1. Unsang ehemplo ang gipakita ni Jesus sa iyang mga sumusunod, ug unsay ilang gibuhat? (Tan-awa ang hulagway sa atubangan sa magasin.)

SI Jesus nagpabiling positibo sa iyang ministeryo dinhi sa yuta, ug gusto niya nga ang iyang mga sumusunod magmapositibo sab sa ilang ministeryo. (Juan 4:35, 36) Sa dihang si Jesus kauban pa sa iyang mga tinun-an, sila madasigon sa pagsangyaw. (Luc. 10:1, 5-11, 17) Pero dihang gidakop ug gipatay si Jesus, ang mga tinun-an temporaryong nawad-ag kadasig sa pagsangyaw. (Juan 16:32) Human mabanhaw si Jesus, gidasig niya sila nga magpokus sa pagsangyaw. Ug human siya mosaka sa langit, sila madasigon kaayo sa pagsangyaw mao nga ang ilang mga kaaway mireklamo: “Tan-awa! inyong gipuno ang Jerusalem sa inyong pagtulon-an.”—Buh. 5:28.

2. Sa unsang paagi gipanalanginan ni Jehova ang buluhatong pagsangyaw?

² Gigiyahan ni Jesus ang buluhaton sa unang siglong mga Kristohanon, ug gipanalanginan sila ni Jehova ug pag-uswag. Pananglitan, sa Pentekostes 33 C.E., mga 3,000 ang nabawtismohan. (Buh. 2:41) Ug padayon nga midaghan pag-ayo ang mga tinun-an. (Buh. 6:7) Pero gitagna ni Jesus nga mas daghan pa ang modawat sa maayong balita sa kataposang mga adlaw.—Juan 14:12; Buh. 1:8.

3-4. Nganong ang pagsangyaw lisod diha sa pipila ka dapit, ug unsay atong hisgotan niining artikuloha?

³ Kitang tanan naningkamot nga magmapositibo sa atong ministeryo. Sa pipila ka nasod, sayon ra nang himoon. Ngano? Tungod kay daghan kaayo ang gustong magpa-Bible study. Gani, ang pipila kanila kinahanglan pang maghulat hangtod nga duna nay Saksi nga makadumala sa pagtuon! Pero sa ubang bahin sa yuta, mas lisod ang pagsangyaw; ang mga tawo sagad wala sa balay, ug kadtong naa sa balay wala kaayoy interes sa Bibliya.

 ⁴ Kon nagpuyo ka sa lugar diin lisod ang pagsangyaw, ang mga sugyot niining artikuloha makatabang tingali nimo. Atong konsiderahon kon unsay gihimo sa pipila aron mas daghan silag maestorya sa ministeryo. Ug hisgotan nato kon nganong makapabilin tang positibo sa atong ministeryo, maminaw man ang mga tawo sa atong mensahe o dili.

5. Unsang mga kalisdanan ang giatubang sa daghang Saksi?

⁵ Nag-anam ka lisod para sa daghang Saksi ang pagpakig-estorya sa mga tawo diha sa ilang balay. Ang pipila ka magmamantala nagpuyo sa mga lugar diin daghag apartment nga estrikto kaayog seguridad o mga subdibisyon nga guwardiyado. Tingali naay bantay o guwardiya nga dili magpasulod niadtong walay kasabot nga residente didto. Ang ubang magmamantala makapamalaybalay ra, pero pipila lang ang ilang maabtan nga tawo sa balay. Ang uban pa gyod nagsangyaw sa mga baryo o lagyong lugar nga gamay rag namuyo. May mga magmamantala nga mobiyahe o mobaktas tingalig layo aron lang masangyawan ang usa ka tagbalay—nga basin wala gani sa balay! Kon ingon ani ang atong teritoryo, dili ta angayng mohunong sa pagsangyaw. Unsay atong buhaton aron magmabungahon gihapon ang atong ministeryo bisan pa sa maong mga kalisdanan?

6. Sa unsang paagi ang mga magsasangyaw samag mga mangingisda?

⁶ Gikomparar ni Jesus ang buluhatong pagsangyaw sa pagpangisda. (Mar. 1:17) Dunay mga mangingisda nga dili tingali makakuhag isda sulod sa pipila ka adlaw. Pero dili sila mosurender; magpailin-ilin hinuon sila. Usbon nila ang oras, lokasyon, o paagi sa pagpangisda. Puwede sab nato nang himoon sa atong ministeryo. Konsideraha ni nga mga sugyot.

