1. Unsay imong pagbati bahin sa kamatuoran?

 GIMAHAL sa katawhan ni Jehova ang kamatuoran nga naa sa Pulong sa Diyos. Dinhi gibase ang atong pagtuo. (Roma 10:17) Kombinsido ta nga giorganisar ni Jehova ang Kristohanong kongregasyon ingong “haligi ug tukod sa kamatuoran.” (1 Tim. 3:15) Nalipay pod tang magpasakop ‘sa mga nanguna kanato,’ kinsa nagpatin-aw sa mga kamatuoran sa Bibliya ug naghatag natog direksiyon nga uyon sa kabubut-on sa Diyos.—Heb. 13:17.

2. Human ta makakat-on sa kamatuoran, sa unsa ta angayng mag-amping? (Santiago 5:19)

² Pero bisan pag gidawat nato ang kamatuoran ug giila nga ang organisasyon sa Diyos ang nagtaganag kasaligang giya, angay gihapon tang mag-amping aron dili ta mapahisalaag. (Basaha ang Santiago 5:19.) Gusto gyod ni Satanas nga mawala ang atong pagsalig sa Bibliya o sa direksiyon gikan sa organisasyon ni Jehova.—Efe. 4:14.

3. Nganong kinahanglan nga lig-on tang mobarog sa kamatuoran? (Efeso 6:​13, 14)

³ Basaha ang Efeso 6:​13, 14. Sa umaabot, mogamit ang Yawa ug makapakombinsir kaayo nga propaganda aron madani ang mga tawo sa tibuok yuta nga mosupak kang Jehova. (Pin. 16:​13, 14) Makadahom pod ta nga mas pangusgan pa ni Satanas ang iyang mga paningkamot nga mapahisalaag ang mga alagad ni Jehova. (Pin. 12:9) Busa importante nga bansayon nato ang atong kaugalingon nga makita ang kalainan sa tinuod ug bakak, ug mosunod sa kon unsay tinuod. (Roma 6:17; 1 Ped. 1:22) Ang atong kaluwasan panahon sa dakong kasakitan magdepende niana!

4. Unsay atong hisgotan niini nga artikulo?

 ⁴ Niini nga artikulo, atong hisgotan ang duha ka hiyas nga makatabang nato nga mailhan ang kamatuoran gikan sa Bibliya ug mosunod sa direksiyon gikan sa organisasyon sa Diyos. Dayon atong hisgotan ang tulo ka sugyot nga makatabang nato nga padayong mobarog sa kamatuoran.

MGA HIYAS NGA GIKINAHANGLAN ARON MAILHAN KON UNSAY TINUOD

5. Sa unsang paagi ang pagkahadlok kang Jehova makatabang nato nga mailhan kon unsay tinuod?

⁵ Kahadlok kang Jehova. Ang hustong kahadlok kang Jehova nagpasabot nga lawom kaayo ang atong gugma niya ug dili ta gustong mohimog bisan unsa nga makapasuko kaniya. Naningkamot ta nga makita ang kalainan sa husto ug sayop, sa tinuod ug bakak, aron madawat nato ang pag-uyon ni Jehova. (Prov. 2:​3-6; Heb. 5:14) Dili gyod nato tugotan nga molabaw ang atong kahadlok sa tawo kay sa atong gugma kang Jehova, kay sagad ang makapalipay sa tawo makapasuko kang Jehova.

