1-2. Unsay sagad mahitabo dihang naay magpabawtismo, ug unsay angay nimong konsiderahon?

 NAKAKITA na ba kag grupo sa mga magpabawtismo? Tingali nadungog nimo ang kombiksiyon sa ilang mga tingog dihang gitubag nila ang duha ka pangutana sa wala pa sila bawtismohi. Nakita nimo nga lipay kaayo ang ilang pamilya ug mga higala. Paghaw-as nila sa tubig, imong nadungog ang palakpak ug nakita ang kalipay sa ilang mga nawong. Sa average, linibo kada semana ang magpahinungod ug magpabawtismo ingong Saksi ni Jehova.

² Komosta ka? Kon naghunahuna ka nga magpabawtismo, sama kag nagasidlak nga kahayag niining daotang kalibotan kay “nangita [ka] kang Jehova.” (Sal. 14:1, 2) Kini nga artikulo gisulat para nimo, batan-on man ka o tigulang na. Pero para natong bawtismado na, gusto pod natong palig-onon ang atong determinasyon nga alagaron si Jehova hangtod sa hangtod. Busa hisgotan nato ang tulo sa daghang rason kon nganong moalagad ta kang Jehova.

3. Nganong ang mga alagad ni Jehova nahigugma sa kamatuoran ug pagkamatarong? (Salmo 119:128, 163)

³ Gisugo ni Jehova ang iyang katawhan nga ‘higugmaon ang kamatuoran.’ (Zac. 8:19) Gidasig ni Jesus ang iyang mga sumusunod nga tinguhaon ang pagkamatarong. (Mat. 5:6) Kini nagpasabot nga kinahanglang gusto kaayo natong himoon kon unsay husto, maayo, ug hinlo sa panan-aw sa Diyos. Gihigugma ba nimo ang kamatuoran ug ang pagkamatarong? Segurado mi nga imo nang gihigugma. Gidumtan nimo ang bakak ug ang tanang butang nga sayop ug daotan. (Basaha ang Salmo 119:128, 163.) Ang pagpamakak nagpakita sa personalidad ni Satanas, ang magmamando niining kalibotana. (Juan 8:44; 12:31) Usa sa mga tumong ni Satanas mao ang pagdaot sa balaang ngalan ni Jehova nga Diyos. Sukad sa rebelyon sa Eden, si Satanas nagpakaylap ug mga bakak bahin sa atong Diyos. Gipatuo niya  ang mga tawo nga si Jehova hakog ug dili matinud-anon nga Magmamando kay naa kunoy maayong mga butang nga wala Niya ihatag sa mga tawo. (Gen. 3:1, 4, 5) Ang mga bakak ni Satanas bahin kang Jehova maoy samag hilo nga padayong nagdaot sa hunahuna ug kasingkasing sa mga tawo. Kon pilion sa mga tawo nga dili ‘higugmaon ang kamatuoran,’ puwede silang maimpluwensiyahan ni Satanas nga himoon ang tanang klase sa daotang mga buhat.​—Roma 1:25-31.

4. Giunsa pagpakita ni Jehova nga siya “ang Diyos sa kamatuoran”? (Tan-awa sab ang hulagway.)

⁴ Si Jehova “ang Diyos sa kamatuoran,” ug iyang gitudloan sa kamatuoran ang tanang nahigugma kaniya. (Sal. 31:5) Pinaagi niana, gitabangan niya sila nga dili na mailad sa mga bakak ni Satanas. Gitudloan sab ni Jehova ang iyang mga alagad nga magmatinud-anon ug himoon kon unsay matarong. Tungod ana, naa silay dignidad ug kalinaw sa hunahuna. (Prov. 13:5, 6) Mao pod ba nay gihimo ni Jehova para nimo sa dihang nagtuon kag Bibliya? Imong nakat-onan nga ang mga paagi ni Jehova mao ang makahatag ug kaayohan sa tanang tawo, ug ikaw mismo nakaeksperyensiya niana. (Sal. 77:13) Busa gusto nimong modapig sa kon unsay matarong sa panglantaw sa Diyos. (Mat. 6:33) Gusto nimong depensahan ang kamatuoran ug pamatud-an nga bakak ang giingon ni Satanas bahin sa atong Diyos nga si Jehova. Unsaon nimo na paghimo?

