1. Sa unsa ta makaseguro, ug ngano?

 DIHANG tan-awon nimo ang kahimtang sa kalibotan, lisod ba para nimo ang pagtuo nga moarang-arang ni? Ang mga membro sa pamilya wala na kaayoy gugma sa usag usa. Daghang tawo ang nahimong mas bayolente ug hakog. Daghan pod ang dili na kaayo mosalig sa awtoridad. Pero kining mga butanga makahatag nimog pagsalig nga moarang-arang unya ang kahimtang. Ngano? Kay ang ginahimo sa mga tawo karon mao gyod ang gitagna sa Bibliya bahin sa “kataposang mga adlaw.” (2 Tim. 3:1-5) Si bisan kinsang sinserong tawo mouyon gyod nga nagakatuman kining tagnaa, ug ang katumanan niini nagpamatuod nga si Kristo Jesus nagsugod na pagmando ingong Hari sa Gingharian sa Diyos. Pero usa lang ni sa daghang tagna bahin sa Gingharian. Molig-on ang atong pagtuo kon hisgotan nato pag-usab ang ubang mga tagna nga natuman sa di pa dugayng katuigan.

2. Unsay atong hisgotan niini nga artikulo, ug ngano? (Komentohi ang hulagway sa atubangan sa magasin.)

² Niining artikuloha, atong hisgotan ang (1) tagna nga makatabang nato nga masabtan kon kanus-a natukod ang Gingharian, (2) mga tagna nga motabang nato nga masabtan nga si Jesus nahimo nang Hari sa Gingharian sa Diyos didto sa langit, ug (3) mga tagna nga naghisgot kon sa unsang paagi laglagon ang mga kaaway sa Gingharian sa Diyos. Atong makita nga sama sa mga piraso sa jigsaw puzzle, kini nga mga tagna  magkatakdo ug naghatag natog klarong ideya kon asa na ta sa dagan sa panahon nga gitakda ni Jehova.

3. Unsay gipasalig kanato sa tagna sa Daniel 7:13, 14 bahin sa Hari sa Gingharian sa Diyos?

³ Ang tagna sa Daniel 7:13, 14 nagpasalig nato nga si Kristo Jesus ang angayan gyod nga mahimong Magmamando sa Gingharian sa Diyos. Ang mga tawo sa tanang nasod malipayong “mag-alagad kaniya,” ug dili gyod siya pulihan ug laing magmamando. Sumala sa laing tagna sa basahon sa Daniel, si Jesus magsugod ug mando sa iyang Gingharian human sa yugto nga gitawag ug pito ka panahon. Posible bang mahibaloan kon kanus-a nahimong Hari si Jesus?

4. Ipatin-aw kon sa unsang paagi ang Daniel 4:10-17 motabang nato nga mahibaloan kon kanus-a nahimong Hari ang Kristo. (Tan-awa sab ang footnote.)

⁴ Basaha ang Daniel 4:10-17. Ang “pito ka panahon” nagtumong sa yugto nga may gidugayong 2,520 ka tuig. Kana nga yugto nagsugod niadtong 607 B.C.E. dihang gitangtang sa mga Babilonyanhon ang kataposang hari nga naglingkod sa trono ni Jehova sa Jerusalem. Natapos ni niadtong 1914 C.E. dihang gientrono ni Jehova si Jesus​—“ang usa nga may legal nga katungod”—​ingong Hari sa Gingharian sa Diyos. *​—Ezeq. 21:25-27.

5. Unsay usa sa mga benepisyo kon masabtan nato ang tagna bahin sa “pito ka panahon”?

⁵ Sa unsang paagi makabenepisyo ta niini nga tagna? Kon masabtan nato ang tagna bahin sa “pito ka panahon,” magpasalig ni nato nga tumanon ni Jehova ang iyang mga saad sumala sa iyang gitakdang panahon. Nagtakda siyag panahon kon kanus-a matukod ang iyang Gingharian, busa iya pong paneguroon nga ang uban pa niyang mga tagna matuman sumala sa iyang gitakdang panahon. Oo, ang adlaw ni Jehova “dili maulahi!”​—Hab. 2:3.

