1. Unsay importante sa daghang tawo karon?

 NAMATIKDAN ba nimo nga daghang tawo karon ang sobrang nagpakaimportante sa kaugalingon ug gusto kaayo nila nga dayegon sila sa uban? Pananglitan, daghan ang naggamit ug social media aron ipanghambog ang ilang mga nahimo. Pero mas gamay ra ang nagadayeg kang Jehova nga Diyos. Niini nga artikulo, atong hisgotan kon unsay gipasabot sa paghatag kang Jehova sa himaya ug kon nganong angay nato nang himoon. Makat-onan pod nato kon sa unsang paagi mahatag nato sa Diyos ang himaya nga angay para niya ug kon unsaon niya mismo paghimaya ang iyang ngalan sa dili madugay.

UNSAY GIPASABOT SA PAGHATAG KANG JEHOVA SA HIMAYA?

2. Giunsa pagpakita ni Jehova ang iyang himaya sa Bukid sa Sinai? (Tan-awa sab ang hulagway.)

² Gipakita sa Bibliya nga si Jehova halangdon ug mahimayaon nga Diyos. Gipakita ni Jehova sa talagsaong paagi ang iyang himaya wala madugay human niya pagawsa ang Israel gikan sa pagkaulipon sa Ehipto. Imadyina ang nahitabo: Milyonmilyong Israelinhon ang nagtigom sa tiilan sa Bukid sa Sinai aron maminaw sa Diyos. Dayon, dihay bagang panganod nga mitabon sa bukid. Ug kalit lang nga milinog ug kusog, nga posibleng inubanan sa pag-alboroto sa bolkan. Diha poy mga dalugdog, kilat, ug kusog kaayong tingog sa budyong. (Ex. 19:​16-18; 24:17; Sal. 68:8) Seguradong nahingangha gyod ang mga Israelinhon dihang nakita nila kon unsa ka mahimayaon si Jehova.

3. Unsay gipasabot sa paghatag kang Jehova sa himaya?

 ³ Pero makahatag kaha ug himaya ang mga tawo kang Jehova? Oo. Ang usa ka paagi nga mahimo nato na mao ang pagsulti sa uban bahin sa iyang kahibulongang gahom ug nindot kaayong mga hiyas. Mahimaya pod nato ang Diyos kon pasidunggan nato siya tungod sa mga butang nga atong nahimo uban sa iyang tabang. (Isa. 26:12) Si Haring David maoy maayo kaayong ehemplo sa paghatag ug himaya kang Jehova. Sa usa niya ka pag-ampo atubangan sa daghang Israelinhon, si David miingon sa Diyos: “Imo, Oh Jehova, ang kabantog ug ang gahom ug ang katahom ug ang himaya ug ang kahalangdon, kay imo ang tanang butang sa langit ug sa yuta.” Human sa pag-ampo ni David, “ang tibuok kongregasyon nagdayeg kang Jehova.”—1 Cron. 29:​11, 20.

4. Sa unsang paagi gihimaya ni Jesus si Jehova?

⁴ Sa dinhi pa si Jesus sa yuta, iyang gihimaya ang iyang Amahan pinaagi sa pagsulti sa uban nga si Jehova mao ang Tinubdan sa iyang gahom sa paghimog mga milagro. (Mar. 5:​18-20) Iya pong gihimaya si Jehova pinaagi sa pagtudlo sa uban bahin Kaniya. Maayo sab ang iyang pagtratar sa uban. Pananglitan, sa dihang nanudlo siya sa sinagoga, dihay naminaw niya nga babaye nga gidemonyohan sulod na sa 18 ka tuig. Ang babaye gipaantos pag-ayo sa demonyo maong siya nagtikuko ug dili na makatuyhad. Lisod gyod ang iyang kahimtang! Naluoy kaayo si Jesus sa babaye maong iya siyang giduol ug giingnan: “Babaye, mamaayo ka sa imong sakit.” Unya gipatong ni Jesus ang iyang mga kamot kaniya ug dihadiha natul-id ang iyang lawas ug “gidayeg niya ang Diyos.” Mapasalamaton gyod ang babaye kay napasig-uli ang iyang maayong panglawas ug dignidad. (Luc. 13:​10-13) Angay gyod niyang himayaon si Jehova, ug mao pod nay angay natong buhaton.

NGANONG GIHIMAYA NATO SI JEHOVA?

