1. Unsang mga kamatuoran ang imong nakat-onan dihang nagsugod na kag tuon ug Bibliya?

 NAHINUMDOM ba ka adtong nagsugod pa lang kag tuon ug Bibliya? Basin nasorpresa ka nga naa diay ngalan ang Diyos. Tingali nahupayan ka pagkahibalo nimo nga dili diay sakiton sa Diyos ang mga tawo diha sa impiyernong kalayo. Ug seguradong nalipay ka sa paglaom nga makita nimo pag-usab ang imong namatay nga mga minahal ug makauban sila sa paraisong yuta.

2. Gawas nga nakakat-on ka sa mga kamatuoran sa Bibliya, unsa pang pag-uswag ang imong nahimo? (Efeso 5:1, 2)

² Samtang nagkadaghan ang imong nakat-onan sa Pulong sa Diyos, mas milalom ang imong gugma kang Jehova. Kana nga gugma nagpalihok nimo nga ipadapat ang imong nakat-onan. Nakahimo kag mas maayong mga desisyon base sa mga prinsipyo sa Bibliya. Naugmad nimo ang mas maayong panghunahuna ug panggawi kay gusto nimong mapalipay ang Diyos. Sama sa bata nga nagsundog sa iyang mahigugmaong ginikanan, gisundog nimo ang imong langitnong Amahan.—Basaha ang Efeso 5:1, 2.

3. Unsa kahay puwede natong ipangutana sa kaugalingon?

³ Puwede natong pangutan-on ang atong kaugalingon: ‘Mas milalom ba ang akong gugma kang Jehova karon kay sa adtong bag-o kong nahimong Kristohanon? Sukad nga nabawtismohan ko, ang ako bang panghunahuna ug panggawi mas parehas na kang Jehova—ilabina sa pagpakitag gugma sa mga igsoon?’ Kon medyo mibugnaw na “ang gugma nga imong nabatonan sa sinugdan,” ayawg kaluya. Nahitabo pod na sa mga Kristohanon sa unang siglo. Wala mosurender si Jesus sa pagtabang nila, ug  dili pod siya mosurender sa pagtabang nato. (Pin. 2:4, 7) Nahibalo siya nga kaya natong painiton pag-usab ang gugma nga atong gibati dihang una natong nakat-onan ang kamatuoran.

4. Unsay atong hisgotan niining artikuloha?

⁴ Niining artikuloha, atong hisgotan kon unsay atong mahimo aron padayong molalom ang atong gugma kang Jehova ug sa uban. Dayon atong tan-awon kon unsang mga panalangin ang atong madawat ug sa uban kon palig-onon nato ang atong gugma.

5-6. Unsang mga kalisdanan ang giatubang ni apostol Pablo panahon sa iyang ministeryo, pero unsay nakadasig niya nga padayong moalagad kang Jehova?

⁵ Malipayon si apostol Pablo sa iyang pag-alagad kang Jehova, pero daghan siyag kalisdanan nga naatubang. Sagad, lagyo ang mga biyahe ni Pablo, ug dili to sayon sa iyang panahon. Sa iyang mga pagbiyahe, usahay makaatubang siyag “kapeligrohan sa mga suba” ug “sa mga tulisan.” Diha poy mga panahon nga gidagmalan siya sa mga magsusupak. (2 Cor. 11:23-27) Ug may mga higayon nga ang mga igsoon wala magpakitag apresasyon sa sinserong mga paningkamot ni Pablo nga tabangan sila.—2 Cor. 10:10; Filip. 4:15.

⁶ Unsay nakatabang kang Pablo nga magpadayon sa pag-alagad kang Jehova? Daghag nakat-onan si Pablo bahin sa personalidad ni Jehova tungod sa iyang pagtuon sa Kasulatan ug tungod sa iyang mga naeksperyensiyahan. Busa kombinsido si Pablo nga gimahal siya ni Jehova nga Diyos. (Roma 8:38, 39; Efe. 2:4, 5) Ug mas milalom ang iyang gugma kang Jehova. Gipakita ni Pablo ang iyang gugma kang Jehova “pinaagi sa pag-alagad ug sa padayon [niyang] pag-alagad sa mga balaan.”—Heb. 6:10.

