1. Ngano tingaling ang mga alagad ni Jehova mobati usahay nga nag-inusara?

KADAGHANAN kanato mobati usahay ug kamingaw. Para sa pipila, dali ra ning mawala. Sa uban, dugay ning mawala. Mobati tingali tag kamingaw bisag daghan tag kauban. Ang pipila nalisdan sa pagpangitag mga higala diha sa bag-ong kongregasyon. Ang uban naggikan sa suod kaayo nga pamilya, maong mobati silag kamingaw dihang mobalhin sila sa lugar nga layo sa ilang pamilya. Ang uban sab mingawon pag-ayo sa ilang minahal nga namatay. Ug ang pipila ka Kristohanon, ilabina kadtong bag-o lang nakakat-on sa kamatuoran, mobating nag-inusara dihang sila isalikway o lutoson sa dili Saksing mga membro sa pamilya ug mga higala.

2. Unsa nga mga pangutana ang atong tubagon?

² Si Jehova nahibalo ug nakasabot sa tanang butang bahin kanato. Sa dihang mobati tag kamingaw, nahibalo siya niana, ug gusto ta niyang tabangan aron dili ta malumsan sa maong pagbati. Sa unsang paagi motabang si Jehova kanato? Unsay atong mahimo sa pagtabang sa atong kaugalingon? Ug unsaon nato pagtabang ang uban diha sa atong kongregasyon nga mibatig kamingaw? Hisgotan nato ang mga tubag niana.

3. Giunsa pagpakita ni Jehova nga gimahal niya si Elias?

³ Si Jehova interesado kaayo sa kaayohan sa tanan niyang magsisimba. Siya duol sa matag usa kanato, ug makita niya dihang kita maguol o madismayar. (Sal. 145:18, 19) Tagda kon unsa ka mahunahunaon si Jehova sa iyang propeta nga si  Elias. Ang maong matinumanong tawo nabuhi sa lisod nga panahon sa kasaysayan sa Israel. Ang gamhanang mga tawo sa Israel nga wala mahigugma kang Jehova naglutos sa iyang mga magsisimba, ilabina kang Elias, ug gusto nila ning patyon. (1 Hari 19:1, 2) Ug tingali nadugangan sab ang kaguol ni Elias kay nagtuo siya nga siya na lang ang nahibiling propeta nga nag-alagad kang Jehova. (1 Hari 19:10) Gitabangan dayon sa Diyos si Elias. Si Jehova nagpadalag anghel aron pasaligan ang iyang propeta nga wala kini mag-inusara—nga duna pay daghang mahinadlokon sa Diyos nga mga Israelinhon!—1 Hari 19:5, 18.

4. Sa unsang paagi gipakita sa Marcos 10:29, 30 ang pagkamahunahunaon ni Jehova sa iyang mga alagad kinsa nawad-ag tabang sa ilang pamilya ug mga higala?

⁴ Si Jehova nahibalo nga sa dihang mopili ta nga alagaron siya, ang pipila kanato kinahanglang mohimog daghang sakripisyo. Pananglitan, ang atong dili Saksing pamilya ug mga higala basin dili na motabang nato. Tingali tungod sa kabalaka, kas-a si apostol Pedro nangutana kang Jesus: “Gibiyaan namo ang tanan ug misunod mi kanimo. Unsa man unya ang among makuha niana?” (Mat. 19:27) Mabinationg gipasaligan ni Jesus ang iyang mga tinun-an nga makabaton silag dakong espirituwal nga pamilya. (Basaha ang Marcos 10:29, 30.) Ug si Jehova, ang Ulo sa atong espirituwal nga pamilya, nagsaad nga iyang tabangan kadtong gustong moalagad kaniya. (Sal. 9:10) Konsideraha ang pipila ka praktikal nga butang nga imong mahimo aron matabangan ka ni Jehova sa pagpakigbisog sa kamingaw.

5. Unsay mga kaayohan sa paghunahuna kon giunsa ka pagtabang ni Jehova?

⁵ Hunahunaa kon giunsa ka pagtabang ni Jehova. (Sal. 55:22) Makatabang ni nimo nga makita nga wala ka mag-inusara. Ang tagsaanong sister nga si Carol, * kinsa mao ray Saksi sa ilang pamilya, miingon: “Ang paghunahuna ug pagpamalandong kon giunsa ko pagtabang ni Jehova nga makalahutay sa mga kalisdanan nakatabang gyod nako nga mobati nga wala ko mag-inusara. Ug nagpasalig ni nako nga kanunay kong tabangan ni Jehova.”