7. Unsa tingali resulta kon mosangyaw ta sa lainlaing oras?

⁷ Sulayi pagduaw ang mga tawo sa laing oras. Mas daghan tag maestorya kon mosangyaw ta sa oras nga posibleng naa sila sa balay. Total, manguli man gyod sila sa ilang balay! Nakita sa daghang igsoon nga praktikal nga mosangyaw sa hapon o sa gabii kay daghan silag maabtan. Dugang pa, ang mga tagbalay tingali mas relaks ug andam makig-estorya nianang mga orasa. O basin makatabang nimo ang pagpadapat sa sugyot sa ansiyano nga si David. Siya miingon nga human nila masangyawi ang usa ka teritoryo, balikan niya ug sa iyang partner ang mga balay diin wala silay naabtang tawo. Siya miingon, “Nasorpresa mi sa kadaghan sa tagbalay nga among maabtan sa among pagbalik.” *

8. Sa unsang paagi mapadapat nato ang Ecclesiastes 11:6 sa atong ministeryo?

⁸ Kinahanglang padayon tang maningkamot nga maabtan ang mga tawo sa ilang balay. Ang atong temang teksto nagpahinumdom nato sa angay natong panglantaw. (Basaha ang Ecclesiastes 11:6.) Si David, nga gihisgotan ganina, wala mohunong. Human sa pipila ka beses nga pagbalikbalik diha sa usa ka balay, naabtan ra gyod niya ang tagbalay. Ang tawo interesadong makighisgot bahin sa Bibliya ug miingon, “Walo ka tuig na kong nagpuyo aning balaya, pero karon pa gyod ko nakaestoryag Saksi ni Jehova dinhi.” Si David miingon, “Nakita nako nga dihang maabtan ra gyod nato ang mga tawo sa ilang balay, sagad maminaw sila sa mensahe nga atong gisangyaw.”

9. Unsay gihimo sa ubang Saksi aron masangyawan ang mga tawo nga dili nila maabtan sa balay?

⁹ Sulayi ang laing lokasyon. Aron maestorya ang mga tawo nga dili nila maabtan sa balay,  giusab sa pipila ka magmamantala ang lokasyon diin sila magsangyaw. Pananglitan, ang pagsangyaw diha sa kadalanan ug ang paggamit ug mga literature cart epektibo kaayo aron mahibalag ang mga tawo nga nagpuyo sa dagkong apartment diin wala itugot ang pagpamalaybalay. Pinaagi niini, personal nga masangyawan sa mga Saksi ang mga tawo nga nagpuyo nianang mga lugara. Dugang pa, nakita sa mga magmamantala nga ang mga tawo mas makig-estorya ug modawat ug mga literatura diha sa mga publikong parke, merkado, ug business area. Si Floiran, usa ka tigdumala sa sirkito sa Bolivia, miingon: “Mangadto mi sa mga merkado ug negosyohanan sa mga ala 1:00 hangtod alas 3:00 sa hapon, dihang ang mga naninda dili kaayo busy. Sagad, daghan mig maestorya ug makasugod pa gani mig mga pagtuon sa Bibliya.”

10. Unsa pay imong mahimo aron masangyawan ang mga tawo?

¹⁰ Sulayi ang laing mga paagi. Ibutang ta nga kapila na nimo gibalikan ang usa ka balay. Miadto ka sa lainlaing oras, pero wala gihapon nimo maabti ang tagbalay. Duna bay laing mga paagi aron imo siyang maestorya? Si Katarína miingon, “Sulatan nako kadtong dili nako maabtan sa balay, ug akong isulat kon unsa untay akong isulti sa personal.” Unsay atong makat-onan niana? Paningkamoti nga masangyawan ang tanan diha sa inyong teritoryo sa lainlaing paagi.

11. Nganong ang pipila ka tawo dili interesado sa atong mensahe?

¹¹ Ang pipila ka tawo dili maminaw sa atong mensahe. Para nila, dili sila kinahanglang mahibalo  bahin sa Diyos o sa Bibliya. Dili sila motuog Diyos kay daghan kaayo silag nakitang pag-antos sa kalibotan. Ilang gisalikway ang Bibliya kay nakita nila ang pagkasalingkapaw sa relihiyosong mga lider kinsa nangangkon nga nagkinabuhi subay niana. Ang uban nagsigeg hunahuna sa ilang trabaho, pamilya, o personal nga mga problema, ug nagtuo sila nga ang Bibliya dili makatabang nila. Sa unsang paagi magmalipayon gihapon ta bisan dihang ang mga tawo dili interesado sa atong mensahe?