7. Unsa ang usa ka paagi nga mapalalom nato ang atong gugma kang Jehova?

⁷ Mapalalom nato ang atong gugma sa Diyos pinaagi sa makugihong pagtuon sa iyang Pulong. Samtang magbasa ka sa Bibliya, paningkamot nga masabtan kon unsay gitudlo niini bahin kang Jehova. Pangutan-a ang kaugalingon: ‘Giunsa pagpakita niini nga asoy nga gihigugma ko ni Jehova? Base sa akong gibasa, nganong angay nakong higugmaon si Jehova?’

8. Sa unsang paagi ang pag-ampo makapalalom sa atong gugma sa Diyos?

⁸ Ang laing paagi nga molalom ang atong gugma kang Jehova mao ang regular nga pag-ampo ug pagsulti kaniya kon unsa gyoy atong gibati. (Sal. 25: 4, 5) Sa baylo, tubagon ni Jehova ang atong mga pag-ampo. (1 Juan 3:21, 22) Si Khanh, sister sa Asia, miingon: “Sa primero, gimahal nako si Jehova tungod lang sa akong nakat-onan bahin niya, pero milalom ang akong gugma dihang nakita nako kon giunsa niya pagtubag ang akong mga pag-ampo. Tungod ana, gusto nakong himoon kon unsay makapalipay niya.” b

9. Giunsa pagpakita ni Timoteo nga miuswag siya sa pagpakitag gugma?

⁹ Pipila ka tuig human mahimong Kristohanon si Pablo, nailaila niya ang batan-ong si Timoteo. Gihigugma ni Timoteo si Jehova, ug gimahal niya ang mga tawo. Giingnan ni Pablo ang mga taga-Filipos: “Wala koy laing ikapadala nga parehas [ni Timoteo ug] tinamdan kinsa tinuod nga mag-atiman ninyo.” (Filip. 2:20) Wala hisgoti ni Pablo dinhi ang abilidad ni Timoteo sa pag-organisar o sa paghatag ug pakigpulong, pero klaro nga nakadayeg si Pablo sa gugma ni Timoteo sa mga  igsoon. Segurado nga ang mga kongregasyon nga gialagaran ni Timoteo naghinamhinam sa iyang pagbisita.—1 Cor. 4:17.

10. Giunsa pagpakita ni Anna ug sa iyang bana ang ilang gugma sa mga igsoon?

¹⁰ Kita pod mangitag mga paagi nga makatabang sa atong mga igsoon. (Heb. 13:16) Konsideraha ang eksperyensiya ni Anna, nga gihisgotan sa miaging artikulo. Human sa kusog nga bagyo, siya ug ang iyang bana mibisita sa usa ka pamilyang Saksi, ug ilang nadiskobrehan nga naguba ang atop sa balay sa pamilya. Tungod ana, ang pamilya walay limpiyo nga sinina. Si Anna miingon: “Gidala namo ang ilang mga sinina, gilabhan, ug gibalik kini nga naplantsa ug napilo na. Para namo, gamay ra to nga butang, pero nakapalig-on to sa among panaghigalaay ug hangtod karon suod gihapon mi.” Kay gihigugma ni Anna ug sa iyang bana ang mga igsoon, napalihok sila nga mohatag ug praktikal nga tabang.—1 Juan 3:17, 18.

11. (a) Kon maningkamot ta nga magpakitag gugma, unsa kahay epekto niini sa uban? (b) Sumala sa Proverbio 19:17, unsay buhaton ni Jehova kon magpakita tag gugma?

