1-2. Unsang mga problema ang giatubang sa daghang Saksi?

SI APOSTOL Pablo nagdasig kang Timoteo ug sa tanang Kristohanon sa pagtuman sa bug-os sa ilang ministeryo. (2 Tim. 4:5) Busa naningkamot ta sa pagsunod sa tambag ni Pablo. Pero usahay, dili nâ sayon. Daghan sa atong mga igsoon ang nagkinahanglag kaisog sa pagsangyaw. (2 Tim. 4:2) Pananglitan, hunahunaa ang atong mga igsoon sa mga lugar diin ang atong buluhaton dunay restriksiyon o gidili pa gani. Sila mosangyaw gihapon bisag posible silang mapriso!

² Ang katawhan ni Jehova nag-atubang ug lainlaing makapaluya nga mga problema. Pananglitan, daghan ang kinahanglang motrabahog daghang oras aron lang matagan-an ang panginahanglan sa ilang pamilya. Gusto nilang mohimog labaw pa diha sa ministeryo, pero kapoy na kaayo sila sa hinapos sa semana. Ang uban nalimitahan pag-ayo sa ilang mahimo tungod sa grabeng sakit o sa pagkatigulang; basin ganig dili sila makagawasgawas sa balay. Ang uban pa gyod kanunayng mobati nga dili sila bililhon kang Jehova. Si Mary, * sister nga nagpuyo sa Middle East, miingon: “Kinahanglan kong maningkamot pag-ayo nga masuklan ang akong negatibong mga pagbati, mao nga maluya ko pag-ayo. Dayon makonsensiya ko kay makuhaan niini ang akong panahon ug kusog nga para unta sa ministeryo.”

3. Unsay atong hisgotan niining artikuloha?

³ Bisag unsay atong problema, si Jehova makahatag natog kusog aron makapadayon ta sa pag-alagad kaniya kutob sa atong mahimo. Sa dili pa nato hisgotan kon sa unsang paagi si Jehova makatabang nato, susihon una nato kon giunsa niya pagpalig-on si Pablo ug Timoteo sa pagtuman sa ilang ministeryo bisan pa sa mga problema.

4. Unsang mga problema ang giatubang ni Pablo?

⁴ Si Pablo nag-atubang ug daghang problema. Ilabinang nagkinahanglan siyag kusog sa dihang siya gibunalan, gibato, ug gipriso. (2 Cor. 11:23-25) Miangkon si Pablo nga usahay kinahanglan niyang suklan ang negatibong mga pagbati. (Roma 7:18, 19, 24) Nag-antos sab siyag “tunok sa unod,” tingali usa ka problema sa panglawas, nga gusto kaayo niyang wagtangon sa Diyos.—2 Cor. 12:7, 8.

5. Unsay napalampos ni Pablo bisan pa sa mga problema nga iyang giatubang?

⁵ Gihatagan ni Jehova si Pablo ug kusog aron makapadayon sa iyang ministeryo bisan pa sa mga problema nga iyang giatubang. Tagda kon unsay nalampos ni Pablo. Pananglitan, samtang siya gipriso sa usa ka balay didto sa Roma, maisogon niyang gidepensahan ang maayong balita atubangan sa Hudiyong mga lider ug tingali sa mga opisyales sa gobyerno. (Buh. 28:17; Filip. 4:21, 22) Gisangyawan sab niya ang daghang Praetorianong Guwardiya ug ang tanang mibisita kaniya. (Buh. 28:30, 31; Filip. 1:13) Niana pong panahona, gigamit sa Diyos si Pablo sa paghimog mga sulat nga nakahatag ug kaayohan sa tinuod nga mga Kristohanon hangtod karon. Dugang pa, ang ehemplo ni Pablo nakapalig-on sa kongregasyon sa Roma, nga tungod niana ang mga igsoon nagpakitag “labaw pa nga kaisog sa pagsulti sa pulong sa Diyos nga walay kahadlok.” (Filip. 1:14) Bisag dihay mga panahon nga limitado rag mahimo si Pablo, gihimo niya ang iyang maarangan sa iyang kahimtang, ug kana “miresulta hinuon sa pag-uswag sa maayong balita.”—Filip. 1:12.