6. Sa unsang paagi ang 1 Pedro 5:9, 10 makadasig niadtong mibatig kamingaw?

 ⁶ Hunahunaa kon giunsa pagtabang ni Jehova ang mga igsoon nga mibatig kamingaw. (Basaha ang 1 Pedro 5:9, 10.) Ang brader nga si Hiroshi, kinsa mao ray Saksi sa ilang pamilya sulod na sa daghang katuigan, miingon: “Diha sa kongregasyon, dali rang makita nga ang tanan dunay mga problema. Nahibalo ta nga gihimo natong tanan ang atong kinamaayohan sa pag-alagad kang Jehova, ug kana makadasig kanamong mga nag-inusarang Saksi sa pamilya.”

7. Sa unsang paagi ang pag-ampo makatabang nimo?

⁷ Mentinaha ang maayong espirituwal nga rutina. Apil niini ang pagsulti kang Jehova kon unsa gyoy imong gibati. (1 Ped. 5:7) “Usa sa pinakaimportanteng butang nga nakatabang nako nga madaog ang akong kamingaw mao ang pag-ampo pag-ayo kang Jehova,” miingon ang batan-ong sister nga si Massiel. Dihang midesisyon siya nga moalagad kang Jehova, mibati siyang nag-inusara kay ang iyang pamilya dili Saksi. “Siya tinuod gyod nako nga Amahan. Kadaghan ko moampo niya kada adlaw, ug isulti nako kaniya ang akong gibati.”

8. Sa unsang paagi ang pagbasa sa Pulong sa Diyos ug pagpamalandong niini makatabang nimo?

⁸ Regular nga basaha ang Pulong sa Diyos, ug pamalandonga ang espesipikong mga asoy nga nagpasiugda sa gugma ni Jehova kanimo. Si Bianca, sister nga pirmeng makadungog ug sakit nga mga pulong gikan sa iyang pamilya, miingon: “Nakatabang gyod nako ang pagbasa ug pagpamalandong sa mga asoy sa Bibliya ug mga sugilanon sa kinabuhi sa mga alagad ni Jehova nga susama nakog kahimtang.” Ang pipila ka igsoon magmemoryag makapahupay kaayong mga teksto, sama sa Salmo 27:10 ug Isaias 41:10. Ang uban miingon nga ang pagpaminaw sa audio recording sa mga tun-anang materyal nakatabang nga dili kaayo sila mobating nag-inusara dihang magtuon para sa mga tigom o magbasag Bibliya.

9. Sa unsang paagi ang pagtambong sa mga tigom nakahatag nimog kaayohan?

⁹ Paningkamot nga makatambong pirme sa mga tigom. Makabenepisyo ka sa makapadasig nga mga programa, ug mailhan pod nimo ang mga igsoon. (Heb. 10:24, 25) Si Massiel, nga gihisgotan ganina, miingon: “Bisag maulawon kaayo ko, gihimo nakong determinasyon nga motambong sa tanang tigom ug mokomento. Nakatabang ni nako nga mobating bahin ko sa kongregasyon.”

10. Nganong importante nga makigsuod ta sa matinumanong mga Kristohanon?

¹⁰ Pakighigala sa matinumanong mga Kristohanon. Pakighigala sa mga igsoon sa kongregasyon,  bisan niadtong lahi nimog edad ug kagikan kay daghan kag makat-onan nila. Ang Bibliya nagpahinumdom nato nga “ang kaalam anaa sa mga tigulang.” (Job 12:12) Ang mga tigulang daghan pog makat-onan sa matinumanong mga batan-on. Si David mas bata kang Jonatan, pero nagkasuod gihapon sila. (1 Sam. 18:1) Nagtinabangay sila sa pag-alagad kang Jehova bisan pa sa lisod nga mga situwasyon. (1 Sam. 23:16-18) “Ang atong mga brader ug sister puwede gyod mahimong atong espirituwal nga mga ginikanan o igsoon,” miingon si Irina, sister nga mao ray Saksi sa iyang pamilya sa pagkakaron. “Puwede silang gamiton ni Jehova nga mahimong atong pamilya.”

