ATONG mabasa sa Bibliya ang kinasingkasing nga mga pulong sa mga tawo nga “may pagbati nga sama kanato.” (Sant. 5:17) Pananglitan, masabtan dayon nato ang giangkon ni Pablo sa Roma 7:21-24: “Dihang gusto nakong buhaton ang matarong, ang daotan ania kanako. . . . Makaluluoy kaayo ko!” Ang maong matinud-anong mga pagbati makapahupay gyod nato dihang makigbisog ta sa atong mga kahuyangan.

Si Pablo nagpahayag sab ug laing matinud-anong mga pagbati. Sa Galacia 2:20, iyang gisulti nga kombinsido siya nga si Jesus “nahigugma [niya] ug nagtugyan sa iyang kaugalingon alang [kaniya].” Mao ba sab nay imong pagbati? Seguro dili sa tanang panahon.

Kon mobati gihapon tang way pulos tungod sa nangagi natong mga sala, malisdan tingali ta sa pagtuo nga gihigugma ug gipasaylo ta ni Jehova, ug malisdan sab ta sa pag-isip sa halad lukat ni Jesus ingong personal nga regalo alang kanato. Gusto ba gyod ni Jesus nga isipon nato ang lukat ingong personal nga regalo? Kon mao, unsay makatabang nato sa pagbuhat niana? Hisgotan nato kanang duha ka pangutana.

Oo, gusto ni Jesus nga isipon nato ang iyang halad ingong personal nga regalo. Nganong makaseguro ta ana? Imadyina ang esena sa Lucas 23:39-43. Ang usa ka tawo gibitay sa estaka tupad kang Jesus. Giangkon niya nga nakahimo siyag daotan. Posibleng seryoso ang maong krimen kay kadto lang nakahimog bug-at kaayong sala ang silotag kamatayon sa estaka. Kay naguol pag-ayo sa iyang situwasyon, ang tawo nagpakiluoy kang Jesus: “Hinumdomi ko inig-abot nimo sa imong Gingharian.”

Unsay gihimo ni Jesus? Maimadyin ba nimo ang kasakit nga iyang gibati dihang milingi siya aron motan-aw sa kriminal? Bisag nasakitan pag-ayo, siya mipahiyom ug miingon: “Akong ipasalig kanimo karong adlawa, ikaw makauban nako sa Paraiso.” Puwede ra untang pahinumdoman ni Jesus ang kriminal nga ‘ang Anak sa tawo mianhi aron sa paghatag sa iyang kinabuhi ingong lukat baylo sa daghan.’ (Mat. 20:28) Pero namatikdan ba nimo nga malumong giingnan ni Jesus ang tawo nga personal siyang makabenepisyo sa halad? Mahigalaon ang iyang tono dihang miingon siyag “ikaw” ug “nako.” Ug iyang giingnan ang maong tawo nga siya makapuyo sa paraisong yuta.

Way duhaduha, gusto ni Jesus nga dawaton sa maong tawo ang iyang halad ingong personal nga regalo. Kon kanay pagbati ni Jesus ngadto sa kriminal nga wala ganiy kahigayonan nga moalagad sa Diyos, labaw na gyod ngadto sa bawtismadong Kristohanon nga nag-alagad sa Diyos. Busa unsay makatabang aron mobati ta nga personal tang makabenepisyo sa halad ni Jesus bisan pa sa atong nangaging mga sala?

Ang ministeryo ni Pablo nakatabang niya nga masabtan nga si Jesus namatay gyod alang kaniya. Sa unsang paagi? Iyang gipatin-aw: “Mapasalamaton  ko kang Kristo Jesus nga atong Ginoo, nga naghatag kanakog gahom, kay giisip ko niya nga matinumanon pinaagi sa paghatag kanakog sagradong buluhaton, bisan pag kaniadto ako tigpasipala, maglulutos, ug bagis.” (1 Tim. 1:12-14) Ang asaynment ni Pablo nakapakombinsir niya nga si Jesus may kaluoy, gugma, ug pagsalig kaniya. Ang matag usa kanato gihatagan sab ni Jesus ug asaynment nga isangyaw ang maayong balita. (Mat. 28:19, 20) Makatabang ba sab nâ kanato sa pagsabot nga si Jesus namatay gyod alang kanato?

Si Albert, nga bag-o lang napasig-uli human ma-disfellow sa halos 34 ka tuig, miingon: “Ang akong sala kanunayng anaa sa akong atubangan. Pero dihang mosangyaw ko, bation nako nga personal kong nakadawat ug asaynment gikan kang Jesus, sama sa gibati ni apostol Pablo. Kini nakadasig nako ug nakatabang nga mahimong positibo ang akong pagbati sa akong kaugalingon, sa akong kinabuhi, ug sa akong kaugmaon.”​—Sal. 51:3.

Si Allan, nga kaniadto nakahimog daghang krimen ug bayolente kaayo, miingon: “Makahunahuna gihapon ko sa kadaot nga nahimo nako sa mga tawo. Usahay, maguol kaayo ko ini. Pero mapasalamaton ko kang Jehova nga bisag makasasala ko, gitugotan ko niyang makasangyaw sa maayong balita. Dihang makita nako nga modawat ang mga tawo sa maayong balita, mahinumdom ko kon unsa ka maayo ug ka mahigugmaon si Jehova. Akong gibati nga gigamit ko niya sa pagtabang sa uban nga parehas nakog kaagi.”

Ang atong ministeryo makatabang nato sa pagpokus sa maayong mga buhat ug hunahuna. Kini makapakombinsir nato nga si Jesus may kaluoy, gugma, ug pagsalig kanato.

Samtang dili pa matapos ang daotang sistema ni Satanas, tingali hukman gihapon ta sa atong kasingkasing tungod sa atong nangaging mga sala. Unsay makatabang nato nga masuklan ang maong mga pagbati?

“Nalipay ko sa pagkahibalo nga ‘ang Diyos mas labaw sa atong kasingkasing,’” miingon si Jean, kinsa makonsensiya usahay tungod sa iyang dobleng pagkinabuhi sa batan-on pa siya. (1 Juan 3:19, 20) Kita sab mahupayan sa pagkahibalo nga si Jehova ug Jesus nakasabot nga makasasala ta. Hinumdomi nga mahigugmaon nilang gitagana ang lukat, dili para sa perpektong mga tawo, kondili para sa mga mahinulsolon.​—1 Tim. 1:15.

Makombinsir ta nga personal tang makabenepisyo sa lukat dihang mainampoon natong pamalandongon ang pagtratar ni Jesus sa dili perpektong mga tawo ug dihang buhaton nato ang atong kinamaayohan sa ministeryo nga gihatag ni Jesus kanato. Sa pagbuhat niana, makasulti ka sama kang Pablo: Si Jesus “nahigugma nako ug nagtugyan sa iyang kaugalingon alang kanako.”