6. Sumala sa 2 Corinto 12:9, 10, unsay nakatabang kang Pablo sa pagtuman sa iyang ministeryo?

⁶ Naamgohan ni Pablo nga ang tanan nga iyang nalampos sa pag-alagad kang Jehova nahimo niya dili sa iyang kaugalingong kusog, kondili sa kusog sa Diyos. Siya miingon nga ang gahom sa Diyos ‘mas kusgan dihang huyang siya.’ (Basaha ang 2 Corinto 12:9, 10.) Pinaagi sa Iyang balaang espiritu, gihatagan ni Jehova si Pablo ug kusog sa pagtuman sa bug-os sa iyang ministeryo—bisan pa sa paglutos, pagkapriso, ug ubang mga problema nga iyang giatubang.

7. Unsang mga problema ang kinahanglang atubangon ni Timoteo aron matuman niya ang iyang ministeryo?

⁷ Si Timoteo, ang batabata pang kauban ni Pablo, kinahanglan sab mosalig sa gahom sa  Diyos sa pagtuman sa iyang ministeryo. Si Timoteo miuban kang Pablo sa lagyong misyonaryong mga panaw. Dugang pa, gipadala siya ni Pablo sa ubang lugar aron duawon ug dasigon ang mga kongregasyon. (1 Cor. 4:17) Posibleng mibati si Timoteo nga dili siya kuwalipikado. Kana tingali rason kon nganong gitambagan siya ni Pablo: “Ayawg tugoti nga may motamay sa imong pagkabatan-on.” (1 Tim. 4:12) Dugang pa, nianang panahona, si Timoteo may kaugalingong tunok sa unod; ‘pirme siyang masakit.’ (1 Tim. 5:23) Pero nahibalo si Timoteo nga ang gamhanang balaang espiritu ni Jehova maghatag niya sa kusog nga iyang gikinahanglan sa pagsangyaw sa maayong balita ug pag-alagad sa iyang mga igsoon.—2 Tim. 1:7.

8. Sa unsang paagi si Jehova nagpalig-on sa iyang katawhan karon?

⁸ Karon, si Jehova naghatag sa iyang katawhan ug “gahom nga labaw sa kasarangan” aron makapadayon sila sa pag-alagad kaniya nga matinumanon. (2 Cor. 4:7) Hisgotan nato ang upat ka tagana ni Jehova aron mapalig-on ta ug matabangan sa pagpabiling matinumanon kaniya: pag-ampo, Bibliya, mga igsoon, ug atong ministeryo.

9. Sa unsang paagi ang pag-ampo makatabang kanato?

⁹ Napalig-on pinaagi sa pag-ampo. Sa Efeso 6:18, gidasig ta ni Pablo nga mag-ampo sa Diyos “sa matag higayon.” Tubagon sa Diyos ang atong mga pag-ampo pinaagi sa pagpalig-on kanato. Si Jonnie, nga nagpuyo sa Bolivia, nakaeksperyensiya niana nga tabang sa dihang nakasinati siyag sunodsunod nga mga problema. Ang iyang asawa ug mga ginikanan grabeng nasakit. Naglisod si Jonnie sa pag-atiman sa panginahanglan nilang tulo kay dungan silang nasakit. Ang iyang inahan namatay, ug ang iyang asawa ug amahan dugayng naayo. Bahin nianang panahona, si Jonnie miingon, “Sa dihang nabug-atan kaayo ko, nakatabang gyod nako ang pagkahimong espesipiko diha sa akong mga pag-ampo.” Si Jehova naghatag kang Jonnie sa kusog nga iyang gikinahanglan aron makalahutay. Ingon sab niana ang naeksperyensiyahan ni Ronald, usa ka ansiyano sa Bolivia. Ang iyang mama nasakit ug cancer, ug namatay kini usa ka bulan sa ulahi. Unsay nakatabang niya? Siya miingon: “Sa dihang mag-ampo ko kang Jehova, isulti gyod nako kaniya ang tanan nakong gibati. Nahibalo ko nga mas makasabot siya nako kay kang bisan kinsa. Mas makasabot pa gani siya nako kay sa akong pagsabot sa akong kaugalingon.” Usahay, mabug-atan kaayo ta sa atong mga problema ug dili gani ta kabalo kon unsay atong iampo. Pero si Jehova nagdapit kanato sa pag-ampo kaniya bisan pag maglisod tag sulti sa atong gihunahuna ug gibati.—Roma 8:26, 27.

