1. Unsay imong pagbati nga gitugotan ta ni Jehova nga makaampo kaniya?

 GIHATAGAN ta ug nindot kaayo nga pribilehiyo—makaampo ta sa Magbubuhat sa langit ug sa yuta. Hunahunaa ra: Puwede natong isulti ang tanan kang Jehova bisag kanus-a ug bisag unsa pay atong pinulongan, ug dili na ta kinahanglang makig-appointment niya. Makaampo ta bisag naa ta sa ospital o sa prisohan, ug makasalig ta nga paminawon ta sa atong mahigugmaong Amahan. Dili gyod nato balewalaon kini nga pribilehiyo.

2. Giunsa pagpakita ni Haring David nga gipabilhan niya ang pribilehiyo sa pag-ampo?

² Gipabilhan ni Haring David ang pribilehiyo sa pag-ampo. Siya miawit kang Jehova: “Hinaot ang akong pag-ampo mahisamag insenso nga giandam sa imong atubangan.” (Sal. 141:1, 2) Sa panahon ni David, andamon pag-ayo ang sagradong insenso nga gamiton sa mga saserdote para sa matuod nga pagsimba. (Ex. 30:34, 35) Ang paghisgot ni David sa insenso nagpakita nga gusto niyang hunahunaon pag-ayo kon unsay iyang iampo sa iyang langitnong Amahan. Mao pod nay gusto natong himoon. Gusto nato nga malipay si Jehova sa atong pag-ampo.

3. Nganong angay tang magpakitag dakong pagtahod dihang mag-ampo kang Jehova?

³ Dihang mag-ampo ta kang Jehova, kinahanglang magpakita tag dakong pagtahod. Hunahunaa ang makapahinganghang mga panan-awon nga nakita ni Isaias, Ezequiel, Daniel, ug Juan. Lainlain ang maong mga panan-awon, pero naa ni pagkaparehas. Gipakita niini kon unsa ka halangdon si Jehova ingong Hari. Nakita ni Isaias “nga si Jehova naglingkod sa  habog ug tinuboy nga trono.” (Isa. 6:1-3) Nakita ni Ezequiel si Jehova nga naglingkod sa Iyang langitnong karo, nga gipalibotag “kahayag nga sama nianang sa balangaw.” (Ezeq. 1:26-28) Nakita ni Daniel ang “Karaan sa mga Adlaw” nga nagsul-ob ug puti, ug ang Iyang trono naay mga siga sa kalayo. (Dan. 7:9, 10) Ug nakita ni Juan si Jehova nga naglingkod sa trono nga gilibotag balangaw nga samag esmeralda tan-awon. (Pin. 4:2-4) Kon pamalandongon nato ang dili hitupngang himaya ni Jehova, mapahinumdoman ta kon unsa ka nindot ang atong pribilehiyo nga makaampo kaniya ug kon unsa ka importante ang paghimo niana nga may pagtahod. Pero unsaon nato pag-ampo?

4. Unsay atong makat-onan sa mga unang gihisgotan ni Jesus sa pag-ampo nga narekord sa Mateo 6:9, 10?

⁴ Basaha ang Mateo 6:9, 10. Sa Wali sa Bukid, gitudloan ni Jesus ang iyang mga tinun-an kon unsaon pag-ampo sa paagi nga makapalipay sa Diyos. Human moingon si Jesus nga “busa, mag-ampo kamo niining paagiha,” una niyang gihisgotan ang importanteng mga butang nga konektado sa katuyoan ni Jehova: ang pagbalaan sa Iyang ngalan; ang pag-abot sa Gingharian nga maglaglag sa tanang kaaway sa Diyos; ug ang umaabot nga mga panalangin nga Iyang ihatag para sa yuta ug sa mga tawo. Kon ato ning iapil sa atong pag-ampo, atong gipakita nga importante kanato ang kabubut-on sa Diyos.

