1-2. Kon dili pa ka andam para sa bawtismo, nganong dili ka angayng maluya? (Tan-awa ang hulagway sa atubangan sa magasin.)

 KON naghunahuna ka nga magpabawtismo, nindot kaayo na nga tumong. Andam na ba kang magpabawtismo karon? Kon andam na ka ug miuyon ang mga ansiyano, ayaw na nag dugaya. Maeksperyensiyahan unya nimo ang makapalipay nga kinabuhi sa pag-alagad kang Jehova.

² Pero naa bay miingon nimo nga kinahanglan pa kang mouswag aron mabawtismohan? O mao pod ba nay imong gibati? Kon mao, ayawg kaluya. Naa kay mahimo aron makab-ot kining importante nga tumong, batan-on man ka o tigulang na.

3. Unsay gipangutana sa Etiopianhong opisyal kang Felipe, ug unsang pangutana ang motungha? (Buhat 8:36, 38)

³ Basaha ang Buhat 8:36, 38. Ang usa ka opisyal sa palasyo sa Etiopia nangutana kang Felipe nga tig-ebanghelyo: “Unsay nakapugong nako nga mabawtismohan?” Ang Etiopianhon gusto nang magpabawtismo. Pero andam na ba gyod siya para nianang importante nga desisyon?

4. Giunsa pagpakita sa Etiopianhon nga gusto gyod niya nga mahibalog dugang?

⁴ Ang Etiopianhon “miadto sa Jerusalem aron mosimba.” (Buh. 8:27) Sa ato pa, nakabig na siya sa mga Hudiyo; Judaismo na ang iyang relihiyon. Seguradong nakakat-on siya bahin kang Jehova gikan sa sagradong mga basahon sa Hebreohanong Kasulatan. Pero gusto pa niyang mahibalog dugang. Gani, unsay iyang gihimo diha sa dalan dihang nakita siya ni Felipe? Nagbasa siya sa linukot nga basahon ni propetang Isaias. (Buh. 8:28) Kadto maoy gahi nga espirituwal nga pagkaon. Ang opisyal sa palasyo dili kontento nga mahibalo lang sa simpleng mga pagtulon-an sa Bibliya; gusto niya nga mahibalog dugang.

5. Unsay gihimo sa Etiopianhon sa iyang nakat-onan?

 ⁵ Ang opisyal nag-alagad kang Rayna Candace sa Etiopia ug taas siyag ranggo; siyay ‘nagdumala sa tanang bahandi’ sa rayna. (Buh. 8:27) Busa, seguradong busy siya kay daghan siyag responsibilidad. Pero naggahin gihapon siyag panahon sa pagsimba kang Jehova. Dili siya kontento nga makakat-on lang sa kamatuoran; milihok siya base sa iyang nakat-onan. Mao nga bisag layo, mibiyahe siya gikan sa Etiopia paingon sa templo sa Jerusalem aron mosimba kang Jehova. Dugay to nga biyahe ug dakog gasto, pero andam niyang himoon ang bisan unsa aron simbahon si Jehova.

6-7. Nganong milalom ang gugma sa Etiopianhon kang Jehova?

⁶ Gitudloan ni Felipe ang Etiopianhon ug pipila ka bag-o ug importanteng kamatuoran, sama sa kon kinsa ang Mesiyas. (Buh. 8:34, 35) Seguradong natandog ang opisyal dihang nahibaloan niya kon unsay gibuhat ni Jesus para niya. Busa unsay gihimo sa opisyal? Puwede ra unta siyang magpabilin ingong tinahod nga Hudiyong kinabig. Pero milalom ang iyang gugma kang Jehova ug sa Iyang Anak. Tungod ana, midesisyon siya nga magpabawtismo ingong sumusunod ni Jesu-Kristo​—desisyon nga makapausab sa iyang kinabuhi. Nakita ni Felipe nga andam na ang opisyal, maong iya siyang gibawtismohan.

⁷ Kon imong sundon ang gihimo sa Etiopianhon, mahimo kang andam para sa bawtismo. Sama niya, makaingon pod ka, “Unsay nakapugong nako nga mabawtismohan?” Atong hisgotan kon unsaon nimo pagsundog ang iyang gihimo: Padayon siyang nagkat-on, milihok siya base sa iyang nakat-onan, ug gipalalom niya ang iyang gugma sa Diyos.