5. Sa unsang paagi ka makabarog dapig sa kamatuoran ug pagkamatarong?

⁵ Mapakita nimo sa imong pagkinabuhi nga dapig ka sa kamatuoran ug sa pagkamatarong, nga samag miingon ka: “Di gyod nako tuohan ang mga bakak ni Satanas, ug dapig ko sa kamatuoran. Si Jehova ang akong gipili nga Magmamando, ug buhaton nako kon unsay husto para niya.” Unsaon nimo na paghimo? Pag-ampo kang Jehova ug ipahinungod ang imong kaugalingon kaniya, ug dayon pagpabawtismo. Kon nahigugma ka sa kon unsay tinuod ug matarong, mapalihok gyod ka nga magpabawtismo.

6. Base sa Salmo 45:4, unsay mga rason nga imong gihigugma si Jesu-Kristo?

⁶ Nganong imong gihigugma si Jesu-Kristo? Matikdi ang pipila ka maayong rason nga mabasa sa Salmo 45:4. (Basaha.) Si Jesus nahigugma sa kamatuoran, pagkamapainubsanon, ug pagkamatarong. Kon gihigugma nimo ang kamatuoran ug pagkamatarong, natural lang nga gihigugma pod nimo si Jesu-Kristo. Hunahunaa  kon sa unsang paagi si Jesus maisogong midepensa sa kon unsay tinuod ug husto. (Juan 18:37) Pero giunsa pagpakita ni Jesus nga importante ang pagkamapainubsanon?

7. Nganong ganahan ka sa pagkamapainubsanon ni Jesus?

⁷ Gipakita ni Jesus nga importante ang pagkamapainubsanon pinaagi sa iyang ehemplo. Pananglitan, gusto niya nga ang iyang Amahan ang madayeg, dili siya. (Mar. 10:17, 18; Juan 5:19) Unsay imong gibati sa pagkamapainubsanon ni Jesus? Seguradong napalihok ka nga higugmaon ang Anak sa Diyos ug sundogon siya. Nganong mapainubsanon si Jesus? Kay iyang gimahal ug gisundog ang iyang mapainubsanong Amahan. (Sal. 18:35; Heb. 1:3) Dili ba naapresyar nimo si Jesus kay iyang gisundog pag-ayo ang mga hiyas ni Jehova?

8. Nganong gimahal nato si Jesus ingong atong Hari?

⁸ Gimahal nato si Jesus ingong atong Hari kay siya ang pinakakuwalipikado nga magmando nato. Si Jehova mismo ang nagbansay sa iyang Anak ug nagpili niya ingong Hari. (Isa. 50:4, 5) Hunahunaa sab ang gugma ug pagsakripisyo nga gipakita ni Jesus. (Juan 13:1) Kay si Jesus man ang imong Hari, angay lang nga imo siyang higugmaon. Siya miingon nga kadtong tinuod nga nahigugma niya​—kadtong gitawag niya nga iyang mga higala—​magpakita sa ilang gugma pinaagi sa pagsunod sa iyang mga sugo. (Juan 14:15; 15:14, 15) Pagkadakong pribilehiyo nga mahimong higala sa Anak ni Jehova!

9. Sa unsang paagi ang bawtismo sa mga Kristohanon parehas sa bawtismo ni Jesu-Kristo?

⁹ Ang usa sa mga gisugo ni Jesus sa iyang mga sumusunod mao ang pagpabawtismo. (Mat. 28:19, 20) Gani siya mismo nagpabawtismo. Sa pipila ka paagi, ang iyang bawtismo lahi nianang sa iyang mga sumusunod. (Tan-awa ang kahon nga “ Ang Bawtismo ni Jesus ug Bawtismo sa Iyang mga Sumusunod​—Kon Unsay Kalainan.”) Pero sa ubang bahin, parehas ni. Nagpabawtismo si Jesus aron ipakita nga iyang himoon ang kabubut-on sa iyang Amahan. (Heb. 10:7) Sa samang paagi, ang mga sumusunod ni Jesu-Kristo magpabawtismo aron ipakita sa tanan nga ila nang gipahinungod ang ilang kaugalingon kang Jehova nga Diyos. Ang ilang kinabuhi karon nakapokus na sa pagbuhat sa iyang kabubut-on, dili sa ilang gusto. Busa ilang gisunod ang ehemplo sa ilang Agalon.

