TUN-ANANG ARTIKULO 5
AWIT 108 Maunongong Gugma sa Diyos
Mga Panalangin Tungod sa Gugma ni Jehova
“Si Kristo Jesus mianhi sa kalibotan aron luwason ang mga makasasala.”—1 TIM. 1:15.
POKUS
Mga panalangin nga naposible tungod sa lukat ug kon unsaon nato pagpakita ang atong apresasyon kang Jehova.
1. Unsay atong himoon aron mapalipay si Jehova?
IMADYINA nga imong gihatagan ang usa nimo ka minahal ug espesyal nga regalo nga nindot ug mapuslanon. Pero unsa kahay imong bation kon iya ra ning tagoan sa kabinet ug kalimtan na lang? Seguradong dili ka malipay. Sa laing bahin, malipay gyod ka kon gamiton niya ang gihatag nimo nga regalo ug pasalamatan ka. Unsay punto? Gihatag ni Jehova ang iyang Anak para nato. Malipay gyod si Jehova kon magpakita tag apresasyon sa maong bililhong regalo ug sa iyang gugma nga maoy nagpalihok niya nga itagana ang lukat.—Juan 3:16; Roma 5:7, 8.
2. Unsay atong hisgotan niining artikuloha?
2 Pero paglabay sa panahon, basin anam-anam nga mamenosan ang atong apresasyon sa regalo nga lukat. Kon mahitabo na, sama rag gitagoan nato sa kabinet ang regalo sa Diyos. Nalipay tuod ta nga nakadawat ani, pero sa ngadtongadto ato ra ning gikalimtan. Aron dili na mahitabo, kinahanglang kanunay natong hunahunaon ang mga gihimo sa Diyos ug sa Kristo para nato. Kining artikuloha makatabang nato sa paghimo niana. Hisgotan nato ang atong mga panalangin karon ug sa umaabot nga naposible tungod sa lukat. Hisgotan pod nato kon unsaon nato pagpakita ang atong pagpabili sa gugma ni Jehova ilabina sa dili pa ug human sa Memoryal.
MGA PANALANGIN KARON
3. Unsa ang usa ka panalangin nga atong nabatonan karon tungod sa lukat?
3 Karon pa lang, nakabenepisyo na ta sa halad lukat sa Kristo. Pananglitan, tungod sa lukat, si Jehova nagpasaylo sa atong mga sala. Dili siya obligado nga himoon na, pero gusto niya nga pasayloon ta. Ang mapasalamatong salmista miawit: “Kay ikaw, Oh Jehova, maayo ug andam sa pagpasaylo.”—Sal. 86:5; 103:3, 10-13.
4. Para kang kinsa gitagana ni Jehova ang lukat? (Lucas 5:32; 1 Timoteo 1:15)
4 Ang uban mobati tingali nga dili takos sa pagpasaylo ni Jehova. Ang tinuod, kitang tanan dili gyod takos niana. Kana pod ang gibati ni apostol Pablo, ug gani siya miingon nga “dili [siya] angayng tawgon nga apostol.” Pero siya midugang: “Pinaagi sa dili hitupngang pagkamaayo sa Diyos nahimo kong apostol.” (1 Cor. 15:9, 10) Kon maghinulsol ta sa atong mga sala, pasayloon ta ni Jehova. Ngano? Dili tungod kay angayan tang pasayloon, kondili tungod kay gimahal ta niya. Busa kon gibati nimo nga dili ka takos sa pagpasaylo ni Jehova, hinumdomi nga gitagana niya ang lukat dili para sa hingpit nga mga tawo, kondili para sa mahinulsolong mga makasasala.—Basaha ang Lucas 5:32; 1 Timoteo 1:15.
