1. Unsay gihimo ni Jehova para nimo?

SA UNSANG paagi nahimo kang Saksi ni Jehova? Una, nadungog nimo “ang maayong balita”—tingali gikan sa imong ginikanan, kauban sa trabaho, eskolmet, o dihang may nagsangyaw sa inyong balay. (Mar. 13:10) Dayon, may naggahin ug dakong panahon ug kusog aron dumalahan kag pagtuon sa Bibliya. Sa inyong pagtuon, nakakat-on ka sa paghigugma kang Jehova ug nahibaloan nimo nga gimahal ka niya. Gikabig ka ni Jehova sa kamatuoran, ug karon, ingong tinun-an ni Jesu-Kristo, duna kay paglaom nga mabuhi sa walay kataposan. (Juan 6:44) Seguradong mapasalamaton ka kang Jehova kay duna Siyay gigamit sa pagtudlo kanimo sa kamatuoran ug gidawat ka Niya ingong usa sa Iyang mga alagad.

2. Unsay atong hisgotan niining artikuloha?

² Karon nga nahibalo na ta sa kamatuoran, duna tay pribilehiyo nga tabangan ang uban nga moduyog kanato sa dalan paingon sa kinabuhi. Sayon ra tingali para nato ang pagsangyaw sa balay ug balay, pero basin malisdan ta sa pagtanyag ug pagdumalag pagtuon sa Bibliya. Kana bay imong gibati? Kon mao, basin makatabang nimo ang mga sugyot niining artikuloha. Hisgotan nato kon unsay magpalihok nato nga motabang sa buluhatong paghimog mga tinun-an. Konsiderahon sab nato kon sa unsang paagi maatubang nato ang mga kalisdanan nga tingali makapugong nato sa pagdumalag pagtuon sa Bibliya. Hisgotan una nato kon nganong kinahanglan nga dili lang ta mga magsasangyaw kondili mga magtutudlo sab sa maayong balita.

3. Nganong mosangyaw ta?

³ Sa dinhi pa si Jesus sa yuta, gisugo niya ang iyang mga sumusunod  sa paghimo sa buluhaton nga may duha ka bahin. Una, gisugo niya sila sa pagsangyaw sa maayong balita sa Gingharian, ug gipakita niya kanila kon unsaon kana paghimo. (Mat. 10:7; Luc. 8:1) Pananglitan, gitudloan ni Jesus ang iyang mga tinun-an kon unsay buhaton dihang dawaton o dili dawaton sa mga tawo ang mensahe sa Gingharian. (Luc. 9:2-5) Gitagna sab niya nga ang iyang mga sumusunod magsangyaw sa daghang tawo ug sa daghang lugar dihang siya miingon nga sila maghatag ug ‘pamatuod ngadto sa tanang kanasoran.’ (Mat. 24:14; Buh. 1:8) Dawaton man sa mga tawo ang mensahe o dili, kinahanglang sultihan sa mga tinun-an ang mga tawo bahin sa Gingharian sa Diyos ug kon unsay mapalampos niini.

4. Sumala sa Mateo 28:18-20, unsay angay natong buhaton gawas pa sa pagsangyaw bahin sa Gingharian?

⁴ Unsa ang ikaduhang bahin sa buluhaton nga gisugo ni Jesus? Iyang giingnan ang iyang mga sumusunod nga tudloan ang potensiyal nga mga tinun-an sa pagtuman sa tanang butang nga iyang gisugo. Ang pipila moingon tingali nga ang sugo ni Jesus sa pagsangyaw ug pagtudlo maoy para lang sa mga Kristohanon sa unang siglo. Pero tinuod ba nâ? Dili, gipakita ni Jesus nga kining importanteng buluhaton magpadayon bisan sa atong panahon, “hangtod sa hinapos sa sistema sa mga butang.” (Basaha ang Mateo 28:18-20.) Posible nga gihatag ni Jesus ang maong sugo dihang nagpakita siya sa kapig 500 sa iyang mga tinun-an. (1 Cor. 15:6) Ug sa pinadayag nga iyang gihatag kang Juan, klarong gipakita ni Jesus nga gidahom niya nga ang tanan niyang tinun-an motabang sa uban sa pagkat-on bahin kang Jehova.—Pin. 22:17.

5. Sumala sa 1 Corinto 3:6-9, giunsa pag-ilustrar ni Pablo ang koneksiyon tali sa pagsangyaw ug pagtudlo?

⁵ Gipakasama ni apostol Pablo ang buluhatong paghimog mga tinun-an sa pagpatubo ug mga tanom, nga nagpakitang dili igo ang pagpugas lang ug binhi. Iyang gipahinumdoman ang mga taga-Corinto: “Ako ang nagtanom, si Apolos ang nagbisbis . . . Kamo ang uma nga ginatikad sa Diyos.” (Basaha ang 1 Corinto 3:6-9.) Ingong mga magbubuhat sa ‘uma sa Diyos,’ dili lang ta magpugas ug binhi kondili magbisbis sab niini ug regular nga magsusi sa pagtubo niini. (Juan 4:35) Pero nahibalo ta nga ang Diyos ang magpatubo sa binhi.

