1. Unsay gihimo ni Jehova sa matag usa kanato?

GIKABIG ni Jehova ang matag usa kanato. (Juan 6:44) Hunahunaa kon unsay gipasabot niana. Samtang gisusi pag-ayo ni Jehova ang binilyong tawo niining kalibotana, duna siyay nakita nga bililhon diha kanimo—sinserong kasingkasing nga puwedeng mahigugma kaniya. (1 Cron. 28:9) Si Jehova nakaila nimo, nakasabot nimo, ug nahigugma kanimo. Makapadasig gyod nâ!

2. Giunsa pagpakita ni Jesus nga gimahal ni Jehova ang matag usa sa Iyang mga karnero?

² Gimahal kaayo ka ni Jehova, ug gimahal sab niya ang tanan nimong Kristohanong mga igsoon. Sa pag-ilustrar niini, gikomparar ni Jesus si Jehova sa usa ka magbalantayg karnero. Kon ang usa ka magbalantay dunay 100 ka karnero unya ang usa niana masaag, unsay iyang buhaton? Iyang “biyaan sa kabukiran ang 99 ug pangitaon ang usa nga nasaag.” Dihang makit-an na niya ang karnero, dili siya masuko niini. Siya malipay. Unsay leksiyon? Ang matag karnero importante kang Jehova. Si Jesus miingon: “Dili gayod buot sa akong Amahan nga anaa sa langit nga malaglag bisan usa lang niining ubos nga mga tawo.”—Mat. 18:12-14.

3. Unsay atong hisgotan niining artikuloha?

³ Dili gyod nato gusto nga kitay mahimong hinungdan nga maluya ang bisan kinsa sa atong mga igsoon. Unsay atong buhaton aron dili ta makapandol sa uban? Ug unsay atong himoon kon dunay makapasakit nato? Tubagon nato kana niining artikuloha. Pero hisgotan una nato kining “ubos nga mga tawo” nga gihisgotan sa Mateo kapitulo 18.

4. Kinsa kining “ubos nga mga tawo”?

⁴ Kining “ubos nga mga tawo” nagtumong sa tanang tinun-an ni Jesus. Bisag unsa pay ilang edad, sila “sama sa mga bata” kay andam silang magpatudlo kang Jesus. (Mat. 18:3) Bisag lainlain silag kagikan ug kultura ug lainlaig panglantaw ug kinaiya, silang tanan nagpakitag pagtuo sa Kristo. Ug ang Kristo nahigugma pag-ayo kanila.—Mat. 18:6; Juan 1:12.

5. Unsay bation ni Jehova kon dunay makapandol o makapasakit sa usa sa Iyang katawhan?

⁵ Kining tanang “ubos nga mga tawo” bililhon kang Jehova. Aron masabtan ang iyang pagbati, hunahunaa kon unsay atong pagbati sa mga bata. Sila bililhon kanato. Gusto nato silang protektahan kay dili sila sama ka lig-on, ka eksperyensiyado, ug ka maalamon sa mga hamtong. Dili nato gusto nga dunay masakitan. Pero, ilabinang maguol ta—o masuko pa gani—kon bata ang pasakitan. Sa susama, gusto tang protektahan ni Jehova. Siya maguol—o masuko pa gani—kon dunay makapandol o makapasakit sa usa sa Iyang katawhan!—Isa. 63:9; Mar. 9:42.

6. Sumala sa 1 Corinto 1:26-29, giunsa pag-isip sa kalibotan ang mga tinun-an ni Jesus?

⁶ Sa unsa pang paagi nga ang mga tinun-an ni Jesus samag “ubos nga mga tawo”? Aw, kinsay giisip sa kalibotan nga importante? Kadtong dato, inila, ug dunay awtoridad. Sa laing bahin, ang mga tinun-an ni Jesus giisip sa kalibotan ingong dili importante o “ubos nga mga tawo.” (Basaha ang 1 Corinto 1:26-29.) Pero dili ingon niana ang panglantaw ni Jehova kanila.

