TUN-ANANG ARTIKULO 32
Sundoga si Jehova—Magmakataronganon
“Ipakita sa tanan ang inyong pagkamakataronganon.”—FILIP. 4:5.
AWIT 89 Pamati ug Magmasinugtanon Aron Panalanginan
SUMARYO a
Unsang klaseha sa kahoy ang gusto nimong sundogon? (Tan-awa ang parapo 1)
1. Unsay angayng makat-onan sa mga Kristohanon gikan sa kahoy? (Tan-awa sab ang hulagway.)
“ANG kahoy nga mobawog dili mabali sa hangin.” Kini nga panultihon nagpakita nga aron ang kahoy makapabiling nagbarog, kinahanglang mobawogbawog ni kon kusog ang hangin. Aron makapabiling lig-on sa espirituwal, ang mga Kristohanon kinahanglang kamao pod mobawog o mopailin-ilin. Unsaon nato na paghimo? Ipakita nato nga makataronganon ta pinaagi sa pag-adjust kon mausab ang atong kahimtang ug pinaagi sa pagtahod sa opinyon ug desisyon sa uban.
2. Unsang mga hiyas ang makatabang nato nga maka-adjust sa bag-ong mga kahimtang, ug unsay atong hisgotan niining artikuloha?
2 Ingong mga alagad ni Jehova, gusto natong magmakataronganon. Gusto pod natong mahimong mapainubsanon ug maluluy-on. Niining artikuloha, atong hisgotan kon sa unsang paagi kini nga mga hiyas nakatabang sa pipila ka Kristohanon nga maka-adjust sa ilang bag-ong kahimtang. Hisgotan pod nato kon sa unsang paagi kini nga mga hiyas makatabang nato. Pero sa dili pa, konsiderahon una nato ang hingpit nga ehemplo ni Jehova ug Jesus sa pagkamakataronganon.
SI JEHOVA UG JESUS MAKATARONGANON
3. Unsay pamatuod nga makataronganon si Jehova?
3 Si Jehova gitawag nga “ang Bato” kay siya lig-on, dili matarog. (Deut. 32:4) Pero makataronganon pod siya. Ang atong Diyos padayong mipahiuyon sa nagakausab nga kahimtang sa kalibotan aron matuman ang iyang katuyoan. Gilalang ni Jehova ang mga tawo sumala sa iyang larawan, busa kaya pod natong mo-adjust kon mausab ang atong kahimtang. Naghatag siyag klarong mga prinsipyo sa Bibliya aron tabangan ta sa paghimog maalamong mga desisyon bisag unsa pang kahimtang ang atong maatubang. Ang ehemplo ni Jehova ug ang mga prinsipyo nga iyang gihatag nato nagpamatuod nga bisag siya “ang Bato,” makataronganon pod siya.
4. Paghatag ug pananglitan sa pagkamakataronganon ni Jehova. (Levitico 5:7, 11)
4 Ang tanang ginahimo ni Jehova hingpit ug makataronganon. Dili siya estrikto sa iyang pagpakiglabot sa mga tawo. Konsideraha pananglitan kon giunsa pagpakita ni Jehova ang iyang pagkamakataronganon sa mga Israelinhon. Wala siya magsugo nga pareho ang ihalad sa tanan, dato man o pobre. Sa pipila ka situwasyon, gitugotan niya ang mga tawo sa pagtanyag ug halad sumala sa makaya sa ilang kahimtang.—Basaha ang Levitico 5:7, 11.
5. Paghatag ug pananglitan sa pagkamapainubsanon ug pagkamaluluy-on ni Jehova.
5 Ang pagkamapainubsanon ug pagkamaluluy-on ni Jehova nagpalihok niya nga mahimong makataronganon. Pananglitan, nakita ang pagkamapainubsanon ni Jehova dihang hapit na niyang laglagon ang daotang mga tawo sa Sodoma. Pinaagi sa iyang mga anghel, gisugo ni Jehova ang matarong nga si Lot nga moikyas ngadto sa kabukiran. Nahadlok si Lot nga moadto didto. Busa mihangyo si Lot nga tugotan siya ug ang iyang pamilya nga moadto sa Zoar, usa ka gamayng lungsod nga apil unta sa laglagon ni Jehova. Puwede untang sultihan ni Jehova si Lot nga kinahanglang mosunod gyod siya sa Iyang instruksiyon. Pero dili kanay gihimo ni Jehova. Hinuon, misugot siya sa hangyo ni Lot, bisag nagpasabot to nga dili niya apilog laglag ang Zoar. (Gen. 19:18-22) Gatosan ka tuig sa ulahi, si Jehova nagpakitag kaluoy sa mga taga-Nineve. Iyang gipadala si propetang Jonas aron magpasidaan nga hapit nang laglagon ang siyudad ug ang daotang mga tawo nga nagpuyo niini. Pero dihang naghinulsol ang mga taga-Nineve, naluoy si Jehova nila ug wala niya laglaga ang siyudad.—Jon. 3:1, 10; 4:10, 11.
