1. Unsay giingon sa Bibliya bahin sa tinuod nga gugma?

 “NAGDILAAB ang kalayo [sa gugma], ang kalayo ni Jah. Ang bul-og sa katubigan dili makapalong sa gugma; bisan ang mga suba dili makabanlas niini.” b (Awit 8:6, 7) Pagkanindot nga deskripsiyon sa tinuod nga gugma! Kini dunay makapalig-on nga pasalig para sa mga magtiayon: Posible gyod nga dili moawop ang inyong gugma sa usag usa.

2. Unsay angayng himoon sa magtiayon aron maseguro nga dili mobugnaw ang ilang gugma?

² Aron dili moawop ang gugma sa magtiayon sa usag usa, kinahanglang naa silay buhaton. Sa pag-ilustrar, ang daob magpabilin rang magsiga kon padayon ning sugnoran. Kon pasagdan ni, mapalong ang kalayo. Ingon ana pod ang gugma sa bana ug asawa. Magpabilin ra ning lig-on kon ila ning atimanon. Usahay, mobugnaw ang gugma sa magtiayon, ilabina dihang naa silay mga problema sa pinansiyal, sakit, o nalisdan sa pag-atiman sa ilang mga anak. Busa kon minyo ka, unsay imong himoon aron dili mapalong ang “kalayo ni Jah” sa inyong kaminyoon? Niining artikuloha, atong hisgotan ang tulo ka paagi kon unsaon nga magpabiling lig-on ang inyong relasyon ug magmalipayon ang inyong kaminyoon. c

3. Sa unsang paagi ang lig-ong relasyon kang Jehova makatabang nga dili mobugnaw ang gugma sa magtiayon? (Ecclesiastes 4:12) (Tan-awa sab ang hulagway.)

³ Aron dili mapalong ang “kalayo ni Jah,” kinahanglang palig-onon  sa bana ug asawa ang ilang relasyon kang Jehova. Sa unsang paagi makatabang ni sa ilang kaminyoon? Dihang pabilhan sa magtiayon ang ilang relasyon sa ilang langitnong Amahan, andam nilang sundon ang iyang tambag. Tungod ana, ilang malikayan ug makaya ang mga problema nga posibleng makabugnaw sa ilang gugma sa usag usa. (Basaha ang Ecclesiastes 4:12.) Ang mga tawo nga maayog espirituwalidad maningkamot pod nga sundogon si Jehova ug mapakita ang iyang mga hiyas, sama sa pagkamaayo, pailob, ug pagpasaylo. (Efe. 4:32–5:1) Kon ipakita sa magtiayon kini nga mga hiyas, mas molig-on ang ilang gugma sa usag usa. Ang sister nga si Lena, nga kapig 25 ka tuig nang minyo, miingon, “Mas sayong higugmaon ug tahoron ang tawo nga maayog espirituwalidad.”

4. Nganong si Jose ug Maria ang gipili ni Jehova nga mahimong ginikanan sa umaabot nga Mesiyas?

⁴ Konsideraha ang usa ka pananglitan sa Bibliya. Dihang mipili si Jehova kon kinsay mahimong ginikanan sa umaabot nga Mesiyas, Iyang gipili si Jose ug Maria. Sa kadaghan sa kaliwat ni David, nganong sila ang Iyang gipili? Kay silang duha parehong suod kang Jehova, ug nahibalo si Jehova nga ila siyang unahon diha sa ilang kaminyoon. Mga magtiayon, unsay inyong makat-onan kang Jose ug Maria?

5. Unsay makat-onan sa mga bana kang Jose?

⁵ Si Jose andam mosunod sa direksiyon ni Jehova, ug tungod ana nahimo siyang mas maayong bana. Sa Bibliya, dihay tulo ka higayon nga nakadawat siyag instruksiyon sa Diyos bahin sa iyang pamilya. Sa matag higayon, misunod dayon siya, bisan pag dili to sayon himoon. (Mat. 1:20, 24; 2:13-15, 19-21) Kay gisunod ni Jose ang direksiyon sa Diyos, iyang naprotektahan ug naatiman si Maria ug natagan-an ang iyang panginahanglan. Seguradong nakapalalom ni sa gugma ug pagtahod ni Maria kang Jose! Mga bana, masundog ninyo si Jose pinaagi sa pagpangitag tambag diha sa Bibliya bahin sa pag-atiman sa inyong pamilya. d Kon inyong ipadapat ni nga tambag bisan pag usahay lisod ning himoon, inyong gipakita nga gimahal ninyo ang inyong asawa ug mas molig-on ang inyong kaminyoon. Ang usa ka sister sa Vanuatu, nga kapig 20 ka tuig nang minyo, miingon: “Dihang ang akong bana mangita ug mosunod sa giya ni Jehova, mas modako ang akong pagtahod niya. Kampante ko, ug naa koy pagsalig sa iyang mga desisyon.”