5. Nganong angay natong tahoron si Jehova?

⁵ Gihimaya nato si Jehova kay gitahod nato siya pag-ayo. Daghag rason kon nganong angay nato siyang tahoron. Si Jehova ang Labing Gamhanan ug walay kinutoban ang iyang gahom. (Sal. 96:​4-7) Maalamon kaayo siya ug dayag nang makita sa mga butang nga iyang gilalang. Siya ang naghatag natog kinabuhi ug nagtagana sa tanan natong gikinahanglan aron mabuhi ta. (Pin. 4:11) Maunongon pod siya. (Pin. 15:4) Ang tanan niyang ginahimo magmalamposon, ug kanunay siyang motuman sa iyang mga saad. (Jos. 23:14) Mao nay hinungdan kon nganong si propetang Jeremias miingon bahin kang Jehova: “Taliwala sa tanang maalamon sa kanasoran ug sa tanan nilang gingharian, wala gayoy sama nimo.” (Jer. 10:​6, 7) Daghan gyod tag rason nga tahoron ang atong langitnong Amahan. Pero dili lang kay gitahod nato si Jehova—gimahal pod nato siya.

6. Nganong gimahal nato si Jehova?

⁶ Gihimaya nato si Jehova kay gimahal nato siya pag-ayo. Konsideraha ang pipila ka hiyas ni Jehova nga tungod niana ato siyang gimahal. Siya maluluy-on kaayo. (Sal. 103:13; Isa. 49:15) Nakasabot siya sa atong gibati; kon masakitan ta, masakitan pod siya. (Zac. 2:8) Ginatabangan ta niya nga mas masuod kaniya. (Sal. 25:14; Buh. 17:27) Ug siya mapainubsanon; “siya moyuko aron mosud-ong sa langit ug sa yuta. Bangonon niya ang timawa gikan sa abog.” (Sal. 113:​6, 7) Seguradong gusto gyod natong himayaon ang atong halangdong Diyos!—Sal. 86:12.

7. Unsang espesyal nga pribilehiyo ang atong nabatonan?

⁷ Gihimaya nato si Jehova kay gusto natong mailhan siya sa uban. Daghan ang wala mahibalo sa kamatuoran bahin kang Jehova.  Ngano? Kay gibutaan sila ni Satanas pinaagi sa pagpakaylap ug daghang bakak nga pagtulon-an bahin sa Diyos. (2 Cor. 4:4) Gipatuo ni Satanas ang mga tawo nga si Jehova masuk-anon, wala mahigugma nato, ug maoy hinungdan sa pag-antos sa katawhan. Pero nahibalo ta sa kamatuoran bahin sa atong Diyos! Busa pribilehiyo nato nga sultihan ang uban kon unsa gyod siyang klaseha sa Diyos aron sila pod makahatag niyag himaya. (Isa. 43:10) Ang Salmo 96 nag-awhag nato nga ihatag kang Jehova ang himaya. Samtang atong hisgotan ang pipila ka bersikulo niini nga salmo, hunahunaa ang mga paagi nga imong mahatag kang Jehova ang himaya nga angay para niya.

SA UNSANG PAAGI MAHATAG NATO KANG JEHOVA ANG HIMAYA NGA ANGAY PARA NIYA?

8. Unsa ang usa ka paagi nga mahimaya nato si Jehova? (Salmo 96:​1-3)

⁸ Basaha ang Salmo 96:​1-3. Mahimaya nato si Jehova pinaagi sa pagsulti sa uban bahin kaniya. Niini nga mga bersikulo, ang katawhan ni Jehova giawhag sa “pag-awit kang Jehova,” ‘pagdayeg sa iyang ngalan,’ ‘pagmantala sa maayong balita sa iyang pagluwas,’ ug ‘pagpahayag sa iyang himaya [ngadto] sa kanasoran.’ Pinaagi niini, atong mahimaya ang atong langitnong Amahan. Ang matinumanong mga Hudiyo ug ang unang siglong mga Kristohanon wala magduhaduha sa pagsulti sa uban bahin sa tanang maayong butang nga gihimo ni Jehova para nila ug sa pagdepensa sa iyang reputasyon. (Dan. 3:​16-18; Buh. 4:29) Sa unsang paagi mahimo pod nato na?

9-10. Unsay imong nakat-onan sa kasinatian ni Angelena? (Tan-awa sab ang hulagway.)