6. Unsay apil sa atong buluhaton ingong mga magtutudlo?

⁶ Kita nangita niadtong “nakiling sa pagdawat sa kamatuoran nga motultol sa kinabuhing walay kataposan.” (Buh. 13:48) Aron mahimo silang mga tinun-an, kinahanglan nato silang tabangan nga (1) makasabot, (2) modawat, ug (3) magpadapat sa ilang mga nakat-onan sa Bibliya. (Juan 17:3; Col. 2:6, 7; 1 Tes. 2:13) Ang tanan diha sa kongregasyon makatabang sa mga Bible study pinaagi sa pagkahimong maayong ehemplo sa pagpakita kanilag gugma ug sa pag-abiabi kanila dihang motambong sila sa mga tigom. (Juan 13:35) Ang nagdumala sa pagtuon kinahanglan pod tingaling mogahin ug dakong panahon ug kusog sa pagtabang sa study nga ‘mapukan ang lig-ong naparilan’ nga mga pagtulon-an o kostumbre. (2 Cor. 10:4, 5) Dangtan tingalig daghang bulan ang paggiya sa usa ka indibiduwal sa paghimo niini nga mga kausaban aron sa ngadtongadto mokuwalipikar siya sa bawtismo. Pero dili gyod masayang ang atong mga paningkamot sa pagtabang kaniya.

7. Unsay magpalihok nato sa pagpakigbahin sa buluhatong pagsangyaw ug paghimog mga tinun-an?

⁷ Nganong makigbahin ta sa buluhatong pagsangyaw ug paghimog mga tinun-an? Una, tungod kay gimahal nato si Jehova. Dihang himoon nimo ang imong maarangan sa pagtuman sa sugo nga mosangyaw ug maghimog mga tinun-an, imong gipakita nga gimahal nimo ang Diyos. (1 Juan 5:3) Hunahunaa kini: Ang  imong gugma kang Jehova nagpalihok na nimo sa pagsangyaw. Sayon ra bang tumanon ang maong sugo? Tingali dili. Dihang misangyaw ka sa unang higayon, gikulbaan ka ba? Segurado! Pero nahibalo ka nga kini ang buluhaton nga gustong ipahimo ni Jesus kanimo, ug gituman nimo ang iyang sugo. Ug posible, nga paglabay sa panahon, mas sayon na para nimo ang buluhatong pagsangyaw. Pero komosta ang pagdumalag pagtuon sa Bibliya? Kulbaan ka bang maghunahuna niana? Tingali. Pero dihang mangayo kag tabang kang Jehova nga madaog ang imong kakulba ug makabatog kaisog sa pagtanyag ug pagtuon sa Bibliya, si Jehova makapalig-on sa imong tinguha sa paghimog mga tinun-an.

8. Sumala sa Marcos 6:34, unsa pay magpalihok nato sa pagtudlo sa uban?

⁸ Ikaduha, ang atong gugma sa isigkatawo magpalihok nato sa pagtudlo kanila sa kamatuoran. Pananglitan, dihay higayon nga si Jesus ug ang iyang mga tinun-an gikapoy pag-ayo kay daghan kaayo silag gisangyawan. Nagkinahanglan silag dapit nga kapahulayan, pero daghan kaayong tawo ang nangadto didto. Kay naluoy, si Jesus misugod pagtudlo kanilag “daghang butang.” (Basaha ang Marcos 6:34.) Nanudlo gihapon siya bisag gikapoy. Ngano? Tungod kay gibutang ni Jesus ang iyang kaugalingon sa kahimtang sa mga tawo. Nakita niya nga nag-antos sila pag-ayo—nga nagkinahanglan gyod silag paglaom—ug gusto niyang motabang kanila. Ingon ana sab ang kahimtang sa mga tawo karon. Bisag malipayon silang tan-awon, sila samag mga karnero nga nangasaag ug walay magbalantay nga naggiya kanila. Si Pablo miingon nga ang mga tawo nga sama niini wala makaila sa Diyos ug walay paglaom. (Efe. 2:12) Sila anaa sa “dalan padulong sa kalaglagan”! (Mat. 7:13) Dihang hunahunaon nato ang espirituwal nga kahimtang sa mga tawo diha sa atong teritoryo, ang gugma ug kaluoy magpalihok nato sa pagtabang kanila. Ug ang labing maayong paagi sa pagtabang kanila mao ang pagtanyag kanilag pagtuon sa Bibliya.

