Natawo ko niadtong Disyembre 22, 1929 sa Noville, usa ka gamayng baryo duol sa Bastogne, sa Belgian Ardennes. Daghan kog nindot nga eksperyensiya sa bata pa ko uban sa akong ginikanan. Kada adlaw, kami sa akong manghod nga si Raymond motabang sa pagpang-harvest ug gatas gikan sa among mga baka. Suod kaayo ang mga tawo sa among gamayng baryo, ug kaming tanan magtinabangay.

Ang akong ginikanan, si Emile ug Alice, mga debotado nga Katoliko. Motambong silag Misa kada Dominggo. Pero sa mga 1939, naay mga payunir gikan sa England nga miabot sa among baryo ug ilang gitanyagan si Papa ug subskripsiyon sa Consolation nga magasin (karon gitawag ug Pagmata!). Nasabtan dayon ni Papa nga mao ni ang kamatuoran ug misugod siyag basa sa Bibliya. Wala na siya motambong sa mga Misa, maong ang among mga silingan nga kaniadto suod kaayo namo misupak pag-ayo kang Papa. Gipresyur nila si Papa nga magpabiling Katoliko, nga miresultag init nga mga panaglalis.

Nasakitan kaayo ko nga grabeng gisupak si Papa. Tungod ana, kinasingkasing kong nangayog tabang sa Diyos pinaagi sa pag-ampo, nga gihisgotan sa sinugdanan. Dihang naundang ang pagsupak sa among mga silingan, nalipay kaayo ko. Nakombinsir ko nga si Jehova ang “Tigpatalinghog sa pag-ampo.”

Niadtong Mayo 10, 1940, gisakop sa Nazi Germany ang Belgium ug tungod ana namakwet ang mga tawo. Ang among pamilya miikyas paingon sa southern nga bahin sa France. Samtang padulong mi didto, hadlok kaayo kay usahay maipit mi sa engkuwentro sa mga sundalo sa Germany ug France.

 Pagbalik namo sa among baryo, wala na ang kadaghanan sa among gamit kay gipangkawat. Ang nabilin na lang mao ang among iro nga si Bobbie. Tungod ana, nakapangutana ko, ‘Nganong naa may giyera ug pag-antos?’

Niadtong mga panahona, nakatabang gyod namo ang mga pagbisita ni Brader Emile Schrantz, a usa ka matinumanong payunir nga ansiyano. Gipatin-aw niya gikan sa Bibliya kon nganong naay pag-antos, ug gitubag niya ang uban pa nakong mga pangutana bahin sa kinabuhi. Tungod ana, mas nasuod ko kang Jehova ug nakombinsir nga siya mahigugmaon nga Diyos.

Bisag wala pa mahuman ang giyera, naay mga igsoon nga regular nga mobisita sa among pamilya. Pagka-Agosto 1943, si Brader José-Nicolas Minet mibisita sa amoa ug nagpakigpulong. Dayon nangutana siya, “Kinsay gustong magpabawtismo?” Miisag kamot si Papa ug miisa pod ko. Nabawtismohan mi sa sapa duol sa among balay.

Niadtong Disyembre 1944, nahitabo ang Battle of the Bulge, ang kataposang pag-atake sa Germany didto sa Belgian Ardennes panahon sa Gubat sa Kalibotan II. Kay nagpuyo mi duol didto, nagtago mi sa basement sa among balay sulod sa mga usa ka bulan. Usa ka adlaw, migawas ko aron magpakaon sa among mga binuhi. Kalit lang nga naay bala sa kanyon nga mibuto sa among nataran. Sa kakusog, milupad ang atop sa balay sa among mga binuhi. Gisinggitan ko sa usa ka Amerikanong sundalo, “Hapa!” Midagan ko ug mihapa duol niya, ug iya kong gisul-oban sa iyang helmet aron maprotektahan ko.

Human sa giyera, naa mi regular nga kontak sa kongregasyon sa Liège, mga 90 kilometros (56 ka milya) padulong sa norte gikan sa amoa. Sa ngadtongadto, nakaporma mig gamayng grupo sa Bastogne. Nagtrabaho ko sa tax administration ug mieskuwela kog Law. Dayon nagtrabaho ko ingong clerk sa usa ka notary office. Pagka-1951, nag-organisar mi ug sirkitong asembliya sa Bastogne. Mga 100 ang nanambong, ug didto nailaila nako ang usa ka sister nga dasig kaayo nga payunir, si Elly Reuter. Mi-bike siyag 50 kilometros (31 ka milya) aron makatambong. Wala madugay, nagkagustohay mi  ug nagkasabot nga magminyo. Niadtong panahona, nakadawat si Elly ug imbitasyon nga moeskuwela sa Gilead sa United States. Misulat siya sa hedkuwarter ug gisulti kon nganong kinahanglan niyang balibaran ang imbitasyon. Si Brader Knorr, nga maoy nanguna sa katawhan ni Jehova niadtong panahona, miingon nga basig moabot ra ang panahon nga makaeskuwela siyag Gilead nga kami nang duha. Pagka-Pebrero 1953, nagminyo mi.

