1. Unsa ang usa ka rason nga gihatag sa Diyos ang regalo nga kaminyoon?

 SI Jehova ang “malipayong Diyos,” ug gusto niya nga magmalipayon pod ta. (1 Tim. 1:11) Gihatagan ta niyag daghang regalo aron ma-enjoy nato ang kinabuhi. (Sant. 1:17) Usa sa iyang mga regalo ang kaminyoon. Sa dihang ang lalaki ug babaye magminyo, manaad sila nga higugmaon, tahoron, ug pabilhan ang usag usa. Kon magpabilin silang suod, magmalipayon gyod sila.—Prov. 5:18.

2. Unsay kahimtang sa daghang kaminyoon karon?

² Makapaguol kay daghang magtiayon karon ang nalimot na sa mga panaad nga ilang gihimo sa adlaw sa ilang kasal. Tungod ana, dili sila malipayon. Ang World Health Organization nagreport nga daghang bana ang mangulata sa ilang asawa, magsultig sakit, ug magtratar nila sa dili mahigugmaong paagi. Tingali ang bana magpakaaron-ingnon nga buotan kon naay laing tawo, pero kon silasila na lang, iyang ginapasakitan ang iyang asawa. Dugang pa, daghang kaminyoon ang nadaot tungod kay ang bana nagatan-aw ug pornograpiya.

3. Nganong ang ubang bana mangabuso sa ilang asawa?

³ Nganong ang ubang bana mangabuso sa ilang asawa? Tingali nagdako sila nga bayolente ang ilang amahan, maong nagtuo sila nga normal ra ang ingon niana nga kinaiya. Ang uban naimpluwensiyahan sa kultura sa ilang lugar nga nagpasiugda sa sayop nga ideya nga ang “tinuod nga lalaki” kinahanglang isog aron mahadlok ang iyang asawa ug mosunod niya. Ang uban pod dili makamaong mokontrol sa ilang gibati ilabina kon masuko sila. Ug naay mga lalaki nga sayop ug panglantaw sa mga babaye ug sa sekso tungod kay nagatan-aw silag pornograpiya. Gipakita sa mga report nga misamot ni nga mga problema panahon sa COVID-19 nga pandemic. Siyempre, dili gyod ni balido nga mga rason aron pasakitan sa bana ang iyang asawa.

4. Unsay angayng likayan sa Kristohanong mga bana, ug ngano?

 ⁴ Angayng likayan sa Kristohanong mga bana nga maimpluwensiyahan sila sa sayop nga panglantaw bahin sa mga babaye. a Ngano? Kay kon unsay naa sa atong hunahuna, sagad mao poy atong himoon. Gitambagan ni apostol Pablo ang dinihogang mga Kristohanon sa Roma nga ‘mohunong na sa pagpaimpluwensiya niini nga sistema sa mga butang.’ (Roma 12:​1, 2) Sa dihang gisulat kini ni Pablo sa mga taga-Roma, ang mga igsoon niana nga kongregasyon taudtaod nang nahimong Kristohanon. Pero ang mga pulong ni Pablo nagpakita nga ang uban kanila naimpluwensiyahan gihapon sa mga binuhatan ug panghunahuna sa kalibotan. Maong gitambagan sila ni Pablo nga angay silang magbag-o. Kana nga tambag mapadapat gihapon sa Kristohanong mga bana karon. Makapasubo kay ang uban nila naimpluwensiyahan sa panghunahuna sa kalibotan ug nag-abuso pa gani sa ilang asawa. b Pero unsa may gusto ni Jehova nga paagi sa pagtratar sa bana sa iyang asawa? Atong makita ang tubag sa temang teksto niini nga artikulo.

5. Sumala sa 1 Pedro 3:​7, unsay angayng pagtratar sa bana ngadto sa iyang asawa?

⁵ Basaha ang 1 Pedro 3:7. Gisugo ni Jehova ang mga bana nga pasidunggan ang ilang asawa. Nagpasabot ni nga tahoron nila ang ilang asawa. Ang bana nga nagpasidungog sa ilang asawa nagtratar kaniya sa buotan ug mahigugmaong paagi. Niining artikuloha, atong konsiderahon kon sa unsang paagi mapasidunggan sa bana ang iyang asawa. Pero sa dili pa, hisgotan una nato ang mga binuhatan nga nagpakitag kawalay-pagtahod ngadto sa mga asawa.