9. Sumala sa Filipos 2:13, sa unsang paagi tabangan ka ni Jehova?

⁹ Tingali magduhaduha ka sa pagtanyag ug pagtuon sa Bibliya kay nahibalo ka nga kinahanglan kang mogahin ug dakong panahon sa pagpangandam ug pagdumala sa pagtuon. Kon mao nay kahimtang, isulti kang Jehova ang imong gibati. Hangyoa siya nga tabangan kang maugmad ang tinguha sa pagpangita ug pagdumalag pagtuon sa Bibliya. (Basaha ang Filipos 2:13.) Si apostol Juan nagpasalig kanato nga tubagon sa Diyos ang mga pag-ampo nga uyon sa Iyang kabubut-on. (1 Juan 5:14, 15) Busa makaseguro ka nga tabangan ka ni Jehova sa pag-ugmad sa tinguha nga makigbahin sa paghimog mga tinun-an.

10-11. Unsa tingali makapugong nato sa pagdumalag pagtuon sa Bibliya?

¹⁰ Nahibalo ta nga importante kaayo ang buluhatong pagpanudlo. Pero tungod sa mga kalisdanan nga atong giatubang, malimitahan tingali ang atong mahimo diha sa buluhatong paghimog mga tinun-an. Atong hisgotan ang pipila niana nga mga kalisdanan ug kon unsaon nato kana pag-atubang.

¹¹ Malimitahan tingali ta sa atong sirkumstansiya. Pananglitan, ang pipila ka magmamantala tigulang na o dili maayog panglawas. Mao ba nay imong kahimtang? Kon oo, konsideraha ang usa sa mga leksiyon nga atong nakat-onan sa COVID-19 pandemic. Nadiskobrehan nato nga makadumala diay tag epektibong mga pagtuon sa Bibliya gamit ang atong mga gadyet! Busa tingali makasugod ug makadumala kag pagtuon sa Bibliya bisag naa ra ka sa imong balay. Ug naa pay laing bentaha. Ang pipila ganahang  magpa-study, pero dili sila makalugar sa mga panahon nga sagad maoy gigahin sa mga igsoon sa pagsangyaw. Pero, makalugar tingali sila sayo sa buntag o sa gabii na. Makadumala ka bag pagtuon nianang mga orasa? Gitudloan ni Jesus si Nicodemo panahon sa kagabhion, nga maoy gipiling oras ni Nicodemo.—Juan 3:1, 2.

12. Unsang mga butang ang makahatag natog kompiyansa nga puwede ta mahimong epektibong mga magtutudlo?

¹² Wala tingali tay kompiyansa sa atong katakos sa pagdumalag pagtuon sa Bibliya. Basin mibati ta nga nagkinahanglan pa tag dugang kahibalo o katakos aron makatudlo sa uban. Kon kanay imong gibati, konsideraha ang tulo ka butang nga makahatag nimog kompiyansa. Una, giisip ka ni Jehova nga kuwalipikadong motudlo sa uban. (2 Cor. 3:5) Ikaduha, si Jesus, kinsa nakabaton sa “tanang awtoridad sa langit ug sa yuta,” nag-awtorisar kanimo sa pagtudlo. (Mat. 28:18) Ug ikatulo, makasalig ka nga tabangan ka sa uban. Si Jesus misalig sa gitudlo sa iyang Amahan nga iyang isulti, busa makasalig sab ka kang Jehova alang sa tabang. (Juan 8:28; 12:49) Dugang pa, makahangyo ka sa inyong tigdumala sa grupo sa pagsangyaw, sa kuwalipikadong payunir, o sa eksperyensiyadong magmamantala nga tabangan ka sa pagsugod ug pagdumalag pagtuon sa Bibliya. Ang pag-uban sa pagtuon nga gidumala niini nga mga igsoon maoy usa ka paagi nga makabaton kag kompiyansa sa pagdumalag pagtuon.

13. Nganong kinahanglan tang mopahiuyon?

¹³ Malisdan tingali ta sa paggamit sa bag-ong mga pamaagi ug galamiton. Ang atong paagi sa pagdumalag pagtuon sa Bibliya nausab na. Ang atong pangunang publikasyon nga gamiton sa pagtuon, ang librong Mabuhi Ka Hangtod sa Hangtod!, nagkinahanglan nga mangandam ta sa pagtuon ug magdumala niini sa paagi nga lahi sa atong gihimo sa una. Pipila na lang ka parapo ang basahon ug mas daghan nag panahon nga makighisgot sa study. Dihang manudlo, mas mogamit na tag mga video ug elektronikong mga galamiton, sama sa JW Library^®. Kon dili pa ka kamao mogamit niini nga mga galamiton, pangayog tabang sa uban aron makakat-on ka kon unsaon kini paggamit. Kitang mga tawo mas komportableng mohimo sa mga butang sa naandan nato nga paagi. Dili sayon para nato ang pagpahiuyon sa bag-ong mga pamaagi. Pero sa tabang ni Jehova ug sa uban, mahimong mas sayon ang pag-adjust ug mahimong mas makalingaw pa gani ang pagdumalag pagtuon. Sumala pa sa usa ka payunir, kini nga paagi sa pagtuon “makalingaw para sa study ug sa nagdumala sa pagtuon.”

