1. Unsa dayon ang gihimo ni Jehova dihang nakasala si Adan ug Eva? (Genesis 3:15)

 DIHANG nakasala si Adan ug Eva, gihatagan dayon ni Jehova ug paglaom ang ilang mga kaliwat pinaagi sa usa ka importanteng tagna. Ang iyang giingon narekord sa Genesis 3:15.​—Basaha.

2. Nganong importante ni nga tagna?

² Ang tagna narekord sa unang basahon sa Bibliya, pero ang tanang ubang basahon sa Bibliya konektado niini nga tagna. Sama nga ang backbone sa libro nag-usa sa tanang panid niini, ang Genesis 3:15 nag-usa o nagkonektar sa mga impormasyon sa matag basahon sa Bibliya ngadto sa usa ka mensahe, nga ang Diyos magpadalag Manluluwas nga maglaglag sa Yawa ug sa tanan niyang daotang sakop. * Panalangin gyod nâ para niadtong nahigugma kang Jehova!

3. Unsay atong hisgotan niini nga artikulo?

³ Niini nga artikulo, tubagon nato ang mosunod nga mga pangutana bahin sa tagna sa Genesis 3:15: Kinsa ang mga karakter nga gihisgotan niini? Sa unsang paagi natuman ang tagna? Ug unsay kaayohan niini kanato?

4. Kinsa ang “halas,” ug nganong nahibalo ta ana?

⁴ Ang mga karakter sa Genesis 3:14, 15 mao ang “halas,”  ang “kaliwat” sa halas, ang “babaye,” ug ang “kaliwat” sa babaye. Ang Bibliya nagtabang nato nga mailhan kon kinsa sila. * Unahon nato ang “halas.” Dili masabtan sa literal nga halas ang giingon ni Jehova sa tanaman sa Eden. Busa ang gihukman ni Jehova seguradong usa ka intelihenteng linalang. Kinsa siya? Klaro ning gipaila sa Pinadayag 12:9. Kini nag-ingon nga “ang orihinal nga halas” mao si Satanas nga Yawa. Pero kinsa ang kaliwat sa halas?

5. Kinsa ang kaliwat sa halas?

⁵ Kon ang Bibliya mogamit sa terminong kaliwat, usahay kini nagtumong niadtong nagsundog pag-ayo sa hunahuna o binuhatan sa ilang simbolikong amahan. Busa ang kaliwat sa halas mao ang daotang mga anghel ug mga tawo nga, sama kang Satanas, misupak kang Jehova nga Diyos ug sa Iyang katawhan. Apil nila ang mga anghel nga mibiya sa langit sa panahon ni Noe ug ang daotang mga tawo nga ang panggawi sama sa Yawa nga ilang amahan.​—Gen. 6:1, 2; Juan 8:44; 1 Juan 5:19; Jud. 6.

6. Nganong imposible nga si Eva ang “babaye”?

⁶ Karon atong hibaloon kon kinsa ang “babaye.” Imposible nga siya si Eva. Ngano? Konsideraha ning usa ka rason. Sumala sa tagna, “dugmokon” sa kaliwat sa babaye ang ulo sa halas. Sa ato nang nahisgotan, ang halas mao ang daotang anghel nga si Satanas, ug walay dili hingpit nga tawo ang makadugmok niya. Busa sa unsang paagi laglagon si Satanas?

7. Base sa Pinadayag 12:1, 2, 5, 10, kinsa ang babaye nga gihisgotan sa Genesis 3:15?

⁷ Ang babaye nga gihisgotan sa Genesis 3:15 gipaila sa kataposang basahon sa  Bibliya. (Basaha ang Pinadayag 12:1, 2, 5, 10.) Dili siya ordinaryong babaye! Ang bulan naa sa ilalom sa iyang mga tiil, ug sa iyang ulo naay korona nga 12 ka bituon. Ug talagsaon kaayo ang iyang gipanganak​—ang Gingharian sa Diyos. Ang Gingharian tua sa langit, busa ang babaye kinahanglang tua sab sa langit. Siya nagsimbolo sa langitnong bahin sa organisasyon ni Jehova—ang iyang matinumanong mga anghel.​—Gal. 4:26.