Niana pong tuiga, mitambong mi ni Elly sa New World Society Assembly didto sa Yankee Stadium, New York. Samtang didto mi, nailaila nako ang usa ka brader nga nagtanyag nakog trabaho ug nanghagad nga mobalhin mi sa United States. Giampo namo ni kang Jehova ug nakadesisyon mi ni Elly nga balibaran ang trabaho ug mobalik sa Belgium aron suportahan ang gamayng grupo sa Bastogne nga mga 10 ra ang magmamantala. Pagkasunod tuig, nanganak si Elly ug batang lalaki nga ginganlan namog Serge. Pero makapaguol kay paglabayg pito ka bulan, nasakit si Serge ug namatay. Among gibubo kang Jehova ang kasakit nga among gibati, ug napalig-on mi sa seguradong paglaom sa pagkabanhaw.

Niadtong Oktubre 1961, nakakita kog trabaho nga part-time ra maong puwede na kong magpayunir. Pero niana pong adlawa, nakadawat kog tawag gikan sa branch servant sa Belgium. Gipangutana ko niya kon makaalagad ba ko ingong circuit servant (karon gitawag ug tigdumala sa sirkito). Mitubag ko, “Puwede ba ming magpayunir una sa dili pa namo dawaton ang asaynment?” Misugot sila sa akong hangyo. Nagpayunir mi sulod sa walo ka bulan. Human ana, nagsugod mi sa sirkitong buluhaton niadtong Septiyembre 1962.

Human sa duha ka tuig sa sirkitong buluhaton, gidapit mi nga mag-alagad sa Belgium Bethel didto sa Brussels, ug nagsugod mi niadtong Oktubre 1964. Kini nga asaynment naghatag namo ug daghang panalangin. Wala madugay human mibisita si Brader Knorr sa Bethel niadtong 1965, nakurat ko kay natudlo ko ingong branch servant. Dayon, kami ni Elly gidapit nga moeskuwela sa ika-41 nga klase sa Gilead. Natinuod gyod ang giingon ni Brader Knorr 13 ka tuig ang milabay. Human mi maka-graduate, mibalik mi sa Belgium Bethel.

Sulod na sa daghang katuigan, nakapribilehiyo ko nga gamiton ang akong mga nahibaloan bahin sa balaod aron depensahan ang atong kagawasan sa pagsimba sa Europe ug sa ubang lugar. (Filip. 1:7) Tungod ani, nakailaila kog mga opisyales sa kapig 55 ka nasod diin ang atong buluhaton gidili o naay restriksiyon. Imbes ipaila nga eksperyensiyado ko sa balaod, akong ipaila ang akong kaugalingon ingong “tawo nga mahinadlokon sa Diyos.” Kanunay kong nangayog giya kang Jehova pinaagi sa pag-ampo, kay nahibalo ko nga “ang kasingkasing sa usa ka hari [o maghuhukom] samag agos sa sapa sa kamot ni Jehova. Iya ning giyahan bisan asa Niya gusto.”—Prov. 21:1.

 Usa ka eksperyensiya nga dili gyod nako malimtan mao kadtong nakig-estorya ko sa usa sa mga opisyales sa European Parliament. Dugay na kong naghangyo nga makig-estorya niya, ug misugot ra gyod siya. Siya miingon, “Hatagan ka nakog singko minutos.” Miduko ko ug nag-ampo. Ang opisyal natingala ug nangutana kon nag-unsa ko. Mitan-aw ko niya ug miingon, “Nagpasalamat ko sa Diyos kay usa ka sa iyang mga ministro.” Ang opisyal nangutana, “Unsay imong pasabot?” Akong gipakita niya ang Roma 13:4. Kay Protestante siya, nainteres siya sa teksto. Unsay resulta? Gihatagan ko niyag 30 minutos, ug maayo kaayo ang resulta sa among panag-estoryahanay. Miingon pa gani siya nga nakadayeg siya sa atong buluhaton.

Sulod na sa daghang katuigan, ang katawhan ni Jehova sa Europe naningkamot nga depensahan ang ilang legal nga katungod kon bahin sa neyutralidad, kustodiya sa bata, buhis, ug uban pa. Nakapribilehiyo ko nga makatabang niana ug makita mismo kon giunsa paghatag ni Jehova kanato ang kadaogan. Kapin nag 140 ka kaso ang nadaog sa mga Saksi ni Jehova sa European Court of Human Rights!

