TUN-ANANG ARTIKULO 10
Kaya Nimong ‘Hukason ang Daang Personalidad’
“Hukasa ang daang personalidad apil ang mga buhat niini.”—COL. 3:9.
AWIT 29 Nagabarog sa Among Ngalan
SUMARYO *
1. Unsay imong kinabuhi sa wala pa ka magtuon ug Bibliya?
UNSAY imong kinabuhi sa wala pa ka magpa-Bible study sa mga Saksi ni Jehova? Daghan nato ang dili ganahang maghunahuna bahin ana. Ang atong panghunahuna ug personalidad kaniadto tingali naimpluwensiyahan sa sukdanan sa kalibotan kon unsay husto ug sayop. Busa kita kaniadto “walay paglaom ug wala makaila sa Diyos.” (Efe. 2:12) Pero nausab nang tanan dihang nagtuon tag Bibliya!
2. Unsay imong nakat-onan dihang nagtuon kag Bibliya?
2 Dihang nagtuon na ka sa Bibliya, nakat-onan nimo nga naa kay Amahan sa langit nga nagmahal pag-ayo nimo. Nasabtan nimo nga kon gusto nimong mapalipay si Jehova ug mahimong membro sa iyang pamilya, kinahanglang mohimo kag dagkong kausaban sa imong pagkinabuhi ug panghunahuna. Kinahanglan nimong makat-onan nga mosunod sa iyang taas nga mga sukdanan.—Efe. 5:3-5.
3. Base sa Colosas 3:9, 10, unsay gusto ni Jehova nga atong himoon, ug unsay atong hisgotan niining artikuloha?
3 Ang atong Maglalalang ug langitnong Amahan, si Jehova, naay katungod sa pagdesisyon kon unsay angayng panggawi sa mga membro sa iyang pamilya. Ug nagsugo siya nga sa dili pa ta magpabawtismo, maningkamot ta sa ‘paghukas sa daang personalidad apil sa mga buhat niini.’ * (Basaha ang Colosas 3:9, 10.) Kini nga artikulo motabang niadtong gustong magpabawtismo sa pagtubag sa tulo ka pangutana: (1) Unsa ang “daang personalidad”? (2) Nganong gusto ni Jehova nga ato ning hukason? (3) Unsaon nato ni paghimo? Para nato nga bawtismado na, kini nga pagtuon makatabang nga dili na nato mabalik ang mga kinaiya sa daang personalidad.
UNSA ANG “DAANG PERSONALIDAD”?
4. Unsay ginahimo sa tawo nga kontrolado sa “daang personalidad”?
4 Ang tawo nga kontrolado sa “daang personalidad” sagad maghunahuna ug molihok sumala sa iyang makasasala nga tendensiya. Tingali kaugalingon ray iyang gihunahuna, dali siyang masuko, dili mapasalamaton, ug garboso. Tingali ganahan siyang motan-aw ug pornograpiya, o kaha imoral o bayolenteng mga salida. Segurado nga naa siyay maayong mga hiyas, ug tingali makonsensiya siya sa iyang ginasulti o ginahimo nga dili maayo. Pero dili kaayo lig-on ang iyang tinguha nga bag-ohon ang iyang panghunahuna ug binuhatan.—Gal. 5:19-21; 2 Tim. 3:2-5.
Dihang mahukas na nato ang “daang personalidad,” dili na ta kontrolado sa makasasalang mga kinaiya ug binuhatan (Tan-awa ang parapo 5) *
5. Unsa ang balanseng panghunahuna kon bahin sa paghukas sa daang personalidad? (Buhat 3:19)
5 Dili ta perpekto, mao nga dili nato bug-os matangtang ang tanang dili maayong panghunahuna ug tinguha. Usahay makahimo o makasulti tag mga butang nga atong mahayan sa ulahi. (Jer. 17:9; Sant. 3:2) Pero dihang mahukas na nato ang daang personalidad, dili na ta kontrolado sa makasasalang mga kinaiya ug binuhatan. Lahi na ta nga klase sa tawo.—Isa. 55:7; basaha ang Buhat 3:19.