6. Paghatag ug mga pananglitan kon giunsa pagsundog ni Jesus ang pagkamakataronganon ni Jehova.
6 Gisundog ni Jesus ang pagkamakataronganon ni Jehova. Gipadala siya sa yuta aron sangyawan ang “nawalang mga karnero sa nasod sa Israel.” Pero nagmakataronganon siya sa pagtuman sa maong asaynment. Pananglitan, dihay dili Israelinhong babaye nga nagpakiluoy kang Jesus nga ayohon ang iyang anak nga “nag-antos pag-ayo kay . . . gidemonyohan.” Naluoy kaayo si Jesus, maong giayo niya ang anak sa babaye. (Mat. 15:21-28) Nia pay laing pananglitan. Panahon sa iyang ministeryo, si Jesus miingon: “Si bisan kinsa nga molimod kanako . . . , ilimod usab nako.” (Mat. 10:33) Pero sa ulahi dihang gilimod siya ni Pedro sa tulo ka higayon, gilimod pod ba niya si Pedro? Wala. Nakita ni Jesus nga si Pedro naghinulsol ug may pagtuo. Human mabanhaw si Jesus, nagpakita siya kang Pedro. Lagmit gipasaligan niya si Pedro nga iya siyang gipasaylo ug gimahal.—Luc. 24:33, 34.
7. Base sa Filipos 4:5, unsay atong gusto nga panglantaw sa uban kanato?
7 Nahisgotan nato nga si Jehova nga Diyos ug si Jesu-Kristo makataronganon. Pero komosta ta? Gidahom ni Jehova nga magmakataronganon ta. (Basaha ang Filipos 4:5.) Pangutan-a ang kaugalingon: ‘Nailhan ba ko sa mga tawo ingong makataronganon, andam magpaubos, ug masinabtanon? O para ba nila estrikto o isog ko? Mamugos ba ko sa uban nga sundon kon unsay sakto para nako? O maminaw ba ko nila ug mosunod sa ilang gusto kon posible?’ Kon maningkamot ta nga magmakataronganon, atong gipakita nga gisundog nato si Jehova ug Jesus. Hisgotan nato ang duha ka situwasyon nga kinahanglan tang magmakataronganon—kon mausab ang atong kahimtang ug kon ang opinyon ug desisyon sa uban lahi sa atoa.
MAGMAKATARONGANON DIHANG MAUSAB ANG KAHIMTANG
8. Unsay makatabang nato nga magmakataronganon dihang mausab ang atong kahimtang? (Tan-awa sab ang footnote.)
8 Mapakita nato ang pagkamakataronganon kon andam tang mo-adjust dihang mausab ang atong kahimtang. Ang maong mga kausaban usahay moresultag wala damhang mga kalisdanan. Basin kalit tang masakit. O kaha kalit nga mausab ang kahimtang sa ekonomiya o politika ug maapektohan pag-ayo ang atong kinabuhi. (Eccl. 9:11; 1 Cor. 7:31) Malisdan pod tingali ta kon mausab ang atong asaynment sa organisasyon ni Jehova. Bisag unsa pay atong maatubang, maka-adjust ta sa bag-ong kahimtang kon himoon nato kining upat ka butang: (1) dawata ang realidad, (2) pagpokus sa umaabot, (3) pabiling positibo, ug (4) paghimog maayo sa uban. b Hisgotan nato karon ang ehemplo sa pipila nato ka igsoon aron makita nato kon sa unsang paagi kining mga butanga makatabang nato.
