1. Sumala sa Salmo 18:​46, sa unsa gipakasama ni David si Jehova?

 USAHAY, makaatubang tag wala damhang mga problema nga makapalisod o makapausab pa gani sa atong kinabuhi. Maayo na lang kay naa si Jehova nga atong kadangpan! Sa miaging artikulo, napahinumdoman ta nga si Jehova ang buhi nga Diyos ug kanunay siyang andam motabang nato. Dihang maeksperyensiyahan nato mismo ang iyang tabang, makombinsir gyod ta nga “si Jehova buhi!” (Basaha ang Salmo 18:46.) Pero human kana isulti ni David, iyang gitawag ang Diyos nga “akong Bato.” Nganong iya mang gipakasama si Jehova, ang buhi nga Diyos, sa bato nga walay kinabuhi?

2. Unsay atong hisgotan niining artikuloha?

² Niining artikuloha, atong hisgotan kon nganong si Jehova gitawag nga bato ug kon unsay gitudlo niana bahin kaniya. Makat-onan pod nato kon unsaon nato pagpakita nga siya ang atong Bato. Dayon atong hisgotan ang mga paagi nga atong masundog ang samag bato nga mga hiyas ni Jehova.

KON NGANONG SI JEHOVA GITAWAG NGA BATO

3. Nganong si Jehova gipakasamag “bato”? (Tan-awa ang hulagway.)

³ Sa Bibliya, si Jehova gipakasamag “bato” aron tabangan ta nga masabtan ang pipila sa iyang mga hiyas. Sagad, kini nga pulong makita sa mga teksto nga nagdayeg kaniya ingong Diyos nga walay kaparehas. Pananglitan, unang gihisgotan si Jehova ingong “Bato” diha sa Deuteronomio 32:4. Dugang pa, si Ana miingon diha sa iyang pag-ampo nga ‘walay bato nga sama ka lig-on sa atong Diyos.’ (1 Sam. 2:2) Si Habacuc nagtawag kang Jehova nga “akong Bato.” (Hab. 1:12) Ang magsusulat sa Salmo 73 nagtawag sa Diyos nga “ang bato sa akong kasingkasing.” (Sal. 73:26) Ug bisan gani si Jehova nagtawag sa iyang kaugalingon  nga bato. (Isa. 44:8) Karon, atong hisgotan ang tulo ka samag bato nga mga hiyas ni Jehova ug sayron kon unsaon nga mahimo nato siyang “atong Bato.”—Deut. 32:31.

4. Sa unsang paagi si Jehova usa ka dangpanan? (Salmo 94:22)

⁴ Dangpanan si Jehova. Sama nga ang dakong bato manalipod nato sa kusog kaayong bagyo, si Jehova manalipod nato dihang makaatubang tag lisod nga mga situwasyon. (Basaha ang Salmo 94:22.) Iya tang giprotektahan ug gipasaligan nga walay bisan unsa nga atong giantos karon ang makahatag natog kadaot hangtod sa hangtod. Nagsaad pod siya nga sa umaabot, wad-on niya ang tanang hinungdan sa atong mga kabalaka ug pag-antos.—Ezeq. 34:​25, 26.

5. Sa unsang paagi mahimo natong Dangpanan si Jehova?

⁵ Ang usa ka paagi nga mahimo natong Dangpanan si Jehova mao ang pag-ampo kaniya. Dihang moampo ta, mabatonan nato ang “kalinaw nga gikan sa Diyos” nga magbantay sa atong kasingkasing ug hunahuna. (Filip. 4:​6, 7) Konsideraha ang eksperyensiya ni Artem, brader nga napriso tungod sa iyang pagtuo. Balikbalik siyang gisukitsukit sa imbestigador. Gipresyur pa gyod siya ug gipakaulawan. Si Artem miingon: “Mabalaka kaayo ko dihang ipatawag ko sa imbestigador. . . . Pirme kong moampo kang Jehova. Ako siyang gihangyo nga tabangan ko nga magpabiling kalmado ug hatagan kog kaalam.” Siya mipadayon: “Bisag unsa pay gihimo sa imbestigador, wala gyod to mosaler. . . . Gibati nako ang tabang ni Jehova. Mora kog nagpasalipod sa pader nga bato.”