14. Unsay angay natong hinumdoman kon ang mga tawo sa atong teritoryo dili interesado sa atong mensahe, ug sa unsang paagi makadasig nato ang 1 Corinto 3:6, 7?

¹⁴ Lisod tingali ang pagsugod ug mga pagtuon sa Bibliya diha sa atong teritoryo. Ang pipila tingali dili interesado sa atong mensahe o supak pa gani niini. Unsay makatabang nato nga magpabiling positibo sa ingon niana nga teritoryo? Hinumdomi nga ang kahimtang sa mga tawo niining gubot nga kalibotan posibleng kalit nga mausab, ug kadtong dili tingali interesado sa una mahimo nang mahunahunaon sa ilang espirituwal nga panginahanglan. (Mat. 5:3) Ang pipila nga dili gyod modawat kaniadto sa atong mga basahon, sa ulahi magpa-Bible study na. Nahibalo sab ta nga si Jehova ang Agalon sa pagpangani. (Mat. 9:38) Gusto niya nga magpadayon ta sa pagtanom ug pagbisbis, pero siya ang magpatubo. (1 Cor. 3:6, 7) Ug makapadasig gyod ang paghinumdom nga bisag wala tay gidumalahag pagtuon sa Bibliya karon, panalanginan ta ni Jehova base sa atong mga paningkamot, dili sa mga resulta niini! *

15. Unsay bation ni Jehova dihang ang usa magpa-Bible study ug magpadapat sa iyang nakat-onan?

¹⁵ Si Jehova malipay dihang ang usa ka tawo modawat sa kamatuoran sa Bibliya ug mosulti sa uban bahin niana. (Prov. 23:15, 16) Seguradong malipay kaayo si Jehova nga makita nga ang iyang katawhan madasigong nagsangyaw ug nanudlo! Pananglitan, bisan pa sa tibuok kalibotang pandemic panahon sa 2020 nga tuig sa pag-alagad, 7,705,765 ka Bible study ang gidumala, nga nakatabang sa 241,994 ka tawo nga idedikar ang ilang kinabuhi kang Jehova ug magpabawtismo. Ug kining bag-ong mga tinun-an magdumala pod ug mga pagtuon sa Bibliya ug maghimog dugang mga tinun-an. (Luc. 6:40) Seguradong malipay si Jehova sa dihang makigbahin ta sa buluhatong paghimog mga tinun-an.

16. Unsay puwede natong himoong tumong?

¹⁶ Dili sayon ang paghimog mga tinun-an, pero sa tabang ni Jehova makahimo ta sa pagtudlo sa mga interesado nga mahigugma sa atong langitnong Amahan. Puwede ba natong himoong tumong ang pagsugod ug pagdumalag bisag usa lang ka pagtuon sa Bibliya? Masorpresa tingali ta sa mahitabo kon atong gamiton ang tanang kahigayonan aron tanyagag pagtuon ang mga tawo nga atong maestorya. Makaseguro ta nga panalanginan ni Jehova ang atong mga paningkamot.

17. Unsay atong bation kon makadumala tag pagtuon sa Bibliya?

¹⁷ Dako gyong pribilehiyo ang pagsangyaw ug pagtudlo sa kamatuoran ngadto sa uban! Kini nga buluhaton makapalipay gyod nato. Si Pablo, kinsa nakatabang sa daghang taga-Tesalonica nga mahimong mga tinun-an, mipahayag sa iyang gibati niining paagiha: “Unsa bay among paglaom o kalipay o korona sa kasadya atubangan sa atong Ginoong Jesus panahon sa iyang presensiya? Dili ba kamo? Kamo gayod ang among himaya ug kalipay.” (1 Tes. 2:19, 20; Buh. 17:1-4) Daghan karon ang mibatig sama niana. Ang sister nga si Stéphanie kinsa, uban sa iyang bana, daghag natabangan nga mabawtismohan miingon, “Wala nay mas labaw nga kalipay kay sa pagtabang sa mga tawo nga magpahinungod sa ilang kinabuhi kang Jehova.”