1. Sumala sa Filipos 2:3, nganong ang pagkamapainubsanon makatabang nato nga masuod sa uban?

MAPAINUBSANON tang mosunod sa mga sukdanan ni Jehova, kay atong nasabtan nga siya kanunayng nahibalo kon unsay labing maayo para kanato. (Efe. 4:22-24) Ang pagkamapainubsanon magpalihok nato sa pag-una sa kabubut-on ni Jehova imbes sa atoa ug sa pag-isip sa uban nga labaw kay kanato. Ingong resulta, masuod ta kang Jehova ug sa atong mga igsoon.​—Basaha ang Filipos 2:3.

2. Unsay giila ni apostol Pablo, ug unsay atong hisgotan niining artikuloha?

² Pero kon dili ta mag-amping, puwede tang maimpluwensiyahan sa mga tawo sa kalibotan kinsa hambogiro ug kaugalingon ray gihunahuna. * Morag may pipila ka Kristohanon sa unang siglo C.E. nga naimpluwensiyahan sa kalibotan, kay si apostol Pablo misulat sa mga taga-Roma: “Sultihan ta mo nga dili maghunahuna nga importante kaayo mo, kondili magbaton ug maayong panghunahuna.” (Roma 12:3) Giila ni Pablo nga kinahanglang duna tay pagtahod sa kaugalingon. Pero ang pagkamapainubsanon motabang kanato nga mahimong balanse sa atong panglantaw sa kaugalingon. Hisgotan niining artikuloha ang tulo ka situwasyon diin ang pagkamapainubsanon makatabang nato nga dili maghunahuna nga importante kaayo ta: (1) sa kaminyoon, (2) sa mga pribilehiyo sa pag-alagad, ug (3) sa paggamit sa social media.

3. Nganong posibleng dili magkasinabot ang magtiayon, ug unsay gibuhat sa pipila aron masulbad ang ilang problema?

³ Gusto ni Jehova nga magmalipayon ang bana ug asawa. Pero kay dili sila hingpit, may mga higayon nga dili sila magkasinabot. Gani, si Pablo misulat nga kadtong magminyo makasinatig mga problema. (1 Cor. 7:28) Ang pipila ka magtiayon magsigeg lalis, ug tingali makahunahuna sila nga dili sila bagay sa usag usa. Kon naimpluwensiyahan sila sa kalibotan, maghunahuna dayon sila nga mas maayo pang magbulag na lang. Para nila, magmalipayon lang sila kon magbulag.

4. Unsay angay natong likayan?

⁴ Likayan gyod nato ang paghunahuna nga pakyas ang atong kaminyoon. Nahibalo ta nga ang bugtong Kasulatanhong basehanan sa diborsiyo mao ang seksuwal nga imoralidad. (Mat. 5:32) Busa kon makasinati tag mga problema sa kaminyoon, dili nato tugotan nga tungod sa garbo maghunahuna ta: ‘Ang akong kapikas wala na magpakabana nako. Wala na niya ihatag nako ang pagmahal nga angay kanako. Tingali mas magmalipayon ko kon mangita kog lain.’ Kon maghunahuna ta niana, kaugalingon ray atong gihunahuna. Ang mga tawo sa kalibotan moingon nga sunda ang imong kasingkasing ug buhata kon unsay makapalipay nimo, bisan pag moresulta nâ sa pagkabungkag sa imong kaminyoon. Pero ang Diyos nag-ingon nga angay kang “magtan-aw dili lang sa kaugalingong kaayohan, kondili sa kaayohan sab sa uban.” (Filip. 2:4) Dili gusto ni Jehova nga mabungkag ang imong kaminyoon. (Mat. 19:6) Gusto niya nga siya ang unahon nimo sa paghunahuna, dili ang imong kaugalingon.

