1-2. Ipatin-aw kon nganong ang mga prinsipyo sa Bibliya mahimo tingaling mas makahuloganon dihang mausab ang atong kahimtang.

 SA ADLAW sa kasal, ang lalaki ug babaye maminaw pag-ayo sa binase sa Bibliya nga pakigpulong bahin sa kaminyoon. Ang mga prinsipyo nga ilang madungog ana nga pakigpulong dili na bag-o para nila. Pero sukad anang adlawa, mas dako na nig kahulogan para nila. Ngano? Kay ila na man ning ipadapat ingong magtiayon.

² Ingon ana pod ang kahimtang kon ang Kristohanong magtiayon mahimo nang ginikanan. Tingali, daghang tuig na silang nakadungog ug mga pakigpulong bahin sa pagpadakog mga anak. Pero karon, ang maong mga prinsipyo mas dako nag kahulogan para nila. Naa na silay kaugalingong anak nga atimanon. Seryoso ni pero nindot kaayo nga responsibilidad! Tinuod gyod nga dihang mausab ang atong kahimtang, mahimong mas makahuloganon ang mga prinsipyo sa Bibliya nga ato nang nahibaloan. Mao ni usa ka rason kon nganong basahon sa mga magsisimba ni Jehova ang Kasulatan, ug parehas sa gisugo nga himoon sa mga hari sa Israel, ila ning pamalandongon sa “tibuok” nilang kinabuhi.​—Deut. 17:19.

3. Unsay atong hisgotan niining artikuloha?

³ Mga ginikanan, nabatonan ninyo ang usa sa nindot kaayong mga pribilehiyo sa mga Kristohanon—ang pagtudlo sa inyong mga anak bahin kang Jehova. Pero dili lang basta tudloan ninyo sila bahin sa atong Diyos. Gusto pod ninyong tabangan sila nga higugmaon siya pag-ayo. Unsay inyong mahimo aron ang inyong mga anak mahigugma kang Jehova?  Niining artikuloha, atong hisgotan ang upat ka prinsipyo sa Bibliya nga makatabang ninyo ingong ginikanan. (2 Tim. 3:16) Hisgotan pod nato kon sa unsang paagi ang ubang Kristohanong ginikanan nakabenepisyo sa pagpadapat sa mga tambag sa Bibliya.

4. Unsa ang usa ka prinsipyo nga makatabang sa mga ginikanan sa pagtudlo sa ilang mga anak nga mahigugma kang Jehova? (Santiago 1:5)

⁴ Unang prinsipyo: Pagiya kang Jehova. Hangyoa si Jehova nga hatagan kag kaalam sa pagtabang sa imong mga anak nga mahigugma niya. (Basaha ang Santiago 1:5.) Siya ang makahatag ug pinakamaayong tambag. Naay daghang rason kon ngano. Hisgotan nato ang duha niana. Una, si Jehova ang pinakaeksperyensiyado nga ginikanan. (Sal. 36:9) Ikaduha, ang iyang tambag kanunayng maayog resulta.​—Isa. 48:17.

5. (a) Unsay gitagana sa organisasyon ni Jehova aron matabangan ang mga ginikanan? (b) Base sa video, unsay imong nakat-onan sa pagpadako ni Brader ug Sister Amorim sa ilang mga anak?

⁵ Pinaagi sa iyang Pulong ug sa iyang organisasyon, si Jehova nagtaganag daghan kaayong binase sa Bibliya nga espirituwal nga pagkaon nga makatabang nimo sa pagtudlo sa imong mga anak nga higugmaon si Jehova. (Mat. 24:45) Pananglitan, makakita kag praktikal nga tambag sa serye nga “Tabang Alang sa Pamilya,” nga sa una naa sa magasing Pagmata! pero karon naa na sa atong website. Naa poy daghang video interview ug drama diha sa jw.org nga makatabang nga mapadapat sa mga ginikanan ang tambag ni Jehova sa pagpadakog mga anak. *​—Prov. 2:4-6.