8. Kinsa ang pangunang bahin sa kaliwat sa babaye, ug kanus-a siya nahimong ingon niana? (Genesis 22:15-18)

⁸ Gitabangan pod ta sa Pulong sa Diyos nga mailhan ang pangunang bahin sa kaliwat sa babaye. Siya kaliwat ni Abraham. (Basaha ang Genesis 22:15-18.) Sumala gyod sa gitagna, si Jesus kaliwat nianang matinumanon nga tawo. (Luc. 3:23, 34) Pero ang kaliwat kinahanglang mas gamhanan kay sa tawo, kay siya ang modugmok, o molaglag, kang Satanas nga Yawa. Busa dihang mga 30 anyos si Jesus, gidihogan siya sa balaang espiritu. Nianang tungora, nahimo siyang dinihogan sa espiritu nga Anak sa Diyos ug nahimong pangunang bahin sa kaliwat sa babaye. (Gal. 3:16) Human sa kamatayon ug pagkabanhaw ni Jesus, “gikoronahan [siya sa Diyos ug] himaya ug dungog” ug gihatagan siya sa “tanang awtoridad sa langit ug sa yuta,” apil ang awtoridad nga “gub-on ang mga buhat sa Yawa.”​—Heb. 2:7; Mat. 28:18; 1 Juan 3:8.

9-10. (a) Kinsa pa ang ubang bahin sa kaliwat sa babaye, ug kanus-a sila nahimong ingon niana? (b) Unsay atong sunod nga hisgotan?

⁹ Pero naa pay uban nga mahimong bahin sa kaliwat sa babaye. Gipaila sila ni apostol Pablo dihang iyang giingnan ang mga Hudiyo ug Hentil nga dinihogang mga Kristohanon: “Kon kamo iya sa Kristo, kamo kaliwat gyod ni Abraham, mga manununod maylabot sa saad.” (Gal. 3:28, 29) Dihang dihogan ni Jehova ang usa ka Kristohanon pinaagig balaang espiritu, ang maong tawo mahimong bahin sa kaliwat sa babaye. Busa ang kaliwat mao si Jesu-Kristo ug ang 144,000 nga kauban niyang magmamando. (Pin. 14:1) Silang tanan nagsundog sa panghunahuna ug binuhatan sa ilang Amahan, si Jehova nga Diyos.

¹⁰ Karon nga nailhan na nato ang mga karakter sa Genesis 3:15, atong hisgotan kon unsa nay nahimo ni Jehova aron anam-anam nga matuman kini nga tagna ug kon unsay kaayohan niini kanato karon.

11. Sa unsang paagi ang kaliwat sa babaye nasamdan diha “sa tikod”?

¹¹ Sumala sa tagna sa Genesis 3:15, samaran sa halas ang kaliwat sa babaye diha “sa tikod.” Natuman nâ dihang gigamit ni Satanas ang mga Hudiyo ug mga Romano aron patyon ang Anak sa Diyos. (Luc. 23:13, 20-24) Ang usa ka tawo temporaryong dili makalakaw kon masamdan ang iyang tikod. Parehas ana ang nahitabo dihang namatay si Jesus. Temporaryo siyang walay nahimo dihang naa siya sa lubnganan sa mga tulo ka adlaw.​—Mat. 16:21.

12. Sa unsang paagi ug kanus-a dugmokon ang ulo sa halas?

¹² Aron matuman ang tagna sa Genesis 3:15, si Jesus kinahanglang dili magpabilin sa lubnganan. Ngano? Kay sumala sa tagna, dugmokon sa kaliwat sa babaye ang  ulo sa halas. Sa ato pa, kinahanglang maayo ang samad ni Jesus sa tikod. Ug mao nay nahitabo! Sa ikatulong adlaw human mamatay si Jesus, siya gibanhaw ingong imortal nga espiritung linalang. Sa gitakdang panahon sa Diyos, dugmokon, o laglagon, ni Jesus si Satanas. (Heb. 2:14) Ang Kristo ug kadtong kauban niya nga magmando maglaglag sa tanang kaaway sa Diyos—ang kaliwat sa halas.​—Pin. 17:14; 20:4, 10. *

13. Sa unsang paagi ta nakabenepisyo sa katumanan niini nga tagna?

¹³ Kon alagad ka sa Diyos, nakabenepisyo ka karon sa katumanan niini nga tagna. Si Jesus mianhi sa yuta ingong tawo. Parehas gyod siyag personalidad sa iyang Amahan. (Juan 14:9) Busa pinaagi kaniya, atong nailhan ug gihigugma si Jehova nga Diyos. Nakabenepisyo sab ta sa mga gitudlo ni Jesus ug sa iyang paggiya ug pagdumala sa Kristohanong kongregasyon karon. Gitudloan ta niya kon unsaon pagkinabuhi nga makapalipay kang Jehova. Ug nakabenepisyo tang tanan sa kamatayon ni Jesus​—ang pagsamad sa iyang tikod. Sa unsang paagi? Human mabanhaw si Jesus, iyang gitanyag ang bili sa iyang dugo ingong hingpit nga halad nga ‘naghinlo kanato gikan sa tanang sala.’​—1 Juan 1:7.