¹¹ Dihang magpakita tag gugma ug kaayo sa uban, sagad mamatikdan nila ang atong mga paningkamot nga sundogon si Jehova, ug maapresyar gyod kaayo na nila. Si Khanh, nga gihisgotan ganina, malipay nga maghinumdom niadtong mitabang niya. Siya miingon: “Mapasalamaton kaayo ko sa tanang buotang sister nga nagkuyog nako sa pagsangyaw. Ila kong kuhaon sa balay, ubanon sa meryenda o paniudto, ug ihatod ug balik sa balay. Nakaamgo ko nga di man diay sayon ang ilang gihimo. Ug gibuhat to nila tungod sa gugma.” Siyempre, dili tanan ang makapasalamat sa atong gihimo para nila. Si Khanh miingon bahin adtong mga mitabang niya: “Unta makabalos ko sa tanang kaayo nga ilang gipakita nako, pero wa ko kabalo kon asa na sila nagpuyo. Hinuon, nahibalo  si Jehova ana, ug akong giampo nga siyay mobalos nila para nako.” Husto si Khanh. Makita ni Jehova ang tanang kaayo nga atong gihimo sa uban, bisan unsa pa ni ka gamay. Giisip ni niya ingong bililhong halad ug ingong utang nga iyang bayran.—Basaha ang Proverbio 19:17.

12. Sa unsang paagi mapakita sa mga brader ang ilang gugma para sa kongregasyon? (Tan-awa sab ang mga hulagway.)

¹² Kon brader ka, sa unsang paagi makapakita kag gugma sa uban ug makatabang nila? Ang batan-ong brader nga si Jordan nangutana sa usa ka ansiyano kon unsa pay iyang mahimo aron makatabang sa kongregasyon. Gikomendahan siya sa ansiyano sa iyang pag-uswag ug gihatagag pipila ka sugyot kon unsa pay iyang mahimo. Pananglitan, iyang giingnan si Jordan nga puwede siyang moabot ug sayo sa Kingdom Hall ug abiabihon ang uban, mokomento sa mga tigom, regular nga mosangyaw uban sa iyang grupo, ug mangitag praktikal nga mga paagi sa pagtabang sa uban. Dihang gipadapat ni Jordan kini nga sugyot, nakakat-on siyag bag-ong mga kahanas ug milalom pod ang iyang gugma sa mga igsoon. Nakat-onan ni Jordan nga ang pagtabang sa uban magsugod dili dihang ministeryal nga alagad na ang usa ka brader kondili una pa niana. Ug dihang matudlo na siya, padayon na niyang himoon.—1 Tim. 3:8-10, 13.

13. Sa unsang paagi ang gugma nagpalihok kang Christian nga mag-alagad pag-usab ingong ansiyano?

¹³ Komosta kon nag-alagad ka kaniadto ingong ministeryal o ansiyano? Dili malimot si Jehova sa imong mga paghago kaniadto ug sa gugma nga nagpalihok nimo sa paghimo niana. (1 Cor. 15:58) Nahibalo pod siya sa gugma nga padayon nimong gipakita. Ang brader nga si Christian nadismayar dihang natangtang siya sa pagkaansiyano. Pero siya miingon: “Nakadesisyon ko nga himoon ang akong  maarangan sa pag-alagad kang Jehova tungod sa gugma—naa man koy pribilehiyo o wala.” Sa ngadtongadto, natudlo siya pag-usab ingong ansiyano. Si Christian miangkon: “Medyo nagduhaduha ko sa pagdawat sa pribilehiyo. Pero midesisyon ko nga kon gitugotan ko ni Jehova nga mag-alagad pag-usab ingong ansiyano tungod sa iyang kaluoy, ako ning dawaton tungod sa akong gugma kaniya ug sa mga igsoon.”