6. (a) Unsay atong makita dinhi sa yuta nga nagpamatuod nga ang Kristo nagmando na sa langit? (b) Sa unsang paagi kini nga pamatuod gisuportaran sa tagna sa Pinadayag 6:2-8?

⁶ Sa hapit nang matapos ang ministeryo ni Jesus diri sa yuta, iyang gitagna ang mga hitabo sa kalibotan nga makatabang aron mahibaloan sa iyang mga sumusunod nga nagsugod na siyag mando sa langit. Apil sa iyang gihisgotan ang mga gubat, kagutom, ug linog. Nagtagna pod siyag mga kamatay, o mga sakit, “sa lainlaing dapit”​—ug usa ka pananglitan ana ang bag-o lang nga COVID-19 nga pandemic. Kini nga mga hitabo maoy bahin sa giingon sa Bibliya nga “ilhanan” sa presensiya sa Kristo. (Mat. 24:3, 7; Luc. 21:7, 10, 11) Kapig 60 ka tuig human si Jesus mamatay ug mibalik sa langit, iyang gihatagan si apostol Juan ug dugang pamatuod nga mahitabo kining mga butanga. (Basaha ang Pinadayag 6:2-8.) Kining tanan nahitabo sukad nahimong Hari si Jesus niadtong 1914.

7. Nganong nahimong alaot ang yuta sukad nahimong Hari si Jesus?

⁷ Nganong migrabe ang kahimtang sa kalibotan dihang si Jesus nahimong Hari? Ang Pinadayag 6:2 naghatag ug importanteng detalye. Kini nag-ingon nga ang unang gihimo ni Jesus ingong Hari mao ang pagpakiggubat. Kang kinsa? Batok sa Yawa ug sa iyang mga demonyo. Sumala sa Pinadayag kapitulo 12, si Satanas napildi, ug siya ug ang mga demonyo gitambog sa yuta. Nasuko kaayo si  Satanas, ug iya ning gipahungaw ngadto sa mga tawo. Tungod niini, nahimong “alaot ang yuta.”​—Pin. 12:7-12.

8. Unsay kaayohan nga nakita nato ang katumanan sa mga tagna bahin sa Gingharian?

⁸ Sa unsang paagi makabenepisyo ta niini nga mga tagna? Ang mga panghitabo sa kalibotan ug ang nakita natong kausaban sa kinaiya sa mga tawo motabang nato nga mahibaloan nga si Jesus nahimo nang Hari. Busa imbes sobrang mabalaka nga ang mga tawo hakog ug bayolente, atong hinumdoman nga ang ilang binuhatan nagtuman sa tagna sa Bibliya. Ang Gingharian nagmando na! (Sal. 37:1) Ug mosamot pa gyod ang kalisdanan sa kalibotan samtang nagkaduol ang Armagedon. (Mar. 13:8; 2 Tim. 3:13) Mapasalamaton kaayo ta sa atong mahigugmaong langitnong Amahan sa pagtabang nato nga masabtan kon nganong daghan kaayo ang problema sa kalibotan.

9. Unsay giingon sa Daniel 2:28, 31-35 bahin sa kataposang gahom sa kalibotan, ug kanus-a ni mitungha?

⁹ Basaha ang Daniel 2:28, 31-35. Nakita nato nga kining tagnaa nagakatuman karon. Gipakita sa damgo ni Nabucodonosor kon unsay mahitabo sa “kaulahiang bahin sa mga adlaw,” human magsugod ang pagmando sa Kristo. Apil sa mga kaaway ni Jesus sa yuta mao ang kataposang gahom sa kalibotan nga gitagna sa Bibliya, nga gisimbolohan sa ‘mga tiil nga may parte nga puthaw ug may parte nga kulonon.’ Kini nga gahom sa kalibotan nagmando na. Mitungha ni niadtong Gubat sa Kalibotan I dihang nagkaalyado ang Britain ug United States ug naporma ang Anglo-Amerikanong alyansa. Ug base sa estatuwa sa damgo ni Nabucodonosor, kini nga gahom sa kalibotan lahi sa milabayng  mga gingharian. Naay labing menos duha ka rason.

