1. Nganong kinahanglan tang mangandam alang sa paglutos?

SA GABII una patya ang atong Ginoong Jesus, siya miingon nga ang tanan nga gustong mahimong iyang mga tinun-an pagadumtan. (Juan 17:14) Hangtod karon, ang matinumanon nga Kristohanong mga Saksi ni Jehova gilutos niadtong supak sa matuod nga pagsimba. (2 Tim. 3:12) Samtang magkaduol ang kataposan niining sistemaha, makadahom ta nga mosamot pa ang paglutos.​—Mat. 24:9.

2-3. (a) Unsay angay natong mahibaloan bahin sa kahadlok? (b) Unsay atong hisgotan niining artikuloha?

² Unsaon nato pagpangandam alang sa paglutos? Dili kinahanglang hunahunaon nato ang tanang daotang butang nga posibleng mahitabo kanato. Kay kon ato nang himoon, madaog ta sa kahadlok ug kabalaka. Mahimong mapildi na ta bisag wala pa ang tinuod nga pagsulay. (Prov. 12:25; 17:22) Ang kahadlok maoy epektibong hinagiban nga sulayan paggamit sa atong “kaaway, ang Yawa,” batok kanato. (1 Ped. 5:8, 9) Unsay atong mahimo karon aron mapalig-on ang kaugalingon?

³ Niining artikuloha, atong hisgotan kon unsaon nato pagpalig-on ang atong relasyon kang Jehova ug kon nganong importante nga ato nang himoon karon. Hisgotan sab nato kon unsay atong buhaton aron mahimong mas maisogon. Sa kataposan, susihon nato kon unsay atong buhaton dihang dumtan ta sa mga tawo.

4. Sumala sa Hebreohanon 13:5, 6, sa unsa ta angayng magmasaligon, ug ngano?

⁴ Magmasaligon nga si Jehova nahigugma nimo ug dili gyod ka niya talikdan. (Basaha ang Hebreohanon 13:5, 6.) Katuigan  kanhi, ang The Watchtower nag-ingon: “Ang tawo nga nakaila pag-ayo sa Diyos mosalig pag-ayo niya panahon sa pagsulay.” Tinuod gyod nâ! Aron makalahutay ta sa mga paglutos, kinahanglan tang mahigugma kang Jehova ug mosalig kaniya sa bug-os, nga dili gyod magduhaduhang gimahal ta niya.​—Mat. 22:36-38; Sant. 5:11.

5. Unsay makatabang aron imong bation nga gihigugma ka ni Jehova?

⁵ Basaha ang Bibliya kada adlaw aron mas masuod kang Jehova. (Sant. 4:8) Sa imong pagbasa, pagpokus sa nindot nga mga hiyas ni Jehova. Dihang magbasa ka sa iyang mga gisulti ug gihimo, hunahunaa kon unsa ka dako ang iyang gugma kanimo. (Ex. 34:6) Ang uban malisdan sa pagtuo nga gihigugma sila sa Diyos kay wala gyoy nagpakitag gugma kanila. Kon kanay imong gibati, sulayi paglista kada adlaw ang mga paagi nga si Jehova nagpakitag kaluoy ug pagkamaayo kanimo. (Sal. 78:38, 39; Roma 8:32) Samtang maghunahuna ka sa imong mga kasinatian ug mamalandong sa imong mga nabasa sa Pulong sa Diyos, tingali mas daghan kag malista nga mga butang nga nahimo ni Jehova para kanimo. Kon mas mapabilhan nimo ang mga gihimo ni Jehova, mas masuod ka kaniya.​—Sal. 116:1, 2.

6. Sumala sa Salmo 94:17-19, sa unsang paagi makatabang nimo ang kinasingkasing nga pag-ampo?

⁶ Pag-ampo kanunay. Hunahunaa ang usa ka bata nga mahigugmaong gigakos sa iyang amahan. Ang bata mobating luwas maong dili siya mahadlok nga mosulti sa iyang amahan sa tanang maayo ug dili maayong nahitabo niya nianang adlawa. Matagamtam nimo ang susamang kasuod kon moduol ka kang Jehova pinaagig kinasingkasing nga pag-ampo kada adlaw. (Basaha ang Salmo 94:17-19.) Dihang mag-ampo kang Jehova, “ibubo ang imong kasingkasing [kaniya] sama sa tubig,” ug isulti sa imong mahigugmaong Amahan ang tanan nimong gikahadlokan ug gikabalak-an. (Lam. 2:19) Unsay resulta niana? Bation nimo ang giingon sa Bibliya nga “kalinaw nga gikan sa Diyos, nga labaw sa tanang pagsabot.” (Filip. 4:6, 7) Kon moampo ka kang Jehova nianang paagiha, mas masuod ka kaniya.​—Roma 8:38, 39.