8. Unsay gidasig sa Juan 17:3 nga imong buhaton?

⁸ Basaha ang Juan 17:3. Ang giingon ba ni Jesus dinhi nakatabang nimo nga makadesisyon nga magtuon ug Bibliya? Daghan nato ang natabangan niana. Pero ang giingon ba ni Jesus nagdasig pod nato nga padayong magkat-on? Oo. Dili gyod ta moundang sa atong mga paningkamot nga ‘mailhan ang bugtong matuod nga Diyos.’ (Eccl. 3:11) Padayon tang mokat-on hangtod sa hangtod. Samtang magkadaghan ang atong makat-onan, mas masuod ta kang Jehova.​—Sal. 73:28.

9. Unsay kinahanglan natong himoon human ta makakat-on sa pangunang mga kamatuoran?

⁹ Siyempre, dihang nagsugod tag tuon bahin kang Jehova, ang una natong nakat-onan mao ang pangunang mga pagtulon-an. Sa sulat ni apostol Pablo sa mga Hebreohanon, iyang gitawag kini nga mga pagtulon-an ingong “simpleng mga butang.” Wala niya  pakamenosa ang mga butang nga “una natong nakat-onan.” Gani gipakasama niya kinig gatas nga makapahimsog sa bata. (Heb. 5:12; 6:1) Pero gidasig pod niya ang tanang Kristohanon nga dili lang makontento sa pangunang mga pagtulon-an, kondili mokat-on pod sa lawom nga mga kamatuoran sa Pulong sa Diyos. Naugmad na ba nimo ang tinguha nga makakat-on sa lawom nga mga pagtulon-an sa Bibliya? Gusto ba nimo nga padayong mouswag, nga padayong makakat-on bahin kang Jehova ug sa iyang mga katuyoan?

10. Nganong lisod para sa uban ang pagtuon?

¹⁰ Pero daghan nato ang nalisdan sa pagtuon. Kana pod bay imong gibati? Sa eskuwelahan, nakakat-on ba kag maayo sa pagbasa ug pagtuon? Nag-enjoy ba ka sa imong pagtuon ug gibati ba nimo nga daghan kag nakat-onan? O naghunahuna ba hinuon ka nga dili ka daling makakat-on sa mga libro? Kon mao, dili lang ikaw ang mibati niana. Pero makatabang nimo si Jehova. Siya ang pinakamaayong Magtutudlo.

11. Giunsa pagpakita ni Jehova nga siya ang “Dakong Instruktor”?

¹¹ Si Jehova miingon nga siya “ang imong Dakong Instruktor.” (Isa. 30:20, 21) Siya mapailobon, buotan, ug masinabtanon nga Magtutudlo. Nagpokus siya sa potensiyal ug maayong mga hiyas sa iyang mga estudyante. (Sal. 130:3) Ug dili gyod siya magdahom ug labaw pa sa atong mahimo. Hinumdomi nga siyay naghimo sa imong utok, nga usa ka nindot kaayo nga regalo. (Sal. 139:14) Naa tay natural nga tinguha nga mokat-on. Gusto sa atong Maglalalang nga padayon tang magkat-on hangtod sa hangtod​—ug mag-enjoy niana. Busa karon pa lang, maayong ‘ugmaron nato ang pagpangandoy’ sa mga kamatuoran sa Bibliya. (1 Ped. 2:2) Paghimog mga tumong nga kaya nimong kab-oton, ug sunda ang imong eskedyul sa pagbasa ug pagtuon sa Bibliya. (Jos. 1:8) Sa tabang ni Jehova, ma-enjoy nimo ang pagbasa ug pagkat-on bahin niya.

12. Nganong angay natong tun-an ang kinabuhi ug ministeryo ni Jesus?

¹² Paggahin kanunay ug panahon nga mamalandong sa kinabuhi ug ministeryo ni Jesus. Ang pagsundog pag-ayo sa ehemplo ni Jesus importante aron makaalagad ta kang Jehova, ilabina niining kataposang mga adlaw. (1 Ped. 2:21) Giingnan daan ni Jesus ang iyang mga sumusunod nga makaatubang silag mga kalisdanan. (Luc. 14:27, 28) Pero segurado siya nga ang iyang tinuod nga mga sumusunod molampos pod sama niya. (Juan 16:33) Tun-i ang mga detalye sa kinabuhi ni Jesus, ug himoang tumong nga sundogon siya sa imong adlaw-adlawng pagkinabuhi.

13. Unsay padayon nimong ihangyo kang Jehova, ug ngano?

¹³ Dili igo ang kahibalo lang. Kinahanglang mapalihok ka niini nga mokat-og dugang bahin kang Jehova ug ugmaron ang mga hiyas sama sa gugma ug pagtuo kaniya. (1 Cor. 8:1-3) Samtang padayon kang magkat-on, padayong hangyoa si Jehova nga tabangan ka nga makabaton ug dugang pagtuo. (Luc. 17:5) Tubagon gyod niya ang maong mga pag-ampo. Ang tinuod nga pagtuo nga gibase sa tukmang kahibalo bahin sa atong Diyos motabang nimo nga mohimog dugang pag-uswag.​—Sant. 2:26.