5. Naa bay usa nato ang makaingon nga takos gyod siya sa pagpasaylo ni Jehova? Ipatin-aw.
5 Wala gyoy usa nato ang angayng mobati nga takos sa pagpasaylo ni Jehova bisag dugay na tang nag-alagad niya. Siyempre, gipabilhan ni Jehova ang atong matinumanong pag-alagad. (Heb. 6:10) Pero gihatag niya kanato ang iyang Anak ingong libre nga regalo, dili ingong bayad sa atong pag-alagad. Kon moingon ta nga takos ta sa pagpasaylo ni Jehova tungod sa atong mga nahimo sa pag-alagad, sama rag miingon ta nga wala nato kinahanglana ang lukat.—Itandi ang Galacia 2:21.
6. Nganong nagkugi pag-ayo si Pablo sa pag-alagad kang Jehova?
6 Nahibalo si Pablo nga bisag unsa pay iyang himoon, dili gyod siya takos sa pagpasaylo sa Diyos. Pero nganong nagkugi man gihapon si Pablo sa pag-alagad kang Jehova? Aron ipakita ang iyang apresasyon sa dili hitupngang pagkamaayo ni Jehova. (Efe. 3:7) Sama kang Pablo, padayon tang magkugi sa pag-alagad dili aron pamatud-an nga takos ta sa pagpasaylo ni Jehova kondili aron ipakita ang atong apresasyon niini.
7. Unsay laing panalangin nga atong nabatonan karon tungod sa lukat? (Roma 5:1; Santiago 2:23)
7 Ang laing panalangin tungod sa lukat mao nga puwede natong mabatonan ang suod nga relasyon kang Jehova. a Sa gihisgotan na sa miaging artikulo, gipakatawo ta nga walay relasyon uban sa Diyos. Pero tungod sa lukat, mabatonan nato “ang pakigdait uban sa Diyos” ug puwede tang masuod kaniya.—Basaha ang Roma 5:1; Santiago 2:23.
8. Nganong angay tang magpasalamat kang Jehova tungod sa pribilehiyo sa pag-ampo?
8 Konsideraha ang usa ka bahin sa atong relasyon kang Jehova—ang pribilehiyo sa pag-ampo. Si Jehova maminaw dili lang sa atong mga pag-ampo ingong grupo panahon sa panagkatigom kondili sa ato pong mga pag-ampo ingong indibiduwal. Ang pag-ampo makahatag natog kalmadong kasingkasing ug kalinaw sa hunahuna. Pero gawas nga makapagaan ni sa atong gibati, makapasuod pod ni nato sa Diyos. (Sal. 65:2; Sant. 4:8; 1 Juan 5:14) Samtang dinhi si Jesus sa yuta, kanunay siyang nag-ampo kay nahibalo siya nga si Jehova maminaw niya ug nga ang iyang pag-ampo mas makapasuod niya sa iyang Amahan. (Luc. 5:16) Mapasalamaton kaayo ta nga tungod sa halad lukat ni Jesus, puwede tang mahimong higala ni Jehova ug makaestorya pa gani Kaniya pinaagi sa pag-ampo!
MGA PANALANGIN SA UMAABOT
9. Unsang panalangin sa umaabot ang mabatonan sa matinumanong mga alagad ni Jehova tungod sa lukat?
9 Tungod sa lukat, ang matinumanong mga alagad ni Jehova makabaton ug kinabuhing walay kataposan sa umaabot. Daghan ang naghunahuna nga imposible ni, kay sukad pa sa una, ang mga tawo mamatay man. Pero ang orihinal nga katuyoan ni Jehova para sa mga tawo mao nga mabuhi sila hangtod sa hangtod. Kon wala pa makasala si Adan, wala gyoy maghunahuna nga imposible ang kinabuhing walay kataposan. Bisag sa pagkakaron lisod tingaling tuohan nga mabuhi ta hangtod sa hangtod, makasalig gyod ta niini kay mahal kaayo ang gibayad ni Jehova aron maposible ni. Gibayad niya ang kinabuhi sa iyang pinalanggang Anak.—Roma 8:32.
