1. Nganong maalamon nga mangandam ta para sa mga kalamidad?

 ANG pagpangandam makaluwas ug kinabuhi. Pananglitan, dihang naay mahitabong kalamidad, kadtong nakapangandam mas dakog purohan nga maluwas ug makatabang sa uban. Ang usa ka humanitarian nga organisasyon sa Europe miingon: “Ang maayong pagpangandam dako gyod ug mahimo.”

2. Nganong angay tang mangandam para sa dakong kasakitan? (Mateo 24:44)

² Ang “dakong kasakitan” kalit nga moabot. (Mat. 24:21) Pero ang dakong kasakitan lahi sa ubang mga kalamidad, kay abante tang nahibalo nga moabot ni. Mga 2,000 ka tuig sa miagi, gipasidan-an ni Jesus ang iyang mga sumusunod nga mangandam para nianang adlawa. (Basaha ang Mateo 24:44.) Kon nakapangandam ta, mas dali para nato nga molahutay nianang lisod nga panahon ug makatabang pod ta sa uban nga molahutay.—Luc. 21:36.

3. Sa unsang paagi ang paglahutay, kaluoy, ug gugma makatabang nato nga maandam sa dakong kasakitan?

³ Konsideraha ang tulo ka hiyas nga makatabang nato nga maandam para sa dakong kasakitan. Unsay atong buhaton kon sugoon ta nga isangyaw ang bug-at nga mensahe sa paghukom ug ang mga tawo mosupak nato? (Pin. 16:21) Kinahanglan nato ang paglahutay aron masunod si Jehova ug mosalig nga panalipdan ta niya. Unsay atong himoon kon ang atong mga igsoon mawad-an sa pipila o sa tanan nilang materyal nga mga butang? (Hab. 3:17, 18) Kinahanglang mobati tag kaluoy nila aron mapalihok ta nga tabangan sila. Unsay atong reaksiyon kon, tungod sa pag-atake sa nag-alyansang kanasoran, kinahanglan tang mopuyo uban sa mga igsoon sa pipila ka panahon? (Ezeq. 38:10-12) Kinahanglang lig-on ang atong gugma para nila aron makalahutay ta nianang lisod nga panahon.

4. Giunsa pagpakita sa Bibliya nga kinahanglang padayon natong ugmaron ang paglahutay, kaluoy, ug gugma?

 ⁴ Ang Pulong sa Diyos nagdasig nato nga padayong ugmaron ang paglahutay, kaluoy, ug gugma. Ang Lucas 21:19 nag-ingon: “Pinaagi sa inyong paglahutay, maluwas ang inyong kinabuhi.” Ang 1 Pedro 3:8 nag-ingon: ‘Kamong tanan kinahanglang magpakitag kaluoy.’ Ug ang 1 Tesalonica 4:9, 10 nag-ingon: “Gitudloan na mo sa Diyos nga maghigugmaay. . . . Apan giawhag mo namo, mga igsoon, nga padayon kining himoon nga mas bug-os pa.” Kini nga mga teksto gisulat para sa mga Kristohanon kaniadto, kinsa nagpakita nag paglahutay, kaluoy, ug gugma. Pero kinahanglang padayon nilang ugmaron kini nga mga hiyas. Angay pod nato nang himoon. Aron matabangan ta, atong konsiderahon kon giunsa pagpakita sa mga Kristohanon sa unang siglo kini nga mga hiyas. Dayon atong susihon kon unsaon nato sila pagsundog aron maandam ta para sa dakong kasakitan.

5. Unsay gihimo sa unang mga Kristohanon aron makalahutay sila sa mga pagsulay?

⁵ Ang unang mga Kristohanon kinahanglang molahutay. (Heb. 10:36) Gawas sa komon nga mga problema nga ilang giatubang, naa pa gyod silay giatubang nga mga pagsulay. Daghan nila ang gilutos, dili lang sa Hudiyong mga lider sa relihiyon ug sa Romanong mga awtoridad, kondili sa ila pong mga pamilya. (Mat. 10:21) Ug sulod sa kongregasyon, dihay mga higayon nga kinahanglan nilang suklan ang impluwensiya ug ang makapabahinbahin nga pagtulon-an sa mga apostata. (Buh. 20:29, 30) Pero nakalahutay ang maong mga Kristohanon. (Pin. 2:3) Ngano? Ilang gipamalandong ang ehemplo niadtong mga milahutay, sama kang Job. (Sant. 5:10, 11) Miampo sila nga hatagan silag kusog. (Buh. 4:29-31) Ug nagpokus sila sa maayong mga resulta sa ilang paglahutay.—Buh. 5:41.