7. Unsay gusto ni Jehova nga bation nato sa atong mga igsoon?

⁷ Gimahal ni Jehova ang tanan niyang alagad, sila man dugay nang nag-alagad kaniya o bag-o pa sa kamatuoran. Ang tanan natong igsoon importante kang Jehova, busa angay nga importante sab sila kanato. Gusto natong ‘higugmaon ang tanang igsoon,’ dili lang ang pipila kanila. (1 Ped. 2:17) Kinahanglan tang maningkamot nga panalipdan sila ug ipakita ang atong gugma kanila. Kon atong mahibaloan nga dunay nahiubos nato, dili ni nato angayng balewalaon, nga maghunahuna nga ang tawo sensitibo ra kaayo ug kinahanglang palabyon na lang niya ang nahitabo. Ngano kahang ang pipila mahiubos? Tingali tungod sa ilang kagikan, may mga igsoon nga ubos kaayog panglantaw sa kaugalingon. Ang uban bag-o pa lang sa kamatuoran, ug wala pa sila makakat-on kon unsaon pag-atubang ang kasaypanan sa uban. Bisan unsa pa man, kinahanglang himoon nato ang atong maarangan aron mapasig-uli ang kalinaw. Sa laing bahin, ang tawo nga pirmeng mapandol angayng makaamgo nga kini maoy dili maayong kinaiya nga kinahanglan niyang wad-on. Kinahanglan ni niyang buhaton aron makabaton siyag kalinaw sa hunahuna ug maayong relasyon sa uban.

8. Unsang komon nga panghunahuna ang nakaimpluwensiya sa mga tinun-an ni Jesus?

⁸ Nganong gihisgotan man ni Jesus kining “ubos nga mga tawo”? Ang iyang mga tinun-an bag-o lang nangutana kaniya: “Kinsa ba gayod ang kinalabwan sa Gingharian sa langit?” (Mat. 18:1) Daghang Hudiyo niadtong panahona ang naghunahuna nga ang posisyon ug ranggo importante kaayo. Ang usa ka eskolar miingon: “Ang mga tawo nabuhi ug namatay aron maangkon ang kadungganan, maayong reputasyon, kabantog, pag-uyon, ug pagtahod.”

9. Unsay kinahanglang buhaton sa mga tinun-an ni Jesus?

⁹ Si Jesus nahibalo nga ang mga tinun-an  kinahanglang maningkamot aron wad-on sa ilang kasingkasing ang hilig nga makigkompetensiya, nga nakagamot sa kultura sa mga Hudiyo. Giingnan sila ni Jesus: “Siya nga kinalabwan kaninyo kinahanglang sama sa kinaubsan, ug ang nagapanguna sama sa nagaalagad.” (Luc. 22:26) Mogawi ta nga “kinaubsan” kon atong ‘isipon ang uban nga labaw kay kanato.’ (Filip. 2:3) Kon ugmaron nato ang maong panghunahuna, mas dakog posibilidad nga dili ta makapandol sa uban.

10. Unsang tambag ni Pablo ang angay natong sundon?

¹⁰ Ang tanan natong igsoon mas labaw kay kanato sa lainlaing paagi. Dali ra nato ning makita kon magpokus ta sa ilang maayong mga hiyas. Kinahanglan natong sundon ang tambag ni apostol Pablo ngadto sa mga taga-Corinto: “Kinsa bay naghimo nimong lahi sa uban? Sa pagkatinuod, unsay anaa kanimo nga wala nimo madawat? Gani, kon nadawat nimo kini, nganong manghambog ka nga daw wala nimo kini madawat?” (1 Cor. 4:7) Busa likayan gyod nato ang paghunahuna o pagpakita nga mas labaw ta kay sa uban. Kon ang usa ka brader maayong mopakigpulong o ang usa ka sister dali rang makasugod ug pagtuon sa Bibliya, angay niyang ihatag ang pasidungog kang Jehova.