7. Nganong angay kang motuo nga matuman ang mga saad sa Diyos bahin sa Gingharian?

⁷ Magmasaligon nga ang tanang panalangin sa Gingharian sa Diyos matuman. (Num. 23:19) Kon wala gyod ka motuo niining mga saara, dali ra kang hadlokon ni Satanas ug sa iyang mga sakop. (Prov. 24:10; Heb. 2:15) Unsay imong himoon karon aron mas molig-on ang imong pagsalig sa Gingharian sa Diyos? Paggahin ug panahon sa pagtuon sa mga saad sa Diyos bahin sa iyang Gingharian ug sa mga rason kon nganong makaseguro ka nga matuman kini. Sa unsang paagi makatabang kana? Tagda ang pananglitan ni Stanley Jones, nga naprisog pito ka tuig tungod sa iyang pagtuo. * Unsay nakatabang  niya nga makalahutay nga matinumanon? Siya miingon: “Sanglit ginapalig-on sa kahibalo mahitungod sa gingharian sa Dios, sanglit nakaseguro ako niini, nga wala gayuy pagduhaduha bisan diyutay, ako wala gayud matarug.” Kon lig-on ang imong pagtuo sa mga saad sa Diyos, mas masuod ka kang Jehova ug dili ka madaog sa kahadlok.​—Prov. 3:25, 26.

8. Ang atong pagtambong sa mga tigom magpaila sa unsa? Ipatin-aw.

⁸ Tambong pirme sa mga tigom. Ang mga tigom mas makapasuod nato kang Jehova. Ang atong pagtambong sa mga tigom magpaila kon makalahutay ba ta sa mga paglutos sa umaabot. (Heb. 10:24, 25) Ngano? Kon mopalta ta sa mga tigom karon tungod sa ginagmayng problema, unsa na man kon sa umaabot kinahanglan natong ipameligro ang kaugalingon aron magtigom uban sa mga igsoon? Sa laing bahin, kon determinado ta nga dili gyod mopalta sa mga tigom, dili ta madaog sa mga kaaway dihang did-an ta sa pagtigom. Karon pa lang, kinahanglang ganahan na tang motambong sa mga tigom. Kon ganahan tang motambong, ang mga pagsupak o pagdili sa gobyerno dili makapugong nato sa pagsugot sa Diyos imbes sa mga tawo.​—Buh. 5:29.

9. Nganong ang pagmemoryag mga teksto usa ka maayong paagi sa pagpangandam alang sa paglutos?

⁹ Memoryaha ang imong paboritong mga teksto. (Mat. 13:52) Dili perpekto ang imong memorya, pero mahimong gamiton ni Jehova ang iyang gamhanang balaang espiritu aron ipahinumdom kanimo ang maong mga teksto. (Juan 14:26) Matikdi ang giingon sa usa ka brader nga napriso sa East Germany ug gibartolina: “Lipay kaayo ko kay nakamemorya na ko daan ug ginatos ka teksto! Bisag nag-inusara ko, nagsige kog pamalandong sa daghang topiko sa Bibliya.” Kadtong mga tekstoha nakatabang sa atong igsoon nga makapabiling suod kang Jehova ug makalahutay nga matinumanon.

