglan natong himoon aron makabenepisyo ta sa iyang tabang.

 SI JEHOVA MAGBANTAY KANIMO

3. Dihang mag-atubang tag makapaguol nga panghitabo, sa unsa tingali ta malisdan?

³ Ang problema. Dihang makaatubang ug makapaguol nga panghitabo, malisdan tingali ta sa paghunahunag tarong o sa paghimog mga desisyon. Ngano? Kay basig ang atong kasingkasing nasakitan pag-ayo ug ang atong hunahuna nabug-atan sa kabalaka. Bation tingali nato nga morag gipalibotan tag bagang gabon, nga wala ta mahibalo kon asa ta paingon. Matikdi kon unsay gibati sa duha ka sister nga gihisgotan ganina dihang nag-atubang sila sa kalisdanan. Si Olivia miingon: “Human maguba sa bagyo ang akong balay, wala ko kabalo kon unsay himoon ug nabalaka kaayo ko.” Si Monika miingon bahin sa pagluib sa iyang bana: “Wala lang ko basta madismaya. Gibati nako nga morag gidunggab ang akong kasingkasing. Nalisdan kog himo bisan sa simpleng mga butang. Di gyod ko katuo nga nahitabo ni nako.” Unsa nga tabang ang gisaad ni Jehova nato dihang mabug-atan ta sa mga problema?

4. Sumala sa Filipos 4:​6, 7, unsay gisaad ni Jehova kanato?

⁴ Ang himoon ni Jehova. Siya nagsaad nga ihatag niya kanato ang gitawag sa Bibliya ug “kalinaw nga gikan sa Diyos.” (Basaha ang Filipos 4:​6, 7.) Kini nga kalinaw nagtumong sa pagkakalmado sa atong hunahuna ug kasingkasing nga resulta sa atong suod nga relasyon kaniya. Kini ‘molabaw sa tanang pagsabot’; sobra pa ni sa kaya natong ma-imagine. Nakasulay na ba mo nga human ninyog ampo nga kinasingkasing kang Jehova mikalma mo pag-ayo? Kana nga pagbati mao ang “kalinaw nga gikan sa Diyos.”

5. Sa unsang paagi ang kalinaw sa Diyos magbantay sa atong hunahuna ug kasingkasing?

⁵ Ang mao ra gihapon nga teksto nag-ingon nga ang kalinaw sa Diyos “magbantay,” o manalipod, “sa inyong kasingkasing ug hunahuna.” Ang orihinal nga pulong para sa “magbantay” maoy usa ka ekspresyon nga nagtumong sa pagbantay sa mga sundalo sa usa ka siyudad aron mapanalipdan ni gikan sa mga kaaway. Ang mga nagpuyo niana nga siyudad makatulog nga malinawon kay nahibalo sila nga ang mga guwardiya nagbantay sa mga ganghaan. Sa susama, dihang ang kalinaw sa Diyos magbantay sa atong kasingkasing ug hunahuna, mobati tang kalmado kay nahibalo ta nga luwas ta. (Sal. 4:8) Sama sa nahitabo kang Ana, bisag dili dayon mausab ang atong kahimtang, puwede gihapon tang mobatig kalinaw. (1 Sam. 1:​16-18) Ug kon kalmado ta, mas sayon para nato nga maghunahunag tarong ug mohimog maalamong mga desisyon.

