Aron mapalipay nato si Jehova, kinahanglang naa tay pagtuo. Pero ang Bibliya nag-ingon nga “ang pagtuo wala mabatoni sa tanang tawo.” (2 Tes. 3:2) Sa dihang gisulti kini ni Pablo, ang iyang gitumong mao ang “daotan kaayong mga tawo” nga naglutos niya. Pero ang iyang giingon puwede pong magtumong sa uban. Naay mga tawo nga mipili nga balewalaon ang klarong ebidensiya nga naay Maglalalang—ang Diyos. (Roma 1:20) Ang uban pod nagtuo nga naay naglungtad nga gamhanang persona. Pero kana nga pagtuo dili igo aron mapalipay si Jehova.

Kinahanglang kombinsido ta nga naglungtad si Jehova ug nga siya ang “tigganti” niadtong may lig-ong pagtuo kaniya. (Heb. 11:6) Ang pagtuo maoy bahin sa bunga sa balaang espiritu. Busa ang pag-ampo kang Jehova makatabang nga madawat nato kini. (Luc. 11:​9, 10, 13) Ang laing paagi nga madawat nato ang iyang espiritu mao ang pagbasa sa iyang Pulong. Dayon, pamalandongon nato ang atong nabasa ug maningkamot nga ipadapat ang atong nakat-onan. Pinaagi ana, ang espiritu ni Jehova mag-impluwensiya sa atong pagkinabuhi ug motabang nato nga mabatonan ang klase sa pagtuo nga makapalipay niya.