LIKAYI ANG MGA BINUHATAN NGA NAGPAKITAG KAWALAY-PAGTAHOD SA IMONG ASAWA

6. Unsay pagbati ni Jehova sa mga bana nga pisikal nga mag-abuso sa ilang asawa? (Colosas 3:19)

⁶ Pisikal nga pag-abuso. Si Jehova nagdumot niadtong nagabuhat ug kapintasan. (Sal. 11:5) Dili gyod malipay si Jehova ilabina kon ang mga bana mag-abuso sa ilang asawa. (Mal. 2:16; basaha ang Colosas 3:19.) Sumala sa atong temang teksto sa 1 Pedro 3:​7, kon maltratahon sa bana ang iyang asawa, madaot gyod ang iyang relasyon sa Diyos. Basin dili gani paminawon ni Jehova ang iyang mga pag-ampo.

7. Sumala sa Efeso 4:​31, 32, unsang klaseha sa sinultihan ang angayng likayan sa mga bana? (Tan-awa sab ang “Termino Gipatin-aw.”)

⁷ Pagsultig sakit nga mga pulong. Ang ubang bana mangabuso sa ilang asawa pinaagig pagpanginsulto ug pagsultig sakit nga mga pulong. Pero si Jehova nagdumot sa “kasuko, kapungot, siningkahay, ug sakit nga sinultihan.” c (Basaha ang Efeso 4:​31, 32.) Madungog gyod ni Jehova ang tanan, bisan ang ginasulti sa bana sa iyang asawa kon silasila ra. Kon ang bana sakit ug sinultihan sa iyang asawa, madaot dili lang ang iyang kaminyoon kondili ang iya pong relasyon sa Diyos.—Sant. 1:26.

8. Unsay pagbati ni Jehova bahin sa pornograpiya, ug ngano?

⁸ Pagtan-awg pornograpiya. Unsay pagbati ni Jehova bahin sa pagtan-awg pornograpiya? Iya kining gidumtan. Busa ang bana nga nagatan-awg law-ay nga mga hulagway o video nagdaot sa iyang relasyon kang Jehova ug wala magpakitag pagtahod sa iyang asawa. d Gidahom ni Jehova nga ang bana magmaunongon sa iyang asawa. Ang usa ka maunongong bana dili gyod  maghimog imoral ug dili gani maghunahuna niana. Si Jesus miingon nga ang lalaki nga motan-aw sa babaye uban ang kaibog nakapanapaw na “diha sa iyang kasingkasing.” e—Mat. 5:​28, 29.

9. Nganong si Jehova dili gyod malipay kon pugson sa bana ang iyang asawa sa paghimog seksuwal nga buhat nga dili niya gusto?

⁹ Pagpugos sa asawa sa paghimog seksuwal nga buhat nga dili niya gusto. Ang pipila ka bana magpugos sa ilang asawa sa paghimog klase sa seksuwal nga buhat nga dili nila gusto ug makapabati nila nga hugaw o wala mahala. Gidumtan gyod ni Jehova kini nga mga buhat kay nagpakita nig kahakog ug kawalay-pagtahod ngadto sa asawa. Dili gyod malipay si Jehova kon himoon ni sa mga bana. Iyang gidahom nga higugmaon ug pabilhan sa bana ang iyang asawa ug tahoron ang iyang pagbati. (Efe. 5:​28, 29) Pero komosta kon ang Kristohanong bana nagaabuso sa iyang asawa, nagatan-awg pornograpiya, o nagpugos sa iyang asawa sa paghimog seksuwal nga buhat nga dili niya gusto? Unsay makatabang sa bana sa pagbag-o sa iyang panghunahuna ug binuhatan?

KON UNSAY MAKATABANG ARON MAHUNONG ANG DAOTANG BINUHATAN

10. Sa unsang paagi ang ehemplo ni Jesus makatabang sa mga bana?

¹⁰ Unsay makatabang sa bana aron mahunong ang iyang dili maayong binuhatan ug pagtratar sa iyang asawa? Angay siyang maningkamot nga sundogon si Jesus. Bisag si Jesus wala magminyo, ang iyang paagi sa pagtratar sa iyang mga tinun-an nagsilbing ehemplo kon unsaon pagtratar sa mga bana ang ilang mga asawa. (Efe. 5:25) Pananglitan, konsideraha kon unsay makat-onan sa mga bana kang Jesus sa iyang paagi sa pagtratar ug pagpakig-estorya sa iyang mga apostoles.