6. Unsay atong himoon aron makabenepisyo ta sa kalinaw nga gikan sa Diyos? (Tan-awa sab ang hulagway.)

⁶ Ang kinahanglan natong himoon. Dihang mabalaka, tawga ang tigbantay, ingnon ta. Sa  unsang paagi? Pag-ampo hangtod nga bation nimo ang kalinaw nga gikan sa Diyos. (Luc. 11:9; 1 Tes. 5:17) Si Luis, nga gihisgotan ganina, misulti kon unsay nakatabang niya ug sa iyang asawa nga si Ana dihang nahibaloan nila nga pipila na lang ka bulan ang iyang kinabuhi. Siya miingon: “Sa ingon ani nga mga panahon, lisod kaayong mohimog mga desisyon bahin sa panglawas ug sa ubang butang. Pero ang pag-ampo dako kaayog tabang aron magmalinawon mi bisan niining lisod kaayo nga panahon.” Si Luis ug ang iyang asawa miingon nga kinasingkasing ug balikbalik silang nag-ampo, ug ilang gihangyo si Jehova nga hatagan silag kalinaw sa hunahuna, kalmadong kasingkasing, ug kaalam sa paghimog maayong mga desisyon. Ug ilang gibati ang iyang tabang. Kon nag-atubang pod kag kalisdanan, lahutay sa pag-ampo, ug imong maeksperyensiyahan kon sa unsang paagi ang kalinaw sa Diyos magbantay sa imong kasingkasing ug hunahuna.—Roma 12:12.

SI JEHOVA MOTABANG NIMO NGA MAHIMONG BALANSE

7. Unsa tingali atong bation dihang makaatubang tag lisod nga pagsulay?

⁷ Ang problema. Dihang mag-atubang ug lisod nga pagsulay, ang atong pagbati ug panghunahuna basin mahimong dili balanse ug maapektohan tingali ang atong reaksiyon. Samag barko nga gikusokuso sa kusog nga mga balod, mobati pod tingali ta nga gikusokuso ta sa lainlaing emosyon. Si Ana, nga gihisgotan ganina, miingon nga dihang namatay si Luis lainlaing emosyon ang iyang gibati. Siya miingon: “Usahay mobati kog grabeng kaguol, ug maluoy kaayo ko sa akong kaugalingon. May mga panahon pod nga masuko ko kay wala na siya.” Dugang pa, si Ana mibating nag-inusara, ug nabug-atan siya kay siya nay mohimo sa mga desisyon nga kaniadto ginahimo ni Luis. Usahay, mobati siya nga morag naa siya sa dagat nga gibagyo. Sa unsang paagi si Jehova motabang nato dihang malumsan ta sa maong mga emosyon?

8. Sumala sa Isaias 33:​6, unsay gipasalig ni Jehova kanato?

⁸ Ang himoon ni Jehova. Nagpasalig siya nga hatagan ta niyag kasegurohan, sa laing pagkasulti, tabangan ta niya nga mahimong balanse. (Basaha ang Isaias 33:6.) Dihang ang barko makaatubang ug bagyo, magtuyatuya tingali ni. Pero aron magpabiling balanse, daghang barko ang naay mga stabilizer (nga morag katig) sa isigkakilid ilalom sa tubig. Makatabang ni aron ang barko dili kaayo magtuyatuya ug ang mga pasahero mas luwas ug dili kaayo malisdan sa biyahe. Pero kini nga mga stabilizer mas epektibo kon ang barko padayong nagdagan. Sa susama, tabangan ta ni Jehova nga mahimong balanse kon padayon  tang mag-alagad kaniya nga matinumanon panahon sa mga pagsulay.

9. Sa unsang paagi makatabang ang atong mga research tool aron magpabilin tang balanse? (Tan-awa sab ang hulagway.)

⁹ Ang kinahanglan natong himoon. Dihang mabug-atan kaayo ka sa imong mga emosyon, paningkamot nga dili mapasagdan ang imong espirituwal nga rutina. Siyempre, dili na tingali nimo mahimo karon ang imong mahimo kaniadto, pero hinumdomi nga si Jehova makataronganon. (Itandi ang Lucas 21:​1-4.) Ingong bahin sa imong espirituwal nga rutina, paggahin ug panahon para sa personal nga pagtuon ug pagpamalandong. Ngano? Kay ang gitagana ni Jehova nga binase sa Bibliya nga mga impormasyon pinaagi sa iyang organisasyon, makatabang nato nga magpabiling balanse. Aron makita ang imong gikinahanglan, puwede nimong gamiton ang mga research tool nga available sa imong pinulongan, sama sa JW Library^® app ug Giya sa Pagpanukiduki Para sa mga Saksi ni Jehova. Si Monika, nga gihisgotan ganina, miingon nga gamiton niya ang mga research tool dihang mamatikdan niya nga mosugod pagbalik ang iyang negatibong emosyon. Pananglitan, gi-search niya ang pulong nga “kasuko.” Sa laing higayon, gi-search pod niya ang “pagluib” o “pagkamaunongon.” Dayon magbasa siya hangtod nga moarang-arang ang iyang gibati. Siya miingon: “Pagsugod nakog research mibati kog grabeng kabalaka. Pero samtang nagpadayon kog basa, gibati nako nga gigakos kog hugot ni Jehova. Naamgohan nako nga nasabtan niya ang tanan nakong emosyon, ug ginatabangan ko niya.” Ang maong tabang gikan kang Jehova makatabang pod nimo nga magpabiling balanse hangtod nga mokalma ang imong mga emosyon.—Sal. 119:​143, 144.