14. Giunsa pagpasiugda ni apostol Pedro nga importante kaayo nga ipadapat nato ang atong nakat-onan? (Tan-awa sab ang hulagway.)

¹⁴ Gipasiugda ni apostol Pedro kon unsa ka importante nga padayong ipadapat sa mga sumusunod sa Kristo ang ilang nakat-onan. Iyang gihisgotan ang estorya sa Bibliya bahin kang Noe. Giingnan ni Jehova si Noe nga Iyang laglagon ang daotang mga tawo sa iyang panahon  pinaagig lunop. Aron maluwas si Noe ug ang iyang pamilya, dili igo ang pagkahibalo lang nga naay moabot nga lunop. Matikdi nga si Pedro naghisgot bahin sa panahon sa wala pa ang Lunop, “samtang gitukod ang arka.” (1 Ped. 3:20) Oo, si Noe ug ang iyang pamilya milihok base sa ilang nahibaloan gikan sa Diyos pinaagi sa paghimo sa dako kaayong arka. (Heb. 11:7) Dayon, ang gihimo ni Noe gipakasama ni Pedro sa bawtismo. Siya misulat: “Ang bawtismo, nga maoy katumbas niini, nagaluwas sab kaninyo karon.” (1 Ped. 3:21) Busa ang imong ginahimo karon agig pagpangandam para sa bawtismo puwede natong ipakasama sa pagtukod ni Noe ug sa iyang pamilya sa arka sulod sa daghang tuig. Unsay kinahanglan nimong himoon aron maandam ka sa bawtismo?

15. Unsaon nato pagpakita nga tinuod tang naghinulsol?

¹⁵ Ang usa sa mga una natong himoon mao ang sinserong paghinulsol sa atong mga sala. (Buh. 2:37, 38) Kon tinuod ang atong paghinulsol, tinud-anay pod ang atong pagbag-o. Gihunong na ba nimo ang mga binuhatan nga dili makapalipay kang Jehova, sama sa imoral nga pagkinabuhi, pagpanigarilyo, o bastos o sakit nga sinultihan? (1 Cor. 6:9, 10; 2 Cor. 7:1; Efe. 4:29) Kon wala pa, paningkamoti nga padayon kang mohimog mga kausaban. Pakig-estorya sa nag-Bible study nimo, o pangayog tabang ug giya sa mga ansiyano sa kongregasyon. Kon batan-on pa ka ug nagpuyo uban sa imong ginikanan, hangyoa sila nga tabangan kang mahunong ang daotang batasan o bisyo nga makapugong nimo sa pagpabawtismo.

16. Unsay apil sa maayong espirituwal nga rutina?

¹⁶ Importante pod nga naa tay maayong espirituwal nga rutina. Apil niana ang pagtambong ug pagpakigbahin sa mga tigom. (Heb. 10:24, 25) Ug kon kuwalipikado na kang mouban sa ministeryo, paningkamoti nga regular kang makasangyaw. Kon pirme kang makigbahin niining buluhaton nga makaluwas ug kinabuhi, mas mag-enjoy ka niini. (2 Tim. 4:5) Kon batan-on ka ug nagpuyo uban sa imong ginikanan, pangutan-a ang imong kaugalingon: ‘Kinahanglan pa ba kong pahinumdoman sa akong ginikanan nga motambong sa mga tigom ug mosangyaw, o dili na ko kinahanglang sultihan?’ Kon imo nang gihimo nga kinabubut-on, gipakita nimo ang imong pagtuo, gugma, ug  pagkamapasalamaton kang Jehova nga Diyos. Kini maoy “mga buhat nga nagpakitag debosyon sa Diyos,” mga regalo nga imong gihatag kang Jehova. (2 Ped. 3:11; Heb. 13:15) Malipay ang atong Diyos kon kinabubut-on ug dili pinugos ang atong paghatag. (Itandi ang 2 Corinto 9:7.) Ato nang ginahimo kay malipay ta nga ihatag ang atong pinakamaayo kang Jehova.