12. Sa unsang paagi ang pagpadapat sa Filipos 2:4 makatabang nato sa atong ministeryo?

¹² Magpakitag personal nga interes. Daghan niadtong sa sinugdan wala maminaw sa atong mensahe ang naminaw ra sa ulahi sa dihang ang magmamantala nagpakitag personal nga interes kanila. (Basaha ang Filipos 2:4.) Pananglitan, si David nga gihisgotan ganina, miingon, “Kon dunay moingon nga dili siya interesado, among isulod ug balik sa bag ang among Bibliya o basahon, ug amo siyang sultihan: ‘Gusto kong mahibalo kon nganong mao nay imong gibati.’” Makamatikod ang mga tawo kon magpakita tag personal nga interes kanila. Malimtan tingali nila ang atong gisulti, pero posibleng mahinumdoman nila ang atong gipakitang interes. Bisan pag dili ta estoryahon sa mga tagbalay, ikapakita nato sa atong paggawi ug ekspresyon sa nawong nga interesado ta nila.

13. Unsaon nato pagpahiuyon ang atong mensahe sa panginahanglan sa kada tagbalay?

¹³ Makapakita tag personal nga interes kon ipahiuyon nato ang atong mensahe sa panginahanglan ug interes sa tagbalay. Pananglitan, duna bay mga timailhan nga may mga anak ang tagbalay? Basin interesado ang ginikanan sa tambag sa Bibliya bahin sa pagpadakog mga anak o sa praktikal nga mga sugyot niini kon sa unsang paagi magmalipayon ang pamilya. Daghan bag trangka ang ilang pultahan? Puwede tang maghisgot bahin sa krimen ug kahadlok nga komon sa kalibotan, ug tingali malipay ang tagbalay nga mahibaloan ang permanenteng solusyon niana. Matag higayon nga makakita kag mga tawo nga gustong maminaw, tabangi sila nga masabtan kon sa unsang paagi ang tambag sa Bibliya makatabang nila. Si Katarína, nga gihisgotan ganina, miingon, “Hinumdoman nako pirme kon sa unsang paagi nakatabang nako ang kamatuoran.” Tungod niana, si Katarína mosulti nga may kombiksiyon, ug seguradong mamatikdan nâ sa iyang mga kaestorya.

14. Base sa Proverbio 27:17, sa unsang paagi ang atong partner sa pagsangyaw makatabang nato?

¹⁴ Pangayog tabang sa uban. Niadtong unang siglo, gitudloan ni Pablo si Timoteo ug  mga pamaagi sa pagsangyaw ug pagpanudlo, ug gidasig niya si Timoteo nga gamiton kana sa pagtabang sa uban. (1 Cor. 4:17) Sama kang Timoteo, makakat-on ta sa eksperyensiyadong mga igsoon sa kongregasyon. (Basaha ang Proverbio 27:17.) Konsideraha ang pananglitan sa brader nga si Shawn. Taudtaod siyang nagpayunir sa usa ka baryo diin kadaghanan sa mga tawo kontento na sa ilang relihiyon. Sa unsang paagi nagpabilin siyang malipayon? “Kon posible, mangita kog partner sa pagsangyaw,” siya miingon. “Samtang magpaingon mi sa sunod nga balay, pahimuslan namo ang higayon aron tabangan ang usag usa nga mahimong mas hanas sa pagpanudlo. Pananglitan, among estoryahan kon unsay giingon sa tagbalay ug kon unsay among gitubag. Dayon, hisgotan namo kon unsay among himoon dihang makaatubang na sab mig ingon niana nga situwasyon.”

15. Nganong gikinahanglan ang pag-ampo aron mahimong epektibo sa ministeryo?

¹⁵ Pangayog tabang kang Jehova. Pangayog giya kang Jehova matag higayon nga mosangyaw ka. Kon wala ang tabang sa iyang gamhanang balaang espiritu, dili gyod ta molampos. (Sal. 127:1; Luc. 11:13) Sa dihang mangayo kag tabang kang Jehova diha sa pag-ampo, magmaespesipiko. Pananglitan, hangyoa siya nga tultolan ka niya niadtong gustong makakat-on bahin kaniya ug andam maminaw. Dayon lihok uyon sa imong pag-ampo pinaagi sa pagsangyaw sa tanan nga imong mahibalag.