6. Nganong gidasig ta ni Jehova nga wad-on ang sayop nga panghunahuna ug dili maayong mga kinaiya sa daang personalidad?
6 Si Jehova nagdasig nato nga wad-on ang sayop nga panghunahuna ug dili maayong mga kinaiya kay gimahal ta niya pag-ayo ug gusto niyang magmalipayon ta. (Isa. 48:17, 18) Nahibalo siya nga kon magpadaog ta sa sayop nga mga tinguha, mapasakitan nato ang atong kaugalingon ug ang uban. Ug masakitan siya nga makita nga gipasakitan nato ang atong kaugalingon ug ang ubang tawo.
7. Base sa Roma 12:1, 2, unsang desisyon ang kinahanglan natong himoon?
7 Yagayagaan tingali ta usahay sa atong mga higala o pamilya kay naningkamot tang bag-ohon ang atong personalidad. (1 Ped. 4:3, 4) Moingon tingali sila nga naa tay katungod nga himoon bisan unsay atong gusto ug di ta angayng magpadiktar sa uban. Pero kadtong wala magsunod sa mga sukdanan ni Jehova walay tinuod nga kagawasan. Ang tinuod, nagpaimpluwensiya sila sa kalibotan nga gimandoan ni Satanas. (Basaha ang Roma 12:1, 2.) Kitang tanan kinahanglang mohimog desisyon: Ipadayon ba nato ang daang personalidad, nga naimpluwensiyahan sa sala ug sa kalibotan ni Satanas, o tugotan ba nato si Jehova nga bag-ohon ta aron mahimong maayong tawo?—Isa. 64:8.
UNSAON NIMO ‘PAGHUKAS’ ANG DAANG PERSONALIDAD?
8. Unsay makatabang nato aron malikayan ang sayop nga panghunahuna ug dili maayong mga kinaiya?
8 Si Jehova nahibalo nga nagkinahanglag panahon ug paningkamot ang pagsukol sa sayop nga panghunahuna ug dili maayong mga kinaiya. (Sal. 103:13, 14) Pero pinaagi sa iyang Pulong, balaang espiritu, ug organisasyon, si Jehova naghatag natog kaalam, kusog, ug tabang aron mabag-o nato ang atong kaugalingon. Segurado nga naeksperyensiyahan na nimo ang iyang tabang. Hisgotan nato karon ang puwede nimong himoon aron padayon nimong mahukas ang daang personalidad ug mokuwalipikar sa bawtismo.
9. Unsay ikatabang sa Pulong sa Diyos kanimo?
9 Gamita ang Bibliya aron masusi nimo pag-ayo ang imong kaugalingon. Ang Pulong sa Diyos morag samin; kini makatabang nimo nga masusi ang imong panghunahuna, sinultihan, ug binuhatan. (Sant. 1:22-25) Ang nag-Bible study nimo ug ang ubang hamtong nga mga Kristohanon makahatag nimog giya. Pananglitan, magamit nila ang Bibliya aron tabangan ka nga makita ang imong maayong mga hiyas ug mga kahuyangan. Matudloan ka nila kon unsaon pagpangitag binase sa Bibliya nga impormasyon nga makatabang nimo sa pagwala sa dili maayong mga kinaiya. Ug si Jehova kanunayng andam sa pagtabang nimo. Siya ang makahatag ug pinakamaayong tabang kay nahibalo siya kon unsay naa sa imong kasingkasing. (Prov. 14:10; 15:11) Busa paningkamoti nga mabatasan nimo nga mag-ampo ug magtuon sa iyang Pulong kada adlaw.