6. Unsay makat-onan sa mga asawa kang Maria?

⁶ Si Maria naay personal nga relasyon kang Jehova; ang iyang pagtuo wala magdepende kang Jose. Pamilyar kaayo siya sa Kasulatan. (Tan-awa ang study note sa Lucas 1:46.) Naggahin sab siyag panahon sa pagpamalandong. (Luc. 2:19, 51) Segurado nga tungod sa lig-ong espirituwalidad ni Maria, nahimo siyang  maayo kaayong asawa. Karon, daghang asawa ang naningkamot nga masundog si Maria. Pananglitan, ang sister nga si Emiko miingon: “Sa dalaga pa ko, naa koy kaugalingong espirituwal nga rutina. Pero pagminyo nako, ang akong bana mao nay moampo para namo ug manguna sa pamilyahanong pagsimba, ug namatikdan nako nga ang akong pagtuo nakadepende na niya. Nakita nako nga kinahanglan kong maningkamot nga palig-onon ang akong relasyon kang Jehova. Busa karon, naggahin kog panahon nga ako rang usa aron mag-ampo, magbasag Bibliya, ug mamalandong sa Pulong sa Diyos.” (Gal. 6:5) Mga asawa, kon padayon ninyong palig-onon ang inyong relasyon kang Jehova, mas dayegon ug higugmaon mo sa inyong bana.—Prov. 31:30.

7. Unsay makat-onan sa mga magtiayon kang Jose ug Maria bahin sa pagsimba nga magkauban?

⁷ Si Jose ug Maria nagtinabangay sab sa pagpalig-on sa ilang relasyon kang Jehova. Nasabtan nila ang kaimportante sa pagsimba kang Jehova ingong pamilya. (Luc. 2:22-24, 41; 4:16) Dili tingali ni sayon himoon ilabina kay nagkadako ang ilang pamilya, pero milampos gihapon sila. Pagkanindot nga ehemplo para sa mga magtiayon karon! Kon naa moy mga anak, parehas ni Jose ug Maria, lisod tingali ang pagtambong sa mga tigom o pag-eskedyul ug panahon para sa pamilyahanong pagsimba. Tingali mas lisod pa gyod ang paggahin ug panahon sa pagtuon o pag-ampo ingong magtiayon. Pero hinumdomi nga dihang mag-uban mo sa pagsimba kang Jehova, mas masuod mo kaniya ug sa usag usa. Busa himoang prayoridad ang pagsimba kang Jehova.

8. Kon ang magtiayon naay problema sa ilang relasyon, unsay ilang mahimo aron mas makabenepisyo sila sa ilang pamilyahanong pagsimba?

⁸ Komosta kon naay problema ang inyong relasyon ingong magtiayon? Tungod ana, dili tingali mo ganahang mag-uban sa pamilyahanong pagsimba. Kon mao, puwede mong magsugod sa mga topiko nga mubo, makalingaw, ug parehas ninyong ganahan. Makapalig-on ni sa inyong relasyon ug makatabang nga ganahan na mong mag-uban sa paghimog espirituwal nga mga butang.

9. Nganong ang bana ug asawa kinahanglang mogahin ug panahon sa usag usa?

⁹ Mga magtiayon, mapalig-on pod ninyo ang inyong gugma kon mogahin mog panahon nga magkauban. Kon inyo nang himoon, magpabilin mong suod kay nahibalo mo kon unsay gihunahuna ug gibati sa inyong kapikas. (Gen. 2:24) Matikdi kon unsay nadiskobrehan ni Lilia ug Ruslan wala madugay human sila maminyo, kapig 15 ka tuig na ang milabay. Si Lilia miingon: “Nagdahom mi nga daghan mig panahon nga magkauban. Pero ang among panahon nahurot sa trabaho, mga buluhaton sa balay, ug sa ulahi, sa pag-atiman sa among mga anak. Nakita namo nga kon dili mi mogahin ug panahon sa usag usa, anam-anam nga mawala ang among kasuod.”

10. Unsaon pagpadapat sa mga magtiayon ang prinsipyo sa Efeso 5:15, 16?

¹⁰ Unsay puwedeng himoon sa mga magtiayon aron maseguro nga naa silay panahon nga magkauban? Puwede mong mag-eskedyul ug panahon sa usag usa. (Basaha ang Efeso 5:15, 16.) Ang brader sa Nigeria nga si Uzondu miingon: “Dihang mag-eskedyul ko sa akong mga himoonon, apilon nako ang panahon nga mag-uban mi sa akong asawa, ug ako gyod nang tumanon.” (Filip. 1:10) Matikdi kon unsay gihimo ni Anastasia, asawa sa usa ka tigdumala sa sirkito sa Moldova, aron magamit niyag maayo ang iyang panahon. Siya miingon: “Samtang busy ang akong bana sa iyang mga responsibilidad, buhaton na nako ang akong  mga himoonon aron nga human sa among mga buluhaton, naa na mi panahon nga magkauban.” Pero komosta kon maglisod mog gahin ug panahon nga magkauban tungod sa inyong mga eskedyul?