6. Unsay nahitabo sa 10 ka Israelinhong espiya tungod sa ilang kahadlok sa tawo?

⁶ Kon mas molabaw ang atong kahadlok sa tawo kay sa atong kahadlok sa Diyos, puwede tang mapahilayo sa kamatuoran. Konsideraha ang nahitabo sa 12 ka pangulo nga nangespiya sa yuta nga gisaad ni Jehova ngadto sa mga Israelinhon. Ang 10 ka espiya nahadlok pag-ayo sa mga Canaanhon. Gani, mas milabaw ang ilang kahadlok sa mga Canaanhon kay sa ilang gugma kang Jehova. Giingnan nila ang ilang isigka-Israelinhon: “Dili nato sila mapildi kay mas kusgan sila nato.” (Num. 13:​27-31) Sa panglantaw sa tawo, mas kusgan ang mga Canaanhon kay sa mga Israelinhon, ug tinuod na. Pero sa dihang miingon ang 10 ka espiya nga dili mapildi sa mga Israelinhon ang ilang mga kaaway, kana nagpakita nga ilang gikalimtan si Jehova. Angay untang magpokus ang 10 ka espiya sa kon unsay gisugo ni Jehova sa  mga Israelinhon. Angay pod unta nilang gipamalandong kon unsay bag-o lang gihimo ni Jehova para nila. Kon ila nang gibuhat, maamgohan unta nila nga ang mga Canaanhon walay mahimo kon itandi sa gahom sa Labing Gamhanang Diyos. Pero lahi si Josue ug Caleb niining walay pagtuo nga mga espiya. Mas importante nilang duha ang pag-uyon ni Jehova. Ilang giingnan ang katawhan: “Kon nalipay si Jehova nato, dad-on gyod ta niya niining yutaa ug ihatag kini kanato.”—Num. 14:​6-9.

7. Sa unsang paagi mas maugmad nato ang kahadlok kang Jehova? (Tan-awa sab ang hulagway.)

⁷ Aron mas maugmad nato ang kahadlok kang Jehova, kinahanglan natong hunahunaon kon unsay makapalipay niya dihang mohimo tag desisyon. (Sal. 16:8) Samtang imong basahon ang mga asoy sa Bibliya, puwede nimong pangutan-on ang imong kaugalingon, ‘Kon tua ko niadtong panahona, unsa kahay akong himoon?’ Pananglitan, imadyina nga naminaw ka samtang gisulti sa 10 ka espiya ang negatibong report. Motuo ba ka sa ilang gisulti ug magpadaog sa kahadlok sa tawo, o mas molabaw ba ang imong gugma kang Jehova ug ang imong tinguha nga mapalipay siya? Ang tibuok henerasyon sa mga Israelinhon wala motuo nga si Josue ug Caleb ang nagsultig tinuod. Tungod ana, wala sila makasulod sa Yutang Saad.—Num. 14:​10, 22, 23.

8. Unsang hiyas ang kinahanglang paningkamotan nato nga ugmaron, ug ngano?

⁸ Pagkamapainubsanon. Gipadayag ni Jehova ang kamatuoran ngadto sa mga mapainubsanon. (Mat. 11:25) Gipakita nato ang atong pagkamapainubsanon sa dihang midawat tag tabang aron makakat-on sa kamatuoran. (Buh. 8:​30, 31) Bisan pa ana, kinahanglan gihapon tang mag-amping nga dili mahimong garboso. Kon garboso ta, basin maghunahuna ta nga ang atong mga opinyon husto kaayo, nga mora bag parehas nig gibug-aton sa mga prinsipyo sa Bibliya ug sa mga direksiyon gikan sa organisasyon ni Jehova.

9. Sa unsang paagi makapabilin tang mapainubsanon?

⁹ Aron makapabilin tang mapainubsanon, kinahanglan natong hinumdoman kon unsa ta ka gamay kon itandi kang Jehova. (Sal. 8:​3, 4) Puwede pod natong hangyoon si Jehova nga tabangan ta nga mahimong mas mapainubsanon ug andam magpatudlo. Tabangan ta niya nga masabtan nga ang iyang panghunahuna, nga atong nakat-onan pinaagi sa Bibliya ug sa iyang organisasyon, mas labaw kay sa atong panghunahuna. Sa imong pagbasa sa Bibliya, matikdi kon giunsa pagpakita ni Jehova nga gimahal niya ang mga mapainubsanon ug gidumtan ang mga garboso, arogante, ug mapahitas-on. Angay kang maningkamot nga magpabiling mapainubsanon ilabina kon makadawat kag espesyal nga pribilehiyo sa pag-alagad, nga tungod ana mahatagan kag dugang awtoridad o mailhan ka sa daghang igsoon.

