1. Nganong makabenepisyo ta sa pagtambong sa tinuig nga Memoryal sa kamatayon sa Kristo?

 SEGURADONG mouyon ka nga ang lukat usa gyod ka bililhong regalo. (2 Cor. 9:15) Kay gihalad ni Jesus ang iyang tawhanong kinabuhi, puwede na kang makabaton ug suod nga relasyon kang Jehova nga Diyos. Naa na pod kay paglaom nga mabuhi sa walay kataposan. Busa angay lang gyod nga pasalamatan nato si Jehova, kay tungod sa iyang gugma gihatag niya kanato ang lukat! (Roma 5:8) Aron tabangan ta nga padayong ipakita ang apresasyon sa lukat ug dili ni balewalaon, gisugo ta ni Jesus nga saulogon ang tinuig nga Memoryal sa iyang kamatayon.—Luc. 22:​19, 20.

2. Unsay atong hisgotan niini nga artikulo?

² Niining tuiga, ang Memoryal himoon sa Sabado, Abril 12, 2025. Seguradong kitang tanan gusto gyong motambong ani. Makabenepisyo tag dako kon mogahin tag panahon sa dili pa ug human sa Memoryal sa pagpamalandong a sa mga gihimo ni Jehova ug sa iyang Anak para nato. Niining artikuloha, atong hisgotan kon unsay atong makat-onan sa lukat bahin kang Jehova ug sa iyang Anak. Sa sunod nga artikulo, atong hisgotan kon unsay angay natong buhaton aron makabenepisyo ta sa lukat ug kon unsaon nato pagpakita ang atong apresasyon niini.

KON UNSAY ATONG MAKAT-ONAN SA LUKAT BAHIN KANG JEHOVA

3. Sa unsang paagi ang kamatayon sa usa ka tawo miresultag kaluwasan sa milyonmilyong tawo? (Tan-awa sab ang hulagway.)

³ Ang lukat nagtudlo nato bahin sa hustisya ni Jehova. (Deut. 32:4) Sa unsang paagi? Konsideraha ni: Tungod sa pagkadili-masinugtanon  ni Adan, napanunod nato ang sala nga miresultag kamatayon. (Roma 5:12) Aron mapahigawas ta gikan sa sala ug kamatayon, gipadala ni Jehova si Jesus sa paglukat nato. Pero sa unsang paagi ang halad lukat sa usa ka hingpit nga tawo makaluwas sa milyonmilyong tawo? Si apostol Pablo nagpatin-aw: “Sama nga ang pagkadili-masinugtanon sa usa ka tawo [si Adan] miresulta nga daghan ang nahimong makasasala, pinaagi usab sa pagkamasinugtanon sa usa ka persona [si Jesus] daghan ang mahimong matarong.” (Roma 5:19; 1 Tim. 2:6) Sa ato pa, tungod sa pagkadili-masinugtanon sa usa ka hingpit nga tawo, naulipon ta sa sala ug kamatayon. Pero tungod sa pagkamasinugtanon sa usa ka hingpit nga tawo, napahigawas ta.

4. Nganong wala na lang tugoti ni Jehova nga mabuhi hangtod sa hangtod ang masinugtanong mga kaliwat ni Adan?

⁴ Kinahanglan ba gyong mamatay si Jesus aron maluwas ta? Dili ba puwede nga tugotan na lang ni Jehova nga mabuhi hangtod sa hangtod ang masinugtanong mga kaliwat ni Adan? Sa panglantaw sa dili hingpit nga mga tawo, morag mao nay makataronganon ug maayong himoon. Pero wala ni mahiuyon sa hingpit nga hustisya ni Jehova. Ingong Diyos sa hustisya, dili gyod konsentihon ni Jehova ang tinuyong pagsupak ni Adan.

5. Nganong makaseguro ta nga kanunay gyong himoon ni Jehova kon unsay husto?

⁵ Pero komosta kon wala ihatag ni Jehova ang lukat ug iyang gibalewala ang hustisya pinaagi sa basta na lang paghatag ug kinabuhing walay kataposan sa dili hingpit nga mga kaliwat ni Adan? Kon kanay gihimo sa Diyos, basin maghunahuna na hinuon ang mga tawo nga dili kanunayng sundon sa Diyos ang iyang sukdanan sa hustisya. Basin magduhaduha na hinuon sila kon tumanon ba gyod niya ang tanan niyang saad. Pero kay gihimo man ni Jehova kon unsay hustisya, dili ta angayng mabalaka ana. Mihimo siyag dako kaayong sakripisyo pinaagi sa paghalad sa iyang pinalanggang Anak. Kana nagpasalig nato nga kanunay gyod niyang buhaton kon unsay husto.

