Naay mga nakabasa aning estoryaha nga nakahunahuna anang pangutanaha. Pero duha ka Mepiboset ang gihisgotan aning mga bersikuloha, ug naa tay makat-onan kon atong susihon ang nahitabo.

Si Haring Saul sa Israel naay pito ka anak nga lalaki ug duha ka anak nga babaye. Ang panganay nga lalaki ni Saul mao si Jonatan. Sa ulahi, ang hari nakabaton ug laing anak nga lalaki nga ginganlag Mepiboset. Anak niya ni sa iyang puyopuyo nga si Rizpa. Pero si Jonatan naa poy anak nga lalaki nga ginganlag Mepiboset. Busa, si Haring Saul naay anak ug apo nga parehong ginganlag Mepiboset.

Ang Bibliya nag-ingon nga naay panahon nga gidumtan ni Haring Saul ang mga Gabaonhon nga nagpuyo uban sa mga Israelinhon ug misulay siya sa pagpuo kanila. Posible nga daghan kanila ang napatay. Sayop gyod to. Ngano? Kay sa panahon ni Josue, ang mga pangulo sa Israel nakigsaad sa mga Gabaonhon nga dili nila sila patyon.—Jos. 9:3-27.

Kana nga pakigsaad nagpadayon pa sa panahon ni Haring Saul. Pero wala nâ sunda sa hari kay misulay siya sa pagpatay sa tanang Gabaonhon. Tungod ana, “si Saul ug ang iyang panimalay [nahimong] sad-an sa dugo.” (2 Sam. 21:1) Sa ulahi, si David nahimong hari. Ang wala mapatay nga mga Gabaonhon nakig-estorya niya bahin sa maong grabeng kasaypanan. Gipangutana sila ni David kon unsaon pagtabon ang grabeng sala ni Saul aron panalanginan ni Jehova ang katawhan. Imbes mangayog kuwarta, ang mga Gabaonhon mihangyo nga itugyan kanila ang pito ka anak nga lalaki sa “tawo nga misulay sa pagpuo” kanila aron ilang patyon. (Num. 35:30, 31) Misugot si David sa ilang gipangayo.—2 Sam. 21:2-6.

Adtong panahona, si Saul ug Jonatan patay na tungod sa pagpakiggubat, pero buhi ang anak ni Jonatan nga si Mepiboset. Bakol si Mepiboset kay naaksidente siya sa bata pa siya, ug wala siya moapil sa gihimo sa iyang lolo sa mga Gabaonhon. Si David nakigsaad kang Jonatan nga mag-unongay sila ingong higala, ug makabenepisyo pod ani ang ilang mga kaliwat, apil na ang anak ni Jonatan nga si Mepiboset. (1 Sam. 18:1; 20:42) Ang Bibliya nag-ingon: “Ang hari [si David] naluoy kang Mepiboset nga anak ni Jonatan nga anak ni Saul, tungod sa gipanumpa ni David ug Jonatan nga anak ni Saul sa atubangan ni Jehova.”—2 Sam. 21:7.

Bisan pa niana, gihatag ni David ang gipangayo sa mga Gabaonhon. Iyang gitugyan kanila ang duha ka anak ni Saul, nga ang usa ginganlag Mepiboset, ug ang lima ka apo ni Saul. (2 Sam. 21:8, 9) Tungod sa gihimo ni David, ang katawhan dili na sad-an sa dugo.

Naa tay makat-onan sa maong hitabo. Klaro ang balaod sa Diyos. Kini nag-ingon: “Dili patyon ang mga anak tungod sa gibuhat sa ilang mga amahan.” (Deut. 24:16) Kon dili sad-an ang duha ka anak ug lima ka apo ni Saul, seguradong dili gyod mouyon si Jehova nga patyon sila. Ang balaod midugang: “Patyon lang ang usa ka tawo kon siya mismo ang makasala.” Posible nga ang pito ka kaliwat ni Saul nga gipatay mitabang niya dihang misulay siya sa pagpatay sa tanang Gabaonhon. Busa ang pito gisilotan sa ilang kasaypanan.

Kini nga hitabo nagpakita nga ang usa dili makarason nga wala siyay sala kay igo ra siyang nagsunod ug sugo. Sakto ang giingon sa Bibliya: “Pataga ang agianan sa imong tiil, ug mahimong luwas ang tanan nimong dalan.”—Prov. 4:24-27; Efe. 5:15.