6. Unsay imong nakat-onan sa gihimo ni Merita aron malahutay niya ang pagsupak?

⁶ Makalahutay pod ta kon regular natong tun-an ug pamalandongon ang mga ehemplo niadtong milahutay, nga mabasa diha sa Bibliya ug sa atong mga publikasyon. Kanay nakatabang sa sister sa Albania nga si Merita, kinsa grabeng gisupak ug gidagmalan sa iyang pamilya. Siya miingon: “Natandog kaayo ko dihang gitun-an nako ang asoy sa Bibliya bahin kang Job. Grabe kaayo ang iyang pag-antos ug wala siya mahibalo kon kinsay hinungdan niini. Pero miingon gihapon siya: ‘Hangtod nga ako mamatay, dili gyod nako wad-on ang akong integridad!’ (Job 27:5) Nakahunahuna ko nga gamay ra kaayo ang akong problema kon ikompara sa mga pagsulay nga naagian ni Job. Dili sama niya, nahibalo ko kon kinsay hinungdan sa mga pagsulay nga akong giatubang.”

7. Bisag wala tay giatubang nga grabeng pagsulay karon, unsay angay natong himoon?

⁷ Mapalig-on sab nato ang atong determinasyon nga molahutay kon kanunay ug kinasingkasing natong isulti kang Jehova ang atong mga gikabalak-an. (Filip. 4:6; 1 Tes. 5:17) Tingali wala kay giatubang nga grabeng pagsulay karon. Pero mangayo ba gihapon kag giya ni Jehova dihang mahiubos ka, maglibog, o wala mahibalo kon unsay buhaton? Kon regular kang mangayog tabang sa Diyos sa imong ginagmay nga mga problema karon, dili na ka magduhaduha nga mangayo niyag tabang dihang makaatubang kag dagkong mga problema sa umaabot. Pinaagi ana, mahimo kang mas kombinsido nga nahibalo gyod siya kon kanus-a ug kon unsaon ka niya pagtabang.—Sal. 27:1, 3.

8. Giunsa pagpakita sa kasinatian ni Mira nga ang paglahutay sa mga pagsulay karon makatabang nato sa umaabot nga mga pagsulay? (Santiago 1:2-4) (Tan-awa sab ang hulagway.)

⁸ Mas dakog purohan nga makalahutay ta sa  umaabot nga dakong kasakitan kon molahutay ta sa mga pagsulay karon. (Roma 5:3) Nganong makaingon ta ana? Daghang igsoon ang miingon nga dihang nakalahutay sila sa usa ka pagsulay, kana nakatabang nila nga malahutay ang sunod nga pagsulay. Ang ilang paglahutay nakapalig-on sa ilang pagtuo nga si Jehova andam ug gusto kaayong motabang. Dayon, kana nga pagtuo nakatabang nila nga malahutay ang sunod nga pagsulay. (Basaha ang Santiago 1:2-4.) Si Mira, payunir sa Albania, miingon nga ang iyang paglahutay kaniadto nakatabang niya nga padayong molahutay. Miangkon siya nga usahay mobati siya nga morag siya ra man ang daghan kaayog problema. Pero gihinumdoman niya kon giunsa siya pagtabang ni Jehova sa milabay nga 20 ka tuig, ug giingnan niya ang iyang kaugalingon: ‘Pabiling matinumanon. Ayawg sayanga ang tanang tuig nga nadaog nimo ang mga pagsulay sa tabang ni Jehova.’ Puwede pod nimong hinumdoman kon giunsa ka pagtabang ni Jehova kaniadto. Makasalig ka nga nakita niya ang matag pagsulay nga imong nalahutay ug panalanginan ka niya. (Mat. 5:10-12) Dayon inig-abot sa dakong kasakitan, nahibalo na ka kon unsaon paglahutay ug mas determinado ka nga padayong molahutay.

9. Giunsa pagpakita sa kongregasyon sa Antioquia ang ilang kaluoy?

⁹ Matikdi kon unsay nahitabo dihang ang mga Kristohanon sa Judea nakasinatig grabeng kagutom. Nabalitaan ni sa kongregasyon sa Antioquia sa Sirya, ug naluoy gyod sila sa ilang mga igsoon sa Judea. Pero dili kay mibati lang silag kaluoy; ila pod ning gipakita. Midesisyon sila “nga magpadalag hinabang ngadto sa mga igsoon nga nagpuyo sa Judea, ang matag usa sumala sa iyang maarangan.” (Buh. 11:27-30) Bisag layo ang gipuy-an sa mga igsoon nga naapektohan sa gutom, ang mga Kristohanon sa Antioquia determinado nga motabang nila.—1 Juan 3:17, 18.

10. Sa unsang paagi mapakita nato ang kaluoy dihang ang atong mga igsoon maapektohan sa kalamidad? (Tan-awa sab ang hulagway.)

