KITANG tanan kombinsido nga si Jehova naggiya ug nagtagana sa espirituwal nga panginahanglan sa iyang katawhan niining “kataposang mga adlaw.” (2 Tim. 3:1) Pero kitang tanan kinahanglang mosunod kang Jehova. Ang atong situwasyon parehas sa mga Israelinhon didto sa kamingawan. Sila kinahanglang mosunod sa tingog sa trompeta.

Gipahimo ni Jehova si Moises ug duha ka trompeta nga gama sa sinalsal nga plata aron ‘tawgon ang katawhan ug pabalhinon ang mga kampo.’ (Num. 10:2) Patingogon sa mga saserdote ang mga trompeta sa lainlaing paagi aron ipahibalo kon unsay buhaton sa katawhan. (Num. 10:3-8) Karon, ang katawhan sa Diyos makadawat ug mga instruksiyon sa lainlaing paagi. Konsideraha ang tulo niini nga mga paagi nga nagpahinumdom kanato sa mga tingog sa trompeta sa karaang panahon​—dihang imbitahon ta sa dagkong mga panagkatigom, dihang bansayon ang mga ansiyano, ug dihang usbon ang mga kahikayan sa tanang kongregasyon.

Kon gusto ni Jehova nga tigomon “ang tibuok katawhan” sa entrada sa sidlakang bahin sa tabernakulo, patingogon sa mga saserdote ang duha ka trompeta. (Num. 10:3) Ang tanang tribo nga nagkampo palibot sa tabernakulo sa upat ka dibisyon makadungog niana. Kadtong nagkampo duol sa entrada makaabot sa pipila lang ka minuto. Ang uban nga tua sa layo nagkinahanglag dugang panahon ug paningkamot aron makaabot. Duol man o layo, gusto ni Jehova nga ang tanan magtigom ug makabenepisyo.

Karon, dili na ta magtigom sa tabernakulo, pero giimbitar ta sa mga tigom sa katawhan sa Diyos. Apil niini ang rehiyonal nga mga kombensiyon ug ubang espesyal nga mga okasyon, diin makadawat tag importanteng mga impormasyon ug instruksiyon. Sa tibuok kalibotan, ang katawhan ni Jehova nakapahimulos sa samang programa. Busa ang tanan nga modawat sa imbitasyon niini nga mga panagkatigom maoy bahin sa dako ug malipayon nga grupo. Ang uban mobiyaheg mas layo. Bisan pa niana, kadtong midawat niini nga mga imbitasyon nakaingon nga wala gyod masayang ang ilang paningkamot.

Kadto bang tua sa hilit nga mga lugar makabenepisyo sab sa dagkong panagkatigom? Tungod sa modernong teknolohiya, daghan kanila ang nakabenepisyo sa samang programa ug mibati pa gani nga apil sila sa dagkong panagkatigom. Pananglitan, sa usa ka pagbisita sa representante sa hedkuwarter, gi-broadcast sa sangang buhatan sa Benin ang programa ngadto sa Arlit, Niger, usa ka minahan nga lungsod sa Sahara Desert. Dihay 21 ka igsoon ug interesado  nga nanambong. Bisag layo sila, gibati nila nga apil sila sa 44,131 nga nanambong. Usa ka brader misulat: “Salamat kaayo sa pag-broadcast sa programa. Gibati namo nga gimahal gyod mi ninyo.”

Kon usa lang ka trompeta ang patingogon sa mga saserdote, “mga pangulo lang, nga mao ang mga pangulo sa linibo,” ang moadto sa tolda nga tagboanan. (Num. 10:4) Didto, makadawat silag mga instruksiyon ug pagbansay gikan kang Moises. Kana makatabang nila sa pag-atiman sa ilang mga responsibilidad diha sa ilang mga tribo. Kon usa ka sa mga pangulo, seguradong maningkamot gyod ka sa pagtambong aron makakat-on.