6. Unsay gibati sa usa ka amahan sa giya nga nadawat niya ug sa iyang asawa gikan sa organisasyon ni Jehova?

⁶ Daghang ginikanan miingon nga naapresyar nila ang tabang nga gihatag ni Jehova pinaagi sa iyang organisasyon. Ang amahan nga si Joe miingon: “Dili sayon magpadakog tulo ka anak diha sa kamatuoran. Kami sa akong asawa pirmeng mag-ampo nga tabangan mi ni Jehova. Kadaghan mi nakaingon nga tayming kaayo ang artikulo o video sa giatubang namo nga situwasyon. Dako kaayog natabang namo ang pagpangayog giya kang Jehova.”  Nakita ni Joe ug sa iyang asawa nga ang maong mga tagana nakatabang sa ilang mga anak nga masuod kang Jehova.

7. Nganong importante nga maningkamot ang mga ginikanan nga magpakitag maayong ehemplo? (Roma 2:21)

⁷ Ikaduhang prinsipyo: Tudloi sila pinaagig maayong ehemplo. Ang mga anak maniid pag-ayo sa ilang ginikanan, ug kasagaran sundogon nila ang ilang makita. Siyempre, walay perpektong ginikanan. (Roma 3:23) Bisan pa ana, ang mga ginikanan angayng maningkamot nga magpakitag maayong ehemplo sa ilang mga anak. (Basaha ang Roma 2:21.) Bahin sa mga bata, ang usa ka amahan miingon: “Mora silag mga foam, kay ma-absorb nila ang tanan.” Miingon pod siya: “Sultihan mi nila kon ang among ginahimo lahi sa among ginatudlo.” Busa kon gusto nato nga higugmaon sa atong mga anak si Jehova, kinahanglan nilang makita nga gihigugma nato Siya pag-ayo.

8-9. Unsay imong nakat-onan sa giingon ni Andrew ug Emma?

⁸ Daghag paagi nga matudloan sa mga ginikanan ang ilang mga anak sa paghigugma kang Jehova. Matikdi ang giingon sa 17 anyos nga brader nga si Andrew: “Pirme ming tudloan sa among ginikanan nga importante kaayo nga mag-ampo. Kada gabii, mag-ampo mi ni Papa bisag nahuman na kog ampo. Pirme ming pahinumdoman ni Mama ug Papa: ‘Puwede mong makig-estorya kang Jehova bisag kapila pa.’ Tungod ana, importante kaayo nako ang pag-ampo. Dili ko malisdan nga moampo kay kabalo ko nga Amahan nako si Jehova ug palangga ko niya.” Mga ginikanan, hinumdomi nga ang inyong gugma kang Jehova makatabang sa inyong mga anak nga higugmaon pod siya.

⁹ Konsideraha pod ang eksperyensiya ni Emma. Dihang gibiyaan sila sa ilang papa, gibinlan silag dako kaayong utang. Si Emma miingon: “Daghang panahon nga naglisod si Mama sa pinansiyal, pero kanunay siyang moingon nga si Jehova nag-atiman ug nagtagana sa iyang mga alagad. Nakita nako nga dako gyod siyag pagtuo sa iyang ginaingon. Gipadapat gyod ni Mama ang iyang gitudlo.” Unsay leksiyon? Ang mga ginikanan makatudlo sa ilang mga anak pinaagig maayong ehemplo bisan sa lisod nga mga kahimtang.—Gal. 6:9.

10. Sa unsang mga kahigayonan nga maestorya sa Israelinhong mga ginikanan ang ilang mga anak? (Deuteronomio 6:6, 7)

¹⁰ Ikatulong prinsipyo: Pakig-estorya pirme sa imong mga anak. Gisugo ni Jehova ang mga Israelinhon sa karaang panahon nga regular nga tudloan ang ilang mga anak bahin niya. (Basaha ang Deuteronomio 6:6, 7.) Ang maong mga ginikanan daghag kahigayonan sa tibuok adlaw nga makig-estorya sa ilang mga anak ug tudloan sila nga higugmaon si Jehova. Pananglitan, ang Israelinhon nga batang lalaki daghang oras tingaling motabang sa iyang papa sa pagtanom o sa paghakot sa giani. Ang iyang igsoon nga babaye halos tibuok adlaw tingaling motabang sa ilang mama sa pagtahi, paghablon, ug sa ubang buluhaton sa balay. Samtang mag-uban sa trabaho ang ginikanan ug mga anak, daghang importanteng butang ang puwede nilang estoryahan. Pananglitan, puwede nilang estoryahan kon unsa ka maayo si Jehova ug kon giunsa niya pagtabang ang ilang pamilya.