17-18. Unsang importanteng hiyas ang makatabang nimo nga mouswag ngadto sa bawtismo, ug ngano? (Proverbio 3:3-6)

¹⁷ Samtang padayon kang mouswag ngadto sa bawtismo, makaatubang kag mga pagsulay. Tingali yagayagaan ka sa uban tungod sa imong bag-ong tinuohan; basin ila pa gani kang supakon o lutoson. (2 Tim. 3:12) Samtang naningkamot ka nga mahunong ang usa ka dili maayong buhat, basig naa gihapoy mga panahon nga imo nang mahimo. O tingali mawad-an kag pailob o maguol kay morag dili nimo makab-ot ang imong tumong. Unsay makatabang nimo nga magpadayon? Ang importante kaayo nga hiyas​—ang imong gugma kang Jehova.

¹⁸ Ang imong gugma kang Jehova maoy nindot kaayo nga hiyas. Gani, kini ang imong pinakamaayong hiyas. (Basaha ang Proverbio 3:3-6.) Ang imong dakong gugma sa Diyos makatabang nga dili ka mosurender bisan pa sa mga problema. Ang Bibliya sagad maghisgot sa maunongong gugma ni Jehova sa iyang mga alagad. Kini nagpasabot nga dili siya mobiya sa iyang mga alagad o moundang sa paghigugma kanila. (Sal. 100:5) Gihimo ka sumala sa larawan sa Diyos. (Gen. 1:26) Unsaon nimo pagpakita ang maong gugma?

19. Sa unsang paagi mahimo kang mas mapasalamaton sa tanang gihimo ni Jehova para nimo? (Galacia 2:20)

¹⁹ Una, ipakita nga mapasalamaton ka. (1 Tes. 5:18) Kada adlaw, pangutan-a ang imong kaugalingon, ‘Giunsa pagpakita ni Jehova nga gimahal ko niya?’ Dayon sa imong mga pag-ampo, seguroa nga mapasalamatan nimo si Jehova ug hisgoti ang espesipikong mga butang nga iyang gihimo para nimo. Isipa ang mga buhat ni Jehova ingong personal nga gugma niya para nimo, nga mao poy naamgohan ni apostol Pablo bahin kang Jehova. (Basaha ang Galacia 2:20.) Pangutan-a ang imong kaugalingon, ‘Gusto pod ba nakong ipakita ang akong gugma kaniya?’ Ang imong gugma kang Jehova makatabang nimo nga suklan ang mga tentasyon ug molahutay sa mga kalisdanan. Kini magpalihok nimo nga mentinahon ang imong espirituwal  nga rutina ug padayong ipakita ang imong gugma sa imong Amahan kada adlaw.

20. Unsay gipasabot sa pagpahinungod sa imong kaugalingon kang Jehova, ug nganong importante kaayo ni nga desisyon?

²⁰ Sa ngadtongadto, ang imong gugma kang Jehova magpalihok nimo nga mohimog espesyal nga pag-ampo. Magpahinungod na ka sa imong kaugalingon sa Diyos. Hinumdomi nga kon nagpahinungod na ka kang Jehova, naa na kay nindot kaayo nga paglaom: Puwede na nimo siyang mahimong Amahan hangtod sa hangtod. Sa imong pagpahinungod, nanaad ka nga moalagad niya bisag unsa pay kahimtang, maayo man o dili. Kas-a ra nimo himoon kini nga panaad. Tinuod, seryosong desisyon ang pagpahinungod kang Jehova. Pero hunahunaa ni: Sa imong kinabuhi, daghan kag himoong desisyon, ug ang uban niana maayo kaayo. Pero ang imong pagpahinungod kang Jehova mao ang pinakamaayong desisyon nga imong mahimo, ug wala nay molabaw ana. (Sal. 50:14) Maningkamot si Satanas nga pahuyangon ang imong gugma sa imong Amahan aron dili na ka magmatinumanon Kaniya. Ayaw gyod padaog kang Satanas! (Job 27:5) Ang imong dakong gugma kang Jehova motabang nimo nga tumanon ang imong panaad ug mas masuod pa sa imong langitnong Amahan.

21. Nganong makaingon ta nga ang bawtismo dili mao ang kataposan kondili ang sinugdanan?

²¹ Human ka magpahinungod kang Jehova, pakig-estorya sa mga ansiyano sa inyong kongregasyon bahin sa sunod nga importanteng himoon. Pero hinumdomi kanunay nga ang bawtismo dili mao ang kataposan, kondili ang sinugdanan. Kini ang sinugdanan sa imong pag-alagad kang Jehova hangtod sa hangtod. Busa karon pa lang, palig-ona ang imong gugma sa imong Amahan. Paghimog mga tumong aron ang imong gugma motubo kada adlaw. Ang paghimo niining tanan magpalihok nimo nga magpabawtismo. Malipayon unya kaayo na nga adlaw. Pero sinugdanan pa lang na. Hinaot nga ang imong gugma kang Jehova ug sa iyang Anak padayong motubo hangtod sa hangtod!