1-2. Unsay giingon sa usa ka magsusulat, ug unsay atong hisgotan niining artikuloha?

KARON, minilyon ang nangangkon nga nagtuo kang Jesus, pero wala nila sunda ang mga butang nga iyang gitudlo. (2 Tim. 4:3, 4) Gani, dihay magsusulat nga miingon: “Kon dunay laing ‘Jesus’ karon nga mosulti sa mga butang nga sama sa gisulti ni Jesus . . . , ato kaha siyang isalikway sama sa atong gihimo duha ka libo ka tuig kanhi? . . . Ang tubag sa kadaghanan mao: Oo, isalikway nato siya.”

² Daghan sa unang siglo ang nakadungog sa gitudlo ni Jesus ug nakakita niya nga naghimog mga milagro, pero wala sila motuo kaniya. Ngano? Sa miaging artikulo, atong nasayran ang upat ka rason kon nganong ang mga tawo napandol sa gisulti ug gibuhat ni Jesus. Hisgotan nato karon ang upat pa ka rason. Masayran sab nato kon nganong ang mga tawo karon nagsalikway sa mga sumusunod ni Jesus ug kon unsay atong buhaton aron dili ta mapandol.

3. Nganong ang pipila napandol kang Jesus?

³ Samtang dinhi pa si Jesus sa yuta, siya nakig-uban sa tanang klase sa tawo. Mikaon siya uban sa mga dato ug may awtoridad, pero pirme sab siyang makig-uban sa mga pobre ug dinaogdaog. Dugang pa, siya maluluy-on niadtong giisip sa kadaghanan ingong “makasasala.” Ang pipila nga mapahitas-on napandol sa gibuhat ni Jesus. Sila nangutana sa iyang mga tinun-an: “Nganong mikaon ug miinom man mo uban sa mga maniningil ug buhis ug sa mga makasasala?” Niini, si Jesus mitubag: “Ang mga himsog wala magkinahanglag doktor, apan kadto lang mga masakiton. Mianhi ko sa pagdapit, dili sa mga  tawong matarong, kondili sa mga makasasala sa paghinulsol.”—Luc. 5:29-32.

4. Sumala ni Isaias, unsa untay angayng dahomon sa mga Hudiyo bahin sa Mesiyas?

⁴ Unsay giingon sa Kasulatan? Sa wala pa moabot si Jesus, dugay nang gitagna ni Isaias nga ang Mesiyas isalikway sa kalibotan. Ang tagna nag-ingon: “Siya gitamay ug gilikayan sa mga tawo . . . Daw gitago ang iyang nawong gikan kanamo. Siya gitamay, ug giisip namo siya nga walay hinungdan.” (Isa. 53:3) Sumala sa tagna, ang Mesiyas likayan sa “mga tawo,” busa ang mga Hudiyo sa unang siglo angay untang magdahom nga si Jesus isalikway.

5. Unsay panglantaw sa daghang tawo karon bahin sa mga sumusunod ni Jesus?

⁵ Ingon ana ba sab ang kahimtang karon? Oo. Daghang lider sa relihiyon ang malipay dihang dunay magpamembro sa ilang relihiyon nga prominente, dato, ug giisip sa kalibotan nga maalamon. Gidawat nila kining bag-ong mga membro bisan pag ang moralidad ug paagi sa pagkinabuhi niini supak sa mga sukdanan sa Diyos. Pero ang maong mga lider sa relihiyon nagtamay sa madasigon, hinlog moralidad nga mga alagad ni Jehova tungod kay dili sila prominente sumala sa panglantaw sa kalibotan. Si Pablo miingon nga gipili sa Diyos kadtong “gipakamenos.” (1 Cor. 1:26-29) Ug bililhon kang Jehova ang tanan niyang matinumanong mga alagad.

6. Unsaon nato pagsundog ang panghunahuna ni Jesus nga atong mabasa sa Mateo 11:25, 26?

⁶ Unsay atong buhaton aron dili mawala ang atong pagtuo? (Basaha ang Mateo 11:25, 26.) Ayaw pagpaimpluwensiya sa panglantaw sa kalibotan bahin sa mga alagad sa Diyos. Hinumdomi nga mapainubsanong mga tawo lang ang gigamit ni Jehova sa paghimo sa iyang kabubut-on. (Sal. 138:6) Ug hunahunaa kon unsa ka daghan ang napalampos ni Jehova pinaagi sa paggamit niadtong giisip sa kalibotan nga dili maalamon o utokan.