11. Unsang kahigayonan ang magamit sa Kristohanong mga ginikanan aron maestorya ang ilang mga anak?

¹¹ Ang panahon nausab na. Sa daghang lugar, ang mga ginikanan ug mga anak wala kaayoy kahigayonan nga mag-uban. Ang mga ginikanan naa tingali sa trabaho ug ang mga anak naa sa eskuwelahan. Busa ang mga ginikanan  kinahanglang mangitag higayon nga maestorya nila ang ilang mga anak. (Efe. 5:15, 16; Filip. 1:10) Ang usa ana mao ang pamilyahanong pagsimba. Ang batan-ong brader nga si Alexander miingon: “Si Papa pirmeng mag-eskedyul ug family worship, ug paneguroon niya nga matuman gyod ni nga eskedyul. Human mi magtuon, mag-estoryahanay na mi.”

12. Unsay angayng hinumdoman sa ulo sa pamilya panahon sa pamilyahanong pagsimba?

¹² Kon ulo ka sa pamilya, unsay imong mahimo aron mag-enjoy ang imong mga anak sa pamilyahanong pagsimba? Sulayi nga estadihan sila sa bag-ong publikasyon nga Mabuhi Ka Hangtod sa Hangtod! Nindot ning libroha kay magkaestorya gyod mog maayo. Gusto nimo nga ang imong mga anak mosulti sa ilang gibati ug gikabalak-an, busa ayaw gamita ang pamilyahanong pagsimba aron sermonan o kasab-an sila. Ug paningkamoti nga dili ka masuko dihang naa silay isulti nga dili uyon sa Bibliya. Angay hinuon kang malipay kay wala silay gitago nimo, ug dasiga sila nga kanunayng isulti ang ilang gibati. Mas makatabang ka sa imong mga anak kon kabalo ka kon unsay naa sa ilang kasingkasing.

13. Unsa ang laing mga kahigayonan nga matabangan sa mga ginikanan ang ilang mga anak nga masuod kang Jehova?

¹³ Mga ginikanan, pangitag kahigayonan sa tibuok adlaw nga matabangan ninyo ang inyong mga anak nga masuod kang Jehova. Ayaw nag hulata ang inyong eskedyul sa pag-Bible study ayha ninyo sila tudloan bahin sa atong mahigugmaong Diyos. Matikdi ang giingon sa inahan nga si Lisa: “Naningkamot mi nga matudloan ang among mga anak bahin kang Jehova pinaagi sa kalalangan. Pananglitan, dihang ang among mga anak malingaw sa among iro, amo silang ingnan nga pamatuod ni nga si Jehova malipayong Diyos ug gusto niya nga malipay ug malingaw ta.”

14. Nganong importante nga tabangan sa mga ginikanan ang ilang mga anak sa pagpilig maayong mga higala? (Proverbio 13:20)

¹⁴ Ikaupat nga prinsipyo: Tabangi ang imong mga anak sa pagpilig maayong mga higala. Giklaro sa Pulong sa Diyos nga ang atong mga higala naay maayo o dili maayong epekto kanato. (Basaha ang Proverbio 13:20.)  Mga ginikanan, kaila ba mo sa mga higala sa inyong mga anak? Nailaila ug nakauban na ba ninyo sila? Unsay inyong mahimo aron ang inyong mga anak masuod sa mga tawo nga nahigugma kang Jehova? (1 Cor. 15:33) Matabangan ninyo ang inyong mga anak nga makakitag maayong mga higala pinaagi sa pag-imbitar sa mga igsoon nga dasig sa espirituwal.​—Sal. 119:63.