Sa mga tuig 1990, kami ni Brader Philip Brumley gikan sa hedkuwarter, ug Brader Valter Farneti gikan sa Italy, nagtinabangay aron makabaton ug dugang kagawasan sa pagsimba ang atong mga igsoon sa Cuba. Ang atong buluhaton didto may restriksiyon. Misulat ko sa Cuban embassy sa Belgium ug nakigkita sa usa ka opisyal nga giasayn nga maoy moatiman sa among hangyo. Sa una namong mga panag-estorya, wala kaayoy maayong resulta.

Sa ngadtongadto, human makaampo kang Jehova para sa giya, mihangyo mi nga magpadalag 5,000 ka Bibliya sa Cuba ug gitugotan mi. Ang mga Bibliya nakaabot didto ug giapod-apod sa mga igsoon, maong nakaingon mi nga gipanalanginan ni Jehova ang among mga paningkamot. Tungod ana, mihangyo na pod mi nga magpadalag dugang 27,500 ka Bibliya ug gitugotan mi. Nakahatag gyod nako ug dakong kalipay ang pagtabang sa atong mga igsoon sa Cuba nga makabaton ug personal nga kopya sa Bibliya.

Kadaghan kong miadto sa Cuba aron tabangan ang mga igsoon nga makabatog dugang kagawasan sa atong buluhaton. Tungod ana, daghan kog naamigo nga mga opisyales sa gobyerno.

Niadtong 1994, kapig 1,000,000 ang namatay dihang nahitabo ang genocide (pagpuo sa rasa) batok sa mga Tutsi didto sa Rwanda.  Makapaguol kay apil sa gipamatay ang uban natong mga igsoon. Wala madugay, naay grupo nga giorganisar sa paghatag ug hinabang sa mga igsoon didto.

Dihang miabot ang among grupo sa Kigali, ang kaulohang siyudad, nakita namo nga ang bungbong sa translation office ug ang pondohanag literatura nangabuslot kay gipaulanan ug mga bala. Daghan mig nadungog nga makapaguol nga estorya bahin sa mga igsoon nga gipamatay pinaagig sundang. Pero nakadungog pod mig mga eksperyensiya kon giunsa pagpakita sa mga igsoon ang ilang gugma sa usag usa. Pananglitan, nailaila namo ang usa ka brader nga Tutsi nga giproteksiyonan sa usa ka pamilyang Saksi nga Hutu. Ila siyang gitagoan sa usa ka lungag diha sa ilang tugkaran sulod sa 28 ka adlaw. Aron makahatag mig espirituwal nga pagdasig, nakigkita mi sa kapig 900 ka igsoon sa Kigali.

Human ana, mitabok mi sa border sa Zaire (karon Democratic Republic of the Congo). Gipangita namo ang daghang igsoon gikan sa Rwanda nga namakwet paingon sa mga refugee camp duol sa siyudad sa Goma. Wala namo sila makit-i maong nag-ampo mi kang Jehova nga tabangan mi nga makit-an sila. Pagkataudtaod, naay lalaki nga nagpaingon namo, ug amo siyang gipangutana kon naa ba siyay nailhan nga Saksi ni Jehova. “Oo, Saksi ko,” siya mitubag. “Dalhon mo nako sa relief committee.” Human sa makapadasig nga panag-estorya uban sa relief committee, nakigkita mi sa mga 1,600 ka refugee aron dasigon ug hupayon sila. Gibasa pod namo ang sulat gikan sa Nagamandong Lawas. Natandog kaayo ang mga igsoon dihang nadunggan nila kini nga pasalig: “Pirme ming nag-ampo para ninyo, ug nahibalo mi nga dili mo pasagdan ni Jehova.” Tinuod gyod ang giingon sa Nagamandong Lawas. Karon, kapin nag 30,000 ka Saksi ang malipayong nag-alagad sa Rwanda!

Human sa halos 58 ka tuig nga panag-ubanay, ang akong pinalanggang asawa nga si Elly namatay niadtong 2011. Gibubo nako kang Jehova ang akong gibati nga kaguol ug iya gyod kong gihupay. Nakahupay pod nako ang pagsangyaw bahin sa maayong balita sa Gingharian.

Bisag kapig 90 anyos na ko, mosangyaw gihapon ko kada semana. Nalipay pod ko nga makatabang sa Legal Department dinhi sa sangang buhatan sa Belgium, maka-share sa akong mga eksperyensiya, ug makadasig sa mga batan-on nga nag-alagad sa Bethel.

Mga 84 ka tuig sa miagi, nag-ampo ko kang Jehova sa unang higayon. Mao to ang sinugdanan nga nasuod ko niya, ug sukad adto, natagamtaman nako ang malipayong kinabuhi sa pag-alagad kang Jehova. Mapasalamaton kaayo ko nga sa tibuok nakong kinabuhi, gihatagan kog pagtagad ni Jehova ug gitubag niya ang akong mga pag-ampo.—Sal. 66:19. b