14. Unsay imong nakat-onan sa giingon sa usa ka sister sa Georgia?

¹⁴ Gipakita pod sa mga alagad ni Jehova ang ilang gugma sa ilang isigkatawo. (Mat. 22:37-39) Pananglitan, si Elena, sister nga taga-Georgia, miingon: “Sa primero, mosangyaw lang ko tungod sa akong gugma kang Jehova. Pero samtang nagkadako ang gugma nako sa akong langitnong Amahan, midako pod ang akong gugma sa mga tawo. Naningkamot ko nga ma-imagine ang mga problema nga ilang giatubang ug kon unsang mga topiko ang makatandog sa ilang kasingkasing. Sa nagsige kog hunahuna niini, mas midako ang akong tinguha nga tabangan sila.”—Roma 10:13-15.

15-16. Sumala sa makita sa mga hulagway, unsay mga panalangin kon magpakita tag gugma sa uban?

¹⁵ Kon magpakita tag gugma sa mga igsoon, dili lang sila ang makabenepisyo. Dihang nagsugod ang COVID-19 nga pandemic, gitudloan sa brader nga si Paolo ug sa iyang asawa ang daghang edaran nga sister kon unsaon paggamit ang ilang mga gadyet sa pagsangyaw. Ang  usa ka sister nga sa primero naglisod ug gamit sa iyang gadyet nakakat-on ra sa ulahi. Tungod niini, naimbitar niya ang iyang mga paryente sa Memoryal, ug 60 kanila ang mitambong pinaagig videoconference! Ang sister ug ang iyang mga paryente nakabenepisyo sa mga paningkamot ni Paolo ug sa iyang asawa. Sa ulahi, ang sister misulat kang Paolo: “Salamat sa inyong pagtudlo namong mga edaran. Di gyod nako malimtan kon giunsa mi pag-atiman ni Jehova ug ang inyong mga sakripisyo aron tabangan mi.”

¹⁶ Ang ingon ani nga mga eksperyensiya nagtudlo kang Paolo ug importanteng leksiyon. Napahinumdoman siya nga ang gugma mas importante kay sa kahibalo o abilidad. Siya miingon: “Nag-alagad ko kaniadto ingong tigdumala sa sirkito. Naamgohan nako karon nga bisag nalimtan na tingali sa mga igsoon ang akong mga pakigpulong, dili nila malimtan ang praktikal nga tabang nga akong gihatag kanila.”

17. Kinsa pay makabenepisyo dihang magpakita tag gugma?

¹⁷ Dihang magpakita tag gugma sa uban, makabenepisyo ta sa wala damhang mga paagi. Kanay naeksperyensiyahan ni Jonathan, nga taga-New Zealand. Usa ka init nga Sabado sa hapon, nakakita siyag payunir nga nagsangyaw diha sa dalan. Nakadesisyon si Jonathan nga kuyogan ang payunir sa pagsangyaw kada Sabado sa hapon. Pero wala siya magdahom nga siya mismo makabenepisyo sa kaayo nga iyang gipakita. Si Jonathan miingon: “Niadtong panahona, medyo dili pa ko ganahang mosangyaw. Pero samtang naminaw ko sa payunir ug nakita nako ang iyang paagi sa pagtudlo ug kon unsa ka malamposon ang iyang ministeryo, naganahan na kong mosangyaw. Nagkasuod pod mi ug gitabangan ko niya nga mouswag sa espirituwal, mag-enjoy sa ministeryo, ug mas masuod kang Jehova.”

18. Unsay gusto ni Jehova nga atong himoon?

¹⁸ Gusto ni Jehova nga molalom ang atong gugma para niya ug sa uban. Sa ato nang nakat-onan, mapalig-on nato ang atong gugma kang Jehova pinaagi sa pagbasa ug pagpamalandong sa iyang Pulong ug regular nga pag-ampo kaniya. Molalom ang atong gugma sa mga igsoon kon ato silang tabangan sa praktikal nga mga paagi. Kon mas molalom ang atong gugma, mas masuod ta kang Jehova ug sa mga igsoon. Ug kana nga kasuod magpadayon hangtod sa hangtod!