KON UNSAON NGA MAKAPABILIN TA SA KAMATUORAN

10. Kinsay gigamit ni Jehova sa pagtaganag instruksiyon ug giya sa iyang katawhan?

¹⁰ Padayong ipakita ang pagsalig sa mga direksiyon sa organisasyon. Sa karaang Israel, gigamit ni Jehova si Moises ug dayon si Josue aron maghatag ug instruksiyon sa Iyang katawhan. (Jos. 1:​16, 17) Ang mga Israelinhon gipanalanginan dihang ilang giila nga kini nga mga lalaki maoy mga representante ni Jehova nga Diyos. Paglabay ug gatosan ka katuigan sa dihang naporma ang Kristohanong kongregasyon, ang 12 ka apostoles maoy naghatag ug direksiyon sa mga igsoon. (Buh. 8:​14, 15) Sa ngadtongadto, kauban na nila ang ubang ansiyano sa Jerusalem sa paghatag ug direksiyon.  Tungod kay gisunod sa mga Kristohanon ang giya gikan niining matinumanong mga lalaki, “ang mga kongregasyon padayon gayong nalig-on diha sa pagtuo ug nagkadako kini adlaw-adlaw.” (Buh. 16:​4, 5) Karon, mapanalanginan pod ta dihang mosunod ta sa mga direksiyon gikan sa organisasyon ni Jehova. Sa laing bahin, kon dili ta magpasakop sa mga brader nga iyang gitudlo nga manguna kanato, unsa kahay bation ni Jehova? Aron matubag na nga pangutana, atong konsiderahon kon unsay nahitabo sa mga Israelinhon sa hapit na silang mosulod sa Yutang Saad.

11. Unsay nahitabo sa mga Israelinhon nga wala motahod kang Moises ingong representante sa Diyos? (Tan-awa sab ang hulagway.)

¹¹ Sa wala pa mosulod ang mga Israelinhon sa Yutang Saad, naay prominenteng mga tawo nga mirebelde kang Moises ug mikuwestiyon sa awtoridad nga gihatag ni Jehova kaniya. Sila miingon: “Balaan ang tibuok katawhan [dili lang si Moises], ug si Jehova nagauban nila.” (Num. 16:​1-3) Tinuod, sa panan-aw sa Diyos “ang tibuok katawhan” balaan, pero gipili niya si Moises nga manguna sa Iyang katawhan. (Num. 16:28) Busa ang pagrebelde niining prominenteng mga tawo kang Moises maoy pagrebelde kang Jehova mismo. Wala sila magpokus sa kon unsay gusto ni Jehova; nagpokus lang sila sa kon unsay ilang gusto—dugang awtoridad ug kadungganan. Tungod ana, gilaglag sila ni Jehova, apil ang libolibo nga misuporta nila. (Num. 16:​30-35, 41, 49) Karon, nahibalo pod ta nga dili malipay si Jehova niadtong mosupak sa kahikayan sa iyang organisasyon.

12. Nganong makasalig ta kanunay sa organisasyon ni Jehova?

¹² Makasalig ta kanunay sa organisasyon ni Jehova. Sa dihang makita sa mga nagapanguna nga kinahanglan gyong usbon ang atong pagsabot sa usa ka kamatuoran sa Bibliya o ang atong paagi sa paghimo sa atong mga buluhaton, dili sila magduhaduha sa paghimo sa gikinahanglang mga kausaban. (Prov. 4:18) Ila  nang gihimo kay ang pinakaimportante nila mao nga mapalipay si Jehova. Naningkamot pod sila nga kanunayng ibase ang ilang mga desisyon sa Pulong sa Diyos—ang sukdanan nga angayng sundon sa tanang alagad ni Jehova.

13. Unsa ang “sukdanan sa maayong mga pulong,” ug unsay angay natong himoon bahin niini?

¹³ “Padayong sunda ang sukdanan sa maayong mga pulong.” (2 Tim. 1:13) Ang “sukdanan sa maayong mga pulong” nagtumong sa Kristohanong pagtulon-an nga naa sa Bibliya. (Juan 17:17) Kini nga mga pagtulon-an mao ang basehanan sa tanan natong gituohan. Ang organisasyon ni Jehova nagtudlo nato nga mosunod pag-ayo niana nga sukdanan. Kon padayon tang mosunod niana, mapanalanginan ta.

