1. Nganong daghang interesado ang nakadayeg dihang mitambong sila sa atong tigom sa unang higayon? (Tan-awa sab ang hulagway.)

 IMADYINA ang magtiayon nga mitambong ug tigom sa Kingdom Hall sa mga Saksi ni Jehova sa unang higayon. Nakadayeg kaayo sila kay giabiabi silag maayo ug nakita nila ang gugma sa mga igsoon sa usag usa. Sa ilang pagpauli, ang asawa miingon sa iyang bana, ‘Lahi kaayo ang mga Saksi no? Ganahan ko nila.’

2. Unsay rason nga napandol ang uban?

² Talagsaon kaayo ang gugma sa mga igsoon sa kongregasyon. Siyempre, ang mga Saksi ni Jehova dili hingpit. (1 Juan 1:8) Mao nga kon mas mailhan nato ang mga igsoon sa kongregasyon, makita pod tingali nato ang ilang mga kahuyangan. (Roma 3:23) Makapaguol kay gitugotan sa uban nga mapandol sila sa kahuyangan sa mga igsoon.

3. Unsa ang ilhanan sa tinuod nga mga sumusunod ni Jesus? (Juan 13:34, 35)

³ Tan-awag balik ang temang teksto niining artikuloha. (Basaha ang Juan 13:34, 35.) Unsa ang ilhanan sa tinuod nga mga sumusunod sa Kristo? Ang gugma, dili ang pagkahingpit. Matikdi pod nga wala moingon si Jesus: ‘Kamo makaila nga kamo akong mga tinun-an.’ Siya miingon: “Ang tanan makaila nga kamo akong mga tinun-an.” Busa gipakita ni Jesus nga dili lang ang iyang mga sumusunod ang makaila sa tinuod nga  mga Kristohanon, kondili apil pod ang mga dili magtutuo. Mailhan sila tungod sa ilang tinuod nga gugma sa usag usa.

4. Unsay gustong mahibaloan sa uban bahin sa tinuod nga mga Kristohanon?

⁴ Ang ubang dili Saksi ni Jehova tingali maghunahuna: ‘Nganong gugma ang ilhanan sa tinuod nga mga sumusunod ni Jesus? Giunsa ni Jesus pagpakitag gugma sa iyang mga apostoles? Ug unsaon nato pagsundog si Jesus?’ Ang mga Saksi angay pong mamalandong sa tubag nianang mga pangutanaha. Makatabang na nga mas mapakita nato ang gugma ilabina dihang makahimog sayop ang uban.​—Efe. 5:2.

5. Ipatin-aw ang giingon ni Jesus sa Juan 15:12, 13.

⁵ Giklaro ni Jesus nga ang iyang mga sumusunod magpakitag gugma sa usag usa sa espesyal nga paagi. (Basaha ang Juan 15:12, 13.) Matikdi ang gisugo ni Jesus kanila: “Kamo maghigugmaay sama sa akong paghigugma kaninyo.” Unsay gipasabot ana? Sama sa gipatin-aw ni Jesus, kini maoy gugma nga andam mosakripisyo​—gugma nga magpalihok sa usa ka Kristohanon nga ihatag bisan ang iyang kinabuhi para sa iyang isigkamagtutuo kon gikinahanglan. b

6. Giunsa pagpakita sa Pulong sa Diyos nga importante kaayo ang gugma?

⁶ Ang Pulong sa Diyos nagtudlo nga importante kaayo ang gugma. Daghan ang ganahan niini nga mga teksto: “Ang Diyos gugma.” (1 Juan 4:8) “Higugmaa ang imong isigkatawo sama sa imong kaugalingon.” (Mat. 22:39) “Ang gugma magtabon sa daghang sala.” (1 Ped. 4:8) “Ang gugma dili gyod molubad.” (1 Cor. 13:8) Gipakita niini nga mga teksto  ug sa uban pa nga importante kaayong ugmaron ug ipakita kining nindot nga hiyas.

7. Nganong dili gyod mahiusa ni Satanas ang mga tawo sa pagpakitag tinuod nga gugma?

⁷ Daghan ang nakapangutana: ‘Sa unsang paagi mailhan ang tinuod nga relihiyon? Ang tanang relihiyon nangangkon nga nagtudlo sila sa kamatuoran, pero lainlain man silag gitudlo bahin sa Diyos.’ Si Satanas naghimog daghang bakak nga relihiyon aron malisdan ang mga tawo sa pag-ila sa tinuod nga relihiyon. Pero dili gyod siya makahimog internasyonal nga panag-igsoonay sa mga Kristohanon nga nagpakitag gugma sa usag usa. Si Jehova lang ang makahimo niana, kay ang tinuod nga gugma naggikan kaniya. Kadto lang nakabaton sa espiritu ug panalangin ni Jehova ang makapakitag tinuod nga gugma sa usag usa. (1 Juan 4:7) Kanay rason nga miingon si Jesus nga ang tinuod nga gugma mao ang ilhanan sa iyang tinuod nga mga sumusunod.

8-9. Dihang nakita sa uban ang gugma sa mga Saksi ni Jehova, unsay epekto niini kanila?