11. Unsay atong makat-onan sa ilustrasyon ni Jesus bahin sa usa ka hari ug sa ulipon niini?

¹¹ Human sultihi ni Jesus ang iyang mga sumusunod nga likayan nila nga makapandol sa uban, naghatag siyag ilustrasyon bahin sa usa ka hari ug sa ulipon niini. Gipapas sa hari ang dako nga utang nga dili gyod mabayran sa ulipon. Pero, wala papasa sa maong ulipon ang mas gamay nga utang sa iyang isigkaulipon. Sa ulahi, gipabilanggo sa hari ang way kaluoy nga ulipon. Unsay leksiyon? Si Jesus miingon: “Ingon usab niana ang himoon sa akong langitnong Amahan kaninyo kon ang matag usa kaninyo dili kinasingkasing nga magpasaylo sa iyang igsoon.”—Mat. 18:21-35.

12. Kon dili ta magpasaylo, sa unsang paagi mapasakitan nato ang uban?

¹² Ang gihimo sa ulipon nakapasakit dili lang kaniya mismo kondili sa uban usab. Una, way kaluoy niyang gipasakitan ang iyang isigkaulipon pinaagi sa ‘pagpabilanggo kaniya hangtod nga mabayran niya ang iyang utang.’ Ikaduha, nakapasakit siya sa ubang ulipon nga nakakita sa iyang gihimo. “Pagkakita sa ubang ulipon sa nahitabo, sila naguol pag-ayo.” Sa susama, ang atong mga buhat makaapektar sa uban. Kon dunay makasala kanato ug dili nato siya pasayloon, unsay mahitabo? Una, mapasakitan nato siya kay wala nato siya pasayloa, ug tingali kay wala nato siya tagda ug pakitaig gugma. Ikaduha, ang uban diha sa kongregasyon matugaw kon mamatikdan nila nga wala tay maayong relasyon nianang igsoona.

13. Unsay imong nakat-onan sa kasinatian sa usa ka payunir?

¹³ Kon pasayloon nato ang atong mga igsoon, makabenepisyo ta ug ang uban. Mao nay naeksperyensiyahan sa usa ka payunir nga tawgon natog Crystal. Nasakitan siya sa gibuhat sa usa ka sister sa kongregasyon. Si Crystal nahinumdom: “Samag gidunggab ko sa iyang sakit nga mga pulong. Di gani ko ganahang makig-uban niya sa pagsangyaw. Nagsugod nag kawala ang akong kadasig ug kalipay.” Gibati ni Crystal nga may rason siya nga maglagot. Pero wala siya magpadaog sa iyang kalagot o sa iyang kaguol. Mapainubsanon niyang gipadapat ang tambag sa Bibliya diha sa artikulong “Pagpasaylo Gikan sa Imong Kasingkasing” sa Oktubre 15, 1999 nga Bantayanang Torre. Gipasaylo niya ang sister.  Si Crystal miingon: “Nakaamgo ko nga kitang tanan naningkamot nga isul-ob ang bag-ong personalidad ug nga si Jehova andam mopasaylo nato kada adlaw. Mora kog naibtag tunok. Nahibalik ang akong kalipay.”