10. Unsay imong nakat-onan sa eksperyensiya ni Elie?
10 Angayng kombinsido ka nga ang mga sukdanan ni Jehova mao ang pinakamaayo. Ang tanang gipahimo ni Jehova makaayo nato. Kadtong nagsunod sa iyang mga sukdanan naay pagtahod sa kaugalingon, katuyoan sa kinabuhi, ug tinuod nga kalipay. (Sal. 19:7-11) Pero kadtong wala magsunod sa mga sukdanan ni Jehova nag-antos sa resulta sa paghimo sa mga buhat sa unod. Matikdi kon unsay giingon ni Elie bahin sa pagsupak sa mga sukdanan sa Diyos. Gipadako siya sa mga ginikanan nga nahigugma kang Jehova. Pero dihang tin-edyer na siya, gipili niya ang dili maayong mga kauban. Nagdroga siya, nagkinabuhing imoral, ug nahimong kawatan. Tungod ana, anam-anam siyang nahimong masuk-anon ug bayolente. Siya miingon: “Akong gibuhat ang tanan nga gitudlo kanako nga dili angayng buhaton sa usa ka Kristohanon.” Pero wala malimti ni Elie ang iyang nakat-onan sa bata pa siya. Sa ulahi, nagpa-Bible study siya pag-usab. Naningkamot siya nga wad-on ang iyang dili maayong mga kinaiya ug binuhatan ug nabawtismohan niadtong 2000. Unsay mga kaayohan sa iyang pagsunod sa mga sukdanan ni Jehova? Si Elie miingon: “Karon, duna na koy kalinaw sa hunahuna ug hinlong konsensiya.” * Base ani nga eksperyensiya, kadtong nagsupak sa mga sukdanan ni Jehova dili maayog gidangatan; ilang gipasakitan ang ilang kaugalingon. Pero si Jehova andam gihapong motabang nila nga magbag-o.
11. Unsang mga butang ang gidumtan ni Jehova?
11 Kat-oni nga dumtan ang gidumtan ni Jehova. (Sal. 97:10) Ang Bibliya nag-ingon nga gidumtan ni Jehova ang “mapahitas-ong mga mata, bakakong dila, [ug] mga kamot nga nagaula ug inosenteng dugo.” (Prov. 6:16, 17) “Gidumtan [pod niya] ang mga pintas ug malimbongon.” (Sal. 5:6) Gidumtan pag-ayo ni Jehova kini nga mga kinaiya ug binuhatan mao nga iyang gilaglag ang tanang daotan sa panahon ni Noe kay gipuno nilag kapintasan ang yuta. (Gen. 6:13) Matikdi ang laing pananglitan. Pinaagi kang propetang Malaquias, si Jehova miingon nga Iyang gidumtan kadtong nagluib sa ilang kapikas pinaagi sa pagplano nga makigdiborsiyo kanila. Dili dawaton sa Diyos ang ilang pagsimba ug papanubagon niya sila sa ilang binuhatan.—Mal. 2:13-16; Heb. 13:4.
Lud-on ta kon pakan-on tag daot nga pagkaon. Ingon ana pod ang angay natong bation bahin sa mga butang nga giingon ni Jehova nga daotan (Tan-awa ang parapo 11-12)
12. Unsay gipasabot sa sugo nga ‘dumtan pag-ayo ang daotan’?
12 Gusto ni Jehova nga atong ‘dumtan pag-ayo ang daotan.’ (Roma 12:9) Ang pulong “dumtan pag-ayo” maoy grabe kaayo nga pagbati. Imadyina kon unsay imong bation kon pakan-on kag daot nga pagkaon. Maghunahuna pa lang gani ka ana, lud-on na ka. Ingon ana pod kon bahin sa mga butang nga giingon ni Jehova nga daotan. Angay nga lud-on ta bisag maghunahuna pa lang niana.
13. Nganong kinahanglan natong panalipdan ang atong hunahuna?
13 Panalipdi ang imong hunahuna. Ang atong panghunahuna makaimpluwensiya sa atong binuhatan. Kanay hinungdan nga gitudloan ta ni Jesus nga tangtangon sa atong hunahuna ang bisan unsa nga moresultag seryosong sala. (Mat. 5:21, 22, 28, 29) Gusto natong mapalipay ang atong langitnong Amahan, dili ba? Busa importante gyod nga wad-on dayon nato ang bisan unsang daotang butang nga mosulod sa atong hunahuna!