10. (a) Nganong ang giingon sa tagna ni Daniel haom kaayo nga deskripsiyon sa Anglo-Amerikanong alyansa? (b) Unsang kapeligrohan ang angay natong likayan? (Tan-awa ang kahong “ Ayawg Paimpluwensiya sa Kulonon!”)

¹⁰ Una, dili sama sa nag-unang mga gahom sa kalibotan nga gihisgotan sa panan-awon, ang Anglo-Amerikanong alyansa gisimbolohan, dili sa puro nga metal sama sa bulawan o plata, kondili sa nagsagol nga puthaw ug kulonon. Ang kulonon nagsimbolo sa “kaliwat sa katawhan,” o ordinaryong mga tawo. (Dan. 2:43, footnote) Makita nato karon nga ang mga tawo nakaimpluwensiya sa mga eleksiyon, mga kampanya sa tawhanong katungod, pagprotesta, ug mga unyon sa mga trabahante. Ingong resulta, kini nga gahom sa kalibotan nalisdan sa pagpatuman sa mga polisiya niini.

11. Nganong ang pagmando sa Anglo-Amerikanong Gahom sa Kalibotan nagkombinsir nato nga nagkinabuhi na ta panahon sa kataposan?

¹¹ Ikaduha, ang Anglo-Amerika, nga gisimbolohan sa mga tiil sa dako kaayong estatuwa, mao ang kataposang gahom sa kalibotan nga gitagna sa Bibliya. Wala nay laing gobyerno sa tawo nga motungha human niini. Kini ug ang tanang ubang gobyerno laglagon sa Gingharian sa Diyos panahon sa Armagedon. *—Pin. 16:13, 14, 16; 19:19, 20.

12. Unsang dugang nga ebidensiya ang gipakita sa tagna ni Daniel nga naghatag natog kahupayan ug paglaom?

¹² Sa unsang paagi makabenepisyo ta niini nga tagna? Ang tagna ni Daniel naghatag ug dugang ebidensiya nga nagkinabuhi na ta panahon sa kataposan. Kapig 2,500 ka tuig kanhi, gitagna ni Daniel nga human sa Babilonya, motungha ang upat ka gahom sa kalibotan nga dakog epekto sa katawhan sa Diyos. Gipakita pod sa tagna nga ang kataposan niini nga mga gahom sa kalibotan mao ang Anglo-Amerika. Naghatag ni natog kahupayan ug paglaom nga sa dili madugay, laglagon sa Gingharian sa Diyos ang tanang gobyerno sa tawo ug kini na ang magmando sa yuta.​—Dan. 2:44.

13. Unsay gisimbolohan sa “ikawalong hari” ug sa “10 ka hari” nga gihisgotan sa Pinadayag 17:9-12, ug sa unsang paagi natuman kini nga tagna?

¹³ Basaha ang Pinadayag 17:9-12. Ang grabeng kadaot tungod sa Gubat sa Kalibotan I miresulta sa katumanan sa lain pang tagna sa Bibliya bahin sa kataposang mga adlaw. Ang mga lider sa politika gustog kalinaw sa tibuok kalibotan. Busa niadtong Enero 1920, ilang giporma ang League of Nations, nga gipulihan sa United Nations niadtong Oktubre 1945. Kini nga organisasyon gitawag nga “ikawalong hari,” pero dili ni matawag nga gahom sa kalibotan. Ang gahom ug impluwensiya niini naggikan sa mga gobyerno nga nagsuportar niini. Kini nga mga gobyerno gitawag sa Bibliya nga “10 ka hari.”

14-15. (a) Unsay gipakita sa Pinadayag 17:3-5 bahin sa “Bantogang Babilonya”? (b) Unsay nagakahitabo sa bakak nga relihiyon kon bahin sa mga nagsuportar niini?