11. Unsay angay nimong buhaton aron masuod ka sa mga igsoon?

¹¹ Ang pagpakighigala dili sayon, ilabina kon maulawon ka. Si Ratna, usa ka maulawong sister nga nakadangat sa kamatuoran bisan pa sa mga pagsupak, miingon, “Kinahanglan nakong dawaton nga nagkinahanglan ko sa tabang sa mga igsoon sa kongregasyon.” Lisod tingaling isulti sa uban ang imong gibati, pero kon imo nang buhaton, magkasuod mo. Ang imong mga higala gustong modasig ug motabang nimo, pero kinahanglan nimo silang sultihan kon unsaon nila kana paghimo.

12. Sa unsang paagi ang ministeryo makatabang nimo nga makakitag suod nga mga higala?

¹² Usa sa kinamaayohang paagi sa pagpakighigala mao ang pagpakig-uban sa mga igsoon diha sa ministeryo. Si Carol, nga gihisgotan ganina, miingon: “Daghan kog nasuod tungod sa pagpakig-uban nako sa mga sister diha sa ministeryo ug sa ubang teokratikanhong kalihokan. Gitabangan ko ni Jehova sulod na sa daghang katuigan pinaagi niini nga mga higala.” Maayo gyod nga makighigala ta sa matinumanong mga Kristohanon. Gamiton ni Jehova ang maong mga higala aron tabangan ka nga madaog ang makapaluyang mga pagbati, sama sa kamingaw.—Prov. 17:17.

13. Unsay responsibilidad sa tanan diha sa kongregasyon?

¹³ Ang tanan diha sa kongregasyon dunay responsibilidad sa pagpalambo sa gugma ug kalinaw aron walay mobating nag-inusara. (Juan 13:35) Ang atong mga pulong ug buhat puwedeng makadasig pag-ayo sa uban! Matikdi ang giingon sa usa ka sister: “Dihang nakakat-on ko sa kamatuoran, ang kongregasyon nahimong akong pamilya. Dili tingali ko mahimong Saksi ni Jehova kon wala ang ilang tabang.” Unsay imong mahimo aron tabangan kadtong nag-inusarang Saksi sa ilang pamilya nga mobating bahin sila sa kongregasyon?

14. Unsay imong mahimo aron mahigala nimo ang mga bag-ohan?

¹⁴ Pakighigala sa mga bag-ohan. Puwede nato silang kinasingkasing nga abiabihon sa atong kongregasyon. (Roma 15:7) Pero dili igo ang pagtimbaya lang kanila. Gusto nato nga sa ngadtongadto masuod nato sila. Busa pakitaig kaayo ug sinserong interes ang mga bag-ohan. Paningkamoti nga mahibaloan kon unsang mga problema ang ilang giatubang, pero likayi ang mga pangutana nga makapaulaw nila. Ang pipila tingali malisdan sa pagsulti sa ilang gibati, busa pag-amping nga dili sila pugson sa pag-estorya. Hinunoa, gamita ang mataktikanhong mga pangutana aron madasig sila sa pagsulti, ug dayon paminaw nga mapailobon sa ilang tubag. Pananglitan, puwede nimo silang pangutan-on kon sa unsang paagi nila nakat-onan ang kamatuoran.

15. Sa unsang paagi ang hamtong nga mga Kristohanon makatabang sa uban diha sa kongregasyon?

¹⁵ Ang tanan sa kongregasyon mouswag sa  espirituwal kon ang hamtong nga mga Kristohanon, ilabina ang mga ansiyano, magpakitag interes kanila. Si Melissa, kinsa gipadako sa iyang inahan sa kamatuoran, miingon: “Mapasalamaton kaayo ko sa mga brader nga migahin ug panahon para nako ug nahimong samag akong espirituwal nga mga amahan sulod na sa daghang tuig. Sa dihang magkinahanglan kog kaestorya, naa koy kaduolan.” Si Mauricio, batan-ong brader nga mibating nag-inusara dihang ang nag-Bible study niya mibiya sa kamatuoran, miingon: “Dako gyong tabang ang personal nga interes sa mga ansiyano kanako. Pirme silang makig-estorya nako. Makigpartner sila nako sa ministeryo, sultihan ko nila sa ilang mga nakat-onan sa ilang personal nga pagtuon sa Bibliya, ug makigdula pa gani sila nakog sport.” Si Melissa ug Mauricio nag-alagad na karon nga bug-os panahon.