10. Base sa Hebreohanon 4:12, nganong importante kaayo ang pagbasa sa Bibliya ug pagpamalandong niini?

¹⁰ Napalig-on pinaagi sa Bibliya. Gibasa ni Pablo ang Kasulatan aron mapalig-on ug mahupayan, ug kinahanglan sab nato nang buhaton. (Roma 15:4) Samtang basahon nato ang Pulong sa Diyos ug pamalandongon kini, gamiton ni Jehova ang iyang espiritu aron tabangan ta nga mas masabtan kon sa unsang paagi ang Bibliya makatabang nato sa atong kahimtang. (Basaha ang Hebreohanon 4:12.) Si Ronald, nga gihisgotan ganina, miingon: “Mapasalamaton ko nga nabatasan nako ang pagbasa sa Bibliya kada gabii. Pirme nakong pamalandongon ang mga hiyas ni Jehova ug ang iyang mahigugmaong pag-atiman sa iyang mga alagad. Kini nakapalig-on gyod nako.”

11. Sa unsang paagi napalig-on sa Bibliya ang usa ka magul-anong sister?

 ¹¹ Makabaton tag hustong panglantaw sa atong kahimtang pinaagi sa pagpamalandong sa Pulong sa Diyos. Konsideraha kon sa unsang paagi ang Bibliya nakatabang sa usa ka magul-anong biyuda. Giingnan siya sa usa ka ansiyano nga daghan siyag makat-onan sa basahon sa Job. Sa dihang gibasa niya kini, nakasaway dayon siya sa sayop nga panghunahuna ni Job. Sa iyang hunahuna, iyang giingnan si Job: “Job! Negatibo ra kaayo ka!” Pero nakaamgo siya nga parehas diay kang Job ang iyang panghunahuna. Tungod niini, nausab ang iyang panglantaw ug nakalahutay siya sa kaguol tungod sa kamatayon sa iyang bana.

12. Sa unsang paagi gipalig-on ta ni Jehova pinaagi sa mga igsoon?

¹² Napalig-on pinaagi sa mga igsoon. Ang laing tagana ni Jehova sa pagpalig-on sa mga Kristohanon mao ang mga isigkamagtutuo. Si Pablo misulat nga nangandoy siya nga ‘magkadinasigay’ uban sa mga igsoon. (Roma 1:11, 12) Si Mary, nga gihisgotan ganina, nakaapresyar sa maong tagana. Siya miingon: “Gigamit ni Jehova ang mga igsoon nga wala gani mahibalo sa akong mga problema. May gisulti sila nga nakadasig nako o gihatagan ko nilag kard, ug mao gyod toy akong gikinahanglan. Nakatabang sab ang pagpakig-estorya sa ubang sister nga may susamang mga problema, ug nakakat-on ko sa ilang mga eksperyensiya. Ug kanunayng gipabati nako sa mga ansiyano nga importante ko sa kongregasyon.”

13. Sa unsang paagi mapalig-on nato ang usag usa diha sa mga tigom?

¹³ Ang mga tigom sa kongregasyon maoy maayo kaayong kahigayonan sa pagdinasigay. Sa dihang motambong ka sa tigom, puwede nimong palig-onon ang uban pinaagi sa pagsulti kanila nga gimahal nimo sila ug nga giapresyar nimo ang ilang mga paningkamot. Pananglitan, sa wala pa magsugod ang tigom, ang ansiyano nga si Peter miingon sa usa ka sister kansang bana dili Saksi: “Makapadasig kaayo nga makita ka dinhi sa tigom. Pirme nimong kauban ang imong unom ka anak nga kanunayng andam sa ilang mga komento.” Nanglugmaw ang mga luha sa sister ug mapasalamaton siyang miingon: “Wa lang ka mahibalo nga mao gyod nay kinahanglan nakong madungog karon.”