10. Unsang paglaom ang gipaabot sa mga dinihogan ug sa ubang mga karnero?
10 Bisag sa umaabot pa ang kinabuhing walay kataposan, gusto ni Jehova nga imadyinon na nato ni karon. Ang mga dinihogan naghinamhinam sa ilang kinabuhi unya didto sa langit samtang magmando sila ibabaw sa yuta kauban sa Kristo. (Pin. 20:6) Ang ubang mga karnero naghinamhinam pod nga mabuhi sa Paraisong yuta nga wala nay kasakit ug pag-antos. (Pin. 21:3, 4) Usa ba ka sa ubang mga karnero nga naglaom nga mabuhi dinhi sa yuta hangtod sa hangtod? Ayaw gyod pakamenosa kini nga ganti! Bililhon kaayo ni kay mao ni ang orihinal nga katuyoan ni Jehova para sa mga tawo. Ang kinabuhi dinhi sa yuta makapalipay gyod kaayo.
11-12. Unsang mga panalangin ang atong gikahinaman didto sa Paraiso? (Tan-awa sab ang mga hulagway.)
11 Imadyina kon unsa unya ang imong kinabuhi sa Paraisong yuta. Dili na ka mabalaka nga masakit o mamatay. (Isa. 25:8; 33:24) Ihatag ni Jehova ang tanang maayong butang nga imong gitinguha. Unsay imong ganahang tun-an didto? Physics? Chemistry? Music? Art? Painting? Seguradong magkinahanglan pod didto ug mga architect, panday, ug mangunguma. Magkinahanglan sab didto ug mga moandam ug pagkaon, mohimog mga tool, mag-landscape, ug uban pa. (Isa. 35:1; 65:21) Kay mabuhi na man ka hangtod sa hangtod, naa na kay panahon nga mokat-on ug bisan unsang skill nga gusto nimo.
12 Makapalipay pod unya ang pag-abiabi sa mga binanhaw! (Buh. 24:15) Imadyina pod kon unsa ka lingaw ang pagkat-on bahin kang Jehova pinaagi sa pagtuon sa lainlaing klase sa iyang kalalangan. (Sal. 104:24; Isa. 11:9) Labaw sa tanan, makapalipay gyod nga mag-alagad kang Jehova uban ang hinlong konsensiya kay nianang panahona, dili na man ta makasala. Imo bang ibaylo kini nga mga panalangin sa “temporaryong kalipay sa pagpakasala”? (Heb. 11:25) Siyempre dili! Kini nga mga panalangin labaw pa gyod sa bisan unsa nga puwede natong maangkon niining kalibotana. Hinumdomi nga dili ta hangtod sa hangtod nga maghulat sa Paraisong yuta kay seguradong moabot gyod ni. Kining tanang panalangin naposible lang tungod kay gimahal ta pag-ayo ni Jehova maong gihatag niya ang iyang Anak para nato!
Unsang mga panalangin sa Paraiso ang imong gikahinaman pag-ayo? (Tan-awa ang parapo 11-12)
PABILHI ANG GUGMA NI JEHOVA
13. Unsaon nato pagpakita nga gipabilhan nato ang gugma ni Jehova? (2 Corinto 6:1)
13 Unsaon nato pagpakita nga gipabilhan nato ang pagtagana ni Jehova sa lukat? Himoon natong prayoridad sa atong kinabuhi ang pag-alagad kaniya. (Mat. 6:33) Hinumdomi nga si Jesus namatay “aron kadtong nagkinabuhi dili na magkinabuhi alang sa ilang kaugalingon, kondili alang kaniya nga namatay alang kanila ug gibanhaw.” (2 Cor. 5:15) Dili gyod nato gustong balewalaon ang dili hitupngang pagkamaayo ni Jehova.—Basaha ang 2 Corinto 6:1.
14. Unsay atong himoon aron mapakita nato ang atong pagsalig sa mga direksiyon ni Jehova?
14 Mapakita pod nato ang atong pagpabili sa gugma ni Jehova pinaagi sa pagsalig sa iyang mga direksiyon. Sa unsang paagi? Dihang mohimo tag mga desisyon, sama pananglitan kon mokuha ba tag taas nga edukasyon o kon unsang klaseha sa trabaho ang atong dawaton, kinahanglan natong konsiderahon kon unsay gusto ni Jehova nga atong himoon. (1 Cor. 10:31; 2 Cor. 5:7) Kon atong ipakita ang atong pagsalig kang Jehova diha sa atong mga desisyon, mas molig-on ang atong pagtuo ug ang atong relasyon kaniya. Ug mahimong mas tinuod para nato ang atong paglaom nga mabuhi hangtod sa hangtod.—Roma 5:3-5; Sant. 2:21, 22.