9. Sa unsang paagi ang magtiayong misyonaryo nakalahutay sa wala damhang mga kalisdanan?
9 Dawata ang realidad. Si Emanuele ug Francesca naasayn ingong mga misyonaryo sa laing nasod. Nagsugod pa lang silag kat-on sa pinulongan ug bag-o pa sa kongregasyon dihang nahitabo ang COVID-19 nga pandemic ug dili na nila personal nga makauban ang mga igsoon. Dayon, kalit nga namatay ang mama ni Francesca. Gusto kaayong makauban ni Francesca ang iyang pamilya pero dili siya makabiyahe tungod sa pandemic. Unsay nakatabang niya nga maatubang kining makapaguol nga mga panghitabo? Una, si Emanuele ug Francesca nag-ampo nga hatagan silag kaalam nga makaya ang ilang mga problema kada adlaw ug dili malumsan sa kabalaka. Gitubag ni Jehova ang ilang mga pag-ampo pinaagi sa pagtagana sa espirituwal nga pagkaon nga ilang gikinahanglan. Pananglitan, nadasig sila sa giingon sa brader sa usa ka video: “Kon mas dali natong madawat ang atong bag-ong mga kahimtang, dali ra sab mobalik ang atong kalipay ingon man ang kahigayonan sa pagpahimulos sa atong bag-ong kahimtang.” c Ikaduha, naningkamot sila nga mahimong mas hanas sa pag-telephone witnessing ug nakasugod pa gani silag pagtuon sa Bibliya. Ikatulo, mapasalamaton nilang gidawat ang mahigugmaong pagdasig ug tabang sa mga igsoon. Sulod sa usa ka tuig, kada adlaw silang padad-an sa usa ka buotang sister ug mubong mensahe nga naay teksto sa Bibliya. Sama kang Emanuele ug Francesca, kon dawaton nato ang atong bag-ong kahimtang, magmalipayon ta sa atong mahimo.
10. Unsay gihimo sa usa ka sister aron maka-adjust siya sa dakong kausaban sa iyang kinabuhi?
10 Pagpokus sa umaabot ug pabiling positibo. Si Christina, sister nga taga-Romania nga nagpuyo sa Japan, nadismayar dihang na-dissolve ang English nga kongregasyon nga iyang gipasakopan. Pero wala siya magpokus sa nahitabo. Hinuon, gihimo niya ang iyang maarangan sa lokal nga kongregasyon pinaagi sa pagpaningkamot nga makasangyaw sa Japanese nga pinulongan. Gihangyo niya ang iyang katrabaho kaniadto nga tabangan siya nga makakat-on ug Japanese. Misugot ang iyang katrabaho nga gamiton ang Bibliya ug ang brosyur nga Mabuhi Ka Hangtod sa Hangtod! aron tudloan siyag Japanese. Nakakat-on si Christina sa pinulongan, ug nainteres pa gyod ang babaye sa kamatuoran. Kon magpokus ta sa umaabot ug magpabiling positibo, ang kalit nga mga kausaban moresultag wala damhang mga panalangin.
11. Unsay nakatabang sa usa ka magtiayon dihang nakaatubang silag mga problema sa pinansiyal?
11 Paghimog maayo sa uban. Ang usa ka magtiayon nga nagpuyo sa lugar diin gidili ang atong buluhaton naapektohan pag-ayo sa pinansiyal dihang nahugno ang ekonomiya sa ilang nasod. Unsay ilang gihimo aron maka-adjust? Una, nagpasimple sila sa ilang kinabuhi. Dayon, imbes magpokus sa ilang mga problema, nakadesisyon sila nga magpokus sa pagtabang sa uban pinaagi sa pagkugi sa pagsangyaw. (Buh. 20:35) Ang bana miingon, “Kay busy mi sa ministeryo, gamay ra mig panahon sa paghunahuna sa among mga problema ug mas daghan mig panahon sa paghimo sa kabubut-on sa Diyos.” Kon mausab ang atong kahimtang, kinahanglan natong hinumdoman kon unsa ka importante nga padayon natong tabangan ang uban, ilabina pinaagi sa atong ministeryo.