14. Base sa Mateo 18:21, 22, sa unsa kaha nalisdan si apostol Pedro ug unsay imong makat-onan sa tubag ni Jesus?

¹⁴ Nahibalo ta nga angay tang magpasaylo; mao nay hustong buhaton. Pero maglisod gihapon tingali ta sa paghimo niana. Posible nga si apostol Pedro mibati usahay ug sama niana. (Basaha ang Mateo 18:21, 22.) Unsay makatabang? Una, palandonga kon unsa ka dako ang pagpasaylo ni Jehova kanimo. (Mat. 18:32, 33) Dili ta niya takos pasayloon, pero andam siyang mohimo niana. (Sal. 103:8-10) Sa samang higayon, “obligado [sab] ta nga higugmaon ang usag usa.” Busa, ang pagpasaylo dili opsiyonal. Obligasyon nato nga pasayloon ang atong mga igsoon. (1 Juan 4:11) Ikaduha, palandonga kon unsay mahitabo dihang magpasaylo ta. Mahimong matabangan nato ang tawo nga nakasala kanato, mahiusa ang kongregasyon, mapanalipdan ang atong relasyon kang Jehova, ug mahupayan ta. (2 Cor. 2:7; Col. 3:14) Ug ikatulo, pag-ampo ngadto sa Usa nga nag-awhag nato sa pagpasaylo. Ayawg tugoti nga bungkagon ni Satanas ang imong maayong relasyon sa mga igsoon. (Efe. 4:26, 27) Gikinahanglan nato ang tabang ni Jehova aron dili ta mabitik ni Satanas.

15. Sumala sa Colosas 3:13, unsay atong mahimo kon matugaw ta sa gibuhat sa usa ka igsoon?

¹⁵ Pero komosta kon natugaw kaayo ka sa gihimo sa usa ka igsoon? Unsay angay nimong buhaton? Paningkamoti nga mamentinar ang kalinaw. Isulti kang Jehova ang imong gibati. Hangyoa siya nga tabangan ang igsoon nga nakapahiubos nimo ug tabangan sab ka nga makita ang maayong mga hiyas nianang  igsoona—ang mismong mga hiyas nga gipabilhan ni Jehova diha kaniya. (Luc. 6:28) Kon dili nimo makalimtan ang nahimo sa imong igsoon, hunahunaa kon unsaon nimo siya pagpakig-estorya. Labing maayo nga maghunahuna ka nga dili gyod tuyo sa igsoon nga pasakitan ka. (Mat. 5:23, 24; 1 Cor. 13:7) Sa dihang makig-estorya ka niya, hunahunaa nga maayo ang iyang intensiyon. Komosta kon dili niya gustong makig-uli? ‘Magpadayon sa pagpailob’ kaniya. Ayawg surender. (Basaha ang Colosas 3:13.) Labaw sa tanan, ayaw gyod paghambin ug kayugot kay makadaot nâ sa imong relasyon kang Jehova. Ayaw gyod tugoti ang bisan unsa nga makapandol nimo. Kon buhaton nimo kana, imong gipamatud-an nga labaw nimong gimahal si Jehova kay sa bisan unsa.—Sal. 119:165.

16. Unsay responsibilidad sa matag usa kanato?

¹⁶ Gipabilhan nato ang pribilehiyo nga mahiusa sa pag-alagad kang Jehova ingong “usa ka panon ubos sa usa ka magbalantay”! (Juan 10:16) Ang librong Organisado Aron Buhaton ang Kabubut-on ni Jehova, panid 165, nag-ingon: “Kay nakapahimulos ka sa maong panaghiusa, duna kay responsibilidad nga motabang sa pagmentinar niana.” Busa, kinahanglang “bansayon nato ang atong kaugalingon nga lantawon ang atong mga igsoon sumala sa paglantaw ni Jehova kanila.” Kitang tanang “ubos nga mga tawo” bililhon kang Jehova. Mao ba sab nay panglantaw nimo sa mga igsoon? Nakita ug gipabilhan ni Jehova ang tanan nimong gibuhat sa pagtabang ug pagpakitag gugma kanila.—Mat. 10:42.

17. Unsay determinado natong buhaton?

¹⁷ Gimahal nato ang atong mga isigkamagsisimba. Busa ‘determinado [ta] nga dili maghimog bisan unsa nga makapandol o makababag sa usa ka igsoon.’ (Roma 14:13) Giisip nato ang atong mga igsoon nga mas labaw kay kanato, ug gusto nato silang pasayloon nga kinasingkasing. Hinaot nga dili nato tugotan nga mapandol ta sa uban. Hinunoa, “buhaton nato ang tanan aron malinawon ang atong relasyon sa uban ug madasig ang usag usa.”—Roma 14:19.