7. Nganong gitawag ni Jesus ang mga Pariseo nga mga salingkapaw, ug unsay ilang reaksiyon?

⁷ Maisogong gisaway ni Jesus ang salingkapaw nga relihiyosong mga tradisyon sa iyang panahon. Pananglitan, iyang giyagyag ang pagkasalingkapaw sa mga Pariseo, kinsa naghunahuna nga mas importante ang paagi sa ilang pagpanghunaw kay sa pag-atiman sa ilang mga ginikanan. (Mat. 15:1-11) Ang mga tinun-an ni Jesus nakurat tingali sa iyang giingon. Gani, sila nangutana kaniya: “Nahibalo ba ka nga nasilo ang mga Pariseo sa imong gisulti?” Si Jesus mitubag: “Ang matag tanom nga wala itanom sa akong langitnong Amahan pagaibton. Pasagdi ninyo sila. Mga buta sila nga tiggiya. Kon ang buta giyahan ug buta, silang duha mangahulog sa gahong.” (Mat. 15:12-14) Wala tugoti ni Jesus ang negatibong reaksiyon sa relihiyosong mga lider sa pagpugong kaniya nga isulti ang kamatuoran.

8. Giunsa pagpakita ni Jesus nga dili tanang relihiyosong pagtulon-an ang dalawaton sa Diyos?

⁸ Giyagyag sab ni Jesus ang bakak nga relihiyosong mga pagtulon-an. Wala siya moingon nga ang tanang relihiyosong pagtulon-an dalawaton sa Diyos. Hinunoa, siya miingon nga daghan ang mosubay sa luag nga dalan padulong sa kalaglagan, pero diyutay lang ang mosubay sa gamay nga dalan padulong sa kinabuhi. (Mat. 7:13, 14) Giklaro niya nga ang pipila magpakaaron-ingnong nag-alagad sa Diyos pero wala diay. Siya nagpasidaan: “Pagbantay sa bakak nga mga propeta nga manganha kaninyo nga magpakaaron-ingnong karnero, apan sa pagkatinuod sila maoy mga lobo nga manunukob. Pinaagi sa ilang mga bunga kamo makaila kanila.”—Mat. 7:15-20.

9. Unsang pipila ka bakak nga relihiyosong pagtulon-an ang giyagyag ni Jesus?

 ⁹ Unsay giingon sa Kasulatan? Ang Bibliya nagtagna nga magdilaab ang kasibot sa Mesiyas alang sa balay ni Jehova. (Sal. 69:9; Juan 2:14-17) Tungod sa maong kasibot, giyagyag ni Jesus ang bakak nga relihiyosong mga pagtulon-an ug tradisyon. Pananglitan, ang mga Pariseo nagtuo nga ang kalag dili mamatay; si Jesus nagtudlo nga ang mga patay natulog. (Juan 11:11) Ang mga Saduseo dili motuog pagkabanhaw; si Jesus nagbanhaw sa iyang higala nga si Lazaro. (Juan 11:43, 44; Buh. 23:8) Ang mga Pariseo nagtudlo nga ang tanan nahitabo tungod sa kapalaran ug sa pagbuot sa Diyos; si Jesus nagtudlo nga ang mga tawo makadesisyon kon moalagad ba sila sa Diyos o dili.—Mat. 11:28.

10. Nganong daghan ang nagsalikway sa atong mga pagtulon-an?

¹⁰ Ingon ana ba sab ang kahimtang karon? Oo. Daghan ang nagsalikway kanato tungod kay ang atong binase sa Bibliya nga mga pagtulon-an nagyagyag sa bakak nga relihiyosong mga ideya. Ang mga lider sa relihiyon nagtudlo sa ilang mga sumusunod nga ang Diyos nagsilot sa mga daotan diha sa impiyerno. Ilang gigamit ang maong bakak nga pagtulon-an aron makontrolar ang mga tawo. Ingong mga alagad ni Jehova, kinsa nagsimba sa Diyos sa gugma, atong giyagyag kanang bakak nga pagtulon-an. Ang mga lider sa relihiyon nagtudlo sab nga ang kalag dili mamatay. Atong giyagyag nga pagano ang sinugdanan sa maong doktrina. Kon tinuod pa kana, dili kinahanglan ang pagkabanhaw. Ug lahi sa pagtulon-an sa kapalaran nga gituohan sa daghang relihiyon, atong gitudlo nga ang tawo dunay kagawasan sa pagpili ug makapili sa pag-alagad sa Diyos. Unsay reaksiyon sa mga lider sa relihiyon? Sagad, masuko sila!