14. Unsay gipaila sa atong sinultihan, ug unsang mga pangutana ang angay natong tubagon?
14 Kontrolaha ang imong sinultihan. Si Jesus miingon: “Ang mogula sa baba naggikan sa kasingkasing.” (Mat. 15:18) Oo, ang atong sinultihan nagpaila kon unsay naa sa atong kasingkasing. Busa pangutan-a ang imong kaugalingon: ‘Mosulti ba kog tinuod, bisan pag moresulta nig dili maayo para nako? Ingong minyo, dili ba ko makig-flirt sa uban? Gilikayan ba gyod nako ang bastos o dili maayong sinultihan? Kalmado ba kog tinubagan bisag gipalagot ko?’ Makatabang gyod ang pagpamalandong nianang mga pangutanaha. Ang imong sinultihan puwedeng itandi sa butones. Kon imong ablihan ang butones, mas daling hukason ang sinina. Busa kon maningkamot pod ka nga wad-on ang pagpamakak ug ang sakit, bastos, o dili maayong sinultihan, mas sayon ang paghukas sa daang personalidad.
15. Unsay gipasabot sa paglansang sa daang personalidad diha “sa estaka”?
15 Angay nga andam kang mohimog kausaban. Si apostol Pablo migamit ug ilustrasyon aron tudloan ta nga importante kaayo ang paghimog kausaban. Misulat siya nga kinahanglan natong ilansang “sa estaka” ang daang personalidad. (Roma 6:6) Sa ato pa, gusto natong sundon ang ehemplo sa Kristo. Kinahanglan natong patyon ang mga kinaiya ug binuhatan nga gidumtan ni Jehova. Pinaagi lang sa paghimo niana nga makabaton tag hinlong konsensiya ug paglaom nga mabuhi sa walay kataposan. (Juan 17:3; 1 Ped. 3:21) Hinumdomi nga dili bag-ohon ni Jehova ang iyang mga sukdanan aron lang malipay ta. Kita ang kinahanglang magbag-o ug mosunod sa iyang mga sukdanan.—Isa. 1:16-18; 55:9.
16. Nganong kinahanglang determinado ka nga padayong suklan ang sayop nga mga tinguha?
16 Padayong sukli ang sayop nga mga tinguha. Bisan dihang bawtismado na ka, kinahanglang padayon nimong suklan ang sayop nga mga tinguha. Matikdi ang eksperyensiya ni Maurício. Bata pa lang siya, homoseksuwal na siyag pagkinabuhi. Sa ulahi, nasangyawan siyag mga Saksi ni Jehova ug nagtuon siyag Bibliya. Human makahimog mga kausaban, siya nabawtismohan niadtong 2002. Pero bisag daghang tuig na siyang nag-alagad kang Jehova, siya miingon: “Angkonon ko nga usahay kinahanglan kong makigbisog sa daotang tinguha.” Pero wala niya ni tugoti nga makapaluya niya. Siya miingon: “Mapalig-on ko sa pagkahibalo nga kon pugngan nako ang akong kaugalingon, akong mapahimut-an si Jehova.” *
