1. Unsay bation ni Jehova dihang ang iyang karnero mobalik kaniya?

SA ATO nang nahisgotan sa nag-unang artikulo, gikomparar ni Jehova ang iyang kaugalingon sa maayong magbalantay nga nag-atiman pag-ayo sa matag usa sa iyang mga karnero. Ug iyang pangitaon si bisan kinsa nga mawala. Giingnan ni Jehova ang mga Israelinhon nga mibiya kaniya: “Balik mo nako, ug mobalik ko ninyo.” Nahibalo ta nga mao gihapon nay iyang gibati kay siya miingon: “Dili ko mausab.” (Mal. 3:6, 7) Si Jesus miingon nga si Jehova ug ang mga anghel mobatig dakong kalipay dihang mobalik Kaniya ang bisan usa lang ka alagad Niya nga nawala.​—Luc. 15:10, 32.

2. Unsay atong hisgotan niining artikuloha?

² Atong konsiderahon ang tulo ka ilustrasyon ni Jesus nga nagtudlo kanato kon unsaon pagtabang kadtong mipalayo kang Jehova. Atong hisgotan ang espesipikong mga hiyas nga atong gikinahanglan aron matabangan ang nawalang karnero sa pagbalik kaniya. Ug atong makat-onan nga mobati tag dakong kalipay kon maningkamot ta sa pagtabang nga makabalik ang mga dili aktibo.

3-4. Nganong ang babaye nga gihisgotan sa Lucas 15:8-10 nangita pag-ayo sa iyang sensilyo nga nawala?

³ Kinahanglan tang maningkamot pag-ayo sa pagpangita niadtong gustong mobalik kang Jehova. Sa ilustrasyon nga narekord sa Ebanghelyo ni Lucas, gihisgotan ni Jesus kon giunsa pagpangita sa usa ka babaye ang bililhong butang nga nawala​—usa ka sensilyong drakma. Ang importanteng bahin niini nga ilustrasyon mao ang dakong paningkamot sa pagpangita sa sensilyo.​—Basaha ang Lucas 15:8-10.

⁴ Gihisgotan ni Jesus ang gibati sa usa ka babaye dihang iyang nakit-an ang bililhon nga sensilyong drakma. Sa panahon ni Jesus, may pipila ka Hudiyong inahan nga mohatag sa ilang anak nga babaye ug usa ka set sa 10 ka sensilyong drakma sa adlaw  sa kasal niini. Tingali ang nawalang sensilyo apil sa usa ka set nga gihatag sa iyang inahan. Ang babaye nagtuo nga ang sensilyo nahulog sa salog, mao nga nagdagkot siyag lampara ug iya kining gipangita. Pero wala niya kini makita. Tingali naglisod siya sa pagpangita sa gamayng sensilyong plata kay dili kaayo hayag ang iyang lampara. Mao nga giayo niyag silhig ang tibuok balay. Sa abog nga iyang natapok, nakita niya ang bililhong sensilyo nga migilak dihang nahayagan kini sa lampara. Nalipay kaayo siya! Iyang gitawag ang iyang mga higala ug silingan aron isulti kanila ang maayong balita.

5. Ngano tingaling lisod ang pagpangita niadtong mibiya sa kongregasyon?

⁵ Nakat-onan nato sa ilustrasyon ni Jesus nga nagkinahanglag dakong paningkamot aron makit-an ang nawala. Sa susama, tingali kinahanglan sab tang maningkamot sa pagpangita niadtong mibiya sa kongregasyon. Tingali daghang tuig na silang miundang sa pagpakig-uban kanato. Basig mibalhin pa gani sila sa lugar diin wala sila mailhi sa mga igsoon. Pero karon, segurado nga ang pipila niining mga dili aktibo gusto na gyong mobalik kang Jehova. Gusto nilang moalagad kang Jehova uban sa mga igsoon, pero nagkinahanglan sila sa atong tabang.