11. Sumala sa giingon ni Jesus sa Juan 8:45-47, unsay gisugo sa Diyos sa iyang katawhan?

¹¹ Unsay atong buhaton aron dili mawala ang atong pagtuo? Kon gihigugma nato ang kamatuoran, kinahanglan natong dawaton ang mga pulong sa Diyos. (Basaha ang Juan 8:45-47.) Dili sama kang Satanas nga Yawa, kita mobarog  dapig sa kamatuoran. Dili gyod nato ikompromiso ang atong pagtuo. (Juan 8:44) Ang Diyos nagsugo sa iyang katawhan nga ‘dumtan pag-ayo ang daotan ug buhaton gyod ang maayo,’ sama sa gihimo ni Jesus.—Roma 12:9; Heb. 1:9.

12. Nganong daghang Hudiyo ang napandol sa paagi nga namatay si Jesus?

¹² Unsay laing rason kon nganong gisalikway sa mga Hudiyo si Jesus? Si Pablo miingon: “Kita nagwali nga ang Kristo gipatay diha sa estaka, nga alang sa mga Hudiyo hinungdan sa pagkapandol.” (1 Cor. 1:23) Nganong daghang Hudiyo ang napandol sa paagi nga namatay si Jesus? Para nila, ang kamatayon ni Jesus diha sa estaka nagpakita nga siya usa ka kriminal ug makasasala—dili ang Mesiyas.—Deut. 21:22, 23.

13. Unsay wala tuohi niadtong napandol kang Jesus?

¹³ Kadtong mga Hudiyo nga napandol kang Jesus wala motuo nga siya inosente, sayop nga giakusahan, ug gitratar sa dili makataronganong paagi. Kadtong naghusay kang Jesus wala magpakabana sa hustisya. Ang korte suprema sa mga Hudiyo dihadiha nga nagtigom, ug ang paagi sa paghusay dili subay sa balaod. (Luc. 22:54; Juan 18:24) Imbes maminaw nga walay pagpihig sa mga sumbong ug ebidensiya batok kang Jesus, ang mga huwes mismo ang nangitag “bakak nga sumbong batok kang Jesus aron ipapatay siya.” Dihang wala to mosaler, ang hataas nga saserdote naningkamot nga makasultig sayop si Jesus aron mahukman kining sad-an. Supak gyod ni sa balaod. (Mat. 26:59; Mar. 14:55-64) Ug human mabanhaw si Jesus, ang maong daotang mga huwes nagbayad ug “daghang pirasong plata” sa Romanong mga sundalo nga nagbantay sa iyang lubnganan, aron magpakaylap kinig dili tinuod nga balita kon nganong walay sulod ang lubnganan.—Mat. 28:11-15.

14. Unsay gitagna sa Kasulatan bahin sa kamatayon sa Mesiyas?

¹⁴ Unsay giingon sa Kasulatan? Bisan pag daghang Hudiyo sa adlaw ni Jesus ang wala magdahom nga kinahanglang mamatay ang  Mesiyas, matikdi kon unsay gitagna sa Kasulatan: “Gihatag niya ang iyang kinabuhi bisan hangtod sa kamatayon ug giisip siya nga usa sa mga malapason; gipas-an niya ang sala sa daghang tawo, ug nagpataliwala siya alang sa mga malapason.” (Isa. 53:12) Busa ang mga Hudiyo walay rason nga mapandol dihang si Jesus gipatay nga samag makasasala.

15. Unsang mga akusasyon batok sa mga Saksi ni Jehova ang nakapandol sa pipila?

¹⁵ Ingon ana ba sab ang kahimtang karon? Oo! Si Jesus dili makataronganong giakusahan ug gihukmang sad-an, ug ingon ana pod ang nasinati sa mga Saksi ni Jehova karon. Matikdi ang pipila ka pananglitan. Didto sa United States, sa katuigan sa 1930 ug 1940, kadaghan ta miatubang sa korte aron depensahan ang atong kagawasan sa pagsimba sa Diyos. Ang pipila ka huwes klaro kaayo nga may pagpihig kanato. Sa Quebec, Canada, ang Simbahan ug ang Estado nagkahiusa sa pagpahunong sa atong buluhaton. Daghang magmamantala ang gipriso tungod lang sa pagsulti sa ilang mga silingan bahin sa Gingharian sa Diyos. Sa Nazi Germany, daghang matinumanong batan-ong brader ang gipapatay nianang gobyerno nga dili moilag Diyos. Ug sa di pa dugayng katuigan, daghan sa atong mga igsoon sa Russia ang gihukmang sad-an ug gipriso tungod sa paghisgot bahin sa Bibliya, nga giisip ingong usa ka “ekstremistang kalihokan.” Bisan ang New World Translation of the Holy Scriptures sa Russian nga pinulongan gidili ug giisip ingong “ekstremistang basahon” kay naggamit kini sa ngalang Jehova.