¹⁰ Karon, makapakita pod tag kaluoy sa mga igsoon dihang maapektohan sila sa kalamidad. Molihok dayon ta sa pagtabang nila. Tingali mangutana ta sa mga ansiyano kon puwede ba tang motabang sa usa ka proyekto. Puwede pod tang mo-donate sa tibuok kalibotang buluhaton, ug puwede natong iampo kadtong naapektohan sa kalamidad. b (Prov. 17:17) Pananglitan, niadtong 2020, kapig 950 ka Disaster Relief Committee ang giporma sa tibuok kalibotan aron maatiman kadtong naapektohan sa COVID-19 nga pandemic. Angay gyod natong pasalamatan ang mga relief committee ug ang tanang miboluntaryo. Tungod sa ilang kaluoy sa mga igsoon, naghatod silag mga hinabang, nagtaganag pagdasig, ug sa ubang kahimtang, nag-repair o nagtukod pag-usab sa mga balay ug mga dapit sa pagsimba.—Itandi ang 2 Corinto 8:1-4.

11. Sa unsang paagi ang pagpakitag kaluoy makapasidungog sa atong langitnong Amahan?

¹¹ Dihang magpakita tag kaluoy human sa kalamidad, mamatikdan sa uban ang atong mga sakripisyo. Pananglitan, niadtong 2019, gidaot sa Bagyong Dorian ang usa ka Kingdom Hall sa Bahamas. Samtang gitukod pag-usab sa mga igsoon ang Kingdom Hall, naa silay gustong ipatrabaho sa usa ka dili Saksi nga kontraktor, ug nangutana sila kon pilay magasto. Ang kontraktor miingon: “Dili ra nako pabayran ang . . . paggamit sa equipment, ang labor, ug ang materyales. . . . Gusto nako ning himoon para sa inyong organisasyon. Natandog man god ko  sa gihimo [ninyo] para sa inyong mga higala.” Kadaghanan sa mga tawo karon wala makaila kang Jehova. Pero daghan nila ang nakamatikod sa gihimo sa mga Saksi ni Jehova. Makapalipay gyod nga ang atong pagpakitag kaluoy makadani sa uban ngadto sa Diyos nga “maluluy-on kaayo”!—Efe. 2:4.

12. Sa unsang paagi ang pagpakitag kaluoy karon makatabang nga maandam ta sa dakong kasakitan? (Pinadayag 13:16, 17)

¹² Nganong kinahanglan tang magpakitag kaluoy panahon sa dakong kasakitan? Gipakita sa Bibliya nga kadtong dili modapig sa mga gobyerno makaatubang ug mga kalisdanan—karon ug panahon sa dakong kasakitan. (Basaha ang Pinadayag 13:16, 17.) Ang atong mga igsoon magkinahanglan tingalig tabang para sa ilang pangunang mga panginahanglan. Dihang ang atong Hari, si Kristo Jesus, moabot aron ipahamtang ang paghukom, hinaot nga makita ta niya nga nagpakitag kaluoy ug imbitahon ta nga ‘makapanunod sa Gingharian.’—Mat. 25:34-40.

13. Base sa Roma 15:7, unsay gihimo sa unang mga Kristohanon aron molig-on ang ilang gugma sa usag usa?

¹³ Ang unang mga Kristohanon nailhan sa ilang gugma sa usag usa. Pero dali ra ba para nila ang pagpakitag gugma? Tagda pananglitan ang mga Kristohanon sa Roma, nga lainlaig kagikan ug kahimtang sa kinabuhi. Gawas pa sa mga Hudiyo nga nagdako nga nagsunod sa Moisesnong Balaod, naa poy mga dili Hudiyo nga lahi kaayog kultura. Ang ubang Kristohanon tingali mga ulipon samtang ang uban dili—ang pipila basin nanag-iya pa ganig ulipon. Bisag managlahi ang maong mga Kristohanon, unsay ilang gihimo aron molig-on ang ilang gugma sa usag usa? Gidasig sila ni apostol Pablo nga ‘abiabihon ang usag usa.’ (Basaha ang Roma 15:7 ug ang footnote.) Unsay iyang gipasabot? Ang pulong nga gihubad ug “abiabiha” nagpasabot nga dawaton ang usa nga kinasingkasing diha sa balay o dawaton siya ingong higala. Pananglitan, giingnan ni Pablo si Filemon nga ‘abiabihon pag-ayo,’ o dawaton, ang milayas nga ulipon nga si Onesimo. (Filem. 17) Giabiabi pod ni Priscila ug Aquila si Apolos, kinsa kulang pag kahibalo bahin sa Kristiyanidad; “ila siyang giuban” aron matudloan siyag dugang. (Buh. 18:26) Bisag managlahi ang maong mga Kristohanon, wala nila tugoti nga mabahinbahin sila. Hinuon, ilang gidawat ug giabiabi ang usag usa.