5. Sayop ba nga moampo bahin sa personal nga mga butang?

⁵ Sa sunod nga bahin sa pag-ampo ni Jesus, iyang gipakita nga dili sayop ang pag-ampo bahin sa personal nga mga butang. Makaampo ta kang Jehova nga hatagan tag pagkaon nianang adlawa, pasayloon ta sa atong mga sala, tabangan tang dili madaog sa tentasyon, ug luwason ta gikan sa usa nga daotan. (Mat. 6:11-13) Kon ato ning iampo kang Jehova, gipakita nato nga nanginahanglan ta sa iyang tabang ug gusto nato siyang mapalipay.

6. Ang mga gihisgotan sa modelong pag-ampo mao ra bay puwede natong iampo? Ipatin-aw.

⁶ Dili gusto ni Jesus nga sundogon sa iyang mga sumusunod ang eksaktong mga pulong sa modelong pag-ampo. Sa ubang pag-ampo ni Jesus, iyang gihisgotan ang lainlaing  butang nga importante kaniya ug iyang gikabalak-an adtong higayona. (Mat. 26:39, 42; Juan 17:1-26) Sama kang Jesus, makaampo ta bahin sa bisan unsa nga atong gikabalak-an. Dihang mohimo tag desisyon, makaampo ta alang sa kaalam ug pagsabot. (Sal. 119:33, 34) Sa dili pa magsugod ug lisod nga asaynment, makapangayo tag tabang aron masabtan nato kon unsaon nâ paghimo. (Prov. 2:6) Ang mga ginikanan makaampo para sa ilang mga anak, ang mga anak makaampo para sa ilang ginikanan, ug kitang tanan angayng mag-ampo para sa atong mga Bible study ug niadtong atong ginasangyawan. Pero siyempre, dili angay nga pulos ra hangyo ang atong mga pag-ampo.

7. Nganong angay natong dayegon si Jehova sa pag-ampo?

⁷ Kinahanglang dili ta malimot nga dayegon si Jehova sa atong pag-ampo. Angayan gyod siya sa atong mga pagdayeg. Siya “maayo ug andam sa pagpasaylo.” Siya pod “maluluy-on ug mabination, dili daling masuko ug dagaya sa maunongong gugma ug pagkamatinumanon.” (Sal. 86:5, 15) Daghan gyod tag rason nga dayegon si Jehova tungod sa iyang mga hiyas ug ginahimo.

8. Unsay pipila sa puwede natong ipasalamat kang Jehova? (Salmo 104:12-15, 24)

⁸ Gawas nga dayegon nato si Jehova sa atong mga pag-ampo, gusto pod nato siyang pasalamatan tungod sa maayong mga butang nga iyang ginahatag kanato. Pananglitan, pasalamatan nato siya tungod sa nindot nga kolor sa mga bulak, sa daghang klase sa lamiang pagkaon, ug sa makapalipayng panaghigalaay. Daghan pag gihatag ang atong mahigugmaong Amahan aron malipay ta. (Basaha ang Salmo 104:12-15, 24.) Ug ilabinang mapasalamaton ta kang Jehova tungod sa dagayang espirituwal nga pagkaon nga iyang gitagana ug sa atong nindot nga paglaom sa umaabot.

9. Unsay makatabang aron dili ta malimot nga magpasalamat kang Jehova? (1 Tesalonica 5:17, 18)

⁹ Usahay, dali ra tang malimot nga magpasalamat kang Jehova sa tanan niyang ginahimo para nato. Unsay makatabang nimo nga mahinumdom? Puwede nimong ilista kon unsay imong mga gihangyo kang Jehova, ug  matag karon ug unya, tan-awa kon giunsa nâ niya pagtubag. Dayon pasalamati siya sa iyang tabang. (Basaha ang 1 Tesalonica 5:17, 18.) Hunahunaa ni: Malipay ta ug mobating gimahal kon pasalamatan ta sa uban. Ingon ana pod ang bation ni Jehova. Malipay siya kon dili ta malimot nga magpasalamat niya kay gitubag niya ang atong mga pag-ampo. (Col. 3:15) Pero unsa pay laing importanteng rason nga pasalamatan nato ang atong Diyos?