14. Sa unsang paagi ang pagpakigbahin sa ministeryo makatabang kanato?

¹⁴ Napalig-on pinaagi sa ministeryo. Sa dihang isulti nato sa uban ang mga kamatuoran sa Bibliya, kita marepreskohan ug madasig, maminaw man sila o dili. (Prov. 11:25) Nakita sa sister nga si Stacy nga makapalig-on gyod ang ministeryo. Sa dihang na-disfellow ang usa ka membro sa iyang pamilya, naguol kaayo siya, ug pirme siyang mangutana sa kaugalingon, ‘Duna pa ba unta koy angayng gihimo sa pagtabang kaniya?’ Mao na lang nay gisigeg hunahuna ni Stacy. Unsay nakatabang niya niining lisod nga situwasyon? Ang ministeryo! Samtang nakigbahin siya sa pagsangyaw, napokus ang iyang pagtagad sa mga tawo diha sa teritoryo nga nagkinahanglan sa iyang tabang. Siya miingon: “Nianang panahona, gihatagan ko ni Jehova ug Bible study nga paspas kaayog pag-uswag. Nakadasig kaayo to nako. Dako kaayog tabang nako ang ministeryo.”

15. Unsay imong nakat-onan sa giingon ni Mary?

¹⁵ Tungod sa ilang mga sirkumstansiya, ang pipila mobati tingali nga gamay ra silag mahimo sa ministeryo. Kon mao nay imong gibati, hinumdomi nga si Jehova malipay kon buhaton nimo ang imong kinamaayohan. Tagda pag-usab ang pananglitan ni Mary. Sa dihang mibalhin siya sa dapit nga lahig pinulongan, gibati niya nga wala kaayo siyay mahimo. Siya  miingon, “Taudtaod pod nga ang ako rang mahimo mao ang paghatag ug mubo nga komento, pagbasag teksto, o paghatag ug tract diha sa ministeryo.” Tungod niini, mibati siya nga dili siya parehas ka maayo niadtong larinong mosulti sa maong pinulongan. Pero giusab niya ang iyang panghunahuna. Naamgohan niya nga puwede siyang gamiton ni Jehova bisag dili kaayo siya kamao sa pinulongan. Siya miingon, “Ang makaluwas ug kinabuhi nga mga kamatuoran simple kaayo, ug ang maong mga kamatuoran maoy makapausab sa kinabuhi sa mga tawo.”

16. Sa unsang paagi makabaton ug kusog kadtong dili makagawasgawas sa balay?

¹⁶ Nakita ug naapresyar ni Jehova ang atong tinguha nga makigbahin sa ministeryo bisan pag dili ta makagawasgawas sa balay. Makatabang siya nato sa pagsangyaw niadtong nag-atiman kanato o sa mga doktor ug nars. Kon ikomparar nato ang atong mahimo karon sa atong nahimo kaniadto, basig maluya ta. Pero kon atong maamgohan kon giunsa ta pagtabang ni Jehova karon, mabatonan nato ang kusog nga atong gikinahanglan sa paglahutay sa bisan unsang kalisdanan uban ang kalipay.

17. Sumala sa Ecclesiastes 11:6, nganong angay tang magpadayon sa atong ministeryo bisag wala dayoy mosanong?

¹⁷ Wala ta mahibalo kon hain sa mga binhi sa kamatuoran nga atong gipugas ang moturok ug motubo. (Basaha ang Ecclesiastes 11:6.) Pananglitan, si Barbara, usa ka sister nga kapin nag 80 anyos, pirmeng magsangyaw pinaagig telepono ug sulat. Sa usa sa iyang mga sulat, gisukip niya ang Marso 1, 2014 nga Bantayanang Torre nga may artikulong “Unsay Nahimo sa Diyos Alang Kanimo?” Wala siya mahibalo nga ang iya diayng napadad-ag sulat usa ka magtiayon nga na-disfellow. Gibalikbalik nilag basa ang magasin. Gibati sa bana nga si Jehova morag direktang nakigsulti kaniya. Ang magtiayon misugod pagtambong sa mga tigom ug ngadtongadto sila napasig-uli—human sa kapig 27 ka tuig. Seguradong nadasig ug napalig-on si Barbara nga makita ang maayong resulta nianang usa niya ka sulat!

18. Unsay angay natong buhaton aron mapalig-on ta sa gahom sa Diyos?

¹⁸ Si Jehova naghatag natog daghang kahigayonan nga madawat ang iyang dagayang gahom. Sa dihang pahimuslan nato ang iyang mga tagana—sama sa pag-ampo, Bibliya, mga igsoon, ug ministeryo—atong gipakita nga kita misalig sa katakos ug tinguha ni Jehova nga motabang kanato. Hinaot nga kanunay tang mosalig sa atong langitnong Amahan, kinsa malipay nga “ipakita ang iyang kusog alang niadtong kansang kasingkasing bug-os alang kaniya.”—2 Cron. 16:9.