15. Unsaon nato pagpakita ang atong apresasyon panahon sa Memoryal?
15 Naa pay laing paagi nga atong mapakita ang atong apresasyon sa gugma ni Jehova. Niining panahon sa Memoryal, ilabinang gusto natong ipakita nga mapasalamaton kaayo ta kang Jehova tungod sa lukat. Gawas nga motambong gyod ta sa Memoryal, gusto pod natong imbitahon ang uban sa pagtambong. (1Tim. 2:4) Sultihi ang imong mga giimbitar kon unsay ginahimo panahon sa Memoryal. Makatabang kon ipatan-aw nimo ang mga video nga Nganong Namatay si Jesus? ug Paghinumdom sa Kamatayon ni Jesus nga makita sa jw.org. Seguroon sa mga ansiyano nga maimbitar ang mga dili aktibo. Imadyina ang dakong kalipay didto sa langit ug dinhi sa yuta kon ang uban sa nawalang karnero ni Jehova mobalik kaniya. (Luc. 15:4-7) Panahon sa Memoryal, abiabihon nato ang mga igsoon, pero ilabina gyod ang mga bisita o kadtong dugay nang wala magtambongan. Gusto natong ipakita nga nalipay gyod ta nga mitambong sila.—Roma 12:13.
16. Nganong angay tang maningkamot nga mohimo pag dugang sa ministeryo panahon sa Memoryal?
16 Makahimo ba kag dugang sa ministeryo sa mga semana sa dili pa ug human sa Memoryal? Ang pagbuhat niana nagpakita nga atong giapresyar ang tanang gihimo sa Diyos ug sa Kristo para nato. Kon kanunay tang makigbahin sa ministeryo, mas makita nato ang tabang ni Jehova, ug ingong resulta, mas molig-on pa ang atong pagsalig kaniya. (1 Cor. 3:9) Seguroa pod nga imong masunod ang eskedyul sa pagbasa sa Bibliya panahon sa Memoryal nga naa sa Pagsusi sa Kasulatan sa Adlaw-Adlaw o sa chart diha sa workbook para sa midweek nga tigom. Puwede pa gani nimong himoong study project kini nga mga teksto.
17. Unsay makapalipay kang Jehova? (Tan-awa sab ang kahong “ Mga Paagi nga Mapakita Nimo ang Imong Pagpabili sa Gugma ni Jehova.”)
17 Siyempre basin dili nimo mahimo ang tanang gisugyot niining artikuloha tungod sa imong kahimtang. Pero hinumdomi nga dili itandi ni Jehova ang imong mahimo sa kon unsay mahimo sa uban. Makita niya kon unsay naa sa imong kasingkasing. Malipay siya dihang makita niya ang imong sinserong apresasyon sa iyang bililhong regalo, ang lukat.—1 Sam. 16:7; Mar. 12:41-44.
18. Nganong mapasalamaton kaayo ta kang Jehova nga Diyos ug kang Jesu-Kristo?
18 Tungod sa lukat, nahimong posible nga mapasaylo ang atong mga sala, masuod ta kang Jehova, ug mabuhi sa walay kataposan. Hinaot nga padayon natong ipakita ang atong pagpabili sa gugma ni Jehova, nga maoy nagpalihok niya nga ihatag kanato kining tanang panalangin. (1 Juan 4:19) Hinaot ipakita pod nato ang atong apresasyon kang Jesus, kinsa nahigugma pag-ayo nato ug naghatag sa iyang kinabuhi para nato!—Juan 15:13.
AWIT 154 Gugma nga Dili Molubad
