1-2. Sa unsang paagi ang usa ka Kristohanon parehas sa usa ka taas kaayo nga bilding? (1 Corinto 15:58)

 NIADTONG 1978, ang 60 ka andana nga bilding sa Tokyo, Japan natukod. Ang mga tawo naghunahuna kon makaya kaha sa bilding ang mga linog nga pirmeng mahitabo sa maong siyudad. Unsay sekreto sa mga engineer? Ilang gidisenyo ang bilding nga lig-on pero flexible ra sa mga pag-uyog sa yuta. Ang mga Kristohanon parehas nianang taas nga bilding. Sa unsang paagi?

² Ang usa ka Kristohanon kinahanglang balanse sa pagpakitag kalig-on ug pagka-flexible. Kinahanglang lig-on siya ug dili matarog kon bahin sa pagsunod sa mga balaod ug sukdanan ni Jehova. (Basaha ang 1 Corinto 15:58.) Siya “andam mosunod” ug dili mokompromiso. Pero kinahanglang “makataronganon,” o flexible, pod siya kon itugot sa kahimtang o kon gikinahanglan. (Sant. 3:17) Ang Kristohanon nga balanse niining bahina dili sobra ka estrikto o sobra ka luag. Niining artikuloha, atong konsiderahon kon sa unsang paagi ta makapakitag kalig-on. Hisgotan pod nato ang lima ka paagi nga gigamit ni Satanas aron pahuyangon ta ug kon unsay atong mahimo aron masuklan kana.

3. Unsang mga balaod ang gihatag ni Jehova sa Buhat 15:28, 29?

³ Si Jehova ang Kinalabwang Tighatag ug Balaod, ug kanunayng klaro ang mga balaod nga iyang gihatag sa iyang katawhan. (Isa. 33:22) Pananglitan, ang Nagamandong Lawas sa unang siglo naghisgot ug tulo ka paagi nga ang mga Kristohanon angayng magpakitag kalig-on: (1) pagsalikway sa idolatriya ug pagsimba lamang kang Jehova, (2) pagtahod sa pagkabalaan  sa dugo, ug (3) pagsunod sa taas nga sukdanan sa Bibliya bahin sa moralidad. (Basaha ang Buhat 15:28, 29.) Sa unsang paagi ang mga Kristohanon karon makapabiling lig-on niining tulo ka bahin?

4. Giunsa nato paghatag kang Jehova ang atong eksklusibong debosyon? (Pinadayag 4:11)

⁴ Atong gisalikway ang idolatriya, ug si Jehova lang ang atong gisimba. Iyang gisugo ang mga Israelinhon nga ihatag kaniya ang eksklusibong debosyon. (Deut. 5:6-10) Ug dihang si Jesus gitental sa Yawa, klaro niyang gipakita nga si Jehova lang ang angay natong simbahon. (Mat. 4:8-10) Busa dili ta mosimbag mga imahen. Dili pod ta mag-idolog mga tawo—lider man sila sa relihiyon, politiko, sikat nga mga atleta, artista, o singer—nga mora bag diyos sila. Modapig ta kang Jehova ug mosimba lamang kaniya nga maoy ‘naglalang sa tanang butang.’—Basaha ang Pinadayag 4:11.

5. Nganong gisunod nato ang balaod ni Jehova bahin sa pagkabalaan sa kinabuhi ug dugo?

⁵ Gisunod nato ang balaod ni Jehova bahin sa pagkabalaan sa kinabuhi ug dugo. Ngano? Kay si Jehova nag-ingon nga ang dugo nagrepresentar sa kinabuhi, usa ka bililhong regalo gikan niya. (Lev. 17:14) Dihang gitugotan na ni Jehova ang mga tawo nga kaonon ang unod sa mga hayop, naghatag siyag sugo nga dili apilog kaon ang dugo. (Gen. 9:4) Naa gihapon ni nga sugo dihang gihatag niya ang Moisesnong Balaod sa Israel. (Lev. 17:10) Ug iyang gigiyahan ang Nagamandong Lawas sa unang siglo sa paghatag ug direksiyon nga ang tanang Kristohanon kinahanglang ‘padayong maglikay sa dugo.’ (Buh. 15:28, 29) Sundon gyod nato ni nga balaod dihang mohimo tag mga desisyon bahin sa pagpatambal. b

6. Unsay atong ginahimo aron masunod ang taas nga sukdanan ni Jehova sa moralidad?

⁶ Gisunod nato pag-ayo ang taas nga sukdanan ni Jehova sa moralidad. (Heb. 13:4) Si apostol Pablo klarong nagtambag nga ‘patyon’ nato ang mga parte sa atong lawas maylabot sa sayop nga mga tinguha—sa ato pa, himoon nato ang tanang gikinahanglan aron mawagtang kini. Dili ta motan-aw o mohimog bisan unsa nga moresultag seksuwal nga imoralidad. (Col. 3:5; Job 31:1) Dihang mag-atubang ug tentasyon, isalikway dayon nato ang bisan unsang panghunahuna o buhat nga makadaot sa atong relasyon sa Diyos.