17. Unsay nakapadasig nimo bahin sa kasinatian ni Nabiha?
17 Pag-ampo nga tabangan ka ni Jehova, ug salig sa iyang balaang espiritu, dili sa imong kaugalingong kusog. (Gal. 5:22; Filip. 4:6) Kinahanglan tang maningkamot nga mahukas ang daang personalidad ug dili na ni mabalik ug sul-ob. Tagda ang kasinatian ni Nabiha. Gibiyaan siya sa iyang papa sa sayis anyos pa lang siya. Si Nabiha miingon: “Nasakitan kaayo ko.” Tungod ani, siya nahimong masuk-anon ug palaaway. Namaligya siyag droga, gidakop, ug pila ka tuig nga gipriso. Dayon naay mga Saksi nga nagsangyaw sa prisohan, ug nagpa-Bible study siya nila. Si Nabiha mihimog dagkong kausaban. “Ang pipila nako ka bisyo dali rang hunongon,” siya miingon. “Apan, mas lisod ang pagbiya sa panigarilyo.” Gidangtan ug kapig usa ka tuig ayha naundang ni Nabiha ang pagpanigarilyo. Unsay nakatabang niya? “Labaw sa tanan, ang makanunayong pag-ampo kang Jehova nakatabang nako nga moundang niini.” Karon, iya nang ginaingnan ang uban: “Masaligon ko nga kon makahimo ko sa pagbag-o aron pahimut-an si Jehova, mahimo kana ni bisan kinsa!” *
KAYA NIMONG MAHIMONG KUWALIPIKADO PARA SA BAWTISMO!
18. Base sa 1 Corinto 6:9-11, unsay nakayang himoon sa daghang alagad sa Diyos?
18 Sa unang siglo, ang uban niadtong mga lalaki ug babaye nga gipili ni Jehova nga maghari kauban sa Kristo daotan ug binuhatan sa wala pa mahimong Kristohanon. Pananglitan, sila kaniadto mga mananapaw, homoseksuwal, ug kawatan. Pero sa tabang sa balaang espiritu sa Diyos, nabag-o nila ang ilang personalidad. (Basaha ang 1 Corinto 6:9-11.) Karon pod, milyonmilyon ang natabangan sa Bibliya nga magbag-o sa ilang kinabuhi. * Nahunong nila ang daotang mga buhat nga nakagamot pag-ayo. Ang ilang pananglitan nagpakita nga kaya pod nimong bag-ohon ang imong personalidad ug hunongon ang daotang mga buhat aron mahimo kang kuwalipikado sa bawtismo.
19. Unsay atong hisgotan sa sunod nga artikulo?
19 Gawas pa sa pagpaningkamot nga hukason ang daang personalidad, kadtong gustong magpabawtismo angayng maningkamot nga isul-ob ang bag-ong personalidad. Ang sunod nga artikulo maghisgot kon unsaon nato nâ paghimo ug kon sa unsang paagi ang uban makatabang nato.
AWIT 41 Palihog Dungga ang Akong Pag-ampo
^ Aron mokuwalipikar sa bawtismo, kinahanglang andam tang mohimog kausaban sa atong personalidad. Tabangan ta niining artikuloha nga makita kon unsa ang mga kinaiya sa daang personalidad, kon nganong angay natong hukason ang maong mga kinaiya, ug kon unsaon nato ni paghimo. Sa sunod artikulo, hisgotan nato kon sa unsang paagi padayon natong masul-ob ang bag-ong personalidad bisag bawtismado na ta.
^ TERMINO GIPATIN-AW: Ang ‘paghukas sa daang personalidad’ nagpasabot nga atong wad-on ang mga kinaiya ug tinguha nga dili makapalipay kang Jehova. Angay nang sugdan sa dili pa ta magpabawtismo.—Efe. 4:22.
^ Alang sa dugang impormasyon, tan-awa ang artikulong “Ang Bibliya Makabag-o sa Kinabuhi—‘Kinahanglan Kong Mobalik Kang Jehova,’” sa Abril 1, 2012 nga Bantayanang Torre.
^ Alang sa dugang impormasyon, tan-awa ang artikulong “Ang Bibliya Makabag-o sa Kinabuhi—‘Maayo Kaayo Sila Nako,’” sa Mayo 1, 2012 nga Bantayanang Torre.
^ Alang sa dugang impormasyon, tan-awa ang artikulong “Ang Bibliya Makabag-o sa Kinabuhi—‘Nahimo Kong Masuk-anon ug Palaaway,’” sa Oktubre 1, 2012 nga Bantayanang Torre.
^ Tan-awa ang kahong “ Ang Bibliya Makabag-o sa Kinabuhi.”
^ HULAGWAY: Ang paghunong sa dili maayong mga kinaiya ug binuhatan samag paghukas ug hugaw nga sinina.