5. Sumala sa Efeso 5:33, sa unsang paagi trataron sa bana ug asawa ang usag usa?

⁵ Ang bana ug asawa angay nga magpakitag gugma ug pagtahod sa usag usa. (Basaha ang Efeso 5:33.) Ang Bibliya nagtudlo nga magpokus ta sa paghatag imbes sa pagdawat.  (Buh. 20:35) Unsang hiyas ang makatabang sa magtiayon sa pagpakitag gugma ug pagtahod? Ang pagkamapainubsanon. Ang bana ug asawa nga mapainubsanon magtinguha dili sa kaugalingong kaayohan, kondili nianang sa ilang kapikas.​—1 Cor. 10:24.

6. Unsay imong nakat-onan sa giingon ni Steven ug Stephanie?

⁶ Ang pagkamapainubsanon nakatabang sa daghang Kristohanong magtiayon nga mahimong mas malipayon sa ilang kaminyoon. Pananglitan, si Steven miingon: “Ang magtiayon angayng magtinabangay ilabina kon dunay mga problema. Imbes maghunahuna ‘Unsay labing maayo para nako?’ mas maayong maghunahuna ‘Unsay labing maayo para namo?’” Mao sab nay gibati sa iyang asawa nga si Stephanie. Siya miingon: “Walay ganahang makig-uban sa tawong makilalison. Kon dili mi magkasinabot, among sayron kon unsay hinungdan sa problema. Dayon, mag-ampo mi, mag-research, ug mag-estorya kon unsaon pagsulbad ang problema. Maningkamot mi nga masulbad ang problema ug dili maglalis.” Ang mga bana ug asawa mas magmalipayon kon dili sila maghunahuna nga mas importante sila kay sa ilang kapikas.

7. Unsay angayng hunahunaon sa usa ka brader dihang makadawat siyag pribilehiyo sa pag-alagad?

⁷ Giisip nato nga pribilehiyo ang pag-alagad kang Jehova sa bisan unsang paagi nga atong maarangan. (Sal. 27:4; 84:10) Kon ang usa ka brader makaarang sa pagdawat ug espesyal nga pribilehiyo sa pag-alagad, dalayegon kana. Gani, ang Bibliya nag-ingon: “Kon dunay mangab-ot sa pagkahimong tigdumala, siya nagtinguhag maayong buhat.” (1 Tim. 3:1) Pero kon makadawat siyag pribilehiyo, dili siya angayng maghunahuna nga mas importante na siya kay sa uban. (Luc. 17:7-10) Angay nga ang iyang motibo mao ang pag-alagad sa uban nga mapainubsanon.​—2 Cor. 12:15.

8. Unsang leksiyon ang atong makat-onan kang Diotrefes, Uzzias, ug Absalom?

⁸ Ang Bibliya naghisgot bahin sa mga tawo nga naghunahuna nga importante kaayo sila. Si Diotrefes mapahitas-on. Gusto niyang “molabaw” diha sa kongregasyon. (3 Juan 9) Si Uzzias nangahas sa paghimo sa usa ka buluhaton bisag wala siya awtorisahi ni Jehova sa pagbuhat niana. (2 Cron. 26:16-21) Si Absalom gustong mahimong hari, busa nagpakaaron-ingnon siya nga gimahal niya ang mga tawo aron suportahan nila siya. (2 Sam. 15:2-6) Klarong gipakita sa maong mga asoy nga si Jehova dili malipay sa mga tawo nga nagtinguha sa ilang kaugalingong kadungganan. (Prov. 25:27) Sa ngadtongadto, ang garbo ug ambisyon moresulta sa kadaot.​—Prov. 16:18.

9. Unsang ehemplo ang gipakita ni Jesus?

⁹ Si Jesus lahi niadtong mapahitas-ong mga tawo kay “bisan pag siya sama sa Diyos, siya wala maghunahuna nga mangilog, nga mahimong katumbas sa Diyos.” (Filip. 2:6) Bisag si Jesus ikaduha kang Jehova, wala siya maghunahuna nga importante kaayo siya. Iyang giingnan ang iyang mga tinun-an: “Kadtong nag-isip sa iyang kaugalingon nga ubos kaninyong tanan mao ang labaw kaninyo.” (Luc. 9:48) Panalangin gyod nga mag-alagad uban sa mga payunir, ministeryal nga alagad, ansiyano, ug tigdumala sa sirkito, kinsa mapainubsanon sama kang Jesus. Ang mapainubsanong mga alagad ni Jehova magpakitag gugma sa usag usa, nga maoy ilhanan sa matuod nga katawhan sa Diyos.​—Juan 13:35.