12. Sa unsang paagi ang ehemplo ni apostol Pablo makatabang nato nga magpailin-ilin diha sa atong ministeryo?
12 Sa atong ministeryo, kinahanglan tang magpailin-ilin. Mailaila nato ang mga tawo nga lainlaig tinuohan, kinaiya, kultura, ug kahimtang sa kinabuhi. Si apostol Pablo mapailin-ilinon, ug makakat-on ta sa iyang ehemplo. Gitudlo siya ni Jesus ingong “apostol sa kanasoran.” (Roma 11:13) Busa si Pablo nagsangyaw sa mga Hudiyo, Grego, edukado, ordinaryong mga tawo, opisyales, ug mga hari. Aron matandog ni Pablo ang kasingkasing sa lainlaing mamiminaw, ‘nahimo siyang sama sa tanang matang sa katawhan.’ (1 Cor. 9:19-23) Gikonsiderar niya ang kultura, kagikan, ug tinuohan sa iyang mamiminaw, ug gipahiuyon niya ang iyang paagi sa pagsangyaw. Sama kang Pablo, molampos ta sa atong ministeryo kon magpailin-ilin ta ug maghunahunag epektibong mga paagi sa pagtabang sa atong mamiminaw.
TAHORA ANG OPINYON SA UBAN
Kon makataronganon ta, tahoron nato ang opinyon sa uban (Tan-awa ang parapo 13)
13. Base sa 1 Corinto 8:9, unsay atong malikayan kon tahoron nato ang opinyon sa uban?
13 Ang pagkamakataronganon makatabang pod nato nga tahoron ang opinyon sa uban. Pananglitan, ang ubang sister ganahang mag-makeup, pero ang uban dili. Ang ubang Kristohanon moinom ug alkoholikong ilimnon nga dili ra magpalabi, pero ang uban dili gyod moinom. Kitang tanan gustog maayong panglawas, pero lainlain tag paagi sa pag-atiman sa atong lawas. Kon maghunahuna ta nga kita pirme ang sakto ug kombinsihon nato ang uban nga sundogon ang atong mga desisyon, posibleng mapandol ang uban ug mabahinbahin ang kongregasyon. Dili gyod nato na gustong mahitabo! (Basaha ang 1 Corinto 8:9; 10:23, 24) Konsiderahon nato ang duha ka pananglitan nga nagpakita kon sa unsang paagi ang mga prinsipyo sa Bibliya makatabang nato nga mahimong balanse ug makaamot sa kalinaw.
Kon makataronganon ta, tahoron nato ang opinyon sa uban (Tan-awa ang parapo 14)
14. Unsang mga prinsipyo sa Bibliya ang angay natong hinumdoman kon bahin sa atong sininaan ug estilo sa buhok?
14 Sininaan ug estilo sa buhok. Imbes hatagan tag estriktong mga balaod kon unsay angay natong isul-ob, gihatagan ta ni Jehova ug mga prinsipyo nga makagiya nato. Ang atong sininaan kinahanglang haom para sa mga ministro sa Diyos, ug nagpakitag pagkamakataronganon, pagtahod sa kaugalingon ug sa uban, ug “maayong panghunahuna.” (1 Tim. 2:9, 10; 1 Ped. 3:3) Busa dili nato gusto nga mapokus kanato ang atensiyon sa mga tawo tungod sa atong sininaan. Ang mga prinsipyo sa Bibliya makatabang pod sa mga ansiyano nga malikayan ang paghimog kaugalingon nilang mga balaod bahin sa sininaan ug estilo sa buhok. Pananglitan, gustong tabangan sa mga ansiyano sa usa ka kongregasyon ang pipila ka batan-on nga misundog sa uso nga estilo sa buhok nga mubo pero gubot. Sa unsang paagi ang mga ansiyano makatabang nila pero dili ra pod maghimog kaugalingong balaod? Gisugyotan sa tigdumala sa sirkito ang mga ansiyano nga sultihan ang mga brader, “Kon naa mo sa stage, ug ang mamiminaw mas mapokus sa inyong hitsura kay sa inyong ginasulti, aw naay problema sa inyong sininaan ug estilo sa buhok.” Walay gihatag nga balaod ang mga ansiyano, pero kining simple nga eksplinasyon nakatabang nga masulbad ang isyu. d
Kon makataronganon ta, tahoron nato ang opinyon sa uban (Tan-awa ang parapo 15)
15. Unsang mga balaod ug prinsipyo sa Bibliya ang angay natong hinumdoman kon bahin sa pagpilig paagi sa pag-atiman sa panglawas? (Roma 14:5)