14. Giunsa nato pagkahibalo nga ang tagna nga gisulti ni Jehova didto sa Eden wala dayon matuman niadtong panahona?

¹⁴ Ang giingon ni Jehova didto sa Eden nagpakita nga dili pa dayon matuman ang tagna adtong panahona. Nagkinahanglag panahon aron ang babaye makapatunghag kaliwat, aron ang Yawa makatigom sa iyang mga sakop, ug aron motungha ang panag-away tali sa duha ka grupo. Makabenepisyo ta sa pagkahibalo niini nga tagna kay kini nagpasidaan nato nga ang kalibotan nga gimandoan ni Satanas magdumot sa mga magsisimba ni Jehova. Ingon niini ang gipasidaan ni Jesus sa iyang mga tinun-an. (Mar. 13:13; Juan 17:14) Nakita gyod nato ang katumanan sa maong bahin sa tagna ilabina sa milabayng 100 ka tuig. Sa unsang paagi nâ natuman?

15. Nganong nagkagrabe ang pagdumot sa kalibotan, pero nganong dili ta angayng mahadlok kang Satanas?

¹⁵ Human si Jesus mahimong Hari niadtong 1914, si Satanas gitambog sa yuta, nga naghulat sa iyang kalaglagan. (Pin. 12:9, 12) Pero wala lang siya basta maghulat nga walay ginahimo. Si Satanas desperado ug naglungotlungot sa kasuko, ug iya ning gipahungaw sa katawhan sa Diyos. (Pin. 12:13, 17) Tungod ana, migrabe ang pagdumot sa kalibotan ngadto sa katawhan sa Diyos. Pero dili ta angayng mahadlok kang Satanas ug sa iyang mga sakop. Hinuon masaligon ta sama kang apostol Pablo, kinsa misulat: “Kon ang Diyos dapig nato, kinsay makadaog batok kanato?” (Roma 8:31) Bug-os tang makasalig kang Jehova, kay sa ato nang nakita, natuman na ang daghang bahin sa tagna sa Genesis 3:15.

16-18. Sa unsang paagi nakabenepisyo si Curtis, Ursula, ug Jessica kay nasabtan nila ang Genesis 3:15?

¹⁶ Ang saad ni Jehova sa Genesis 3:15 makatabang nato nga maatubang ang bisan unsang pagsulay. Si Curtis, nga misyonaryo sa Guam, miingon: “May mga panahon nga nag-atubang kog mga kalisdanan nga nagsulay  sa akong pagkamaunongon kang Jehova. Pero ang pagpamalandong sa tagna sa Genesis 3:15 nakatabang nako nga padayong mosalig sa akong langitnong Amahan.” Naghinamhinam si Curtis sa panahon nga taposon ni Jehova ang tanan natong kalisdanan.

¹⁷ Si Ursula, sister sa Bavaria, miingon nga ang Genesis 3:15 nakakombinsir niya nga ang Bibliya gikan gyod sa Diyos. Ug bilib kaayo siya kay iyang nakita nga ang tanang ubang tagna konektado niining tagnaa. Miingon pod siya: “Natandog ko pagkahibalo nako nga naa dayoy gihimo si Jehova aron mahatagan tag paglaom.”

¹⁸ Si Jessica, nga taga-Micronesia, miingon: “Di nako malimtan ang akong gibati dihang nakaplagan nako ang kamatuoran! Ang tagna sa Genesis 3:15 nagakatuman na. Nagpahinumdom ni nako nga ang atong lisod nga kinabuhi karon dili mao ang tinuod nga kinabuhi. Kini nga tagna nagkombinsir pod nako nga ang pag-alagad kang Jehova makahatag nakog kinamaayohang kinabuhi karon ug mas maayong kinabuhi sa umaabot.”

19. Nganong makasalig ta nga matuman gyod ang kataposang bahin sa tagna?

¹⁹ Sa ato nang nahisgotan, ang Genesis 3:15 nagakatuman na karon. Nailhan na gyod nato ang kaliwat sa babaye ug ang kaliwat sa halas. Si Jesus, ang pangunang bahin sa kaliwat sa babaye, naulian na sa iyang samad sa tikod ug usa na ka mahimayaon ug imortal nga Hari. Ang pagpili sa 144,000, nga apil sa kaliwat sa babaye, hapit nang mahuman. Kay ang unang bahin sa tagna natuman na, makasalig gyod ta nga matuman pod ang kataposang bahin niana, ang pagdugmok sa ulo sa halas. Dili gyod masukod ang kalipay unya sa mga alagad sa Diyos dihang laglagon na si Satanas! Busa ayaw gyod ug surender, kay ang atong Diyos kasaligan. Pinaagi sa kaliwat sa babaye, dagaya niyang panalanginan “ang tanang nasod sa yuta.”​—Gen. 22:18.