14. Nganong ang ubang Kristohanon wala makapadayon sa pagsunod sa “sukdanan sa maayong mga pulong”?

¹⁴ Unsay posibleng mahitabo kon dili na ta mosunod sa “sukdanan sa maayong mga pulong”? Konsideraha ang usa ka pananglitan. Sa unang siglo, naay mga Kristohanon nga nagpakaylap ug dili tinuod nga estorya nga ang adlaw ni Jehova miabot na. Naa tingali sulat nga gikan kuno kang apostol Pablo nga naghisgot bahin niana. Ang ubang Kristohanon sa Tesalonica mituo dayon sa maong estorya bisag wala pa nila maseguro kon tinuod ba to. Ang nakapasamot pa gyod kay ila pod ning gisulti sa uban. Dili gyod unta sila mailad kon ilang gihinumdoman ang gitudlo ni Pablo niadtong magkauban pa sila. (2 Tes. 2:​1-5) Gitambagan ni Pablo ang mga igsoon nga dili bastabasta motuo sa tanan nga ilang madungog. Aron tabangan sila sa umaabot, gitapos ni Pablo ang iyang ikaduhang sulat sa mga taga-Tesalonica pinaagi niini nga mga pulong: “Ako mismo, si Pablo, ang nagsulat niini nga pangomosta, ingong ilhanan sa tanan nakong sulat; kini ang akong agi.”—2 Tes. 3:17.

15. Unsay atong himoon aron dili ta mailad sa bakak nga mga impormasyon nga morag tinuod? Paghatag ug pananglitan. (Tan-awa sab ang mga hulagway.)

¹⁵ Unsay atong makat-onan sa giingon ni Pablo sa mga taga-Tesalonica? Kon naa tay madunggan nga dili uyon sa atong nakat-onan sa  Bibliya o kaha makadungog tag makapakurat nga impormasyon, kinahanglan tang magmaalamon. Sa kanhing Soviet Union, ang mga igsoon nakadawat ug sulat nga gikan kuno sa hedkuwarter. Kini nga sulat nagdasig sa mga igsoon nga maghimog lahi nga organisasyon. Morag tinuod ang maong sulat, pero ang matinumanong mga igsoon wala mailad. Ilang nakita nga ang mensahe sa sulat dili uyon sa kon unsay gitudlo kanila. Karon, ang mga kaaway mogamit usahay ug modernong teknolohiya sama sa Internet ug social media aron maglibog ta ug magkabahinbahin. Imbes motuo dayon, maprotektahan nato ang atong kaugalingon pinaagi sa pagsusi kon ang ato bang nadungog o nabasa nahiuyon sa mga kamatuoran nga ato nang nakat-onan.—2 Tes. 2:2; 1 Juan 4:1.

16. Base sa Roma 16:​17, 18, unsay angay natong himoon kon ang uban mobiya sa kamatuoran?

¹⁶ Pabiling nahiusa niadtong mga maunongon kang Jehova. Gusto sa Diyos nga magkahiusa ta sa atong pag-alagad kaniya. Makapabilin tang nahiusa kon dili ta mobiya sa kamatuoran. Kadtong dili magpabilin sa kamatuoran makapahinabog pagkabahinbahin sulod sa kongregasyon. Busa gipasidan-an ta sa Diyos nga ‘likayan sila,’ kay kon dili, basin kita mismo mobiya pod sa kamatuoran.—Basaha ang Roma 16:​17, 18.

17. Unsay mga kaayohan kon nakaila ta sa kamatuoran ug dili mobiya niana?

¹⁷ Kon nakaila ta sa kamatuoran ug dili mobiya niana, makapabilin tang suod kang Jehova ug lig-on sa espirituwal. (Efe. 4:​15, 16) Maproteksiyonan ta gikan sa bakak nga mga pagtulon-an ug propaganda ni Satanas, ug luwason ta ni Jehova panahon sa dakong kasakitan. Kon dili ta mobiya sa kamatuoran, ‘ang Diyos sa kalinaw magauban kanato.’—Filip. 4:​8, 9.