16-17. Sa unsang praktikal nga mga paagi nga makatabang ta sa uban?

¹⁶ Paghatag ug praktikal nga tabang. (Gal. 6:10) “Sagad ang imo lang gikinahanglan mao ang simpleng buhat sa kaayo nga gipakita sa hustong panahon,” miingon si Leo, nga nag-alagad ingong misyonaryo sa lugar nga layo sa iyang pamilya. “Nahinumdom ko niadtong naaksidente ko. Dihang nakauli ra gyod ko sa balay, grabe na kaayo ang akong stress. Pero dihay magtiayon nga nangimbitar nakog pangaon. Wala na ko kahinumdom sa among gikaon, pero mahinumdom gihapon ko nga mapailobon silang naminaw nako. Human niadto, miarang-arang gyod ang akong pamati!”

¹⁷ Malipay ta panahon sa teokratikanhong mga kalihokan, sama sa mga asembliya ug kombensiyon, ug ang usa ka rason niana mao nga makauban nato ang mga igsoon ug magkaestoryahanay ta bahin sa programa. Pero si Carol, nga gihisgotan ganina, miingon, “Mobati kog grabeng kamingaw panahon sa mga asembliya ug kombensiyon.” Ngano? “Bisag gilibotan kog ginatos o linibo pa gani ka igsoon,” siya miingon, “sagad kauban nila ang ilang mga pamilya. Dihang makita nako sila, mobati kong nag-inusara.” Ang uban malisdan sa pagtambong sa kombensiyon o asembliya sa unang higayon human mamatay ang ilang kapikas. Naa ba kay nailhan nga ingon nianag kahimtang karon? Puwede nimo siyang  dapiton nga mouban sa inyong pamilya sa sunod nga teokratikanhong kalihokan.

18. Unsaon nato pagpadapat ang 2 Corinto 6:11-13 dihang mangimbitar tag mga igsoon nga makig-uban nato?

¹⁸ Pakig-uban sa mga igsoon. Sulayi ang paglingawlingaw kauban ang lainlaing igsoon, ilabina kadtong mibati tingali nga nag-inusara. Gusto natong ‘buksan pag-ayo ang atong kasingkasing,’ ilabina para kanila. (Basaha ang 2 Corinto 6:11-13.) “Malipay kaayo mi dihang hagaron mi sa mga igsoon nga moadto sa ilang balay o mouban nilag biyahe,” miingon si Melissa, nga gihisgotan ganina. Duna bay igsoon sa kongregasyon nga puwede nimong imbitahon nga makig-uban nimo?

19. Kanus-a ilabinang makatabang ang pagpakig-uban nato sa mga igsoon?

¹⁹ May mga higayon nga ilabinang maapresyar sa mga igsoon ang atong pagpakig-uban nila. Ang pipila malisdan tingali kon kauban nila ang ilang dili Saksing pamilya panahon sa mga selebrasyon nga supak sa Bibliya. Ang uban maguol tingali kaayo panahon sa espesipikong mga petsa, sama sa anibersaryo sa kamatayon sa ilang minahal. Kon mogahin tag panahon nga makig-uban sa mga igsoon nga mibatig ingon niana, atong gipakita nga gimahal gyod nato sila.—Filip. 2:20.

20. Sa unsang paagi ang giingon ni Jesus sa Mateo 12:48-50 makatabang nato dihang mobati tag kamingaw?

²⁰ Daghag rason kon nganong ang usa ka Kristohanon mobati usahay nga nag-inusara. Pero dili gyod nato kalimtan nga si Jehova nahibalo pag-ayo sa maong pagbati. Gitagana niya ang atong gikinahanglan, sagad pinaagi sa mga igsoon. (Basaha ang Mateo 12:48-50.) Ingong balos, ipakita nato kang Jehova ang atong apresasyon sa iyang mahigugmaong kahikayan pinaagi sa paghimo sa atong maarangan sa pagtabang sa atong mga igsoon. Bisag unsa pa tingali atong bation usahay, wala gyod ta mag-inusara kay si Jehova kanunayng nag-uban kanato!