Gusto gyod ni Jehova nga ang duha ka tawo nga magminyo magmalipayon ug makabaton ug suod nga relasyon sa usag usa hangtod sa hangtod. (Mat. 19:4-6) Kon gusto kang magminyo, sa unsang paagi makakita kag maayong kapikas? Ingong atong Maglalalang, si Jehova nahibalo kon unsay kinahanglang buhaton aron magmalamposon ang panagtratohay ug kaminyoon. Busa, kon imong ipadapat ang mga prinsipyo nga iyang gihatag kanato, magmalipayon gyod ka. Tagda ang pipila niana.

Una, kinahanglan nato ning masabtan: “Ang kasingkasing labaw nga malimbongon kay sa bisan unsang butang, ug kini desperado.” (Jer. 17:9) Sa dihang ang duha ka tawo nga gustong magminyo magkaila ug magsugod pag-date, dali rang maugmad ang ilang pagbati sa usag usa. Kon mahitabo nâ, malisdan sila sa paghimog maalamong mga desisyon. Sa dihang ang managtrato modesisyon nga magminyo base lang sa ilang pagbati sa usag usa, sagad masakitan lang sila sa ulahi. (Prov. 28:26) Kanay hinungdan nga dili maalamon nga ang lalaki ug babaye mopahayag sa ilang pagmahal sa usag usa o mohimog mga panaad sa dili pa nila mailhan pag-ayo ang usag usa.

Ang Proverbio 22:3 nag-ingon: “Ang tawong maalamon makakita sa kapeligrohan ug molikay niana, pero ang walay kasinatian moderetso ra ug mag-antos sa resulta.” Nganong peligroso ang paggamit ug mga dating website? Makapaguol nga ang pipila nga nakig-date sa ilang nakaila sa Internet nakaamgo sa ulahi nga ang ilang ka-date gusto lang diayng mamentaha nila. Dugang pa, ang mga tawong malimbongon naghimog dili tinuod nga mga account aron mapanguwartahan ang mga tawong dali ra motuo. Usahay, kadtong naghimo niana nangangkon nga Saksi kuno sila.

Tagda ang laing kapeligrohan. Ang pipila ka dating website naggamit ug matematikal nga mga kalkulasyon aron kuno mahibaloan kon kinsay bagay sa usag usa. Pero walay ebidensiya nga mosaler nâ nga pamaagi. Maalamon bang mosalig sa hinimog tawo nga pormula aron maseguro nga molampos ang importanteng mga desisyon sama sa kaminyoon? Ang matematikal nga mga pormula dili gyod kasaligan kon itandi sa mga prinsipyo sa Bibliya.—Prov. 1:7; 3:5-7.

Ang prinsipyo sa Proverbio 14:15 nag-ingon: “Ang inosente motuo sa tanan niyang madunggan,  apan ang maalamon mamalandong sa matag lakang.” Sa dili ka pa modesisyon nga ang usa mahimong maayong kapikas, kinahanglan nga mailhan una nimo siya pag-ayo. Pero lisod kanang buhaton online. Bisan pag makita nimo ang profile sa usa ka tawo ug pirme mong mag-estorya online, makaingon ba gyod ka nga nakaila na ka niya? Ang pipila nga naghunahuna nga nakaplagan na nila ang tinuod nga gugma nakurat sa dihang nakita na nila sa personal ang maong tawo.

Ang salmista miingon: “Wala ko makig-uban sa mga malimbongon, ug gilikayan nako kadtong mga nagpakaaron-ingnon.” (Sal. 26:4) Daghan ang naghunahuna nga okey rang mamakak sila diha sa ilang online dating profile aron mas magustoan sila sa uban. Tingali, itago nila ang ilang tinuod nga pagkatawo o kaha dili ni mailhan dihang mag-message sila sa uban. Bisag ang pipila moingon nga Saksi ni Jehova sila, bawtismado ba gyod sila? Hamtong ba sila sa espirituwal? Duna ba silay suod nga relasyon kang Jehova? Tinahod ba sila diha sa ilang kongregasyon? O sila ba dili maayong mga ehemplo o ‘daotang mga kauban’ pa gani? (1 Cor. 15:33; 2 Tim. 2:20, 21) Ug sila ba may Kasulatanhong basehanan nga magminyo? Kinahanglan nimo nang mahibaloan, pero lisod nang masayran kon dili ka mangutana sa ubang Saksi nga nakaila pag-ayo sa maong tawo. (Prov. 15:22) Ug siyempre, ang maunongong alagad ni Jehova dili gyod maghunahunang ‘magpayugo nga dili timbang’ sa usa ka dili magtutuo.—2 Cor. 6:14; 1 Cor. 7:39.

Tungod kay peligroso ang paggamit ug mga dating website, dunay mas maayong mga paagi sa pagpangitag kapikas ug pagpakigsuod sa maong tawo nga mahimong moresulta sa dungganong kaminyoon. Asa ka makailailag potensiyal nga kapikas? Kon posible ang pagpahigayon ug mga public gathering, ang mga Saksi ni Jehova personal nga magkailhanay diha sa mga tigom, asembliya, kombensiyon, ug ubang okasyon.

Kon dili posible ang mga public gathering, sama niining panahon sa COVID-19 pandemic, gamiton nato ang elektronikong mga galamiton sa pagtambong ug mga tigom, diin dunay mga kahigayonan nga mailaila ang ubang tagsaanong mga Saksi. Imong makita kon sa unsang paagi sila mohatag sa ilang mga bahin ug madungog sila nga mopahayag sa ilang pagtuo pinaagi sa ilang mga komento. (1 Tim. 6:11, 12) Puwede sab mong mag-estoryahanay diha sa usa ka breakout room human sa tigom. Pinaagi sa virtual nga mga tapoktapok uban sa mga igsoon, maobserbahan nimo kon sa unsang paagi ang igsoon nga imong nagustoan nakiglabot sa ubang tawo, ug pinaagi niana, mahimong mahibaloan nimo ang tinuod niyang kinaiya. (1 Ped. 3:4) Ngadtongadto, samtang mas magkailhanay pa mo, mahibaloan nimo kon parehas ba mog mga tumong ug prinsipyo ug kon bagay ba mo sa usag usa.

Sa dihang ang mga tagsaanon mangitag kapikas sa kaminyoon sa mga paagi nga uyon sa mga prinsipyo sa Bibliya, dakog posibilidad nga maeksperyensiyahan nila ang giingon sa usa ka panultihon: “Kadtong nakakitag maayong asawa [o bana] nakakitag maayong butang, ug nakadawat siyag pag-uyon ni Jehova.”—Prov. 18:22.