14. Giunsa pagpakita ni Anna ug sa iyang bana ang gugma?

¹⁴ Makapakita pod tag gugma sa atong mga igsoon pinaagi sa pagpakighigala ug paggahin ug panahon kanila. Kon ato nang himoon, sagad mapalihok pod sila sa pagpakitag gugma kanato. (2 Cor. 6:11-13) Konsideraha ang eksperyensiya ni Anna ug sa iyang bana. Nag-alagad sila ingong mga misyonaryo sa usa ka nasod sa West Africa, dayon nabalhin silag laing nasod. Pero wala madugay human sa ilang pagbalhin didto, nagsugod ang COVID-19 nga pandemic. Tungod ana, dili pa nila personal nga makauban ang mga igsoon sa kongregasyon. Giunsa pagpakita sa magtiayon ang ilang gugma? Pinaagig videoconferencing, naestorya sa magtiayon ang mga igsoon. Gisultihan nila ang mga igsoon nga gusto nila silang mas mailhan. Natandog ang mga igsoon, maong pirme pod silang manawag ug mag-message nila. Nganong naningkamot ang magtiayon nga makigsuod sa kongregasyon? Si Anna miingon, “Dili gyod nako malimtan ang gugma nga gipakita sa mga igsoon kanako ug sa akong pamilya sa maayo ug lisod nga mga panahon. Tungod ana, nadasig ko nga magpakita pod ug gugma.”

15. Unsay imong nakat-onan kang Vanessa bahin sa paghigugma sa tanan natong igsoon? (Tan-awa sab ang hulagway.)

¹⁵ Sa daghang kongregasyon, ang mga igsoon  lainlaig kagikan ug personalidad. Mapalig-on nato ang atong gugma kanilang tanan kon magpokus ta sa ilang maayong mga hiyas. Ang sister nga si Vanessa sa New Zealand nalisdan kaniadto nga makigsuod sa pipila diha sa iyang kongregasyon. Pero imbes likayan kadtong naay mga batasan nga dili niya ganahan, midesisyon siya nga mogahin ug dugang panahon nga makig-uban nila. Nakatabang na nga makita niya kon nganong gimahal sila ni Jehova. Siya miingon: “Sukad nga tigdumala sa sirkito na ang akong bana, mas daghan pang igsoon nga lainlaig personalidad ang among makauban, ug mas sayon na para nako nga makigsuod nila. Karon ganahan na kaayo kong makig-uban sa lainlaing igsoon. Seguradong ganahan pod si Jehova nga lainlaig kagikan ug personalidad ang iyang mga magsisimba, maong iya tang gikabig niini nga organisasyon.” Kon sundogon nato ang panglantaw ni Jehova sa mga igsoon, atong gipamatud-an nga gimahal nato sila.—2 Cor. 8:24.

16. Nganong importante ang gugma panahon sa dakong kasakitan? (Tan-awa sab ang hulagway.)

¹⁶ Importante ang gugma panahon sa dakong kasakitan. Dihang magsugod na ang dakong kasakitan, unsaon ta pagpanalipod ni Jehova? Matikdi kon unsay gisugo ni Jehova sa iyang katawhan dihang giatake ang karaang Babilonya: “Lakaw, akong katawhan, sulod sa inyong kinasulorang mga lawak, ug sirhi ang mga pultahan. Panago usa mo kadiyot hangtod nga ang kasuko molabay.” (Isa. 26:20) Posibleng mapadapat pod nato na panahon sa dakong kasakitan. Ang “kinasulorang mga lawak” mahimong magtumong sa atong mga kongregasyon. Panahon sa dakong kasakitan, madawat nato ang proteksiyon nga gisaad ni Jehova kon padayon tang makig-uban sa mga igsoon. Busa kinahanglang maningkamot ta karon nga dili lang basta dawaton ang mga igsoon, kondili higugmaon pod sila. Ang atong kaluwasan posibleng magdepende niana!

17. Kon mangandam ta karon, unsay atong mahimo panahon sa dakong kasakitan?

¹⁷ “Ang dakong adlaw ni Jehova” magpahinabog grabeng kasakit sa mga tawo. (Sof. 1:14, 15) Ang katawhan ni Jehova makaatubang pod ug mga kalisdanan. Pero kon mangandam ta karon, makapabilin tang kalmado ug makatabang ta sa uban. Malahutay nato ang bisan unsang pagsulay nga atong maatubang. Dihang mag-antos ang mga igsoon, maningkamot ta nga tabangan sila pinaagi sa pagpakitag kaluoy ug pagtagana sa ilang mga panginahanglan. Ug mounong gyod ta sa atong mga igsoon, nga nakat-onan na natong higugmaon. Ingong ganti, hatagan ta ni Jehova ug kinabuhing walay kataposan sa kalibotan diin dili na mahinumdoman pa ang tanang kalisdanan ug kasakit.—Isa. 65:17.