15 Paagi sa pag-atiman sa panglawas. Ang matag Kristohanon maoy modesisyon kon unsaon niya pag-atiman ang iyang panglawas. (Gal. 6:5) Dihang mopili silag paagi sa pagtambal, kinahanglan nilang sundon ang balaod sa Bibliya nga likayan ang dugo ug espiritismo. (Buh. 15:20; Gal. 5:19, 20) Pero sa mga butang nga walay espesipikong giingon ang Bibliya, puwede silang modesisyon kon unsang paagi sa pagtambal ang ilang dawaton. Naay mga igsoon nga sa doktor lang gyod magpakonsulta, pero ang uban ganahan ug alternatibong mga paagi. Bisag kombinsido kaayo ta sa atong gipili nga paagi sa pagtambal, kinahanglan natong tahoron ang katungod sa atong mga igsoon sa paghimog mga desisyon bahin sa pag-atiman sa ilang panglawas. Busa angay natong hinumdoman kini nga mga punto: (1) Ang Gingharian sa Diyos lang ang bug-os ug permanenteng makasulbad sa atong mga problema sa panglawas. (Isa. 33:24) (2) Ang matag Kristohanon kinahanglang “bug-os nga kombinsido” kon unsay pinakamaayo para niya. (Basaha ang Roma 14:5.) (3) Dili nato hukman ang uban o mohimog bisan unsa nga makapandol nila. (Roma 14:13) (4) Ang mga Kristohanon magpakitag gugma ug unahon nila ang panaghiusa sa kongregasyon kay sa ilang kagawasan sa paghimog personal nga mga desisyon. (Roma 14:15, 19, 20) Kon ato ning hinumdoman, magpabilin tang suod sa mga igsoon ug makaamot ta sa kalinaw sa kongregasyon.
Kon makataronganon ta, tahoron nato ang opinyon sa uban (Tan-awa ang parapo 16)
16. Sa unsang paagi ang usa ka ansiyano makapakitag pagkamakataronganon sa iyang pagpakiglabot sa kauban niyang mga ansiyano? (Tan-awa sab ang mga hulagway.)
16 Ang mga ansiyano kinahanglang magpakitag maayong ehemplo sa pagkamakataronganon. (1 Tim. 3:2, 3) Pananglitan, ang usa ka ansiyano dili angayng magdahom nga ang iyang mga opinyon pirmeng dawaton tungod lang kay mas magulang siya sa ubang ansiyano. Nahibalo siya nga ang espiritu ni Jehova puwedeng magpalihok kang bisan kinsang ansiyano sa pagsultig punto nga makatabang nila sa paghimog maalamong desisyon. Ug kon walay prinsipyo sa Bibliya nga malapas, ang makataronganong mga ansiyano andam mosuportar sa desisyon sa kadaghanang ansiyano bisan pag lahi unta ang ilang gusto nga desisyon.
MGA KAAYOHAN KON MAKATARONGANON TA
17. Unsay mga kaayohan kon makataronganon ta?
17 Daghag kaayohan ang pagkahimong makataronganon. Mas masuod ta sa mga igsoon, ug ang kongregasyon naay kalinaw. Malipay ta kay bisag lainlain tag personalidad ug kultura, nagkahiusa ta sa pagsimba kang Jehova. Labaw sa tanan, malipay kaayo ta kay nahibalo ta nga gisundog nato ang atong makataronganong Diyos, si Jehova.
AWIT 90 Magdinasigay Kita sa Usag Usa
a Si Jehova ug Jesus makataronganon, ug gusto nila nga maugmad nato kini nga hiyas. Kon makataronganon ta, mas dali tang maka-adjust sa mga kausaban, sama sa kausaban sa atong panglawas o pinansiyal nga kahimtang. Makatabang pod ta nga magmalinawon ug magkahiusa ang kongregasyon.
b Tan-awa ang artikulong “Kon Unsaon Pag-atubang sa Kausaban” sa 2016 nga Pagmata! Num. 4.
c Tan-awa ang video nga Interbiyo Kang Brader Dmitriy Mikhaylov, diha sa artikulong “Gihimo ni Jehova ang Paglutos Ingong Kahigayonan sa Pagpamatuod” sa Marso-Abril 2021 nga Atong Kristohanong Kinabuhi ug Ministeryo—Workbook sa Tigom.
d Para sa dugang impormasyon bahin sa sininaan ug estilo sa buhok, tan-awa ang leksiyon 52 sa librong Mabuhi Ka Hangtod sa Hangtod!