6. Unsa pang hiyas ni Jehova ang nagpalihok niya sa pagtagana sa lukat? (1 Juan 4:​9, 10)

⁶ Pinaagi sa pagtagana sa lukat, gipakita ni Jehova ang hustisya, pero ilabinang gipakita niya ang iyang dakong gugma. (Juan 3:16; basaha ang 1 Juan 4:​9, 10.) Ang lukat nagpakita nga gusto ni Jehova nga mabuhi ta sa walay kataposan ug mahimong bahin sa iyang pamilya. Konsideraha ni: Sa dihang si Adan nakasala, gitangtang siya ni Jehova ingong membro sa Iyang pamilya. Tungod ana, kitang tanan natawo nga dili bahin sa pamilya sa Diyos. Pero tungod sa lukat, gipasaylo ni Jehova ang atong  mga sala, ug sa ngadtongadto, iyang dawaton pag-usab ingong bahin sa iyang pamilya ang tanan nga magpakitag pagtuo ug magmasinugtanon kaniya. Bisan karon pa lang, puwede na natong mabatonan ang suod nga relasyon kaniya ug sa atong mga igsoon. Klaro nga gimahal gyod ta pag-ayo ni Jehova!—Roma 5:​10, 11.

7. Sa unsang paagi ang pag-antos ni Jesus motabang nato nga masabtan nga gimahal ta pag-ayo ni Jehova?

⁷ Mas masabtan nato nga gimahal ta pag-ayo ni Jehova kon atong pamalandongon kon unsa ka dako ang iyang gisakripisyo aron mahatag ang lukat. Si Satanas miingon nga walay alagad sa Diyos ang magpabiling maunongon Kaniya kon lisod ang situwasyon. Aron mapamatud-an nga sayop ang giingon ni Satanas, gitugotan ni Jehova nga mag-antos si Jesus sa dili pa siya mamatay. (Job 2:​1-5; 1 Ped. 2:21) Nakita ni Jehova samtang si Jesus gibugalbugalan sa mga magsusupak, gilapdosan sa mga sundalo, ug gilansang sa estaka. Ug nakita ni Jehova ang iyang pinalanggang Anak nga grabeng nag-antos hangtod nga namatay. (Mat. 27:​28-31, 39) Naay gahom si Jehova nga hunongon ang tanang pag-antos ni Jesus. Pananglitan, puwede gyod untang luwason ni Jehova si Jesus, ilabina dihang miingon ang mga magsusupak: “Kon giuyonan siya sa Diyos, Iya siyang luwason.” (Mat. 27:​42, 43) Pero kon iya tong gihimo, dili gyod matagana ang lukat ug wala gyod tay paglaom. Maong gitugotan ni Jehova ang iyang Anak nga mag-antos hangtod sa kamatayon.

8. Nasakitan ba si Jehova nga nakita ang iyang Anak nga nag-antos? Ipatin-aw. (Tan-awa sab ang hulagway.)

⁸ Dili gyod ta angayng maghunahuna nga kay ang Diyos ang Labing Gamhanan, wala na siyay pagbati. Gilalang ta sumala sa iyang larawan ug may mga pagbati, maong makaingon ta nga si Jehova naa poy mga pagbati. Ang Bibliya nag-ingon nga siya ‘masakitan’ ug ‘maguol.’ (Sal. 78:​40, 41) Konsideraha pod ang eksperyensiya ni Abraham ug Isaac. Hinumdomi nga si Abraham gisugo sa paghalad sa iyang bugtong nga anak. (Gen. 22:​9-12; Heb. 11:​17-19) Ma-imagine nato kon unsa ka sakit ang gibati ni Abraham samtang naggunit siya sa kutsilyo aron patyon ang iyang anak. Pero seguradong labaw pa niana ang gibati ni Jehova dihang nakita niya ang iyang Anak nga grabeng gipaantos sa daotang mga tawo hangtod nga namatay. Sakit gyod kaayo to para kang Jehova!—Tan-awa sa jw.org ang video nga Sundoga ang Ilang Pagtuo—Abraham, Bahin 2.