11. Giunsa pagtratar ni Jesus ang iyang mga apostoles?

¹¹ Si Jesus kanunayng nagpakitag kaayo ug pagtahod sa iyang mga apostoles. Dili siya dominante, mahariharion, o sakit ug sinultihan. Bisag siya ang ilang Ginoo ug Agalon, wala gyod niya ipabati sa iyang mga tinun-an nga ubos sila. Hinuon mapainubsanon siyang nag-alagad nila. (Juan 13:​12-17) Giingnan ni Jesus ang iyang mga tinun-an: “Pagkat-on gikan kanako kay ako malumo ug mapainubsanon, ug kamo mobatig kahayahay.” (Mat. 11:​28-30) Matikdi nga si Jesus malumo. Ang lumo nga tawo lig-on, dili huyang. Lig-on kaayo siya kay kaya niyang kontrolon ang iyang kaugalingon. Bisan sa makapasuko nga mga situwasyon, kalmado ra siya ug dili magpadaog sa iyang gibati.

12. Unsang ehemplo ang gipakita ni Jesus kon bahin sa iyang sinultihan?

¹² Ang mga pulong ni Jesus makapalig-on ug makarepresko sa uban. Dili siya sakit ug sinultihan sa iyang mga sumusunod. (Luc. 8:​47, 48) Bisan pag gihagit ug giinsulto siya sa iyang mga magsusupak, “wala siya mobalos ug insulto.” (1 Ped. 2:​21-23) May mga higayon pa gani nga gipili ni Jesus nga dili motubag kay sa mosultig sakit. (Mat. 27:​12-14) Maayo gyod siya nga ehemplo para sa Kristohanong mga bana!

13. Unsay kahulogan sa giingon sa Mateo 19:​4-6 nga ang bana “moipon sa iyang asawa”? (Tan-awa sab ang hulagway.)

¹³ Gisugo ni Jesus ang mga bana nga mounong sa ilang asawa. Iyang gikutlo ang giingon sa iyang Amahan nga ang bana angayng “moipon sa iyang asawa.” (Basaha ang Mateo 19:​4-6.) Ang Gregong pulong nga gihubad dinhi ug “moipon” literal nga nagkahulogang “motapot pag-ayo, samag papilit.” Busa ang bana ug asawa angayng suod kaayo nga samag gipapilit sila sa usag usa. Kon langkaton sila, pareho silang madaot. Busa kon gimahal gyod sa bana ang iyang asawa, dili siya motan-aw ug bisan unsang klase sa pornograpiya. Determinado  siya nga likayan ang “pagtan-aw sa butang nga walay pulos.” (Sal. 119:37) Sama bag mihimo siyag pakigsaad sa iyang mga mata nga dili gyod motan-aw nga may kaibog sa ubang babaye.—Job 31:1.

14. Unsang mga lakang ang angayng himoon sa nag-abusar nga bana aron mapasig-uli ang iyang relasyon kang Jehova ug sa iyang asawa?