16. Ingon sa gipakita sa 1 Juan 4:1, nganong dili ta angayng motuo sa bakak nga mga estorya bahin sa katawhan ni Jehova?

¹⁶ Unsay atong buhaton aron dili mawala ang atong pagtuo? Sayra kon unsay tinuod. Sa iyang Wali sa Bukid, gipasidan-an ni Jesus ang iyang mga mamiminaw nga sila “butangbutangan sa tanang matang sa buhat nga daotan.” (Mat. 5:11) Kini nga mga bakak naggikan kang Satanas. Giimpluwensiyahan niya ang mga magsusupak sa pagpakaylap ug makadaot nga mga estorya bahin niadtong nahigugma sa kamatuoran. (Pin. 12:9, 10) Kinahanglan natong isalikway ang mga bakak nga gipakaylap sa atong mga kaaway. Dili gyod nato tugotan ang maong mga bakak nga makapahadlok kanato o makapahuyang sa atong pagtuo.—Basaha ang 1 Juan 4:1.

17. Sa unsang paagi ang mga panghitabo una pa ang kamatayon ni Jesus nakapandol sa pipila?

¹⁷ Sa hapit nang mamatay si Jesus, siya gibudhian sa usa sa iyang 12 ka apostoles. Tulo ka higayon siyang gilimod sa laing apostoles, ug gibiyaan siya sa tanan niyang apostoles sa gabii una siya mamatay. (Mat. 26:14-16, 47, 56, 75) Si Jesus wala matingala niini. Gitagna pa gani niya nga kini mahitabo. (Juan 6:64; 13:21, 26, 38; 16:32) Dihang nakita kini sa pipila, sila tingali napandol ug naghunahuna, ‘Kon ingon ana ang paggawi sa mga apostoles ni Jesus, di ko gustong mahimong bahin nianang grupoha!’

18. Unsang mga tagna ang natuman una pa ang kamatayon ni Jesus?

¹⁸ Unsay giingon sa Kasulatan? Gatosan ka tuig una pa mianhi si Jesus sa yuta, gipadayag ni Jehova sa iyang Pulong nga ang Mesiyas budhian baylo sa 30 ka pirasong plata. (Zac. 11:12, 13) Ang magbudhi kang Jesus maoy usa sa iyang suod nga mga higala. (Sal. 41:9) Si propetang Zacarias misulat sab: “Patya ang magbalantay, ug patibulaaga ang panon.” (Zac. 13:7) Imbes mapandol niini nga mga panghitabo, ang sinserong mga tawo mapalig-on  sa pagkakita nga kini nga mga tagna natuman kang Jesus.

19. Unsay nahibaloan sa sinserong mga tawo?

¹⁹ Ingon ana ba sab ang kahimtang karon? Oo. Sa atong panahon, ang pipila ka iladong mga Saksi mibiya sa kamatuoran, nahimong apostata, ug dayon misulay sa pagpahisalaag sa uban. Nagpakaylap silag dili maayong mga report, malimbongong mga estorya, ug mga bakak bahin sa mga Saksi ni Jehova diha sa balita ug sa Internet. Pero ang sinserong mga tawo wala malimbongi. Nahibalo sila nga ang Bibliya nagtagna nga mahitabo ang maong mga butang.—Mat. 24:24; 2 Ped. 2:18-22.

20. Unsay atong mahimo aron dili ta malimbongan niadtong mibiya sa kamatuoran? (2 Timoteo 4:4, 5)

²⁰ Unsay atong buhaton aron dili mawala ang atong pagtuo? Kinahanglan natong huptang lig-on ang atong pagtuo pinaagi sa regular nga pagtuon, padayong pag-ampo, ug pagkugi diha sa buluhaton nga gipahimo ni Jehova kanato. (Basaha ang 2 Timoteo 4:4, 5.) Kon duna tay pagtuo, dili ta mabalaka dihang makadungog tag dili maayong mga report bahin sa mga Saksi ni Jehova. (Isa. 28:16) Ang atong gugma kang Jehova, sa iyang Pulong, ug sa atong mga igsoon motabang nato nga dili malimbongan niadtong mibiya sa kamatuoran.

21. Bisag ang kadaghanan karon nagsalikway sa atong mensahe, sa unsa ta segurado?

²¹ Sa unang siglo, daghan ang napandol ug nagsalikway kang Jesus. Pero daghan pod ang midawat kaniya. Apil kanila ang labing menos usa ka membro sa Sanhedrin ug bisan ang “daghang saserdote.” (Buh. 6:7; Mat. 27:57-60; Mar. 15:43) Karon, minilyon sab ang wala mapandol. Ngano? Tungod kay sila nahibalo ug nahigugma sa mga kamatuoran nga naa sa Kasulatan. Ang Pulong sa Diyos nag-ingon: “Ang dagayang pakigdait matagamtam niadtong nahigugma sa imong balaod; walay makapandol nila.”—Sal. 119:165.