10. Sumala sa 1 Pedro 2:21, nganong angay natong pasalamatan si Jehova nga iyang gipadala si Jesus sa yuta?

¹⁰ Basaha ang 1 Pedro 2:21. Angay natong pasalamatan si Jehova kay iyang gipadala ang iyang pinalanggang Anak aron tudloan ta. Pinaagi sa pagtuon sa kinabuhi ni Jesus, daghan tag makat-onan bahin kang Jehova ug kon unsaon nga mapalipay nato Siya. Kon magpakita tag pagtuo sa halad sa Kristo, mahimo tang suod nga higala ni Jehova nga Diyos ug naa tay malinawong relasyon uban Kaniya.​—Roma 5:1.

11. Nganong angay tang moampo pinaagi sa ngalan ni Jesus?

¹¹ Pasalamatan nato si Jehova nga makaampo ta kaniya pinaagi sa iyang Anak. Si Jesus ang ginagamit ni Jehova sa paghatag sa atong mga hangyo. Paminawon ug tubagon ni Jehova ang mga pag-ampo nga gitanyag pinaagi sa ngalan ni Jesus. Si Jesus miingon: “Bisan unsay inyong ihangyo pinaagi sa akong ngalan, ako kining buhaton aron ang Amahan mahimaya sa Anak.”​—Juan 14:13, 14.

12. Unsay laing rason nga pasalamatan nato si Jehova sa paghatag sa iyang Anak?

¹² Pasayloon ta ni Jehova sa atong mga sala pinasukad sa halad lukat ni Jesus. Ang Kasulatan nag-ingon nga si Jesus ang atong “hataas nga saserdote, [nga naglingkod] sa tuong kamot sa trono sa Halangdong Diyos sa kalangitan.” (Heb. 8:1) Si Jesus ang atong “magtatabang ngadto sa Amahan.” (1 Juan 2:1) Mapasalamaton gyod ta kang Jehova kay gihatagan ta niyag Hataas nga Saserdote nga nakasabot sa atong mga kahuyangan ug ‘nagahangyo para kanato’! (Roma 8:34; Heb. 4:15) Dili ta hingpit, mao nga kon wala ang halad ni Jesus, dili ta makaduol kang Jehova pinaagi sa pag-ampo. Busa angay gyod tang magpasalamat sa bililhong regalo ni Jehova kanato​—ang iyang pinalanggang Anak!

13. Sa gabii una mamatay si Jesus, giunsa niya pagpakita nga iyang gihigugma ang iyang mga tinun-an?

¹³ Sa gabii una mamatay si Jesus, migahin siyag taas nga panahon sa pag-ampo para sa iyang mga tinun-an. Iyang gihangyo ang iyang Amahan nga ‘bantayan sila tungod sa usa nga daotan.’ (Juan 17:15) Gihigugma gyod sila ni Jesus! Hapit na siyang makasinatig grabeng pagsulay, pero gihunahuna gihapon niya ang kaayohan sa iyang mga apostoles.

14. Unsaon nato pagpakita nga gihigugma nato ang mga igsoon?

¹⁴ Ingong pagsundog kang Jesus, dili lang ang atong panginahanglan ang atong gihunahuna. Kanunay tang nag-ampo para sa mga igsoon. Pinaagi niana, gisunod nato ang sugo ni Jesus nga maghigugmaay, ug gipakita nato kang Jehova nga gihigugma gyod nato ang mga igsoon. (Juan 13:34) Dili usik sa panahon ang pag-ampo para sa mga igsoon. Ang Pulong sa Diyos nag-ingon nga “ang pangamuyo sa tawong matarong dunay gamhanang epekto.”​—Sant. 5:16.