16. Nganong gikinahanglan ang personal nga pagtuon aron mahimong epektibo sa ministeryo?

¹⁶ Paggahin ug panahon para sa personal nga pagtuon. Ang Pulong sa Diyos nag-ingon: ‘Pamatud-i sa inyong kaugalingon ang maayo ug dalawaton ug hingpit nga kabubut-on sa Diyos.’ (Roma 12:2) Kon mas kombinsido ta nga nahibalo ta sa kamatuoran bahin sa Diyos, mas kombinsido pod tang makigsulti sa uban diha sa ministeryo. Si Katarína, nga gihisgotan ganina, miingon: “Di pa dugay, naamgohan nako nga kinahanglan nakong palig-onon ang akong pagtuo maylabot sa pipila ka pangunang pagtulon-an sa Bibliya. Busa gitun-an nako pag-ayo ang ebidensiya nga dunay Maglalalang, nga ang Bibliya Pulong gyod sa Diyos, ug nga ang Diyos dunay organisasyon nga nagrepresentar niya karon.” Si Katarína miingon nga ang iyang personal nga pagtuon nakapalig-on sa iyang pagtuo ug nakadugang sa iyang kalipay diha sa ministeryo.

17. Nganong si Jesus nakapabiling positibo sa iyang ministeryo?

¹⁷ Si Jesus nagpabiling positibo ug nagpadayon sa pagsangyaw bisan pag ang pipila wala maminaw sa iyang mensahe. Ngano? Nasayod siya nga ang mga tawo kinahanglang mahibalo sa kamatuoran, ug gusto niyang tabangan ang mas daghang tawo kutob sa mahimo. Nahibalo sab siya nga ang pipila nga dili maminaw sa sinugdan maminaw ra sa ulahi. Tagda ang nahitabo sa iyang pamilya. Sulod sa tulo ka tuig ug tunga nga ministeryo ni Jesus, wala gyod siyay igsoon nga nahimong tinun-an. (Juan 7:5) Pero human sa iyang pagkabanhaw, sila nahimong mga Kristohanon.—Buh. 1:14.

18. Nganong magpadayon ta sa pagsangyaw?

¹⁸ Wala ta mahibalo kon kinsa sa ngadtongadto ang modawat sa mga kamatuoran sa Bibliya nga atong gitudlo. Ang pipila mas dugay mosanong sa kamatuoran kay sa uban. Bisan kadtong dili maminaw kanato makamatikod sa atong maayong panggawi ug positibong panglantaw, ug basin sa ngadtongadto, ilang “himayaon ang Diyos.”—1 Ped. 2:12.

19. Sumala sa 1 Corinto 3:6, 7, unsay angay natong ilhon?

 ¹⁹ Bisag kita ang nagtanom ug nagbisbis, kinahanglan natong hinumdoman nga ang Diyos maoy magpatubo sa atong gitanom. (Basaha ang 1 Corinto 3:6, 7.) Si Getahun, brader nga nag-alagad sa Ethiopia, miingon: “Sulod sa kapig 20 ka tuig, ako lang ang Saksi sa usa ka teritoryo nga talagsa rang masangyawan. Pero karon, 14 na ang magmamantala dinhi. Trese ang nabawtismohan, apil ang akong asawa ug tulo ka anak. Sa aberids, 32 ka tawo ang manambong sa mga tigom.” Malipayon si Getahun nga nagpadayon siya sa pagsangyaw samtang mapailobon siyang nagpaabot nga kabigon ni Jehova ang sinserong mga tawo ngadto sa Iyang organisasyon!—Juan 6:44.

20. Sa unsang paagi nahisama tag mga tig-rescue?

²⁰ Bililhon kang Jehova ang tanang tawo. Gihatagan ta niyag pribilehiyo nga mahimong isigkamagbubuhat sa iyang Anak sa pagtigom sa mga tawo gikan sa tanang kanasoran sa dili pa matapos kining sistemaha. (Hag. 2:7) Ang atong buluhatong pagsangyaw puwedeng ipakasama sa usa ka rescue operation. Ug kita samag mga membro sa rescue team nga gipadala aron luwason ang mga tawo nga natanggong sa usa ka minahan. Bisag pipila lang ang makakitag mga minero nga buhi pa, ang paghago sa tanang tig-rescue importante. Ingon sab niana ang atong paghago diha sa ministeryo. Wala ta mahibalo kon pila pa ang maluwas gikan sa sistema ni Satanas. Pero puwedeng gamiton ni Jehova ang bisan kinsa kanato sa pagtabang kanila. Si Andreas, nga nagpuyo sa Bolivia, miingon, “Nahibalo ko nga dihang ang usa ka tawo makakat-on sa kamatuoran ug magpabawtismo, tungod nâ sa paningkamot sa daghan nga matabangan siya.” Hinaot nga batonan nato ang susamang positibong panglantaw sa atong ministeryo. Kon ato nang himoon, panalanginan ta ni Jehova, ug ang atong ministeryo makahatag natog tinuod nga kalipay.