⁸ Sama sa gitagna ni Jesus, nailhan sa daghang tawo ang iyang tinuod nga mga sumusunod tungod sa gugma nga ilang gipakita sa usag usa. Pananglitan, ang brader nga si Ian nahinumdom sa unang kombensiyon nga iyang natambongan sa sports stadium duol sa iyang balay. Pero pipila ka bulan una pa niana, mitan-aw siyag dula sa mao ra gihapon nga stadium. Siya miingon: “Dako kaayog kalainan kini nga kombensiyon. Ang mga Saksi matinahoron ug desenteg [sininaan], ug ang ilang mga anak buotan.” Siya midugang: “Labaw sa tanan, kining mga tawhana daw malipayon ug malinawon​—nga maoy akong gipangandoy. Wala koy mahinumdoman sa mga pakigpulong nianang adlawa, apan ang panggawi sa mga Saksi nagpabilin sa akong hunahuna.” c Siyempre, ang maong panggawi maoy resulta sa atong tinuod nga gugma sa usag usa. Kay gimahal nato ang atong mga igsoon, gipakitaan nato silag kaayo ug pagtahod.

⁹ Mao pod nay namatikdan sa brader nga si John niadtong nagsugod siyag tambong sa mga tigom. Siya miingon: “Nakadayeg ko sa ilang pagkamahigalaon . . . mora silag mga santos. Ang ilang tinuod nga gugma nakakombinsir nako nga akong nakaplagan ang matuod nga relihiyon.” d Daghan pag parehas ana nga mga eksperyensiya nga nagpamatuod nga ang katawhan ni Jehova mao ang tinuod nga mga Kristohanon.

10. Kanus-a ta ilabinang magpakitag Kristohanong gugma? (Tan-awa sab ang footnote.)

¹⁰ Sama sa gihisgotan sa sinugdan, ang atong mga igsoon dili hingpit. Usahay, naa silay masulti o mahimo nga makapalagot nato. e (Sant. 3:2) Ilabina niana nga mga kahimtang nga mapakita nato ang atong Kristohanong gugma pinaagi sa atong reaksiyon sa ilang nahimo. Bahin niana, unsay atong makat-onan sa ehemplo ni Jesus?​—Juan 13:15.

11. Unsang dili maayong mga kinaiya ang gipakita ni Santiago ug Juan? (Tan-awa sab ang hulagway.)

¹¹ Nahibalo si Jesus nga masayop gyod ang iyang mga sumusunod. Tungod sa iyang gugma, gitabangan niya sila nga matul-id ang  ilang dili maayong mga kinaiya aron uyonan sila ni Jehova. Kas-a, giingnan ni Santiago ug Juan ang ilang inahan nga hangyoon si Jesus nga hatagan silag taas nga posisyon sa Gingharian. (Mat. 20:20, 21) Busa gipakita ni Santiago ug Juan nga mapahitas-on sila ug gusto nilang molabaw sa uban.​—Prov. 16:18.

12. Si Santiago ug Juan lang ba ang nagpakitag dili maayong kinaiya? Ipatin-aw.

¹² Dili lang si Santiago ug Juan ang nagpakitag dili maayong kinaiya niadtong higayona. Matikdi ang reaksiyon sa ubang apostoles: “Pagkahibalo niini sa 10 ka apostoles, sila naglagot sa magsoon.” (Mat. 20:24) Maimadyin nato nga grabe gyod ang panaglalis ni Santiago, Juan, ug sa ubang apostoles. Tingali miingon ang uban: ‘Kinsa man mo para mangayog taas nga posisyon sa Gingharian? Dili lang kamo ang naghago uban ni Jesus. Angay pod ming hatagag espesyal nga mga pribilehiyo!’ Bisag unsa pay nahitabo, ang mga apostoles nalimot sa pagpakitag inigsoong gugma sa usag usa.

13. Unsay reaksiyon ni Jesus sa kahuyangan sa iyang mga apostoles? (Mateo 20:25-28)

¹³ Unsay reaksiyon ni Jesus sa nahitabo? Wala siya masuko. Wala siya moingon nga mangita siyag mas maayong mga apostoles, mga lalaki nga mas mapainubsanon ug kanunayng magpakitag gugma sa usag usa.  Hinuon, si Jesus mapailobong nakig-estorya nila kay nahibalo siya nga maayo silag kasingkasing. (Basaha ang Mateo 20:25-28.) Padayon niya silang gipakitaag gugma bisan pag dili kini ang una o kataposang higayon nga naglalis ang mga apostoles kon kinsay labaw nila.​—Mar. 9:34; Luc. 22:24.