9. Giunsa pagpakita sa Roma 8:​32, 38, 39 ang kadako sa gugma ni Jehova kanato ug sa atong mga igsoon?

⁹ Ang lukat nagtudlo nato nga wala gyoy makalabaw sa gugma ni Jehova kanato. Mas labaw pa ni sa gugma sa atong pinakasuod nga membro sa pamilya o higala. (Basaha ang Roma 8:​32, 38, 39.) Ug kon gimahal nato ang atong kaugalingon, mas labaw pa ang pagmahal ni Jehova  kanato. Gusto ba nimong mabuhi hangtod sa hangtod? Mas labaw na nga gusto na ni Jehova para nimo. Gusto ba nimong mapasaylo ang imong mga sala? Mas labaw na nga gusto ni Jehova nga pasayloon ang imong mga sala. Ang iya lang gihangyo mao nga dawaton nato ang iyang bililhong regalo nga lukat pinaagi sa pagpakitag pagtuo ug pagkamasinugtanon. Ang lukat nagpakita gyod kon unsa ka dako ang gugma sa Diyos para nato. Ug sa bag-ong kalibotan, mas daghan pa gyod tag makat-onan bahin sa gugma ni Jehova.—Eccl. 3:11.

KON UNSAY GITUDLO SA LUKAT BAHIN KANG JESUS

10. (a) Unsay ilabinang nakapaguol kang Jesus bahin sa iyang kamatayon? (b) Giunsa pagbalaan ni Jesus ang ngalan ni Jehova? (Tan-awa sab ang kahong “ Ang Pagkamatinumanon ni Jesus Nagbalaan sa Ngalan ni Jehova.”)

¹⁰ Importante kaayo kang Jesus ang reputasyon sa iyang Amahan. (Juan 14:31) Giakusahan si Jesus nga nagpasipala sa Diyos ug mirebelde sa nasod, maong naguol kaayo siya kay basig makahatag nig kaulawan sa iyang Amahan. Tungod ana, siya miampo: “Amahan ko, kon mahimo, kuhaa kining kopa gikan kanako.” (Mat. 26:39) Pinaagi sa iyang pagpabiling matinumanon kang Jehova hangtod sa iyang kamatayon, bug-os nga gibalaan ni Jesus ang ngalan sa iyang Amahan.

11. Giunsa pagpakita ni Jesus ang iyang dakong gugma sa mga tawo? (Juan 13:1)

¹¹ Ang lukat nagtudlo pod nato nga gimahal pag-ayo ni Jesus ang mga tawo, ilabina ang iyang mga tinun-an. (Prov. 8:31; basaha ang Juan 13:1.) Pananglitan, nahibalo si Jesus nga dili gyod sayon ang pipila ka bahin sa iyang asaynment dinhi sa yuta, ilabina ang iyang sakit nga kamatayon. Bisan pa niana, kinasingkasing nga gihimo ni Jesus ang iyang asaynment. Naningkamot siya pag-ayo nga sangyawan, tudloan, ug alagaran ang uban. Bisan sa adlaw sa iyang kamatayon, migahin siyag panahon  nga hugasan ang tiil sa iyang mga apostoles ug iya silang gidasig ug gihupay. (Juan 13:​12-15) Ug bisan dihang gilansang na siya sa estaka, gihatagan niyag paglaom ang kriminal nga tupad niya. Giingnan pod niya si Juan nga atimanon ang iyang inahan. (Luc. 23:​42, 43; Juan 19:​26, 27) Busa gipakita ni Jesus ang iyang dakong gugma dili lang pinaagi sa iyang kamatayon kondili pinaagi pod sa iyang pagkinabuhi dinhi sa yuta.

12. Sa unsang paagi padayon tang ginatabangan ni Jesus karon?

¹² Bisag si Jesus namatay “kausa alang sa tanang panahon,” daghan gihapon siyag ginahimo para nato karon. (Roma 6:10) Hunahunaa ang daghang butang nga iyang ginahimo aron makabenepisyo ta sa lukat. Nag-alagad siya ingong atong Hari, Hataas nga Saserdote, ug ulo sa kongregasyon. (1 Cor. 15:25; Efe. 5:23; Heb. 2:17) Siyay nagdumala sa buluhaton nga pagtigom sa mga dinihogan ug sa dakong panon, buluhaton nga matapos sa dili pa magsugod ang Armagedon. b (Mat. 25:32; Mar. 13:27) Iya pong giseguro nga ang iyang matinumanong mga alagad makabaton ug dagayang espirituwal nga pagkaon niining kataposang mga adlaw. (Mat. 24:45) Ug padayon ta niyang tabangan panahon sa iyang Usa ka Libo ka Tuig nga Pagmando. Klaro nga gihatag ni Jehova ang iyang Anak dili lang aron mamatay para nato kondili aron mohimog daghang butang para sa atong kaayohan!