10. Nganong ang imong gugma kang Jesus magpalihok nimo nga magpabawtismo?

¹⁰ Imong gidawat si Jesus ingong ang bugtong Anak ni Jehova ug ingong Hari nga gipili sa Diyos sa pagmando kanato. Nahibalo ka nga si Jesus mapainubsanon ug gisundog niya pag-ayo ang iyang Amahan. Nakat-onan nimo nga iyang gipakaon ang mga gigutom, gihupay ang mga naluya, ug giayo pa gani ang mga masakiton. (Mat. 14:14-21) Nakita nimo kon giunsa niya paggiya ang iyang kongregasyon karon. (Mat. 23:10) Ug nahibalo ka nga ingong Hari sa Gingharian sa Diyos, mas labaw pa niana ang iyang himoon sa umaabot. Unsaon nimo pagpakita nga gimahal nimo si Jesus? Pinaagi sa pagsundog sa iyang ehemplo. (Juan 14:21) Ang usa sa imong mahimo aron masundog siya mao ang pagpahinungod sa imong kaugalingon kang Jehova ug pagpabawtismo.

11. Unsa ang pinakaimportanteng rason sa pagpabawtismo, ug ngano?

¹¹ Unsa ang pinakaimportanteng rason sa pagpabawtismo? Gisulti ni Jesus ang kinalabwang sugo sa Diyos: “Higugmaa si Jehova nga imong Diyos sa tibuok mong kasingkasing, sa tibuok mong kalag, sa tibuok mong hunahuna, ug sa tibuok mong kusog.” (Mar. 12:30) Ingon ana ba ang imong gugma sa Diyos?

12. Nganong gihigugma nimo si Jehova? (Tan-awa sab ang hulagway.)

¹² Daghan kaayog rason nga higugmaon si Jehova.  Pananglitan, nahibaloan nimo nga siya “ang tuboran sa kinabuhi” ug siya ang naghatag sa “matag maayong gasa ug matag hingpit nga regalo.” (Sal. 36:9; Sant. 1:17) Ang matag maayong butang nga imong napahimuslan naggikan sa atong mahinatagon ug mahigugmaong Diyos.

13. Nganong espesyal kaayo nga regalo ang lukat?

¹³ Ang lukat maoy espesyal kaayo nga regalo ni Jehova kanato. Nganong makaingon ta ana? Hunahunaa kon unsa ka suod si Jehova ug ang iyang Anak. Si Jesus miingon: “Gihigugma ko sa Amahan” ug “gihigugma nako ang Amahan.” (Juan 10:17; 14:31) Suod kaayo sila kay magkauban sila sulod na sa bilyonbilyong katuigan. (Prov. 8:22, 23, 30) Imadyina kon unsa ka sakit para sa Diyos nga tugotan ang iyang Anak nga mag-antos ug mamatay. Gimahal kaayo ni Jehova ang mga tawo​—apil ka—​mao nga gihatag niya ang iyang pinalanggang Anak ingong halad lukat aron ikaw ug ang uban mabuhi hangtod sa hangtod. (Juan 3:16; Gal. 2:20) Kini ang pinakadakong rason nga gihigugma nato ang Diyos.

14. Unsa ang pinakamaayong tumong nga imong mahimo?

¹⁴ Mas milalom ang imong gugma kang Jehova dihang mas nailhan nimo siya. Seguradong gusto nimo nga mas masuod kaniya karon ug hangtod sa hangtod. Ug mahimo na nimo. Gidasig ka niya nga lipayon ang iyang kasingkasing. (Prov. 23:15, 16) Mapalipay nimo siya dili lang pinaagi sa pulong kondili sa imo pong mga buhat. Ang imong paagi sa pagkinabuhi  magpakita kon unsa nimo ka mahal si Jehova. (1 Juan 5:3) Kana ang pinakamaayong tumong nga imong mahimo sa imong kinabuhi.

15. Unsaon nimo pagpakita nga gimahal nimo si Jehova?

¹⁵ Unsaon nimo pagpakita nga gimahal nimo si Jehova? Una, mohimo kag espesyal nga pag-ampo nga imo nang ipahinungod ang imong kaugalingon sa bugtong matuod nga Diyos. (Sal. 40:8) Dayon, mahibaloan sa tanan nga nagpahinungod na ka kon magpabawtismo ka. Sa ato nang nahisgotan ganina, ang bawtismo maoy malipayon ug importante kaayong hitabo sa imong kinabuhi. Magsugod na ka sa imong bag-ong kinabuhi, dili para sa imong kaugalingon, kondili para kang Jehova. (Roma 14:8; 1 Ped. 4:1, 2) Tingali bation nimo nga morag dako kaayo na nga desisyon, ug tinuod na. Pero moresulta nag malipayon kaayong kinabuhi. Sa unsang paagi?

