TUN-ANANG ARTIKULO 3
AWIT 35 Tinoa ang Mas Hinungdanong mga Butang
Paghimog mga Desisyon nga Makapalipay Kang Jehova
“Ang pagkahadlok kang Jehova mao ang sinugdan sa kaalam, ug ang kahibalo bahin sa Usa nga Labing Balaan mao ang pagsabot.”—PROV. 9:10.
POKUS
Kon sa unsang paagi ang kahibalo, pagsabot, ug katakos sa panghunahuna makatabang nato sa paghimog maalamong mga desisyon.
1. Unsa ang kinahanglan natong himoon kada adlaw?
KADA adlaw kinahanglan tang mohimog mga desisyon. Ang uban sayon ra, sama sa kon unsay atong ipamahaw o unsang orasa ta matulog. Pero naay mga butang nga medyo lisod desisyonan kay makaapektar ni sa atong panglawas, sa atong kalipay, sa atong mga minahal, o sa atong pagsimba. Gusto nato nga ang atong mga desisyon makahatag ug kaayohan nato ug sa atong pamilya. Labaw sa tanan, gusto nato nga ang atong mga desisyon makapalipay kang Jehova.—Roma 12:1, 2.
2. Unsay makatabang nimo sa paghimog maalamong mga desisyon?
2 Dakog posibilidad nga makahimo kag maalamong desisyon kon imong (1) sayron ang mga detalye, (2) konsiderahon ang panghunahuna ni Jehova, ug (3) pamalandongon ang imong mga kapilian. Niining artikuloha, atong hisgotan kining tulo ka butang ug kon sa unsang paagi makatabang ni nato sa pagbansay sa atong katakos sa panghunahuna.—Prov. 2:11.
SAYRA ANG MGA DETALYE
3. Nganong kinahanglan una natong sayron ang mga detalye sa dili pa ta maghimog desisyon? Iilustrar.
3 Aron makahimo tag maayong desisyon, kinahanglan una natong sayron ang mga detalye. Nganong hinungdanon kini? Imadyina ang usa ka pasyente nga mikonsultag doktor bahin sa iyang seryosong sakit. Moreseta ba dayon ang doktor ug tambal o modesisyon nga operahan siya nga dili una mangutana o mo-examine niya? Siyempre dili. Sa susama, makahimo kag maayong mga desisyon kon imo unang sayron ang mga detalye bahin sa kahimtang. Unsaon nimo na paghimo?
4. Base sa Proverbio 18:13, unsay imong himoon aron mahibalo ka sa mga detalye? (Tan-awa sab ang hulagway.)
4 Sagad masayran nimo ang mga detalye kon mangutana ka. Pananglitan, ibutang ta nga giimbitar ka sa usa ka tapoktapok. Moadto ba ka? Kon dili kaayo nimo kaila ang nag-organize o wala kay ideya bahin sa tapoktapok, kinahanglan kang mangutana: “Asa ug kanus-a himoon ang tapoktapok? Unsa ka daghan ang giimbitar? Kinsa may magdumala ug magseguro nga wala ray problema panahon sa tapoktapok? Kinsa may mangadto? Unsay giplanong himoon didto? Magdalit bag makahubog nga mga ilimnon?” Ang mga tubag niini nga mga pangutana makatabang nimo sa paghimog maalamong desisyon.—Basaha ang Proverbio 18:13.
Sayra ang mga detalye pinaagig pagpangutana (Tan-awa ang parapo 4) a
5. Unsay angay nimong buhaton kon nahibalo na ka sa mga detalye?
5 Karon nga nahibalo na ka sa mga detalye, pamalandonga ang kahimtang. Pananglitan, komosta kon imong mahibaloan nga apil sa giimbitar ang mga indibiduwal kinsa walay pagpabili sa mga prinsipyo sa Bibliya? O komosta kon magpatuyang rag dalit didto ug makahubog nga mga ilimnon? Posible kaha nga kini nga tapoktapok mahimong banha ug way pugong nga paglipaylipay? (1 Ped. 4:3) Komosta kon ang tapoktapok matunong sa eskedyul sa tigom o pagsangyaw? Kon mapamalandong na nimo ang mga posibleng mahitabo, makatabang ni nimo sa paghimog maayong desisyon. Pero dili pa igo nga nahibalo na ka sa imong pagbati bahin sa situwasyon. Kinahanglang mahibaloan pod nimo kon unsay pagbati ni Jehova bahin niini.—Prov. 2:6.
KONSIDERAHA ANG PANGHUNAHUNA NI JEHOVA
6. Base sa Santiago 1:5, nganong angay tang moampo kang Jehova alang sa tabang?
6 Hangyoa si Jehova nga tabangan ka nga masabtan ang iyang panghunahuna. Si Jehova nagsaad nga hatagan ta niyag kaalam aron masabtan nato kon ang atong gihunahuna nga desisyon makapalipay ba niya. Kini nga kaalam ‘madagayaon niyang ihatag sa tanan ug dili siya mamuyboy.’—Basaha ang Santiago 1:5.