⁹ Konsideraha ang kasinatian ni Angelena, a sister nga nagpuyo sa United States. Maisogon niyang gidepensahan ang reputasyon ni Jehova diha sa kompaniya nga iyang gitrabahoan. Ingong bag-ong empleyado, si Angelena ug ang uban pang mga bag-ohan gipatawag sa miting. Usa-usa silang gipasulti bahin sa ilang kaugalingon ug sa ilang kinabuhi. Nag-andam si Angelena ug mga picture aron makita sa iyang mga katrabaho ang iyang malipayong kinabuhi ingong Saksi ni Jehova. Pero sa wala pa ang iyang turno nga mosulti, usa sa iyang katrabaho nga lalaki nagpailaila ug miingon nga ang iyang pamilya Saksi ni Jehova. Dayon gidaot sa lalaki ang atong mga pagtulon-an. Si Angelena miingon: “Nakulbaan kaayo ko. Pero nakahunahuna ko: ‘Pasagdan ra ba nako siya  nga mosultig dili tinuod bahin kang Jehova? O akong depensahan si Jehova?’”

¹⁰ Dihang nahuman nag estorya ang iyang katrabaho, si Angelena hilom nga nag-ampo. Dayon matinahoron niyang gisultihan ang iyang katrabaho: “Parehas ta, Saksi ni Jehova pod ang akong pamilya, ug ako pod.” Bisag gikulbaan, si Angelena nagpabiling kalmado. Iyang gipakita ang mga picture sa malipayong espirituwal nga mga okasyon nga iyang natambongan ug matinahoron niyang gidepensahan ang iyang pagtuo. (1 Ped. 3:15) Unsay resulta? Pagkahumag sulti ni Angelena, medyo nausab ang tinamdan sa iyang katrabaho. Miingon pa gani siya nga naa siyay malipayong mga kasinatian sa bata pa siya uban sa mga Saksi ni Jehova. Si Angelena miingon: “Angay gyod natong isulti ang kamatuoran bahin kang Jehova. Pribilehiyo gyod nga depensahan ang iyang ngalan.” Kita pod naay dakong pribilehiyo nga dayegon ug himayaon si Jehova bisag daoton sa uban ang iyang ngalan.

11. Giunsa pagpadapat sa katawhan ni Jehova sukad pa kaniadto ang prinsipyo sa Salmo 96:8?

¹¹ Basaha ang Salmo 96:8. Mahimaya nato si Jehova pinaagi sa materyal nga mga butang nga atong nabatonan. Sukad pa kaniadto, ang mga alagad ni Jehova naghimaya kaniya pinaagi sa paghatag sa ilang bililhong mga butang. (Prov. 3:9) Pananglitan, ang mga Israelinhon nag-amot para sa pagtukod ug pagmentinar sa templo. (2 Hari 12:​4, 5; 1 Cron. 29:​3-9) Ang mga tinun-an sa Kristo nag-alagad niya ug sa iyang mga apostoles “pinaagi sa ilang mga kabtangan.” (Luc. 8:​1-3) Ang unang siglong mga Kristohanon nagpadala pod ug hinabang para sa ilang mga igsoon nga nanginahanglan. (Buh. 11:​27-29) Karon, kita pod makahimaya kang Jehova pinaagi sa atong mga donasyon.

12. Sa unsang paagi ang atong mga donasyon makahatag ug himaya kang Jehova? (Tan-awa sab ang hulagway.)

¹² Ang atong mga donasyon makahatag ug himaya kang Jehova. Konsideraha ang usa ka pananglitan. Niadtong 2020, ang Zimbabwe nakasinatig hulaw; taastaas nga panahon nga walay ulan. Tungod niini daghang tawo ang nameligrong mamatay sa kagutom, apil ang sister nga si Prisca. Pero bisag lisod ang kahimtang, si Prisca padayong nagsangyaw kada Miyerkoles ug Biyernes imbes magtrabaho sa umahan. Maong yagayagaan siya sa iyang mga silingan ug sultihan, “Magutman gyod ka ana.” Si Prisca kanunayng motubag, “Dili gyod pasagdan ni Jehova ang iyang  mga alagad.” Wala madugay, nakadawat siyag hinabang gikan sa organisasyon. Ang maong mga hinabang naposible tungod sa atong mga donasyon. Nakadayeg gyod ang mga silingan ni Prisca ug sila miingon, “Wala gyod ka pasagdi sa Diyos, maong gusto ming mokat-on bahin niya.” Tungod ana, pito sa iyang mga silingan misugod sa pagtambong sa mga tigom.