10. Nganong angay tang magmemoryag mga kanta?

¹⁰ Memoryaha ug kantaha ang mga awit sa pagdayeg kang Jehova. Dihang si Pablo ug Silas napriso sa Filipos, sila nangantag mga awit sa pagdayeg kang Jehova nga ilang namemorya. (Buh. 16:25) Sa susama, dihang ang atong mga igsoon sa kanhing Soviet Union gipugos pagdala ngadto sa Siberia, giunsa nila pagpalig-on ang ilang kaugalingon? Si Sister Mariya Fedun nahinumdom: “Among gikanta ang tanang kanta nga among nahibaloan, ang mga kanta sa songbok.” Siya miingon nga kadtong  mga kantaha nakadasig nilang tanan ug nakatabang nilang mas masuod kang Jehova. Mapalig-on ba ka dihang mokanta ka sa imong paboritong mga awit? Kon mao, memoryaha na kana!​—Tan-awa ang kahong “ Hatagi Kog Kaisog.”

11-12. (a) Sumala sa 1 Samuel 17:37, 45-47, nganong maisogon si David? (b) Unsang importanteng leksiyon ang atong makat-onan kang David?

¹¹ Aron maatubang ang mga paglutos, nagkinahanglan kag kaisog. Kon gibati nimo nga dili ka maisogon, unsay imong mahimo? Hinumdomi, ang tinuod nga kaisog wala magdepende sa imong gidak-on, kusog, o abilidad. Tagda ang pananglitan sa batan-ong si David dihang giatubang niya si Goliat. Kon ikomparar sa maong higante, si David mas gamay, mas huyang, ug walay galamiton sa pagpakiggubat. Wala gani siyay espada. Pero isog kaayo siya. Si David maisogong midasdas aron makig-away niadtong hambogirong higante.

¹² Nganong isog kaayo si David? Siya lig-on kaayog pagtuo nga si Jehova nag-uban kaniya. (Basaha ang 1 Samuel 17:37, 45-47.) Wala siya magpokus kon unsa ka dako si Goliat kon ikomparar kaniya. Hinuon, nagpokus siya kon unsa ka gamay si Goliat kon ikomparar kang Jehova. Unsay atong makat-onan niini? Magmaisogon ta kon mosalig ta nga si Jehova nagauban kanato ug kon segurado ta nga ang atong mga kaaway wala ra sa kumingking sa Labing Gamhanang Diyos. (2 Cron. 20:15; Sal. 16:8) Unsay atong buhaton aron mahimo tang mas maisogon karon​—sa dili pa moabot ang paglutos?

13. Sa unsang paagi mahimo tang mas maisogon? Ipatin-aw.

¹³ Mahimo tang mas maisogon karon kon isangyaw nato ang maayong balita sa Gingharian sa Diyos. Ngano? Kay ang pagsangyaw magtudlo nato nga mosalig kang Jehova ug dili mahadlok sa tawo. (Prov. 29:25) Sama nga mosamot ka lig-on ang atong kaunoran kon mag-ehersisyo ta, mosamot pod ang atong kaisog kon mosangyaw ta sa balay ug balay, sa publikong mga lugar, sa impormal, ug sa mga negosyohanan. Kon maisogon ta sa pagsangyaw karon, mas andam ta nga mosangyaw bisag idili ang atong buluhaton.​—1 Tes. 2:1, 2.

14-15. Unsay atong makat-onan kang Nancy Yuen ug Valentina Garnovskaya?

¹⁴ Daghan tag makat-onan sa ehemplo sa duha ka matinumanong sister nga maisogon  kaayo. Si Nancy Yuen wala ray lima ka piye ang gitas-on, pero dili siya daling mahadlok. * Wala gyod siya moundang ug sangyaw sa maayong balita sa Gingharian sa Diyos. Tungod niana, napriso siyag mga 20 ka tuig sa Komunistang China. Ang mga opisyales nga nagsukitsukit niya miingon nga siya ang “pinakagahig ulo” sa tibuok nasod!

¹⁵ Si Valentina Garnovskaya katulo napriso sa kanhing Soviet Union, nga tanantanan miabot ug 21 ka tuig. * Ngano? Tungod kay determinado kaayo siyang mosangyaw. Gani, ang mga opisyales nagtawag niya ingong “peligrosong tiglapas sa balaod.” Nganong maisogon kaayo kining duha ka matinumanong babaye? Kay kombinsido sila nga si Jehova nag-uban kanila.