SI JEHOVA MOTABANG NIMO

10. Unsa tingali atong bation human sa makapaguol kaayo nga panghitabo?

¹⁰ Ang problema. Human sa makapaguol kaayo nga panghitabo, naa tingali mga adlaw nga mobati tang luya kaayo sa pisikal ug emosyonal. Mobati tingali ta nga mora tag atleta nga kusog kaayo modagan sa una pero karon nagtakiang na tungod sa usa ka injury. Basig malisdan tag himo sa mga buluhaton nga kaniadto sayon ra kaayo para nato, o basig wala tay gana nga himoon ang mga kalihokan nga kaniadto ganahan kaayo tang mohimo. Sama kang Elias, mobati tingali ta nga morag lisod kaayong mobangon ug gusto na lang tang matulog. (1 Hari 19:​5-7) Unsay gisaad ni Jehova nga iyang himoon dihang mobati tang luya?

11. Unsa pay laing paagi ni Jehova sa pagtabang nato? (Salmo 94:18)

 ¹¹ Ang himoon ni Jehova. Si Jehova nagsaad nga tabangan ta niya. (Basaha ang Salmo 94:18.) Sama nga ang na-injure nga atleta nagkinahanglag tabang aron makalakaw, nagkinahanglan pod tingali tag tabang aron makapabiling aktibo sa pag-alagad kang Jehova. Sa maong kahimtang, si Jehova nagpasalig kanato: “Ako, si Jehova nga imong Diyos, nagahawid sa imong tuong kamot, ang Usa nga nag-ingon kanimo, ‘Ayawg kahadlok. Ako motabang kanimo.’” (Isa. 41:13) Naeksperyensiyahan ni David kini nga tabang. Dihang nag-atubang siyag mga pagsulay ug mga kaaway, miingon siya kang Jehova: “Ang imong tuong kamot nagpaluyo kanako.” (Sal. 18:35) Pero sa unsang paagi itagana ni Jehova ang iyang tabang?

12. Kinsa tingali ang gamiton ni Jehova aron tabangan ta dihang maluya ta?

¹² Sagad, palihokon ni Jehova ang uban aron tabangan ta. Pananglitan, dihang naluya si David, ang iyang higala nga si Jonatan miduaw niya aron palig-onon ug dasigon siya. (1 Sam. 23:​16, 17) Sa susama, gipili ni Jehova si Eliseo aron hatagag praktikal nga tabang si Elias. (1 Hari 19:​16, 21; 2 Hari 2:2) Karon, gamiton tingali ni Jehova ang atong pamilya, mga higala, o ang mga ansiyano aron tabangan ta. Pero mas ganahan tingali tang magpalain kon nabug-atan ta sa atong emosyon. Gusto tang mag-inusara, ug normal lang na. Unsay atong mahimo aron madawat ang tabang ni Jehova?

13. Unsay kinahanglan natong himoon aron makabenepisyo sa tabang ni Jehova? (Tan-awa sab ang hulagway.)

¹³ Ang kinahanglan natong himoon. Sukli ang tendensiya nga magpalain. Kon magpalain ta, sagad mapokus na lang ta sa atong kaugalingon ug sa mga problema nga atong giatubang. Kini makaapektar sa mga desisyon nga atong himoon. (Prov. 18:1) Siyempre, naay mga panahon nga kinahanglan tang mag-inusara, ilabina kon nag-atubang tag makapaguol kaayo nga mga panghitabo. Pero kon ilain nato ang atong kaugalingon sa taastaas nga panahon, posible nga masalikway na hinuon nato ang mga tawo nga gigamit ni Jehova sa pagtabang kanato. Busa bisag lisod, dawata ang tabang sa imong pamilya, mga higala, ug sa mga ansiyano. Hinumdomi kanunay nga sila ang gigamit ni Jehova sa pagtabang kanimo.—Prov. 17:17; Isa. 32:​1, 2.