11. Sa unsa nga mga buluhaton magkauban si Aquila ug Priscila?

¹¹ Ang mga magtiayon makakat-on sa ehemplo ni Aquila ug Priscila, magtiayon nga naapresyar sa daghang Kristohanon sa unang siglo. (Roma 16:3, 4) Wala kaayoy giingon ang Bibliya bahin sa ilang kaminyoon, pero gipakita niini nga sila nagtrabaho, nagsangyaw, ug mitabang sa uban nga magkauban. (Buh. 18:2, 3, 24-26) Gani, dihang ang Bibliya maghisgot bahin kang Aquila ug Priscila, ang ilang mga ngalan kanunay nga mag-uban.

12. Unsay puwedeng himoon sa bana ug asawa aron kanunay silang magkauban? (Tan-awa sab ang hulagway.)

¹² Unsaon pagsundog sa mga magtiayon si Aquila ug Priscila? Hunahunaa ang daghang butang nga kinahanglan ninyong himoon. Puwede ba mong mag-uban sa paghimo niini nga mga buluhaton imbes nga mag-iyahay? Pananglitan, si Aquila ug Priscila nag-uban sa pagsangyaw. Naa ba moy regular nga eskedyul sa pagsangyaw nga magkauban? Si Aquila ug Priscila nag-uban pod sa pagtrabaho. Dili tingali mo parehas ug trabaho sa imong kapikas, pero puwede ba ninyong himoon ang mga buluhaton sa balay nga magkauban? (Eccl. 4:9) Kon magtinabangay mo sa usa ka buluhaton, mas bation ninyo nga partner mo ug naa moy higayon nga magkaestoryahanay. Si Robert ug Linda kapig 50 ka tuig na nga minyo. Si Robert miingon: “Sa tinuod lang, wala kaayo mi panahon sa paglingawlingaw. Pero dihang manghugas kog plato ug trapohan ni sa akong asawa o dihang mangibot kog sagbot ug motabang siya nako, malipay kaayo ko. Kay kanunay ming magkauban sa mga buluhaton, mas nagkasuod mi. Padayong mitubo ang among gugma.”

13. Aron magkasuod gyod ang bana ug asawa, unsay angay nilang himoon?

¹³ Pero hinumdomi nga bisag magkauban ang bana ug asawa, dili pa na igo aron magkasuod sila. Usa ka asawa sa Brazil miingon: “Karon, daghan kaayong butang ang makabalda nato, maong dali ra kaayo tang maghunahuna nga nakagahin na tag panahon sa atong kapikas kay naa ra man nagpuyo sa usa ka balay. Pero nakat-onan nako nga dili igo nga magkauban lang mi sa akong bana. Kinahanglang hatagan pod nako siyag atensiyon.” Matikdi kon unsay gihimo ni Bruno ug sa iyang asawa nga si Tays aron maseguro nga mahatagan nilag atensiyon ang usag usa. Si Bruno miingon: “Dihang magkauban mi, ipadaplin namo ang among mga cellphone ug i-enjoy ang among panahon sa usag usa.”

14. Kon ang magtiayon dili malingaw nga makig-uban sa usag usa, unsay puwede nilang himoon?

¹⁴ Pero komosta kon dili mo malingaw nga  makig-uban sa inyong kapikas? Tingali lainlain mog hilig o mairita mo sa usag usa. Unsay inyong mahimo? Hinumdomi ang daob nga gihisgotan ganina. Dili ni kalit nga modilaab. Kinahanglan nga anam-anam ning sugnoran. Sa primero, gagmay ra ang imong isugnod ug sa ngadtongadto dagko na. Sa samang paagi, sulayi nga mag-uban mo kada adlaw bisag kadiyot lang. Seguroa nga ang inyong himoon parehas mong ganahan, dili kanang butang nga maglalis hinuon mo sa ulahi. (Sant. 3:18) Kon magsugod mo sa ginagmayng butang, tingali anam-anam nga motubog balik ang inyong gugma.