7. Unsay makatabang aron masabtan nimo ang panghunahuna ni Jehova? Iilustrar.
7 Kon nakaampo na ka alang sa giya ni Jehova, matikdi pag-ayo ang iyang tubag. Ibutang ta nga nasaag ka samtang nagbiyahe, mao nga nangutana ka sa usa nga tagadidto. Molakaw ra ba dayon ka bisag wala pa gani siya katubag? Siyempre dili. Maminaw gyod ka pag-ayo sa iyang ihatag nga direksiyon. Sa susama, kon mihangyo ka kang Jehova alang sa kaalam, paningkamoti nga mahibaloan nimo ang iyang tubag. Mahimo nimo na pinaagi sa pagsusi kon unsa nga mga balaod ug prinsipyo sa Bibliya ang mapadapat sa imong situwasyon. Pananglitan, dihang modesisyon kon moadto ba ka sa tapoktapok nga gihisgotan ganiha, puwede nimong konsiderahon kon unsay giingon sa Bibliya bahin sa banha ug walay pugong nga paglipaylipay, daotang panagkauban, ug sa pag-una sa Gingharian imbes sa atong kaugalingong mga gusto.—Mat. 6:33; Roma 13:13; 1 Cor. 15:33.
8. Unsay imong himoon aron makakita kag impormasyon nga imong gikinahanglan? (Tan-awa sab ang hulagway.)
8 Pero usahay nagkinahanglan tingali gihapon kag tabang sa pagpangitag impormasyon nga imong gikinahanglan. Puwede kang magpatambag sa usa ka eksperyensiyado nga igsoon. Pero makabenepisyo pod ka kon mag-research ka. Daghan tag publikasyon nga makatabang nimo, sama sa Giya sa Pagpanukiduki Para sa mga Saksi ni Jehova ug Mga Teksto Para sa Kristohanong Pagkinabuhi. Hinumdomi ang imong tumong: ang paghimog desisyon nga makapalipay kang Jehova.
Konsideraha ang panghunahuna ni Jehova (Tan-awa ang parapo 8) b
9. Unsaon nato pagseguro nga ang atong desisyon makapalipay kang Jehova? (Efeso 5:17)
9 Unsaon nato pagseguro nga ang atong desisyon makapalipay kang Jehova? Una, kinahanglang mailhan nato siya pag-ayo. Ang Bibliya nag-ingon: “Ang kahibalo bahin sa Usa nga Labing Balaan mao ang pagsabot.” (Prov. 9:10) Oo, mabatonan nato ang tinuod nga pagsabot kon nahibalo ta pag-ayo sa mga hiyas ug katuyoan ni Jehova ug kon unsay iyang gusto o dili gusto. Pangutan-a ang imong kaugalingon, ‘Base sa akong nahibaloan bahin kang Jehova, unsa kaha nga desisyon ang makapalipay niya?’—Basaha ang Efeso 5:17.
10. Nganong ang mga prinsipyo sa Bibliya mas importante kay sa tradisyon o lokal nga kostumbre?
10 Usahay kinahanglan tang mohimog mga desisyon nga dili makapalipay sa atong mga minahal, pero makapalipay kang Jehova. Ang ubang mga ginikanan tingali magpugos sa ilang anak nga babaye nga makigminyo sa usa ka tawong dato—o usa nga makahatag ug dako nga bugay—bisan pag ang maong tawo dili hamtong sa espirituwal. Normal lang nga gusto sa maong mga ginikanan nga maayog kahimtang sa materyal ang ilang anak. Pero kinsay motabang niya nga mouswag sa espirituwal? Unsa may panglantaw ni Jehova bahin niini? Makita nato ang tubag sa Mateo 6:33. Niining tekstoha, ang mga Kristohanon giawhag nga ‘unahon kanunay ang pagpangita sa Gingharian.’ Bisan pag gitahod nato ang atong mga ginikanan ug ang mga tawo sa atong lugar, ang pinakaimportante nato mao ang paglipay kang Jehova.
PAMALANDONGA ANG IMONG MGA KAPILIAN
11. Unsang hiyas ang makatabang nimo sa pagpamalandong sa imong mga kapilian? (Filipos 1:9, 10)
11 Human nimo konsideraha ang mga prinsipyo sa Bibliya nga mapadapat sa imong situwasyon, kinahanglan nimong timbangtimbangon ang imong mga kapilian. Unsang hiyas ang makatabang nimo? Ang katakos sa panghunahuna. Ang katakos sa panghunahuna makatabang nimo nga masabtan ang posibleng resulta sa matag kapilian. (Basaha ang Filipos 1:9, 10; tan-awa ang study note nga “full discernment.”) Usahay sayon rang magdesisyon. Pero naa poy mga situwasyon nga lisod desisyonan. Ang katakos sa panghunahuna makatabang nimo sa paghimog maalamong mga desisyon bisan pa sa lisod nga mga situwasyon.