15. Nganong ang mga igsoon nanginahanglan sa atong pag-ampo?

 ¹⁵ Ang mga igsoon nanginahanglan sa atong pag-ampo kay nag-atubang silag daghang pagsulay. Puwede natong hangyoon si Jehova nga tabangan sila nga makalahutay bisan pa sa sakit, kalamidad, gubat, paglutos, ug ubang kalisdanan. Makaampo pod ta para sa mga igsoon nga nagsakripisyo sa paghatag ug hinabang. Basig naa kay nailhan nga mga igsoon nga nag-atubang ug ingon ana nga kalisdanan. Puwede nimong isulti ang ilang ngalan diha sa imong pag-ampo. Dihang hangyoon nato si Jehova nga tabangan sila nga makalahutay, atong gipakita nga tinuod nato silang gihigugma.

16. Nganong angay natong iampo ang mga nanguna kanato?

¹⁶ Ang mga nanguna sa kongregasyon mapasalamaton nga ato silang giapil sa atong pag-ampo kay makatabang ni nila. Ingon ana ang gibati ni apostol Pablo. Siya misulat: “Iampo sab ko, aron mahibalo ko kon unsay angayng isulti dihang mosulti ko, aron may kaisog ko sa pagsangyaw sa sagradong tinago sa maayong balita.” (Efe. 6:19) Karon sab, daghang kugihang brader ang nanguna kanato. Dihang iampo nato kang Jehova nga panalanginan ang ilang buluhaton, atong gipakita nga gihigugma nato sila.

17-18. Kanus-a tingali ta hangyoon nga moampo para sa uban, ug unsay angay natong hinumdoman?

¹⁷ Usahay, hangyoon ta nga moampo para sa uban. Pananglitan, ang sister nga nagdumalag pagtuon sa Bibliya mohangyo sa iyang kaubang sister nga maoy moampo. Ang mikuyog nga sister wala tingali kaayo makaila sa Bible study, mao nga basig mas gusto niyang moampo inighuman sa pagtuon aron mas mapahaom niya ang iyang pag-ampo sa panginahanglan sa Bible study.

¹⁸ Ang usa ka brader hangyoon tingali nga moampo panahon sa tigom alang sa pagsangyaw o sa tigom sa kongregasyon. Angayng hinumdoman sa moampo nga brader kon unsay katuyoan sa maong tigom. Ang pag-ampo dili angayng gamiton aron manambag sa kongregasyon o mohimog mga pahibalo. Sa kadaghanang tigom sa kongregasyon, lima ka minuto  ra ang gigahin para sa awit ug pag-ampo, mao nga ang brader nga moampo kinahanglang dili mogamit ug “daghang pulong” ilabina sa sugod sa tigom.​—Mat. 6:7.

19. Unsay makatabang aron mahimo tang andam sa adlaw ni Jehova sa paghukom?

¹⁹ Kinahanglang hatagan natog mas dakong importansiya sa atong kinabuhi ang pag-ampo samtang magkaduol ang adlaw ni Jehova sa paghukom. Si Jesus miingon: “Nan padayon sa pagtukaw, nga mangamuyo kanunay nga kamo makaikyas niining tanang butang nga kinahanglang mahitabo.” (Luc. 21:36) Ang atong kanunayng pag-ampo makatabang nato nga magpabiling nagtukaw, o lig-on sa espirituwal, aron andam ta sa adlaw sa Diyos.

20. Unsay atong himoon aron ang atong pag-ampo mahisamag humot nga insenso?

²⁰ Unsay atong nahisgotan? Importante kaayo para nato ang atong pribilehiyo sa pag-ampo. Sa atong pag-ampo, angay natong hatagag kinadak-ang importansiya ang mga butang maylabot sa katuyoan ni Jehova. Magpasalamat pod ta tungod sa Anak sa Diyos ug sa iyang pagmando sa Gingharian, ug iampo nato ang mga igsoon. Siyempre, puwede natong iampo ang atong pisikal ug espirituwal nga panginahanglan. Kon hunahunaon nato pag-ayo ang atong isulti sa dili pa ta mag-ampo, gipakita nato nga atong gipabilhan kining nindot kaayo nga pribilehiyo. Ang atong pag-ampo mahisamag humot nga insenso nga makapalipay kang Jehova.​—Prov. 15:8.