16. Unsay sekreto aron mahimong tinuod nga maisogon?

¹⁶ Sa ato nang nahisgotan, aron mahimo tang mas maisogon, kinahanglang dili ta mosalig sa atong kusog ug abilidad. Hinunoa, kinahanglang motuo ta nga si Jehova nagauban kanato ug nga siya ang nakig-away para kanato. (Deut. 1:29, 30; Zac. 4:6) Kanay sekreto aron mahimong tinuod nga maisogon.

17-18. Sumala sa Juan 15:18-21, unsang pasidaan ang gihatag ni Jesus? Ipatin-aw.

¹⁷ Ganahan tang respetohon sa mga tawo, pero dili ta angayng maghunahuna nga wala tay pulos kon dili ganahan ang mga tawo kanato. Si Jesus miingon: “Malipayon mo dihang dumtan mo sa mga tawo, ug dihang isalikway mo nila ug pakaulawan ug daoton ang inyong ngalan tungod sa Anak sa tawo.” (Luc. 6:22) Unsay gipasabot ni Jesus?

¹⁸ Wala ipasabot ni Jesus nga gusto sa mga Kristohanon nga dumtan sila sa mga tawo. Nagpasidaan lang siya kon unsay mahitabo kanato. Dili ta bahin sa kalibotan. Kita nagsunod sa mga pagtulon-an ni Jesus ug nagsangyaw sa mensahe nga iyang gisangyaw. Tungod niana,  ang kalibotan nagdumot kanato. (Basaha ang Juan 15:18-21.) Gusto natong lipayon si Jehova. Kon dumtan ta sa mga tawo kay gihigugma nato ang atong Amahan, dili ta angayng maguol.

19. Unsaon nato pagsundog ang mga apostoles?

¹⁹ Ayawg tugoti nga tungod sa isulti o buhaton sa mga tawo, ikaulaw nimo ang pagkahimong Saksi ni Jehova. (Miq. 4:5) Makakat-on ta nga dili magpadala sa kahadlok sa tawo pinaagig paghunahuna sa gihimo sa mga apostoles sa Jerusalem human patya si Jesus. Nahibalo sila nga gidumtan sila pag-ayo sa Hudiyong mga lider sa relihiyon. (Buh. 5:17, 18, 27, 28) Pero kada adlaw, padayon silang miadto sa templo ug gipaila ang ilang kaugalingon ingong mga tinun-an ni Jesus pinaagi sa pagsangyaw. (Buh. 5:42) Wala sila mouk-ok sa kahadlok. Madaog sab nato ang pagkahadlok sa tawo kon atong ipaila ang kaugalingon ingong mga Saksi ni Jehova​—sa trabahoan, sa eskuwelahan, o sa mga silingan.​—Buh. 4:29; Roma 1:16.

20. Nganong malipayon ang mga apostoles bisag gidumtan?

²⁰ Nganong malipayon ang mga apostoles? Nahibalo sila kon nganong gidumtan sila, ug giisip nilang kadungganan nga himoan silag daotan tungod sa pagbuhat sa kabubut-on ni Jehova. (Luc. 6:23; Buh. 5:41) Sa ulahi, si apostol Pedro misulat: “Bisan pag mag-antos mo tungod sa pagkamatarong, kamo malipayon.” (1 Ped. 2:19-21; 3:14) Dihang masabtan nato nga gidumtan ta kay nagbuhat tag matarong, dili gyod ta mohunong sa pag-alagad kang Jehova tungod sa pagdumot sa mga tawo kanato.

21-22. (a) Unsay imong determinadong buhaton aron makapangandam alang sa paglutos? (b) Unsay atong hisgotan sa sunod nga artikulo?

²¹ Wala ta kabalo kon kanus-a ta makasinatig paglutos o kon kanus-a idili sa gobyerno ang atong buluhaton. Pero nahibalo ta nga makapangandam ta karon pinaagi sa pagpalig-on sa atong relasyon kang Jehova, pagkat-on nga mahimong mas maisogon, ug dili pagpadala sa pagdumot sa mga tawo. Ang atong pagpangandam karon makatabang nato sa pagbarog nga malig-on sa umaabot.

²² Pero komosta kon idili gyod ang atong pagsimba? Sa sunod nga artikulo, atong hisgotan ang mga prinsipyo nga makatabang nato nga padayong makaalagad kang Jehova bisag idili ang atong buluhaton.