15. Nganong importante kaayo ang pagtahod aron dili mobugnaw ang gugma sa magtiayon?

¹⁵ Importante kaayo ang pagtahod diha sa kaminyoon. Sama nig oxygen nga makapasiga pag-ayo sa daob. Kon walay oxygen, dali rang mapalong ang kalayo. Kon wala poy pagtahod, dali rang mobugnaw ang gugma sa magtiayon. Sa laing bahin, kon ang bana ug asawa maningkamot nga magpakitag pagtahod sa usag usa, padayong modako ang ilang gugma. Pero hinumdomi nga bisag para nimo nagpakita kag pagtahod, ang pangutana, gibati ba sa imong kapikas nga imo siyang gitahod? Si Penny ug Aret kapig 25 ka tuig na nga minyo. Si Penny miingon: “Kay naa mi pagtahod sa usag usa, malipayon ang among panimalay. Dili mi mahadlok nga isulti kon unsay naa sa among hunahuna kay importante namo ang opinyon sa matag usa.” Busa unsay imong mahimo aron bation sa imong kapikas nga gitahod gyod nimo siya? Konsideraha ang ehemplo ni Abraham ug Sara.

16. Unsay makat-onan sa mga bana kang Abraham? (1 Pedro 3:7) (Tan-awa sab ang hulagway.)

¹⁶ Gipakitaan ni Abraham si Sara ug pagtahod. Iyang gikonsiderar ang opinyon ug pagbati ni Sara. Dihay higayon nga nasakitan ug nahiubos pag-ayo si Sara, ug iyang gipahungaw ang iyang gibati kang Abraham. Iya pa ganing gibasol ang iyang bana. Nasuko ba si Abraham ug misultig sakit nga mga pulong? Wala. Nahibalo siya nga si Sara kanunayng nagpasakop niya ug nagsuportar sa iyang mga desisyon. Naminaw si Abraham sa iyang asawa ug naningkamot nga masulbad ang problema. (Gen. 16:5, 6) Unsay atong makat-onan? Mga bana, naa moy awtoridad sa paghimog mga desisyon para sa inyong pamilya. (1 Cor. 11:3) Pero makapakita mog gugma sa inyong asawa kon konsiderahon ninyo ang ilang opinyon sa dili pa modesisyon, ilabina kon ang desisyon makaapektar nila. (1 Cor. 13:4, 5) Naay mga panahon nga ang inyong asawa ma-stress ug basin kinahanglan nilang isulti ang ilang gibati. Gitahod ba ninyo ang ilang gibati pinaagi sa pagpaminaw sa ilang isulti? (Basaha ang 1 Pedro 3:7.) Si Angela ug Dmitry halos 30 ka tuig na nga minyo. Gisulti ni Angela kon nganong  gibati niya nga gitahod siya sa iyang bana: “Si Dmitry andam kanunay nga maminaw nako dihang mahiubos ko o dihang gusto lang kong makig-estorya. Mapailobon siya nako, bisan sa mga panahon nga emosyonal kaayo ko.”

17. Unsay makat-onan sa mga asawa kang Sara? (1 Pedro 3:5, 6)

¹⁷ Gitahod ni Sara si Abraham pinaagi sa pagsuportar sa iyang mga desisyon. (Gen. 12:5) Dihay higayon nga midesisyon si Abraham nga abiabihon ang mga bisita nga kalit rang miabot. Iyang gihangyo si Sara nga biyaan una ang iyang trabaho ug maghimog daghang tinapay. (Gen. 18:6) Si Sara milihok dayon ug gisuportahan ang desisyon ni Abraham. Mga asawa, masundog ninyo si Sara pinaagi sa pagsuportar sa mga desisyon sa inyong bana. Kon inyo nang himoon, molig-on ang inyong kaminyoon. (Basaha ang 1 Pedro 3:5, 6.) Si Dmitry, nga gihisgotan sa miaging parapo, misulti kon nganong gibati niya nga gitahod siya sa iyang asawa. Siya miingon: “Naapresyar nako ang paningkamot ni Angela nga suportahan ang akong mga desisyon, bisag usahay dili mi parehas ug opinyon. Bisag dili maayo ang resulta sa desisyon, dili ko niya basolon.” Sayon gyong higugmaon ang tawo nga nagtahod nimo!

18. Unsay kaayohan kon padayong sugnoran sa magtiayon ang ilang gugma?

¹⁸ Karon, gusto ni Satanas nga palongon ang gugma sa mga Kristohanong magtiayon. Nahibalo siya nga kon mawala ang gugma sa magtiayon sa usag usa, posible nga anam-anam silang mapalayo kang Jehova. Pero ang tinuod nga gugma dili gyod mapalong! Busa hinaot nga ang imong gugma sa imong kapikas maparehas sa gugma nga gihisgotan sa Awit ni Solomon. Paningkamoti nga kanunayng unahon si Jehova sa inyong kaminyoon, mogahin ug panahon sa usag usa, ug tahoron ang pagbati ug panginahanglan sa matag usa. Kon inyo nang himoon, ang inyong kaminyoon magpasidungog sa Tinubdan sa tinuod nga gugma, si Jehova. Ug samag kalayo nga kanunayng gisugnoran, ang inyong gugma modilaab hangtod sa hangtod.