6. Nganong makasalig ta kanunay kang Jehova? (Isaias 26:​3, 4)

⁶ Kasaligan si Jehova. Samag dako kaayong bato nga dili matarog, si Jehova naa kanunay para nato. Makasalig ta niya kay siya “ang Bato nga walay kataposan.” (Basaha ang Isaias 26:​3, 4.) Kay buhi man pirme si Jehova, naa siya kanunay para motuman sa iyang mga saad, motubag sa atong mga pag-ampo, ug motabang nato. Makasalig pod ta niya kay maunongon siya niadtong mga nag-alagad kaniya. (2 Sam. 22:26) Dili gyod niya kalimtan ang atong ginahimo, ug gantihan gyod ta niya.—Heb. 6:10; 11:6.

7. Unsay atong maeksperyensiyahan kon mosalig ta kang Jehova? (Tan-awa sab ang hulagway.)

⁷ Mahimo nato si Jehova nga atong Bato kon bug-os tang mosalig niya. Naa tay pagsalig nga kon sundon nato siya bisan sa lisod kaayo nga mga kahimtang, makabenepisyo gyod ta. (Isa. 48:​17, 18) Ug sa dihang maeksperyensiyahan nato ang iyang tabang, mas molig-on ang atong pagsalig kaniya. Mas maandam pod ta sa mga pagsulay nga ato pang atubangon sa umaabot. Sagad, sa mga panahon nga wala gyod tay laing kadangpan, diha gyod nato makita kon unsa ka kasaligan si Jehova. Ang brader nga si Vladimir miingon: “Kadtong naa ko sa detention center, mao to ang panahon nga nasuod ko pag-ayo sa Diyos. Nakakat-on ko nga mosalig pag-ayo kang Jehova kay ako rang usa ug dili nako kontrolado ang situwasyon.”

8. (a) Nganong makaingon ta nga lig-on ug dili matarog si Jehova? (b) Unsay kaayohan kon mosalig ta sa Diyos nga atong Bato? (Salmo 62:​6, 7)

 ⁸ Lig-on ug dili matarog si Jehova. Sama sa dako kaayong bato, si Jehova lig-on ug dili matarog. Dili mausab ang iyang personalidad ug katuyoan. (Mal. 3:6) Dihang mirebelde si Adan ug Eva didto sa Eden, wala usba ni Jehova ang iyang katuyoan. Sama sa gisulat ni apostol Pablo, si Jehova “dili . . . makalimod sa iyang kaugalingon.” (2 Tim. 2:13) Nagpasabot ni nga bisag unsa pay mahitabo ug bisag unsa pay buhaton sa uban, dili gyod usbon ni Jehova ang iyang personalidad, katuyoan, o mga sukdanan. Kon mosalig ta sa atong dili matarog nga Diyos, makalaom ta nga tabangan ug luwason ta niya aron makalahutay ta sa lisod nga mga kahimtang.—Basaha ang Salmo 62:​6, 7.

9. Unsay imong makat-onan sa eksperyensiya ni Tatyana?

⁹ Mahimo nato si Jehova nga atong Bato kon magpokus ta kon unsa siyang klaseha sa Diyos ug kon hunahunaon nato pirme ang iyang mga saad. Motabang ni nato nga makapabiling lig-on ug maunongon sa dihang mag-atubang ug mga pagsulay. (Sal. 16:8) Mao nay nahitabo sa sister nga si Tatyana, nga gi-house arrest tungod sa iyang pagtuo. Siya miingon: “Gibati nako nga nag-inusara na lang ko. Lisod kaayo to sa primero. Pirme kong maguol.” Pero sa dihang nasabtan niya nga ang iyang pagsulay konektado kang Jehova ug sa Iyang katuyoan, nahupayan siya ug nalig-on pag-usab. Si Tatyana miingon: “Napahinumdoman ko nga naa ko niini nga kahimtang kay gimahal nako si Jehova ug gusto nako siyang mapalipay. Tungod ani, natabangan ko nga dili magpokus sa akong kaugalingon.”