10. Unsay angay nimong buhaton kon gibati nimo nga ang mga problema sa kongregasyon wala atimana sa mga ansiyano?

¹⁰ Unsay angay nimong buhaton kon morag dunay problema sa kongregasyon ug gibati nimo nga wala ni atimana sa mga ansiyano?  Imbes magreklamo, ikapakita nimo ang pagkamapainubsanon pinaagi sa pagsuportar niadtong mga nagapanguna. (Heb. 13:17) Aron matabangan ka sa paghimo niana, pangutan-a ang kaugalingon: ‘Ang mga problema ba nga akong nakita seryoso kaayo nga kinahanglan gyong tul-iron? Mao ba ni ang hustong panahon sa pagtul-id niana? Ako bang responsibilidad ang paghimo niana? Sa tinuoray lang, naningkamot ba gyod ko nga magkahiusa ang kongregasyon, o gusto lang nakong ipakita nga importante kaayo ko?’

11. Sumala sa Efeso 4:2, 3, unsay mga resulta kon mag-alagad ta kang Jehova nga mapainubsanon?

¹¹ Mas gipabilhan ni Jehova ang pagkamapainubsanon kay sa katakos, ug ang panaghiusa kay sa kalamposan. Busa himoa ang imong maarangan sa pag-alagad kang Jehova nga mapainubsanon. Sa pagbuhat niana, makatabang ka nga mahiusa ang kongregasyon. (Basaha ang Efeso 4:2, 3.) Magmaaktibo sa ministeryo. Pangitag mga paagi nga makaalagad sa uban pinaagi sa pagpakitag kaayo kanila. Magmaabiabihon sa tanan, apil niadtong walay responsibilidad sa kongregasyon. (Mat. 6:1-4; Luc. 14:12-14) Samtang mapainubsanon kang makigkooperar sa kongregasyon, ang uban makamatikod dili lang sa imong katakos, kondili sa imo pong pagkamapainubsanon.

12. Ang Bibliya ba nagdasig nato nga makighigala? Ipatin-aw.

¹² Gusto ni Jehova nga mag-enjoy ta uban sa atong mga higala ug pamilya. (Sal. 133:1) Si Jesus may suod nga mga higala. (Juan 15:15) Ang Bibliya naghisgot sa mga kaayohan kon duna tay tinuod nga mga higala. (Prov. 17:17; 18:24) Ug nag-ingon ni nga dili maayong ilain nato ang kaugalingon. (Prov. 18:1) Daghan  ang naghunahuna nga ang social media maoy paagi nga makabaton ug daghang higala ug dili magmingaw. Pero kinahanglan tang magbantay sa paggamit niini.

13. Nganong ang pipila nga mogamit sa social media mobatig kamingaw ug kaguol?

¹³ Gipakita sa mga research nga ang pagsigeg tan-aw sa mga post diha sa social media moresulta hinuon sa kamingaw ug kaguol. Ngano? Ang usa ka posibleng rason mao nga ang mga tawo sagad mag-post diha sa social media sa mga letrato bahin sa importanteng mga hitabo sa ilang kinabuhi, nga magpakita lang sa kinanindotang mga letrato nila, sa ilang mga higala, ug sa nindot nga mga dapit nga ilang naadtoan. Ang tawo nga magsigeg tan-aw sa maong mga letrato makahunahuna tingali nga ang iyang kinabuhi laay ug way lami. Ang usa ka 19 anyos nga sister miingon, “Mibati kog kasina dihang nakita nako ang uban nga lingaw kaayo panahon sa weekend, samtang ako gilaay diha sa balay.”