13. Unsang klase sa panggawi ang makahatag ug himaya kang Jehova? (Salmo 96:9)

¹³ Basaha ang Salmo 96:9. Mahimaya nato si Jehova pinaagi sa atong panggawi. Ang mga saserdote nga nag-alagad sa templo ni Jehova kinahanglang hinlo sa pisikal. (Ex. 40:​30-32) Pero ang hinlo nga panggawi mas importante pa kay sa pisikal nga kahinlo. (Sal. 24:​3, 4; 1 Ped. 1:​15, 16) Ang Bibliya nag-ingon nga angay natong hukason ang “daang personalidad” ug isul-ob ang “bag-ong personalidad.” Nagpasabot ni nga atong hunongon o likayan ang bisan unsang hugaw nga panghunahuna ug binuhatan nga dili makapalipay kang Jehova. Hinuon maningkamot ta nga ipahiuyon ang atong panghunahuna ug binuhatan sa nindot nga mga hiyas ni Jehova. (Col. 3:​9, 10) Sa tabang ni Jehova, bisan ang grabe kaayo ka imoral ug daotan nga mga tawo puwedeng magbag-o ug magsul-ob sa bag-ong personalidad.

14. Unsay imong nakat-onan sa eksperyensiya ni Jack? (Tan-awa sab ang hulagway.)

¹⁴ Konsideraha ang eksperyensiya ni Jack. Siya bayolente ug gikahadlokan nga tawo. Gani gianggaan siyag Ang Demonyo. Daghan siyag nahimong krimen maong gisentensiyahan siyag kamatayon. Pero samtang wala pa ipahamtang ang iyang sentensiya, nagpa-Bible study siya sa brader nga mibisita sa ilang prisohan. Bisag daghan siyag nahimong daotan, nahukas ni Jack ang iyang daang personalidad ug sa ngadtongadto nahimo siyang kuwalipikado para sa bawtismo. Nausab na gyod kaayo si Jack, maong sa adlaw nga patyon na siya, ang ubang guwardiya nanghilak samtang nanamilit niya. Ang usa ka opisyal sa prisohan miingon: “Kaniadto si Jack ang pinakadaotan dinhi sa prisohan. Karon usa na siya sa pinakabuotan.” Usa ka semana human mamatay si Jack, ang mga brader mibalik sa prisohan aron magdumalag tigom. Dihay piniriso nga mitambong sa tigom sa unang higayon. Nganong mitambong man siya? Kay nakadayeg siya sa kausaban ni Jack ug gusto siyang mahibalo kon unsay kinahanglan niyang buhaton aron makaalagad  kang Jehova. Oo, ang atong panggawi makahimaya gyod sa atong langitnong Amahan.—1 Ped. 2:12.

SA UNSANG PAAGI HIMAYAON NI JEHOVA ANG IYANG NGALAN SA DILI MADUGAY?

15. Sa unsang paagi bug-os nga himayaon ni Jehova ang iyang ngalan sa dili madugay? (Salmo 96:​10-13)

¹⁵ Basaha ang Salmo 96:​10-13. Ang kataposang mga bersikulo sa Salmo 96 nagpaila kang Jehova ingong matarong nga Maghuhukom ug Hari. Unsaon paghimaya ni Jehova ang iyang ngalan sa dili madugay? Pinaagi sa pagpahamtang sa hustisya. Hapit na niyang laglagon ang Bantogang Babilonya kay gidaot niini ang iyang balaang ngalan. (Pin. 17:​5, 16; 19:​1, 2) Ang uban nga makakita sa kalaglagan sa Bantogang Babilonya tingali modesisyon nga mosimba kang Jehova. Dayon sa Armagedon, laglagon ni Jehova ang tibuok sistema ni Satanas. Iyang laglagon ang tanang masinupakon kaniya ug nagpasipala sa iyang ngalan. Pero iyang luwason ang tanang nahigugma, nagmasinugtanon, ug naghimaya kaniya. (Mar. 8:38; 2 Tes. 1:​6-10) Dihang matapos ang Usa ka Libo ka Tuig nga Pagmando sa Kristo, mahitabo ang kataposang pagsulay, ug human niana bug-os nang mabalaan ni Jehova ang iyang ngalan. (Pin. 20:​7-10) Nianang panahona, “ang yuta mapuno sa kahibalo sa himaya ni Jehova sama sa katubigan nga nagtabon sa dagat.”—Hab. 2:14.

16. Unsay determinado nimong buhaton? (Tan-awa sab ang hulagway.)

¹⁶ Makapalipay gyod kon moabot na ang panahon nga ang tanan sa langit ug sa yuta maghatag kang Jehova sa himaya nga angay sa iyang ngalan! Pero sa dili pa na moabot, himoon nato ang atong maarangan sa paghimaya sa atong Diyos. Aron ipasiugda kining importanteng responsibilidad, ang Nagamandong Lawas nagpili sa Salmo 96:8 ingong atong tinuig nga teksto para sa 2025: “Ihatag kang Jehova ang himaya nga angay sa iyang ngalan.”