AYAWG HUNONG SA PAGKAT-ON

13. Sa unsang paagi ang pagpamalandong makatabang nimo nga padayong makakat-on bahin sa gugma sa Diyos ug sa Kristo kanato?

¹³ Daghan pa kag makat-onan bahin sa gugma ni Jehova nga Diyos ug ni Kristo Jesus kanato kon padayon kang mamalandong bahin niini. Tingali sa dili pa ug human sa Memoryal niining tuiga, puwede kang mobasag usa o kapin pa ka Ebanghelyo. Pero ayaw pagbasag daghan kaayong kapitulo sa usa lang ka higayon. Samtang magbasa ka, ayaw pagdalidali. Pangitag dugang mga rason kon nganong angay natong higugmaon si Jehova ug si Jesus. Ug paningkamoti nga masulti nimo sa uban ang imong mga nakat-onan.

14. Base sa Salmo 119:97 ug footnote, sa unsang paagi ang pag-research makatabang nato nga padayong makakat-on bahin sa lukat ug sa uban pang mga topiko? (Tan-awa sab ang hulagway.)

¹⁴ Kon dugay na ka sa kamatuoran, maghunahuna  tingali ka kon naa pa ba kay bag-ong makat-onan bahin sa pamilyar nga mga topiko, sama sa hustisya sa Diyos, sa iyang gugma, ug sa lukat. Sa tinuod lang, daghan pa kaayo tag makat-onan bahin niini ug sa uban pang mga topiko. Busa unsay angay nimong himoon? Pahimusli pag-ayo ang mga impormasyon nga makita diha sa atong mga publikasyon. Kon naa kay nabasahan nga wala nimo masabti, pag-research. Dayon pamalandonga ang imong nakat-onan ug kon unsay gitudlo niini kanimo bahin kang Jehova, sa iyang Anak, ug sa ilang gugma kanimo.—Basaha ang Salmo 119:97 ug footnote.

15. Nganong dili ta angayng mohunong sa pagpangitag espirituwal nga mga bahandi?

¹⁵ Kon sa imong pagbasa o pag-research wala dayon kay makita nga bag-o o makapainteres nga mga butang, ayawg kaluya. Imadyina nga nangita kag bulawan. Ang mga tigpangitag bulawan kinahanglang mogahin ug daghang oras o adlaw ayha sila makakitag gamayng tipak niini. Pero maningkamot gyod sila, kay ang matag tipak sa bulawan dako kaayog bili. Unsa pa kaha ang mga kamatuoran nga naa sa Bibliya; mas labaw pa nig bili kay sa bulawan! (Sal. 119:127; Prov. 8:10) Maong pailob lang ug padayon sa imong eskedyul sa pagbasa sa Bibliya.—Sal. 1:2.

16. Sa unsang paagi nato masundog si Jehova ug si Jesus?

¹⁶ Samtang magtuon ka, pangitag mga paagi nga mapadapat nimo ang imong nakat-onan. Pananglitan, sundoga ang hustisya ni Jehova pinaagi sa pagtratar sa uban sa patas nga paagi. Sundoga ang gugma ni Jesus para sa iyang Amahan ug sa uban pinaagi sa pagkahimong andam mosakripisyo para kang Jehova ug sa mga igsoon. Dugang pa, sundoga si Jesus pinaagi sa pagsangyaw sa uban aron sila pod makabatog kahigayonan nga makabenepisyo sa bililhong regalo ni Jehova nga lukat.

17. Unsay atong hisgotan sa sunod nga artikulo?

¹⁷ Kon mas masabtan ug maapresyar nato ang lukat, mas molalom ang atong gugma kang Jehova ug sa iyang Anak. Tungod niana, mas higugmaon pa gyod ta nila. (Juan 14:21; Sant. 4:8) Busa pahimuslan nato ang mga tagana ni Jehova aron padayon tang makakat-on bahin sa lukat. Sa sunod nga artikulo, atong hisgotan ang pipila ka panalangin tungod sa lukat ug kon unsay atong himoon aron mapakita nato ang atong apresasyon sa gugma ni Jehova.