14. Unsay kahimtang nga gidak-an sa mga apostoles ni Jesus?

¹⁴ Klaro nga gikonsiderar ni Jesus ang kahimtang nga gidak-an sa mga apostoles. (Juan 2:24, 25) Nagdako sila sa lugar diin ang mga lider sa relihiyon nagtudlo nga isipon lang nga importante ang usa ka tawo kon prominente siya ug naay taas nga posisyon. (Mat. 23:6; tan-awa ang video nga The Front Seats in the Synagogue sa study note sa Mateo 23:6.) Ang Hudiyong mga lider sa relihiyon naghunahuna pod nga mas maayo sila sa uban. f (Luc. 18:9-12) Nahibalo si Jesus nga ang gidak-an sa mga apostoles makaapektar sa ilang panglantaw sa ilang kaugalingon ug sa uban. (Prov. 19:11) Nakasabot siya nga dili hingpit ang iyang mga tinun-an, ug nagpailob siya matag higayon nga masayop sila. Nahibalo pod siya nga maayo silag kasingkasing, maong mapailobon niya silang gitabangan nga mawala ang ilang garbo ug tinguha nga labwan ang uban ug mapulihan kanag gugma.

15. Unsay atong makat-onan sa nahitabo kang Santiago, Juan, ug sa ubang apostoles?

¹⁵ Daghan tag leksiyon nga makat-onan sa gihimo sa mga apostoles. Sayop gyod ang gihimo ni Santiago ug Juan nga nangayo silag taas nga posisyon sa Gingharian. Pero nasayop pod ang ubang apostoles kay gitugotan nila ang maong situwasyon nga makabungkag sa ilang panaghiusa. Bisan pa niana, gipakitaan gihapon ni Jesus ug kaayo ug gugma ang 12 ka apostoles. Unsay atong makat-onan? Imbes magpokus sa sayop sa uban, importante nga bantayan nato ang atong reaksiyon. Unsay makatabang? Dihang masuko ta sa usa ka igsoon, pangutan-on nato ang atong kaugalingon: ‘Nganong apektado man kaayo ko sa iyang gihimo? Nagpakita ba ni nga naa koy dili maayong kinaiya nga kinahanglan nakong usbon? Naa kaha siyay giatubang nga mga problema? Bisan pag naa koy rason nga maglagot, makapakita ba kog gugma ug palabyon na lang ang nahitabo?’ Kon padayon tang magpakitag gugma sa uban, atong gipamatud-an nga tinuod ta nga mga sumusunod ni Jesus.

16. Unsa pay atong makat-onan sa gihimo ni Jesus?

¹⁶ Ang gihimo ni Jesus nagtudlo pod nato nga sabton ang atong mga igsoon. (Prov. 20:5) Tinuod, si Jesus makabasag kasingkasing, kita dili. Pero puwede natong pailoban ang atong mga igsoon sa ilang mga sayop. (Efe. 4:1, 2; 1 Ped. 3:8) Mas sayon nang himoon kon mas mailhan nato sila. Niay pananglitan.

17. Unsay kaayohan dihang mas nailhan sa tigdumala sa sirkito ang usa ka igsoon?

¹⁷ Ang usa ka tigdumala sa sirkito nahinumdom sa usa ka brader sa East Africa. Sa primero, naghunahuna siya nga ang brader dili kaayo maayog kinaiya. Unsay gihimo sa tigdumala sa sirkito? Siya miingon: “Imbes likayan ang brader, naningkamot ko nga mas mailhan siya.” Tungod ana, nahibaloan  niya ang kahimtang nga gidak-an sa brader nga maoy nakaimpluwensiya sa iyang personalidad. Siya mipadayon: “Dihang nasabtan nako kon unsa ka lisod para niya nga bag-ohon ang iyang personalidad ug kon unsa na ka dakong kausaban ang iyang nahimo, nakadayeg ko niya ug nagkasuod mi.” Oo, kon maningkamot ta nga sabton ang atong mga igsoon, mas sayon para nato nga pakitaan silag gugma.

18. Unsay puwede natong ipangutana sa atong kaugalingon kon nasakitan ta sa gihimo sa usa ka igsoon? (Proverbio 26:20)

¹⁸ Usahay, mobati tingali ta nga kinahanglan natong estoryahon ang igsoon nga nakapasakit nato. Pero maayong pangutan-on una nato ang kaugalingon: ‘Nahibalo ba ko sa tanang detalye?’ (Prov. 18:13) ‘Posible kaha nga wala niya tuyoa ang iyang gihimo?’ (Eccl. 7:20) ‘Naa pod ba koy nahimong ingon ana nga sayop?’ (Eccl. 7:21, 22) ‘Kon ako siyang estoryahon, dili kaha mosamot lang ang problema?’ (Basaha ang Proverbio 26:20.) Kon atong hunahunaon ni nga mga pangutana, posibleng makaamgo ta nga kaya rang tabonan ug gugma ang sayop sa atong igsoon.

19. Unsay determinado nimong himoon?

¹⁹ Ingong grupo, gipamatud-an natong mga Saksi ni Jehova nga kita ang tinuod nga mga tinun-an ni Jesus. Mapamatud-an sa matag usa nato nga tinuod tang mga sumusunod ni Jesus kon magpakita tag tinuod nga gugma sa atong mga igsoon bisan pa sa ilang mga kahuyangan. Kon ato nang himoon, matabangan nato ang uban nga mailhan ang tinuod nga relihiyon ug moduyog nato sa pagsimba kang Jehova, ang Diyos sa gugma. Hinaot nga determinado ta nga padayong ipakita ang gugma nga magpaila sa tinuod nga mga Kristohanon.