7. Unsay angay natong determinasyon, ug ngano?

⁷ Gusto ni Jehova nga kita ‘kinasingkasing nga magmasinugtanon.’ (Roma 6:17) Ang iyang giya kanunay nga para sa atong kaayohan, ug ang iyang mga balaod dili nato puwedeng usbon. (Isa. 48:17, 18; 1 Cor. 6:9, 10) Naningkamot ta nga mapalipay si Jehova ug masundog ang determinasyon sa salmista, kinsa miingon: “Determinado kong motuman sa imong mga regulasyon sa tanang panahon, hangtod sa kataposan.” (Sal. 119:112) Pero naningkamot si Satanas nga pahuyangon ang atong determinasyon. Unsang mga paagi ang iyang gigamit?

8. Sa unsang paagi gigamit ni Satanas ang paglutos aron pahuyangon ta?

⁸ Paglutos. Gigamit sa Yawa ang pisikal nga pag-atake ug ang presyur gikan sa uban aron mohuyang ang atong determinasyon. Tumong niya nga “matukob” ta, nga madaot ang atong relasyon kang Jehova. (1 Ped. 5:8) Ang mga Kristohanon sa unang siglo gihulga, gikulata, ug gipatay tungod sa ilang determinasyon nga magpabiling lig-on. (Buh. 5:27, 28, 40; 7:54-60) Karon, gigamit gihapon ni Satanas ang  paglutos. Makita nato ni sa brutal nga pagtratar sa atong mga igsoon sa Russia ug sa ubang nasod ug sa mga pag-atake nga ginahimo sa mga magsusupak.

9. Paghatag ug pananglitan kon nganong angay tang mag-amping sa dili daling mailhan nga pagpresyur.

⁹ Dili daling mailhan nga pagpresyur. Gawas pa sa direktang mga paglutos, si Satanas naggamit pod ug mga “lit-ag.” (Efe. 6:11) Tagda pananglitan ang brader nga si Bob, nga naospital kay kinahanglang operahan. Iyang giingnan ang mga doktor nga dili gyod siya magpaabonog dugo bisag unsa pay mahitabo. Gitahod sa doktor nga moopera niya ang iyang desisyon. Pero sa gabii una ang operasyon, ang doktor nga mo-anesthesia kang Bob mibisita niya dihang miuli na ang iyang pamilya. Giingnan niya si Bob nga dili ra tingali siya abonohan, pero mag-andam lang silag dugo enkasog kinahanglan. Nagtuo tingali ang doktor nga mausab ang hunahuna ni Bob kay wala diha ang iyang pamilya. Pero nagpabiling lig-on si Bob ug miingon nga dili gyod siya magpaabonog dugo bisag unsa pay mahitabo.

10. Nganong delikado ang tawhanong panghunahuna? (1 Corinto 3:19, 20)

¹⁰ Tawhanong panghunahuna. Kon ang atong panghunahuna sa usa ka butang gibase sa panglantaw sa tawo, posibleng balewalaon na nato si Jehova ug ang iyang mga sukdanan. (Basaha ang 1 Corinto 3:19, 20.) “Ang kaalam niining kalibotana” sagad nagdasig sa mga tawo nga sundon ang ilang sayop nga mga tinguha. Nasundog sa pipila ka Kristohanon sa Pergamo ug Tiatira ang panghunahuna sa mga tawo sa ilang palibot nga imoral ug nagsimbag mga idolo. Gihatagan ni Jesus ug bug-at nga tambag kining duha ka kongregasyon kay ilang gikonsentir ang seksuwal nga imoralidad. (Pin. 2:14, 20) Karon, ang mga tawo sa atong palibot nagpresyur pod nato nga dawaton ang ilang sayop nga mga panghunahuna. Ang mga membro sa atong pamilya ug ang atong mga kaila maningkamot tingali nga tandogon ang atong emosyon ug tentalon ta nga mokompromiso. Pananglitan, moingon tingali sila nga dili ra sayop kon sundon nimo ang imong gusto ug nga kinaraan na ang sukdanan sa Bibliya bahin sa moralidad.