6. Sa unsang paagi ang tanan sa kongregasyon makatabang sa pagpangita sa mga dili aktibo?

⁶ Kinsay makatabang sa pagpangita sa mga dili aktibo? Kitang tanan​—mga ansiyano, payunir, membro sa pamilya, ug magmamantala. Naa ba kay higala o paryente nga nahimong dili aktibo? Naa ba kay nakit-ang dili aktibo dihang nagsangyaw ka sa balay ug balay o kaha nag-public witnessing? Ipatin-aw kaniya nga kon gusto niyang magpaduaw, malipay ka sa paghatag sa iyang adres o numero sa cellphone ngadto sa mga ansiyano.

7. Unsay imong nakat-onan sa giingon sa ansiyano nga si Thomas?

⁷ Unsay mahimo ilabina sa mga ansiyano sa pagpangita niadtong gustong mobalik kang Jehova? Matikdi ang komento sa ansiyano nga si Thomas, * nga taga-Spain. Kapig 40 ang iyang natabangan nga makabalik sa kongregasyon. Si Thomas miingon: “Ako unang pangutan-on ang lainlaing igsoon kon nahibalo ba sila kon asa na nagpuyo ang mga dili aktibo. O kaha pangutan-on nako ang mga igsoon kon naa ba silay nahinumdoman nga dili na tigtambongan ug tigom. Kadaghanan sa kongregasyon malipayng motabang kay mobati sila nga apil sila sa pagpangita. Dayon, dihang akong duawon ang mga igsoon nga dili aktibo, mangutana ko bahin sa ilang mga anak o mga paryente. Tingali ginadala nila kaniadto ang ilang mga anak sa tigom, ug tingali ang ilang mga anak nahimo pong mga magmamantala kaniadto. Sila sab puwedeng tabangan nga makabalik kang Jehova.”

8. Sa ilustrasyon bahin sa nawalang anak nga narekord sa Lucas 15:17-24, giunsa pagtratar sa amahan ang iyang mahinulsolong anak?

⁸ Unsang mga hiyas ang atong gikinahanglan aron atong matabangan kadtong gustong mobalik kang Jehova? Matikdi ang pipila ka leksiyon nga atong makat-onan sa ilustrasyon ni Jesus bahin sa anak nga mibiya sa ilang balay. (Basaha ang Lucas 15:17-24.) Si Jesus miingon nga sa ulahi ang anak nakaamgo sa iyang sayop ug midesisyon nga mopauli. Ang amahan midagan aron sugaton ang iyang anak ug gigakos kini pag-ayo, mao nga mibati ang anak nga gimahal gihapon siya sa iyang amahan. Ang anak nakonsensiya kaayo sa iyang gihimo ug naghunahuna nga dili na siya angayng  isipon nga anak. Gisulti niya ang iyang gibati, ug nasabtan gyod siya sa iyang amahan. Dayon may gihimo ang amahan nga nagpakita nga gidawat niya ang iyang anak, dili ingong sinuholan, kondili ingong minahal nga membro sa pamilya. Aron pamatud-an kana, ang amahan naghikay ug salosalo ug gihatagan niyag nindot nga sinina ang iyang mahinulsolong anak.

9. Unsang mga hiyas ang atong gikinahanglan aron atong matabangan ang mga dili aktibo sa pagbalik kang Jehova? (Tan-awa ang kahong “ Kon Unsaon Pagtabang Kadtong Gustong Mobalik.”)

⁹ Si Jehova sama nianang amahan diha sa ilustrasyon. Gimahal niya ang atong dili aktibong mga igsoon ug gusto niya nga mobalik sila kaniya. Pinaagi sa pagsundog kang Jehova, matabangan nato sila sa pagbalik. Aron mahimo kini, gikinahanglan nato ang pailob, empatiya, ug gugma. Nganong angay natong ipakita ang maong mga hiyas ug unsaon nato kana pagpakita?