10. Unsay atong himoon karon aron mahimo nato si Jehova nga atong Bato?

¹⁰ Sa umaabot, makaatubang tag mas lisod nga mga pagsulay, ug nianang panahona kinahanglan tang mas mosalig kang Jehova. Maong karon pa lang, importante nga palig-onon na nato ang atong pagtuo nga tabangan ta ni Jehova nga makapabiling matinumanon. Unsaon nato na paghimo? Basaha ang mga asoy sa Bibliya ug ang mga eksperyensiya sa mga alagad ni Jehova karon. Pamalandonga kon giunsa pagpakita sa Diyos ang iyang samag bato nga mga hiyas sa pagtabang sa iyang mga alagad. Hunahunaa pag-ayo ang imong mga nabasa. Makatabang ni nga mahimo nimo si Jehova nga imong Bato.

SUNDOGA ANG SAMAG BATO NGA MGA HIYAS NI JEHOVA

11. Nganong gusto natong sundogon ang samag bato nga mga hiyas ni Jehova? (Tan-awa sab ang kahong “ Tumong Para sa mga Batan-ong Brader.”)

¹¹ Nahisgotan na nato ang samag bato nga mga hiyas ni Jehova. Karon atong hisgotan kon unsaon nato na pagsundog. Kon mas masundog nato ang mga hiyas ni Jehova, mas mapalig-on nato ang kongregasyon. Pananglitan, ginganlan ni Jesus si Simon nga Cefas (kon hubaron “Pedro”) nga nagkahulogang “Usa ka Pirasong Bato.” (Juan 1:42) Ang paghatag ni Jesus niana  nga ngalan nagpakita nga hupayon ug lig-onon ni Pedro ang kongregasyon. Ang mga ansiyano gipakasamag “landong sa dako kaayong bato,” nga nagpakita nga protektahan nila ang mga igsoon sa kongregasyon. (Isa. 32:2) Siyempre, ang tibuok kongregasyon makabenepisyo kon kitang tanan, dili lang ang mga ansiyano, mosundog sa samag bato nga mga hiyas ni Jehova.—Efe. 5:1.

12. Sa unsang mga paagi mahimo tang dangpanan sa mga igsoon?

¹² Mahimong dangpanan. Mahimo tang dangpanan sa mga igsoon kon pasak-on nato sila sa atong balay panahon sa mga kalamidad, kagubot, o giyera. Samtang mas magkalisod ang kahimtang niining “kataposang mga adlaw,” kinahanglan tang mas magtinabangay. (2 Tim. 3:1) Makahupay ta sa mga igsoon ug mapabati nato kanila nga gimahal nato sila. Ang usa ka paagi nga mahimo nato ni mao ang pag-abiabi kanila sa Kingdom Hall, nga makaamot sa kasuod sa kongregasyon. Nagpuyo ta sa kalibotan nga gubot kaayo ug ang mga tawo walay gugma sa usag usa. Maong kon ang atong mga igsoon motambong sa mga tigom, gusto natong himoon ang tanan natong maarangan aron madasig sila ug mobating luwas ug gimahal.

13. Sa unsang paagi ang mga ansiyano mahimong dangpanan sa mga igsoon? (Tan-awa sab ang hulagway.)

¹³ Ang mga ansiyano makatabang sa mga igsoon nga nag-atubang ug lainlaing kalisdanan. Panahon sa mga kalamidad ug medikal nga mga emerhensiya, ang mga ansiyano molihok dayon aron hatagag praktikal nga tabang ang mga igsoon. Mohatag pod silag giya ug pagdasig. Ang mga igsoon dili magduhaduha nga moduol sa usa ka ansiyano nga nailhang buotan, masinabtanon, ug andam maminaw. Kini nga mga hiyas makatabang sa uban nga mobating gimahal. Tungod ana, mas sayon para nila nga ipadapat ang bisan unsang binase sa  Bibliya nga tambag gikan sa mga ansiyano.—1 Tes. 2:​7, 8, 11.