11. Samtang naningkamot ta nga magpabiling lig-on, unsay angay natong likayan?

¹¹ Usahay, maghunahuna tingali ta nga kulang ang direksiyon nga gihatag ni Jehova. Basig matental pa gani ta nga ‘mosaylo sa mga butang nga nasulat.’ (1 Cor. 4:6) Sad-an niini ang mga lider sa relihiyon sa panahon ni Jesus. Nagdugang silag kaugalingon nilang mga lagda diha sa Balaod maong nabug-atan pag-ayo ang mga tawo. (Mat. 23:4) Si Jehova naghatag natog klarong direksiyon pinaagi sa iyang Pulong ug organisasyon. Wala tay rason nga dugangan ang mga instruksiyon nga iyang gihatag. (Prov. 3:5-7) Busa dili gyod ta molapas sa kon unsay nasulat sa Bibliya o mohatag sa mga igsoon ug kaugalingong mga balaod bahin sa personal nga mga butang.

12. Giunsa pag-promote ni Satanas ang malimbongong mga impormasyon?

¹² Malimbongong mga impormasyon. Gigamit ni Satanas ang malimbongong mga impormasyon ug ang “kalibotanong mga ideya” aron mailad ug magkabahinbahin ang mga tawo. (Col. 2:8) Sa unang siglo, apil niini ang mga pilosopiya nga gibase sa panghunahuna sa tawo, dili Kasulatanhong mga pagtulon-an sa mga Hudiyo, ug ang pagtulon-an nga ang mga Kristohanon angayng mosunod sa Moisesnong Balaod. Kini maoy mga panglimbong kay gipalayo niini ang atensiyon sa mga tawo gikan sa tinuod nga Tinubdan sa kaalam, si Jehova. Karon, gigamit ni Satanas ang media ug ang social network aron magpakaylap ug way basehanang mga  estorya ug dili tinuod nga mga balita nga gi-promote sa mga politiko. Daghan kaayo ni panahon sa COVID-19 nga pandemic. c Ang mga Saksi ni Jehova nga naminaw sa giya gikan sa atong organisasyon nakalikay sa sobrang kabalaka nga naeksperyensiyahan niadtong naminaw sa malimbongong mga impormasyon.—Mat. 24:45.

13. Nganong angay tang magbantay sa mga butang nga makabalda nato?

¹³ Kabaldahan. Kinahanglang magpokus ta kanunay sa “mas importanteng mga butang.” (Filip. 1:9, 10) Ang mga butang nga makabalda nato makakuhag dakong panahon ug kusog nga para unta sa mas importanteng kalihokan. Ang normal nga mga butang nga atong ginahimo sama sa pagkaon, pag-inom, paglingawlingaw, ug pagtrabaho mahimong makabalda nato kon dinhi na nakapokus ang atong kinabuhi. (Luc. 21:34, 35) Gawas pa ana, adlaw-adlaw tang gipaulanan ug mga balita bahin sa mga protesta ug mga isyu sa politika. Mag-amping gyod ta nga dili magpabalda niini nga mga isyu, kay basig sa atong hunahuna ug kasingkasing naa na tay gidapigan. Gigamit ni Satanas kining lima ka paagi nga atong nahisgotan aron mohuyang ang atong determinasyon nga himoon kon unsay husto. Atong konsiderahon kon sa unsang paagi masuklan nato ang iyang mga paningkamot ug makapabilin tang lig-on.

14. Unsa ang usa sa makatabang nato nga padayong modapig kang Jehova?

¹⁴ Hinumdomi kon nganong nagpahinungod ka ug nagpabawtismo. Gihimo to nimo kay gusto nimong modapig kang Jehova. Hinumdomi kon unsay nakatabang nimo nga makombinsir nga mao ni ang kamatuoran. Mikuha kag tukmang kahibalo bahin kang Jehova, ug nakakat-on ka nga tahoron ug higugmaon siya ingong imong langitnong Amahan. Naugmad nimo ang pagtuo ug napalihok ka nga maghinulsol. Ang imong kasingkasing nagpalihok nimo nga biyaan ang sayop nga mga buhat ug magkinabuhi sumala sa kabubut-on sa Diyos. Nahupayan ka dihang gibati nimo nga napasaylo na  ka sa Diyos. (Sal. 32:1, 2) Mitambong ka sa mga tigom ug misugod pagsulti sa uban bahin sa nindot nga mga butang nga imong nakat-onan. Ingong dedikado ug bawtismadong Kristohanon, nagsubay na ka karon sa dalan sa kinabuhi, ug determinado ka nga dili mobiya niana.—Mat. 7:13, 14.