10. Nganong kinahanglan tang magmapailobon aron matabangan ang dili aktibo nga maulian sa espirituwal?

¹⁰ Angay tang magmapailobon kay ang mga dili aktibo nagkinahanglag panahon aron maulian sa espirituwal. Daghang dili aktibo kaniadto miadmitir nga milihok lang sila human sa balikbalik nga pagduaw sa mga ansiyano ug sa ubang igsoon sa kongregasyon. Ang sister nga si Nancy, nga taga-Southeast Asia, misulat: “Naa koy suod nga amiga sa kongregasyon nga mitabang pag-ayo nako. Giisip ko niya nga morag iyang magulang. Gipahinumdoman ko niya sa maayo namong mga eksperyensiya sa una. Mapailobon siyang maminaw dihang isulti nako ang akong gibati, ug dili siya magduhaduha sa pagtambag nako. Tinuod gyod siyang  amiga kay andam siyang motabang sa tanang panahon.”

11. Nganong importante ang empatiya sa pagtabang niadtong nasakitan?

¹¹ Ang empatiya samag epektibong tambal; kini makaayo sa kasingkasing nga samaran. Ang pipila ka dili aktibo napasakitan kaniadto sa usa ka igsoon. Ug bisag daghang tuig na ang milabay, wala gihapon mawala ang ilang kasuko. Kini nga pagbati nakapugong nila sa pagbalik kang Jehova. Ang uban naghunahuna tingali nga biktima sila sa inhustisya. Basig nagkinahanglan silag maminaw nila ug mosabot sa ilang gibati. (Sant. 1:19) Si María, nga dili aktibo kaniadto, miingon, “Gusto nako nga naay maminaw, mohupay, ug mogiya nako.”

12. Sa unsang paagi ang gugma ni Jehova samag pisi?

¹² Sa Bibliya, ang gugma ni Jehova sa iyang katawhan gipakasama sa pisi. Ngano man? Konsideraha ni nga ilustrasyon: Imadyina nga hapit na kang malumos diha sa dagat ug naay miitsa nimog life jacket. Seguradong magpasalamat ka kay makatabang ni nga dili ka maunlod. Pero dili igo ang life jacket para maluwas ka. Ang tubig bugnaw, ug dili ka maluwas gawas kon makaabot ka sa sakayan. Kinahanglan nga naay moitsa nimog pisi ug mobitad nimo paingon sa sakayan. Si Jehova miingon maylabot sa mga Israelinhon nga mipalayo kaniya: “Ginabitad nako sila pinaagi sa . . . pisi sa gugma.” (Os. 11:4) Mao gihapon nay gibati sa Diyos niadtong miundang sa pag-alagad kaniya ug nag-atubang ug grabeng mga problema ug kabalaka. Gusto niya nga mahibalo sila nga gimahal niya sila. Gusto sab niyang mobalik sila kaniya. Ug puwede kang gamiton ni Jehova sa pagpakita sa iyang gugma kanila.

13. Sa unsang paagi ang eksperyensiya ni Pablo nagpakita nga ang atong gugma makatabang sa uban sa pagbalik kang Jehova?

 ¹³ Importante nga atong pasaligan ang mga dili aktibo nga gimahal sila ni Jehova ug gimahal sab nato sila. Si Pablo, nga gihisgotan sa nag-unang artikulo, nahimong dili aktibo sa kapig 30 ka tuig. Siya miingon: “Usa ka buntag niana, dihang molakaway na ko sa balay, dihay miabot nga buotan nga tigulang nga sister ug nakig-estorya siya nako sa mahigugmaong paagi. Mihilak ko nga morag bata. Giingnan nako siya nga posibleng gipadala siya ni Jehova aron makig-estorya nako. Nianang higayona, nakadesisyon ko nga mobalik kang Jehova.”

14. Sumala sa ilustrasyon nga narekord sa Lucas 15:4, 5, unsay gihimo sa magbalantay dihang nakita niya ang nawalang karnero?

