Ang maong teksto naghisgot ug siyam ka Kristohanong mga hiyas: “Ang bunga sa espiritu mao ang gugma, kalipay, kalinaw, taas nga pailob, pagkabuotan, pagkamaayo, pagtuo, kalumo, ug pagpugong sa kaugalingon.” Pero dili ra ni ang maayong mga hiyas nga atong maugmad sa tabang sa espiritu sa Diyos.

Matikdi ang giingon ni apostol Pablo sa nag-unang mga bersikulo: “Ang mga buhat sa unod . . . mao ang seksuwal nga imoralidad, kahugawan, walay kaulaw nga paggawi, idolatriya, espiritismo, pagdumtanay, panag-away, pagkamadudahon, pagsilaob sa kasuko, panagbingkil, pagkabahinbahin, mga sekta, kasina, paghuboghubog, banha ug way pugong nga paglipaylipay, ug mga butang nga sama niini.” (Gal. 5:19-21) Ang pag-ingon ni Pablo ug “mga butang nga sama niini” nagpasabot nga naa pay laing “mga buhat sa unod,” sama nianang gihisgotan sa Colosas 3:5. Ingon ana pod ang siyam ka maayong hiyas nga gihisgotan ni Pablo sa Galacia 5:22, 23. Wala hisgoti ni Pablo ang tanang maayong hiyas nga atong mabatonan sa tabang sa balaang espiritu.

Masabtan nato nâ dihang atong ikomparar ang maong teksto sa giingon ni Pablo sa kongregasyon sa Efeso: “Ang bunga sa kahayag naglangkob sa tanang matang sa pagkamaayo ug pagkamatarong ug kamatuoran.” (Efe. 5:8, 9) Oo, ang “pagkamaayo,” apil ang pagkamatarong ug kamatuoran, maoy bahin sa “bunga sa kahayag,” pero bahin sab ni sa “bunga sa espiritu.”

Sa susama, gidasig ni Pablo si Timoteo nga ugmaron ang unom ka maayong hiyas​—ang pagkamatarong, debosyon sa Diyos, pagtuo, gugma, paglahutay, ug kalumo. (1 Tim. 6:11) Tulo lang niana (pagtuo, gugma, ug kalumo) ang gihisgotan nga bahin sa “bunga sa espiritu.” Pero gikinahanglan sab ni Timoteo ang balaang espiritu sa pag-ugmad sa ubang hiyas nga gihisgotan​—ang pagkamatarong, debosyon sa Diyos, ug paglahutay.​—Itandi ang Colosas 3:12; 2 Pedro 1:5-7.

Busa ang Galacia 5:22, 23 wala maghisgot sa tanang hiyas nga bahin sa “bunga sa espiritu.” Ang espiritu sa Diyos makatabang nato sa pag-ugmad sa giingon sa teksto nga siyam ka bahin sa “bunga sa espiritu.” Pero naa pay laing mga hiyas nga angayng ugmaron aron mahimo tang hamtong nga Kristohanon ug atong ‘masul-ob ang bag-ong personalidad nga gihimo sumala sa kabubut-on sa Diyos, nga nahiuyon sa tinuod nga pagkamatarong ug pagkamaunongon.’​—Efe. 4:24.