15. Unsay kaayohan sa pagtuon ug pagpamalandong?

¹⁵ Tun-i ang Pulong sa Diyos ug pamalandonga kini. Sama nga ang kahoy makabarog nga lig-on kon nakagamot ni pag-ayo, makapabilin tang lig-on kon ang atong pagtuo nakagamot pag-ayo sa Pulong sa Diyos. Samtang magkadako ang kahoy, ang mga gamot niini magkalalom ug mokatap. Dihang magtuon ta ug mamalandong, mas molig-on ang atong pagtuo ug mahimo tang mas kombinsido nga ang mga pamaagi sa Diyos mao ang pinakamaayo. (Col. 2:6, 7) Pamalandonga kon sa unsang paagi ang instruksiyon, paggiya, ug proteksiyon ni Jehova nakatabang sa iyang mga alagad kaniadto. Pananglitan, si Ezequiel naniid pag-ayo samtang detalyadong gisukod sa anghel ang templo diha sa panan-awon. Ang panan-awon nakapalig-on kang Ezequiel, ug naghatag ni natog praktikal nga mga leksiyon kon sa unsang paagi masunod nato ang sukdanan ni Jehova sa putling pagsimba. d (Ezeq. 40:1-4; 43:10-12) Makabenepisyo pod ta kon mogahin tag panahon sa pagtuon ug pagpamalandong sa lawom nga mga butang sa Pulong sa Diyos.

16. Sa unsang paagi ang lig-ong kasingkasing nakapanalipod kang Bob? (Salmo 112:7)

¹⁶ Ugmara ang lig-ong kasingkasing. Gipahayag ni Haring David ang iyang dili matarog nga gugma kang Jehova dihang siya miawit: “Lig-on ang akong kasingkasing, Oh Diyos.” (Sal. 57:7) Kita pod makabatog lig-ong kasingkasing, nga bug-os nagasalig kang Jehova. (Basaha ang Salmo 112:7.) Matikdi kon sa unsang paagi ni nakatabang kang Bob, nga gihisgotan ganina. Dihang giingnan siya sa doktor nga naay andamong dugo enkasog kinahanglan, miingon dayon siya nga kon naa gani posibilidad nga abonohan siyag dugo, mobiya dayon siya sa ospital. Sa ulahi, si Bob miingon: “Wala gyod ko magduhaduha, ug wala gyod ko mabalaka.”

17. Unsay atong makat-onan sa eksperyensiya ni Bob? (Tan-awa sab ang hulagway.)

 ¹⁷ Si Bob nakapabiling lig-on kay sa wala pa siya maospital, dugay na siyang nakadesisyon nga dili gyod mokompromiso. Una, gusto niyang mapalipay si Jehova. Ikaduha, gitun-an niya pag-ayo ang giingon sa Bibliya ug sa atong mga publikasyon bahin sa pagkabalaan sa kinabuhi ug dugo. Ikatulo, kombinsido siya nga ang pagsunod sa direksiyon ni Jehova makahatag niyag kaayohan karon ug sa umaabot. Kita pod makabatog lig-ong kasingkasing bisag unsa pang pagsulay ang atong maatubang.

18. Sa unsang paagi ang ehemplo ni Barak nagtudlo nato nga mosalig kang Jehova? (Tan-awa ang hulagway sa atubangan sa magasin.)

¹⁸ Salig kang Jehova. Matikdi kon sa unsang paagi milampos si Barak kay misalig siya sa direksiyon ni Jehova. Bisag walay taming o bangkaw sa tibuok Israel, gisugo siya ni Jehova nga makig-away batok sa armadong kasundalohan sa Canaan nga gipangunahan ni Sisera. (Maghu. 5:8) Giingnan ni propetang Debora si Barak nga moadto sa patag aron makig-away kang Sisera ug sa iyang 900 ka magkakaro. Bisag nahibalo si Barak nga makabentaha ang mga kaaway nga nagkaro diha sa patag, misunod gihapon siya. Samtang ang mga sundalo milugsong sa Bukid sa Tabor, si Jehova nagpahinabog kusog kaayong ulan. Ang mga karo ni Sisera nalubong sa lapok, ug gihatag ni Jehova kang Barak ang kadaogan. (Maghu. 4:1-7, 10, 13-16) Sa samang paagi, ihatag ni Jehova kanato ang kadaogan kon mosalig ta niya ug sa direksiyon nga iyang gitagana pinaagi sa iyang organisasyon.—Deut. 31:6.

19. Nganong gusto nimong magpabiling lig-on?

¹⁹ Samtang naa pa ta niini nga sistema, kinahanglang maningkamot ta nga magpabiling lig-on. (1 Tim. 6:11, 12; 2 Ped. 3:17) Hinaot magmadeterminado ta nga dili magpadala sa paglutos, dili daling mailhan nga mga pagpresyur, tawhanong panghunahuna, malimbongong mga impormasyon, ug mga kabaldahan. (Efe. 4:14) Hinuon, mobarog tang lig-on sa atong debosyon kang Jehova ug tumanon nato kanunay ang iyang mga sugo. Pero kinahanglan pod tang magmakataronganon. Sa sunod nga artikulo, atong hisgotan kon sa unsang paagi si Jehova ug Jesus nagpakitag hingpit nga ehemplo sa pagkamakataronganon.