14. Unsaon nato pagpakita nga kasaligan ta?

¹⁴ Mahimong kasaligan. Gusto natong mahibalo ang uban nga makasalig sila nato ilabina panahon sa kalisdanan. (Prov. 17:17) Unsay atong himoon aron mailhan ta nga kasaligan? Maningkamot ta nga ipakita kanunay ang maayong mga hiyas. Pananglitan, tumanon nato ang atong mga saad ug dili ta maglangan sa paghimo kon unsay gikinahanglan. (Mat. 5:37) Mohatag ta ug praktikal nga tabang niadtong mga nanginahanglan. Maningkamot pod ta nga tumanon ang atong mga asaynment sumala sa instruksiyon nga atong nadawat.

15. Kay kasaligan ang mga ansiyano, unsay epekto niana sa kongregasyon?

¹⁵ Tungod kay kasaligan ang mga ansiyano, dako kaayo nig epekto sa kongregasyon. Sa unsang paagi? Ang mga igsoon mobating gisuportahan kay nahibalo sila nga makaduol sila sa mga ansiyano, sama sa ilang tigdumala sa grupo sa pagsangyaw. Mobati pod sila nga giatiman kay nahibalo sila nga ang mga ansiyano andam  motabang nila. Dugang pa, kay gibase sa mga ansiyano ang ilang tambag gikan sa Bibliya ug sa atong mga publikasyon imbes sa ilang kaugalingong opinyon, ang mga igsoon may pagsalig nila. Mas mosalig pod ang mga igsoon sa ansiyano nga makamaong motago ug kompidensiyal nga mga butang ug motuman sa iyang saad nga dili kini isulti ngadto sa uban.

16. Unsay kaayohan para nato ug sa uban kon lig-on ta?

¹⁶ Mahimong lig-on, dili matarog. Mahimo tang maayong ehemplo sa uban kon mobarog ta kon unsay husto ug mohimo tag mga desisyon base sa mga prinsipyo sa Bibliya. Kon mas molalom ang atong kahibalo ug molig-on ang atong pagtuo, mas makabarog ta sa kamatuoran. Dili ta magpalingpaling o daling motuo sa bakak nga mga pagtulon-an ug kalibotanong panghunahuna. (Efe. 4:14; Sant. 1:​6-8) Ang atong pagtuo kang Jehova ug sa iyang mga saad motabang nato nga mahimong kalmado ug balanse dihang makadawat tag dili maayong balita. (Sal. 112:​7, 8) Makatabang pod ta sa uban nga nag-atubang ug mga pagsulay.—1 Tes. 3:​2, 3.

17. Sa unsang paagi mapalig-on sa mga ansiyano ang kongregasyon?

¹⁷ Ang mga ansiyano may pagpugong sa kaugalingon, maayog panghunahuna, organisado, ug makataronganon. Sila nakahatag ug maayong ehemplo sa mga igsoon ug nakapalig-on sa kongregasyon tungod sa ilang ‘pagpangupot pag-ayo’ sa kamatuoran. (Tito 1:9; 1 Tim. 3:​1-3) Pinaagi sa ilang ehemplo ug pag-shepherding, ang mga ansiyano nagtabang sa mga igsoon nga mahimong regular sa tigom, pagsangyaw, ug personal nga pagtuon. Sa dihang ang mga igsoon makaatubang ug wala damhang mga problema, ang mga ansiyano maningkamot pag-ayo sa pagdasig kanila nga magpokus kanunay kang Jehova ug sa iyang mga saad.

18. Nganong gusto natong dayegon si Jehova ug mas makigsuod kaniya? (Tan-awa sab ang kahong “ Usa ka Paagi nga mas Masuod Kang Jehova.”)

¹⁸ Human nato mahisgoti ang nindot kaayong mga hiyas ni Jehova, makaingon pod ta sama kang Haring David: “Madayeg unta si Jehova, ang akong Bato.” (Sal. 144:1) Si Jehova nga atong Diyos naa kanunay para nato. Pirme siyang motabang ug magpanalangin nato sa espirituwal. Maong sa tibuok natong kinabuhi, bisan hangtod sa pagkatigulang, naa gyod tay rason nga moingon: “Siya ang akong Bato.”—Sal. 92:​14, 15.