SI JEHOVA MAGHUPAY KANIMO

14. Unsang makapahadlok nga mga situwasyon ang posible natong maatubang?

¹⁴ Ang problema. Naa tingali mga higayon nga mahadlok kaayo ta. Sa Bibliya, ang matinumanong mga alagad sa Diyos naghisgot sa  mga panahon nga sila nahadlok ug nangurog tungod sa ilang mga kaaway o sa ubang presyur nga ilang giatubang. (Sal. 18:4; 55:​1, 5) Sa susama, posibleng makaeksperyensiya pod tag pagsupak diha sa eskuwelahan, trabahoan, o gikan sa atong pamilya o sa gobyerno. Basin mameligro pa gani ang atong kinabuhi tungod sa sakit. Nianang mga panahona, mobati tingali ta nga mora tag gamayng bata nga walay mahimo. Unsaon ta pagtabang ni Jehova sa ingon niini nga mga kahimtang?

15. Unsang pasalig ang gihatag kanato sa Salmo 94:19?

¹⁵ Ang himoon ni Jehova. Siya maghupay kanato. (Basaha ang Salmo 94:19.) Kini nga salmo makapahunahuna tingali nato sa usa ka gamayng bata nga nahadlok ug dili makatulog tungod sa kusog nga mga dalugdog. Ma-imagine nato ang papa nga miduol sa iyang anak ug gikugos kini hangtod nga kini nakatulog. Bisan tuod nagpadayon ang pagdalugdog, ang bata mibating luwas kay gigakos siya sa iyang amahan. Sa susama, dihang mag-atubang ug makapahadlok nga mga pagsulay, kinahanglan tingali nato ang simbolikong paggakos sa atong langitnong Amahan hangtod nga mokalma ang atong mga pagbati. Sa unsang paagi nato madawat ang maong paghupay gikan kang Jehova?

16. Unsay atong mahimo aron makabenepisyo sa paghupay ni Jehova? (Tan-awa sab ang hulagway.)

¹⁶ Ang kinahanglan natong himoon. Kada adlaw, paggahin ug panahon uban kang Jehova pinaagi sa pag-ampo kaniya ug pagbasa sa iyang Pulong. (Sal. 77:​1, 12-14) Kon imo nang himoon, si Jehova dayon ang una nimong duolon dihang ma-stress ka. Isulti ang imong mga gikahadlokan ug gikabalak-an sa imong langitnong Amahan. Tugoti siya sa pagpakig-estorya ug sa paghupay kanimo pinaagi sa Kasulatan. (Sal. 119:28) Naa tingali kay ganahan nga mga basahon sa Bibliya nga makahupay nimo dihang mahadlok ka. Pananglitan, madasig tingali ka sa mga basahon sa Job, Salmo, ug Proverbio ug apil na pod sa giingon ni Jesus sa Mateo kapitulo 6. Samtang mag-ampo ka kang Jehova ug magbasa sa iyang Pulong, bation nimo ang iyang paghupay.

17. Sa unsa ta makasalig?

¹⁷ Makasalig ta nga dili gyod ta biyaan ni Jehova sa lisod nga mga panahon sa atong kinabuhi. Dili gyod ta mag-inusara. (Sal. 23:4; 94:14) Si Jehova nagsaad nga iya tang bantayan, tabangan nga mahimong balanse, suportahan, ug hupayon. Bahin kang Jehova, ang Isaias 26:3 nag-ingon: “Panalipdan nimo kadtong mga bug-os nagasalig kanimo; hatagan nimo silag walay kataposang pakigdait, kay kanimo sila nagasalig.” Busa salig kang Jehova ug pahimusli ang tanan nga gigamit niya sa pagtabang kanimo. Kon imo nang himoon, makabaton kag kusog bisan sa lisod nga mga panahon.