¹⁴ Ang bana nga nagmaltratar o sakit ug sinultihan sa iyang asawa kinahanglang maningkamot nga mabalik ang iyang relasyon kang Jehova ug sa iyang asawa. Unsay angay niyang himoon? Una, angay niyang ilhon nga naa siyay seryosong problema. Wala gyoy matago kang Jehova. (Sal. 44:21; Eccl. 12:14; Heb. 4:13) Ikaduha, angay siyang mohunong sa pag-abuso sa iyang asawa ug magbag-o sa iyang batasan. (Prov. 28:13) Ikatulo, mangayo siyag pasaylo sa iyang asawa ug kang Jehova. (Buh. 3:19) Kinahanglan niyang hangyoon si Jehova nga tabangan siyang magbag-o sa iyang panghunahuna, sinultihan, ug binuhatan. (Sal. 51:​10-12; 2 Cor. 10:5; Filip. 2:13) Ikaupat, molihok siya uyon sa iyang mga pag-ampo pinaagi sa pagdumot sa tanang klase sa kapintasan ug sakit nga sinultihan. (Sal. 97:10) Ikalima, mangayo siyag tabang sa mahigugmaong mga ansiyano sa kongregasyon. (Sant. 5:​14-16) Ikaunom, maghimo siyag plano aron dili na niya mahimo pag-usab ang maong daotang binuhatan. Mao pod ni nga mga lakang ang angayng himoon sa bana nga nagatan-awg pornograpiya. Panalanginan gyod ni Jehova ang iyang mga paningkamot nga bag-ohon ang iyang binuhatan. (Sal. 37:5) Pero dili pa igo nga hunongon lang sa bana kining daotang mga buhat. Angay pod siyang maningkamot nga pasidunggan ang iyang asawa. Unsaon niya na paghimo?

KON UNSAON PAGPASIDUNGOG ANG IMONG ASAWA

15. Unsaon pagpakita sa bana ang iyang pagmahal sa iyang asawa?

¹⁵ Ipakita ang pagmahal. Naandan na sa pipila ka malipayong minyo nga mga brader nga kada adlaw, maghimo silag mga buhat nga nagpakita nga ilang gimahal ang ilang asawa. (1 Juan 3:18) Mahimong ipakita sa bana ang iyang pagmahal bisan sa ginagmayng paagi, sama sa paggunit sa iyang kamot o paggakos niya. Tingali iyang i-text  ang iyang asawa ug sultihan “I miss you” o pangutan-on “Komosta ka?” Puwede pod tingali niya siyang hatagan ug card, bulak, o regalo aron ipahayag ang iyang pagmahal. Kon himoon sa bana kini nga mga butang, iyang mapasidunggan ang iyang asawa ug mapalig-on ang ilang kaminyoon.

16. Nganong angayng apresyahon sa bana ang iyang asawa?

¹⁶ Sultihi siya nga imo siyang giapresyar. Ang bana nga nagpasidungog sa iyang asawa mosulti gyod sa iyang apresasyon kaniya. Sultihan niya ang iyang asawa nga gipabilhan niya ang tanang ginahimo sa iyang asawa para niya. (Col. 3:15) Malipay gyod ang asawa kon ang iyang bana sinserong modayeg niya. Mobati siyang may kasegurohan, gimahal, ug gipasidunggan.—Prov. 31:28.

17. Unsaon pagpakita sa bana ang iyang pagtahod sa iyang asawa?

¹⁷ Ipakita ang kaayo ug pagtahod. Kon gimahal sa bana ang iyang asawa, iya gyod siyang pabilhan. Para niya, ang iyang asawa maoy bililhong regalo gikan kang Jehova. (Prov. 18:22; 31:10) Tungod ana, pakitaan niya ang iyang asawa ug kaayo ug pagtahod bisan sa pribadong bahin sa ilang kaminyoon. Dili mamugos ang bana sa paghimog klase sa seksuwal nga buhat nga dili gusto sa iyang asawa, nga mopabati niyang samag giabuso, o makahasol sa iyang konsensiya. f Maningkamot pod ang bana nga magpabiling hinlo ang iya mismong konsensiya atubangan ni Jehova.—Buh. 24:16.

18. Unsay angayng determinasyon sa mga bana? (Tan-awa sab ang kahong “ Upat ka Paagi Aron Mapakita sa Bana ang Iyang Pagtahod sa Iyang Asawa.”)

¹⁸ Mga bana, makaseguro gyod mo nga nakita ug gipabilhan ni Jehova ang inyong mga paningkamot nga pasidunggan ang inyong asawa sa tanang bahin sa inyong kinabuhi. Magmadeterminado nga pasidunggan ang inyong asawa pinaagi sa paglikay sa daotang mga buhat ug pagpakita kaniyag kaayo, pagtahod, ug pagmahal. Kon imo ning buhaton, imong gipakita nga imo siyang gihigugma ug gipabilhan. Pasidunggi ang imong asawa, kay pinaagi niana, imong maprotektahan ang imong pinakaimportanteng relasyon—ang imong relasyon kang Jehova.—Sal. 25:14.