14. Sa unsang paagi ang tambag sa 1 Pedro 3:8 makatabang nato sa paggamit sa social media sa maayong paagi?

¹⁴ Siyempre magamit nato ang social media sa maayong paagi, pananglitan sa pagpakigkomunikar sa pamilya ug mga higala. Pero namatikdan ba nimo nga ang pipila ka tawo mag-post diha sa social media aron dayegon sila sa uban? Sama rag miingon sila, “Tan-awa ko.” Ang pipila mag-post pa ganig bastos ug law-ay nga mga comment sa ilang letrato o nianang sa uban. Ang mga Kristohanon dili mohimo niana kay giawhag sila sa pag-ugmad sa pagkamapainubsanon ug simpatiya.​—Basaha ang 1 Pedro 3:8.

15. Sa unsang paagi ang Bibliya makatabang nato nga dili magpaimportante sa kaugalingon?

¹⁵ Kon mogamit kag social media, pangutan-a ang kaugalingon: ‘Ang ako bang i-post nga mga comment, letrato, o video makahatag ug impresyon nga nanghambog ko? Dili kaha ko makaaghat sa uban nga masina?’ Ang Bibliya nag-ingon: “Ang tanang naa sa kalibotan​—ang tinguha sa unod, ang tinguha sa mga mata, ug ang mapasigarbohong pagpakita sa mga nabatonan sa usa—​wala maggikan sa Amahan, apan naggikan sa kalibotan.” (1 Juan 2:16) Sa usa ka bersiyon sa Bibliya, ang “mapasigarbohong pagpakita sa mga nabatonan sa usa” gihubad ingong “gustong  magpaimportante.” Ang mga Kristohanon dili mobati nga kinahanglan silang magpaimportante. Ilang gisunod ang tambag sa Bibliya: “Dili ta magpaimportante sa kaugalingon, nga mag-aghat ug kompetisyon ug magsinahay.” (Gal. 5:26) Ang pagkamapainubsanon makatabang nato nga dili maimpluwensiyahan niana nga kinaiya sa kalibotan.

16. Nganong angay natong likayan ang pagkamapahitas-on?

¹⁶ Angay natong ugmaron ang pagkamapainubsanon kay ang mga mapahitas-on walay “maayong panghunahuna.” (Roma 12:3) Ang mga mapahitas-on makilalison ug gustong magpaimportante. Ang ilang panghunahuna ug panggawi sagad makapasakit kanila ug sa uban. Kon dili sila magbag-o, ang ilang hunahuna mabutaan ug mapahisalaag ni Satanas. (2 Cor. 4:4; 11:3) Sa laing bahin, ang tawong mapainubsanon maayog panghunahuna. Siya balanseg panglantaw sa kaugalingon, ug iyang giila nga sa daghang paagi, ang uban mas labaw kay kaniya. (Filip. 2:3) Ug nahibalo siya nga “ang Diyos batok sa mga mapahitas-on, apan pakitaan niyag dili hitupngang pagkamaayo ang mga mapainubsanon.” (1 Ped. 5:5) Kadtong maayog panghunahuna dili gusto nga mahimo nilang kaaway si Jehova.

17. Unsay angay natong buhaton aron makapabiling mapainubsanon?

¹⁷ Aron makapabiling mapainubsanon, kinahanglang ipadapat nato ang tambag sa Bibliya nga ‘hukason ang daang personalidad apil ang mga buhat niini, ug isul-ob ang bag-ong personalidad.’ Nagkinahanglan nag paningkamot. Angay natong tun-an ang ehemplo ni Jesus, ug maningkamot ta nga sundogon siya kutob sa atong maarangan. (Col. 3:9, 10; 1 Ped. 2:21) Kon himoon nato kana, makabenepisyo gyod ta. Kon atong ugmaron ang pagkamapainubsanon, mahimong mas malipayon ang atong pamilya, makatabang ta nga mahiusa ang kongregasyon, ug mahibalo ta kon sa unsang paagi likayan ang sayop nga paggamit sa social media. Labaw sa tanan, atong mabatonan ang panalangin ug pag-uyon ni Jehova.