12-13. Sa unsang paagi ang katakos sa panghunahuna makatabang nimo sa paghimog maalamong desisyon bahin sa pagpanarbaho?
12 Ibutang ta nga nangita kag trabaho aron masuportahan ang imong pamilya. Naay duha ka trabaho nga imong gipilian. Imong gisusi ang mga detalye, sama sa klase sa trabaho, eskedyul, gilay-on, ug uban pa. Ang duha ka trabaho parehong dili supak sa Bibliya. Tingali mas gusto nimo ang usa kay ganahan ka sa klase sa trabaho o mas dakog suweldo. Pero naa pay laing mga butang nga angay nimong konsiderahon sa dili pa ka magdesisyon.
13 Pananglitan, asa sa duha ang makatabang nimo nga dili maglisod sa pagtambong sa mga tigom? Asa sa duha ang makahatag nimog mas dakong panahon sa pag-atiman sa emosyonal ug espirituwal nga panginahanglan sa imong pamilya? Kini nga mga pangutana makatabang aron mauna nimo “ang mas importanteng mga butang”—ang imong pagsimba ug ang panginahanglan sa imong pamilya—imbes ang mas dakong suweldo. Makatabang pod ni aron makahimo kag desisyon nga panalanginan ni Jehova.
14. Sa unsang paagi ang katakos sa panghunahuna ug pagpakitag gugma makatabang aron dili ta makapandol sa uban?
14 Ang katakos sa panghunahuna makatabang nato nga konsiderahon kon unsay posibleng epekto sa atong mga desisyon ngadto sa uban aron ‘dili ta makapandol’ nila. (Filip. 1:10) Importante ni dihang mohimo tag mga desisyon bahin sa atong sininaan ug panagway. Pananglitan, ganahan tingali ta sa usa ka klase sa sininaan o pamostura. Pero komosta kon makapandol ni sa mga igsoon o sa mga dili Saksi? Ang katakos sa panghunahuna motabang nato nga tahoron ang ilang pagbati. Ang gugma mopalihok nato nga unahon ang kaayohan sa uban ug magmakasaranganon. (1 Cor. 10:23, 24, 32; 1 Tim. 2:9, 10) Kana makatabang nato aron makahimo tag desisyon nga magpakitag gugma ug pagtahod sa uban.
15. Unsay angay nimong buhaton sa dili pa ka mohimog bug-at nga desisyon?
15 Sa dili pa ka mohimog bug-at nga desisyon, daghang butang ang angay nimong konsiderahon. Si Jesus miingon nga angay nimong “kuwentahon ang gasto.” (Luc. 14:28) Busa hunahunaa kon unsa ka dako nga panahon, gasto, ug paningkamot ang gikinahanglan sa pag-implementar sa imong plano. Sa pipila ka kahimtang, puwede nimong estoryahon ang imong pamilya aron inyong mahisgotan kon unsay himoon sa matag usa aron molampos ang plano. Nganong importante man ni? Makatabang ni aron imong makita kon naa bay kinahanglang usbon sa imong mga plano o kon mas praktikal ba ang laing opsiyon. Ug kon imong iapil ang imong pamilya sa panaghisgot ug kon maminaw ka sa ilang mga sugyot, lagmit mas mosuportar sila sa imong desisyon.—Prov. 15:22.
PAGHIMOG DESISYON NGA MOLAMPOS
16. Unsay makatabang nimo sa paghimog desisyon nga molampos? (Tan-awa sab ang kahong “ Kon Unsaon Paghimog Maalamong mga Desisyon.”)
16 Kon imo nang gisunod ang mga sugyot nga gihisgotan sa ibabaw, andam na ka sa paghimog maalamong desisyon. Imo nang nahibaloan ang mga detalye ug nasusi ang mga prinsipyo nga makatabang nimo sa paghimog desisyon nga makapalipay kang Jehova. Busa ang imong himoon karon mao nga hangyoon nimo si Jehova nga tabangan ka nga molampos ang imong desisyon.
17. Unsa ang pangunang makatabang sa paghimog maayong desisyon?
17 Bisan pag nakahimo na ka kaniadto ug malamposong mga desisyon, ayaw pagsalig sa imong kaugalingong kaalam ug kasinatian. Hinumdomi nga ang pangunang makatabang nimo sa paghimog maayong desisyon mao ang pagsalig sa kaalam ni Jehova. Siya lang ang makahatag ug tinuod nga kahibalo, pagsabot, ug katakos sa panghunahuna—mga butang nga importante aron mahimo tang maalamon. (Prov. 2:1-5) Si Jehova makatabang nimo sa paghimog mga desisyon nga makapalipay niya.—Sal. 23:2, 3.
AWIT 28 Pakighigala Kang Jehova
