Nganong ang manlulukat nga gihisgotan ni Boaz miingon nga “mameligro” ang iyang panulondon kon iyang minyoan si Ruth? (Ruth 4:1, 6)

Sa panahon sa Bibliya, kon ang minyo nga lalaki mamatay nga walay anak, naay mga pangutana nga motungha: Unsay mahitabo sa iyang gipanag-iya nga yuta? Mawala na ba hangtod sa hangtod ang iyang ngalan? Gitubag kana sa Moisesnong Balaod.

Unsay mahitabo sa yuta sa lalaki nga namatay o napobre ug nagbaligya sa iyang yuta? Ang igsoong lalaki o duol nga paryente puwedeng molukat sa yuta. Pinaagi niini, ang yuta magpabilin sa pamilya.​—Lev. 25:23-28; Num. 27:8-11.

Unsaon pagseguro nga dili mawala ang ngalan sa namatay nga lalaki? Minyoan sa bayaw nga lalaki ang biyuda sa iyang igsoon aron makapatunghag kaliwat nga maoy modala sa ngalan sa namatay ug manunod sa propidad niini. Mahigugmaon pod ni nga kahikayan kay maatiman ang biyuda.​—Deut. 25:5-7; Mat. 22:23-28.

Tagda pananglitan si Noemi. Naminyo siya kang Elimelek. Dihang namatay ang iyang bana ug duha ka anak nga lalaki, wala nay laing lalaki sa pamilya nga makaatiman niya. (Ruth 1:1-5) Dihang mibalik si Noemi sa Juda uban sa iyang binalaye nga si Ruth, giingnan niya si Ruth nga hangyoon si Boaz nga lukaton ang ilang yuta. Si Boaz duol nga paryente ni Elimelek. (Ruth 2:1, 19, 20; 3:1-4) Pero nahibalo si Boaz nga naa pay laing ‘mas duol nga paryente,’ nga maoy unang hatagag kahigayonan nga mahimong manlulukat.​—Ruth 3:9, 12, 13.

Sa primero, ang mas duol nga paryente andam motabang. (Ruth 4:1-4) Bisan pag mogasto siya aron lukaton ang yuta, nahibalo siya nga si Noemi dili na makapatunghag anak nga makapanunod sa yuta ni Elimelek. Busa maadto sa iyaha ang yuta ni Elimelek. Pabor kaayo ni niya kay madugangan pa ang iyang yuta.

Pero nausab ang iyang hunahuna dihang nahibaloan niya nga si Ruth ang iyang minyoan. Siya miingon: “Dili nako kana malukat kay basig mameligro ang akong kaugalingong panulondon.” (Ruth 4:5, 6) Nganong nausab ang iyang hunahuna?

Kon siya o ang laing lalaki makigminyo kang Ruth ug manganak si Ruth ug batang lalaki, ang bata ang makapanunod sa yuta ni Elimelek. Nganong miingon man siya nga “mameligro” ang iyang “panulondon”? Walay giingon ang Bibliya, pero niay pipila ka posibleng rason.

• Una, maalkansi siya sa iyang gigasto kay dili man siya ang makapanag-iya sa yuta ni Elimelek. Maadto kini sa anak ni Ruth.

• Ikaduha, responsibilidad niya nga pakan-on ug atimanon si Noemi ug Ruth.

• Ikatulo, kon madugangan ang ilang anak ni Ruth, kinahanglan niya silang hatagag panulondon sama sa uban niyang mga anak.

• Ikaupat, kon wala gyod siyay laing anak, ang bata nga ipanganak ni Ruth mao ang makapanunod sa yuta ni Elimelek ug sa iya mismong yuta. Busa ang iyang yuta maadto sa bata nga nagdala sa ngalan ni Elimelek. Kay nahadlok nga basig mawala ang iyang panulondon, wala niya tabangi si Noemi. Iyang gihatag sa sunod nga manlulukat, si Boaz, ang maong responsibilidad. Gidawat kadto ni Boaz kay gusto niya nga “ang panulondon sa tawong namatay magpabilin sa iyang ngalan.”​—Ruth 4:10.

Atong nakita nga ang mas duol nga paryente mas interesado sa pagpreserbar sa iyang ngalan ug panulondon. Mas milabaw ang iyang kahakog. Naningkamot siya nga mapreserbar ang iyang ngalan, pero wala gani bisan usa nato karon nga nahibalo sa iyang ngalan. Wala pod niya madawat ang espesyal nga pribilehiyo nga nadawat ni Boaz​—nga malista ingong usa sa mga katigulangan sa Mesiyas, si Jesu-Kristo. Sayang kaayo nga gipalabay niya ang kahigayonan nga tabangan ang nanginahanglan tungod sa iyang kahakog!​—Mat. 1:5; Luc. 3:23, 32.