15. Unsay mahimo sa mga ginikanan aron matabangan nila ang ilang mga anak nga makakitag maayong mga higala?

¹⁵ Konsideraha ang eksperyensiya sa amahan nga si Tony. Gisulti niya kon unsay gihimo niya ug sa iyang asawa aron ang ilang mga anak makakitag maayong mga higala: “Pirme gyod ming mangimbitar ug mga brader ug sister nga lainlaig pangedaron. Magdungan mig pangaon ug moapil sila sa among family worship. Maayo ni nga paagi nga mailhan kadtong nahigugma ug malipayong nag-alagad kang Jehova. Panalangin kaayo kay nakapasaka mig mga circuit overseer, misyonaryo, ug uban pa. Ang ilang mga eksperyensiya, kadasig, ug pagsakripisyo dako kaayog epekto sa among mga anak, ug nakatabang ni nga masuod sila kang Jehova.” Mga ginikanan, paningkamoti nga matabangan ninyo ang inyong mga anak nga makakitag maayong mga higala.

16. Unsay himoon kon ang anak moingon nga dili siya gustong moalagad kang Jehova?

¹⁶ Komosta man kon human sa tanan nimong gihimo, sultihan ka sa imong anak nga dili siya gustong moalagad kang Jehova? Ayaw paghunahuna nga napakyas ka ingong ginikanan. Kitang tanan​—apil ang imong anak—​gihatagan ni Jehova ug kagawasan sa pagpili, sa ato pa makapili ta kon moalagad ba ta sa Diyos o dili. Kon modesisyon ang imong anak nga mobiya kang Jehova, ayawg wad-a ang imong paglaom nga mobalik ra unya siya. Hinumdomi ang ilustrasyon bahin sa milayas nga anak. (Luc. 15:11-19, 22-24) Ang maong batan-on wala na mosubay sa hustong dalan, pero sa ulahi mibalik siya. Basin naay moingon, “Ilustrasyon ra man nâ. Mahitabo ba gyod nâ sa tinuod nga kinabuhi?”  Oo! Mao nay nahitabo sa batan-on nga si Elie.

17. Sa unsang paagi nadasig ka sa eksperyensiya ni Elie?

¹⁷ Si Elie miingon bahin sa iyang ginikanan: “Gihimo nila ang tanan aron masilsil kanako ang gugma kang Jehova ug sa iyang Pulong, ang Bibliya. Apan, sa tin-edyer pa ko misugod ko pagrebelde.” Si Elie hinayhinay nang naghimog dili maayo. Bisag naningkamot ang iyang ginikanan nga tabangan siya sa espirituwal, wala siya maminaw nila. Human siya mobiya sa ilang balay, daotan na siyag pagkinabuhi. Pero usahay, sangyawan niya ang usa sa iyang mga higala. Si Elie miingon: “Sa sige nakog estorya sa akong higala bahin kang Jehova, mas nagsige kog hunahuna bahin Kaniya. Sa hinayhinay, ang binhi sa kamatuoran nga gipaningkamotan sa akong ginikanan nga matisok sa akong kasingkasing misugod pagtubo.” Sa ulahi, si Elie mibalik sa kamatuoran. * Imadyina kon unsa ka malipayon ang iyang mga ginikanan nga natudloan nila siya nga higugmaon si Jehova sa bata pa siya.​—2 Tim. 3:14, 15.

18. Unsay imong gibati sa mga ginikanan nga naningkamot sa pagtudlo sa ilang mga anak nga higugmaon si Jehova?

¹⁸ Mga ginikanan, gihatagan mog nindot kaayong pribilehiyo​—ang pagpatunghag bag-ong henerasyon sa mga magsisimba ni Jehova. (Sal. 78:4-6) Dili nâ sayon nga asaynment, maong kinasingkasing mo namong gikomendahan sa inyong paningkamot nga tabangan ang inyong mga anak! Kon padayon ninyong himoon ang inyong maarangan sa pagtabang kanila nga higugmaon si Jehova ug sa pagmatuto kanila pinaagi sa iyang disiplina ug tambag, makaseguro mo nga malipay ang atong mahigugmaong Amahan sa langit.​—Efe. 6:4.