16. Base sa Salmo 41:12, unsang ganti ang ihatag ni Jehova niadtong naggamit sa ilang kinabuhi sa pag-alagad kaniya?

¹⁶ Wala nay molabaw sa pagkamahinatagon ni Jehova. Bisag unsa pay imong ihatag kaniya, ang iyang ibalos mas labaw kanunay sa imong ihatag. (Mar. 10:29, 30) Iyang ihatag kanimo ang pinakaeksayting ug pinakamalipayong kinabuhi​—bisan karon niining daotang kalibotan nga hapit nang taposon. Ug sinugdanan pa lang na. Ang kinabuhi nga imong sugdan sukad sa imong bawtismo puwedeng dili matapos. Makaalagad ka sa imong mahigugmaong Amahan hangtod sa hangtod. Ang inyong gugma sa usag usa padayong motubo. Gani padayon kang mabuhi samtang buhi siya, hangtod sa hangtod.​—Basaha ang Salmo 41:12.

17. Unsay imong mahatag kang Jehova nga wala pa niya mabatoni?

¹⁷ Dihang magpahinungod ka ug magpabawtismo, naa kay mahatag sa imong Amahan nga espesyal kaayo para niya. Ang matag maayong butang ug matag malipayong hitabo sa imong kinabuhi naggikan kaniya. Pero bisag iya ang langit ug ang yuta, naa kay mahatag nga wala pa niya mabatoni​—ang imong debosyon ug kinabubut-ong pag-alagad. Mao ni ang imong ikabalos niya. (Job 1:8; 41:11; Prov. 27:11) Kini ang pinakamaayong  paagi nga magamit nimo ang imong kinabuhi! Ang imong gugma kang Jehova mao gyod ang pinakamaayong rason nga magpabawtismo.

18. Unsa nga mga pangutana ang puwede nimong ipangutana sa kaugalingon?

¹⁸ Unsay imong tubag kon pangutan-on ka, Magpabawtismo ka? Ikaw ray makatubag niana. Pero makatabang tingali kon pangutan-on nimo ang imong kaugalingon, ‘Unsay akong gihulat?’ (Buh. 8:36) Hinumdomi ang tulo ka rason nga atong nahisgotan. Una, imong gihigugma ang kamatuoran ug ang pagkamatarong. Pangutan-a ang imong kaugalingon, ‘Gusto ba nakong moabot ang adlaw dihang ang tanan mosulti nag tinuod ug mohimo kon unsay husto?’ Ikaduha, imong gihigugma si Jesu-Kristo. Pangutan-a ang imong kaugalingon, ‘Gusto ba nako nga ang akong Hari mao ang Anak sa Diyos, ug gusto ba nakong sundogon ang iyang ehemplo?’ Ang ikatulo ug pinakaimportante, imong gihigugma si Jehova. Pangutan-a ang imong kaugalingon, ‘Gusto ba nakong lipayon si Jehova pinaagi sa pag-alagad kaniya ingong akong Diyos?’ Kon oo ang imong tubag niini nga mga pangutana, nganong dili pa man ka magpabawtismo? Unsay imong gihulat?​—Buh. 16:33.

19. Nganong dili ka angayng magduhaduha sa pagpabawtismo? Iilustrar. (Juan 4:34)

¹⁹ Kon nagduhaduha ka nga magpabawtismo, hunahunaa ang ilustrasyon ni Jesus. (Basaha ang Juan 4:34.) Matikdi nga gikompara ni Jesus ang pagbuhat sa kabubut-on sa iyang Amahan sa pagkaon. Ngano? Kay ang pagkaon makahatag natog kaayohan. Nahibalo si Jesus nga ang tanang ipabuhat ni Jehova kanato maoy para sa atong kaayohan. Dili gusto ni Jehova nga mohimo tag bisan unsa nga makadaot nato. Apil ba sa kabubut-on ni Jehova nga magpabawtismo ka? Oo. (Buh. 2:38) Busa makasalig ka nga makahatag nimog kaayohan ang pagtuman sa sugo nga magpabawtismo. Kon dili ka magduhaduha nga kaonon ang lami kaayo nga pagkaon, nganong magduhaduha man ka nga magpabawtismo?

20. Unsay hisgotan sa sunod nga artikulo?

²⁰ Nganong ang uban wala pa magpabawtismo? Daghan tingali ang moingon, “Dili pa ko andam.” Ang tinuod, ang pagpahinungod sa imong kaugalingon kang Jehova ug pagpabawtismo mao ang pinakaimportanteng desisyon nga imong mahimo. Busa nagkinahanglag panahon, pagpamalandong, ug paningkamot aron maandam ka. Pero kon gusto kaayo nimong magpabawtismo, unsay imong mahimo karon aron maandam ka? Ato nang hisgotan sa sunod nga artikulo.