¹⁴ Ang mga dili aktibo nagkinahanglan sa atong padayong tabang ug pagdasig. Sama sa nawalang anak sa ilustrasyon ni Jesus, sila tingali mibatig grabeng kasakit nga dugayng maulian. Ug tungod sa ilang mga naeksperyensiyahan sa kalibotan ni Satanas, tingali mobati sila nga dili na suod kang Jehova. Busa kinahanglang tabangan nato sila nga molig-on ang ilang pagtuo kaniya. Sa ilustrasyon bahin sa nawalang karnero, si Jesus miingon nga gipas-an sa magbalantay ang karnero ug gidala kini balik sa panon. Ang magbalantay migahin nag dakong panahon ug kusog sa pagpangita sa nawalang karnero. Pero nahibalo siya nga luya na kaayo ang karnero ug dili na niini kayang molakaw balik sa panon mao nga iya kining gipas-an.​—Basaha ang Lucas 15:4, 5.

15. Unsaon nato pagtabang ang mga dili aktibo nga gustong mobalik kang Jehova? (Tan-awa ang kahong “ Epektibo Kaayong Publikasyon.”)

¹⁵ Kinahanglan tingali tang mogahin ug panahon  ug kusog sa pagtabang niadtong mga dili aktibo nga madaog ang ilang mga kahuyangan. Pero sa tabang sa espiritu ni Jehova, sa iyang Pulong, ug sa atong mga publikasyon, matabangan nato sila nga molig-on pag-usab sa espirituwal. (Roma 15:1) Unsaon nato nâ paghimo? Usa ka dugay nang ansiyano miingon, “Kadaghanan sa mga dili aktibo nga midesisyon nga mobalik kang Jehova kinahanglang dumalahan pag-usab ug Bible study.” * Busa kon gihangyo ka nga mag-Bible study sa dili aktibong igsoon, dawata kana nga malipayon kon posible sa imong situwasyon. Ang ansiyano miingon sab, “Ang magmamantala nga modumala sa pagtuon kinahanglan nga maayong higala, nga kasaligan ug kasultihan sa dili aktibong igsoon sa iyang gibati.”

16. Nganong nahibalo ta nga tabangan ta sa mga anghel?

¹⁶ Daghang eksperyensiya ang nagpakita nga ang mga anghel nagtabang nato sa pagpangita sa mga dili aktibo nga gustong mobalik kang Jehova. (Pin. 14:6) Pananglitan, si Silvio, nga taga-Ecuador, nag-ampo kang Jehova nga tabangan siya nga makabalik sa kongregasyon. Samtang nag-ampo pa siya, dihay duha ka ansiyano nga nag-doorbell. Niana nga pagduaw, malipayong gisugdan sa mga ansiyano ang pagtabang kaniya.

17. Unsang panalangin ang atong madawat kon tabangan nato ang mga luya sa espirituwal?

¹⁷ Malipay kaayo ta dihang atong tabangan ang mga luya sa espirituwal nga makabalik kang Jehova. Matikdi ang giingon ni Salvador, payunir nga naningkamot pag-ayo sa pagtabang sa mga dili aktibo: “Usahay makahilak ko sa kalipay. Malipay kaayo kong maghunahuna nga giluwas ni Jehova ang iyang pinalanggang karnero gikan sa kalibotan ni Satanas ug nakapribilehiyo ko nga motabang Niya sa paghimo niana.”​—Buh. 20:35.

18. Kon dili ka aktibo sa pag-alagad, unsay imong maseguro?

¹⁸ Kon dili ka aktibo sa pag-alagad kang Jehova, makasalig ka nga gimahal gihapon ka niya. Gusto niya nga mobalik ka. Kinahanglan kang maningkamot nga mobalik kaniya. Pero sama sa amahan sa ilustrasyon ni Jesus, si Jehova nagpaabot sa imong pagbalik, ug malipay kaayo siyang modawat nimo.