¹⁴ Basaha ang Pinadayag 17:3-5. Sa panan-awon nga gihatag sa Diyos, nakita ni apostol Juan ang usa ka pampam, ang “Bantogang Babilonya,” nga nagsimbolo sa tibuok kalibotang imperyo sa bakak nga relihiyon. Sa unsang paagi natuman ang panan-awon? Ang bakak nga mga relihiyon dugay nang nakigtinabangay ug nagsuportar sa mga gobyerno sa kalibotan. Pero sa dili madugay, ibutang ni Jehova sa kasingkasing sa mga lider sa gobyerno ang ‘pagbuhat sa iyang hunahuna.’ Unsa unyay resulta? Atakehon sa maong mga gobyerno, o “10 ka hari,” ang bakak nga mga relihiyon ug laglagon kini.​—Pinadayag 17:1, 2, 16, 17.

 ¹⁵ Giunsa nato pagkahibalo nga hapit nang laglagon ang Bantogang Babilonya? Aron matubag nâ, makatabang kon atong hinumdoman nga usa sa mga depensa sa karaang siyudad sa Babilonya mao ang mga tubig sa Suba sa Euprates. Sa basahon sa Pinadayag, ang minilyong tawo nga nagsuportar sa Bantogang Babilonya gipakasama sa “mga tubig.” (Pin. 17:15) Pero gipakita sab niini nga ang mga tubig ‘mohubas’​—buot pasabot, ang tibuok kalibotang imperyo sa bakak nga relihiyon mawad-ag daghang tigsuportar. (Pin. 16:12) Kanang tagnaa natuman na karon, kay daghang tawo ang mibiya sa bakak nga relihiyon ug nangitag laing kakuhaan ug giya.

16. Unsay mga benepisyo nga nasabtan nato ang mga tagna bahin sa pagtungha sa United Nations ug sa kalaglagan sa Bantogang Babilonya?

¹⁶ Sa unsang paagi makabenepisyo ta niini nga mga tagna? Ang pagtungha sa United Nations ug ang nagkahuyang nga suporta para sa bakak nga relihiyon maoy dugang ebidensiya nga nagkinabuhi na ta sa kataposang mga adlaw. Pero bisag nagkahubas ang simbolikong mga tubig nga nagsuportar sa Bantogang Babilonya, dili kini ang makalaglag sa  bakak nga mga relihiyon. Sa nahisgotan na, ibutang ni Jehova sa kasingkasing sa “10 ka hari”​—ang mga gobyerno nga nagsuportar sa United Nations—​ang ‘pagbuhat sa iyang hunahuna.’ Kalit nga laglagon niini nga mga gobyerno ang Bantogang Babilonya, nga makapakurat sa kalibotan. * (Pin. 18:8-10) Ang kalaglagan sa Bantogang Babilonya makaapektar pag-ayo sa tibuok kalibotan ug posibleng moresultag grabeng mga kalisdanan. Pero ang katawhan sa Diyos naay labing menos duha ka rason nga magmalipayon. Kining dugay na kaayong kaaway ni Jehova nga Diyos mawala na hangtod sa hangtod, ug hapit na gyong moabot ang atong kaluwasan!—Luc. 21:28.

17-18. (a) Unsay atong himoon aron padayon natong mapalig-on ang atong pagtuo? (b) Unsay atong hisgotan sa sunod nga artikulo?

¹⁷ Gitagna ni Daniel nga “ang tinuod nga kahibalo modagaya.” Ug mao gyod nay nahitabo. Nasabtan na nato ang mga tagna bahin sa atong panahon. (Dan. 12:4, 9, 10) Kay tukma kaayong natuman kini nga mga tagna, mas milalom ang atong pagsalig kang Jehova ug sa iyang Pulong. (Isa. 46:10; 55:11) Busa padayong palig-ona ang imong pagtuo pinaagi sa pagkugig tuon sa Kasulatan ug sa pagtabang sa uban nga mahimong higala ni Jehova. Iyang panalipdan kadtong bug-os nga nagasalig kaniya, ug iya silang hatagan ug “walay kataposang pakigdait.”​—Isa. 26:3.

¹⁸ Sa sunod nga artikulo, atong hisgotan ang mga tagna bahin sa Kristohanong kongregasyon panahon sa kataposan. Sa ato unyang makat-onan, kini nga mga tagna magpamatuod pod nga nagkinabuhi na ta sa kataposang mga adlaw. Atong makita ang dugang ebidensiya nga si Jesus, ang atong nagmando na nga Hari, naggiya gyod sa iyang maunongong mga sumusunod.