Karon, ang mga ansiyano dili “mga pangulo”; dili sab sila magharihari sa panon sa Diyos nga gipaatiman kanila. (1 Ped. 5:1-3) Pero gihimo nila ang tanan nilang maarangan sa pag-atiman sa panon. Busa, motambong gyod sila dihang imbitahon para sa dugang nga pagbansay, sama sa Kingdom Ministry School. Sa maong mga tunghaan, ang mga ansiyano makakat-on nga mahimong mas epektibo sa pag-atiman sa mga buluhaton sa kongregasyon. Kini makatabang nga mas mouswag ang espirituwalidad sa tanan. Tingali wala pa ka makatambong sa usa niana nga mga tunghaan, pero posible nga nakabenepisyo ka gikan sa mga nakatambong niana.

Usahay patingogon sa mga saserdote ang trompeta nga pinalubadlubad. Magpahibalo ni nga gusto ni Jehova nga ibalhin ang tibuok kampo. (Num. 10:5, 6) Dihang ibalhin ang kampo, himoon ni sa organisado kaayong paagi, pero dako kaayo ni nga trabaho. Busa tingali ang uban magduhaduha sa pagsunod. Ngano?

Ang uban tingali naghunahuna nga nagsige na lang silag balhin ug makurat na lang nga mamalhin na pod. “Usahay ang panganod magpabilin lang gikan sa gabii hangtod sa buntag.” Usahay pod ‘duha ka adlaw, usa ka bulan, o mas dugay pa’ ayha ibalhin ang kampo. (Num. 9:21, 22) Tanantanan, kapila gibalhin ang kampo? Base sa Numeros kapitulo 33, mga 40 ka lugar ang gikampohan sa mga Israelinhon.

Usahay ang mga Israelinhon magkampo sa lugar nga landong. Nindot nâ nga puwesto diha sa “dako ug makahadlok nga kamingawan.” (Deut. 1:19) Busa dihang mamalhin sila, posibleng mabalaka sila kay basig dili maayong lugar ang ilang balhinan.

Dihang magsugod na silag biya, ang uban tingali malisdan sa pagpaabot sa ilang turno. Ang tanan nakadungog sa pinalubadlubad nga tingog sa trompeta pero dili sila magdungan pagbiya. Kana nga tingog sa trompeta nagpasabot nga mobiya na ang mga tribo nga nagkampo sa sidlakan​—ang Juda, Isacar, ug Zabulon. (Num. 2:3-7; 10:5, 6) Dihang makabiya na sila, patingogon na sab sa mga saserdote ang trompeta aron ipahibalo nga mobiya na ang tulo ka tribong dibisyon nga nagkampo sa habagatan. Padayon nang himoon sa mga saserdote hangtod makabiya ang tibuok kampo.

Tingali mobati sab ka nga naay mga kausaban sa organisasyon nga lisod sundon. Basig naghunahuna ka nga daghan ra kaayo ang kausaban. Ug tingali komportable na ka sa pipila ka kahikayan ug naghunahuna ka nga maayo untag wala to usba. Tingali nasulayan ang imong pailob kay taudtaod pod una ka naka-adjust. Pero kon maningkamot ta nga mosunod kay nahibalo ta nga angay nato nang himoon, makita gyod nato ang panalangin ni Jehova.

Sa panahon ni Moises, gigiyahan ni Jehova ang milyonmilyong lalaki, babaye, ug bata latas sa kamingawan. Kon wala pa sila atimana ug giyahi ni Jehova, dili gyod sila makalahutay. Karon, nakalahutay ta sa espirituwal tungod sa giya ni Jehova. Iya tang ginatabangan nga masuod kaniya ug magpabiling lig-on ang atong pagtuo. Busa hinaot nga magmadeterminado ta nga mosunod sama sa pagsunod sa matinumanong mga Israelinhon sa tingog sa trompeta!