1. Unsay gusto ni Jehova nga himoon sa iyang mga alagad? (Tan-awa sab ang hulagway.)

 KANG kinsa ta makaduol kon nagkinahanglan tag paghupay ug giya? Nahibalo ta sa tubag ana. Makaduol ta kang Jehova nga Diyos pinaagi sa pag-ampo, ug kanay gusto ni Jehova nga atong himoon. Gusto niya nga kita ‘mag-ampo kanunay.’ (1 Tes. 5:17) Makaduol ta niya pinaagi sa pag-ampo ug makapangayog giya sa tanang bahin sa atong kinabuhi. (Prov. 3:5, 6) Kay mahinatagon siya nga Diyos, wala ta niya limitahe kon kapila lang ta makaampo niya.

2. Unsay hisgotan niining artikuloha?

² Mapasalamaton kaayo ta kang Jehova kay gitugot niya nga makaampo ta kaniya. Pero sa kadaghan sa atong buluhaton, basin maglisod ta sa paggahin ug panahon sa pag-ampo. Basin kinahanglan pod natong pauswagon ang kalidad sa atong mga pag-ampo. Maong mapasalamaton ta nga ang Bibliya naghatag natog pagdasig ug giya. Niining artikuloha, hisgotan nato kon sa unsang paagi masundog nato si Jesus sa paggahin ug panahon sa pag-ampo. Konsiderahon pod nato ang lima ka importanteng butang nga puwede natong iapil sa atong pag-ampo aron mouswag pa ang kalidad niini.

3. Unsay nahibaloan ni Jesus bahin sa pag-ampo?

³ Nahibalo si Jesus nga importante kaayo kang Jehova ang atong mga pag-ampo. Sulod sa taas nga panahon una siya mianhi sa yuta, nakita niya kon giunsa pagtubag sa iyang Amahan  ang pag-ampo sa matinumanong mga lalaki ug babaye. Pananglitan, si Jesus naa sa kiliran sa iyang Amahan dihang gitubag Niya ang sinserong mga pag-ampo ni Ana, David, Elias, ug sa uban pa. (1 Sam. 1:10, 11, 20; 1 Hari 19:4-6; Sal. 32:5) Kanay rason nga gitudloan ni Jesus ang iyang mga tinun-an nga mag-ampo pirme ug mosalig nga dunggon sila sa Diyos!—Mat. 7:7-11.

4. Unsang ehemplo ang gipakita ni Jesus kon bahin sa pag-ampo?

⁴ Pinaagi sa iyang kaugalingong mga pag-ampo kang Jehova, si Jesus naghatag ug maayong ehemplo sa iyang mga tinun-an. Sa tibuok ministeryo ni Jesus, kanunay siyang nag-ampo. Kinahanglan siyang mogahin ug panahon sa pag-ampo kay pirme siyang busy ug daghag tawo sa iyang palibot. (Mar. 6:31, 45, 46) Mobangon siya sayo sa buntag aron makaampo siya nga siya lang usa ug walay makabalda niya. (Mar. 1:35) Diha pa gani higayon nga nag-ampo siya sa tibuok gabii una siya mihimog importanteng desisyon. (Luc. 6:12, 13) Ug sa gabii una siya mamatay, balikbalik nga nag-ampo si Jesus aron matuman niya ang pinakalisod nga bahin sa iyang asaynment dinhi sa yuta.—Mat. 26:39, 42, 44.

5. Unsaon nato pagsundog si Jesus kon bahin sa pag-ampo?

⁵ Ang ehemplo ni Jesus nagtudlo nato nga bisag unsa pa ta ka busy, kinahanglan tang mag-eskedyul o mogahin ug panahon sa pag-ampo. Sama kang Jesus, momata tingali tag sayo o ma-late gamay sa pagkatulog aron mag-ampo. Kon ato nang himoon, atong gipakita kang Jehova nga giapresyar nato kining espesyal nga regalo. Ang sister nga si Lynne nahinumdom nga natandog kaayo siya dihang nakat-onan niya kon unsa ka dakong pribilehiyo ang pag-ampo. Siya miingon: “Dihang nakat-onan nako nga makaampo ko kang Jehova bisan kanus-a, nakatabang ni nga isipon nako siya ingong suod nga Higala, ug nadasig ko nga pauswagon ang akong mga pag-ampo.” Seguradong daghan nato ang mibati ana. Busa hisgotan nato ang lima ka importanteng butang nga puwede natong iapil sa atong pag-ampo.

6. Sumala sa Pinadayag 4:10, 11, si Jehova takos modawat sa unsa?

⁶ Dayega si Jehova. Sa makapahinganghang panan-awon, si apostol Juan nakakitag 24 ka ansiyano didto sa langit nga nagsimba kang  Jehova. Ilang gidayeg ang Diyos ug giila nga takos siya nga modawat sa “himaya ug sa dungog ug sa gahom.” (Basaha ang Pinadayag 4:10, 11.) Ang matinumanong mga anghel daghan pod kaayog rason nga dayegon ug pasidunggan si Jehova. Kauban nila si Jehova sa langit ug nakaila sila pag-ayo kaniya. Nakita nila ang mga hiyas ni Jehova diha sa iyang ginahimo. Tungod ana, napalihok sila sa pagdayeg kaniya.—Job 38:4-7.

7. Nganong dayegon nato si Jehova?

⁷ Gusto pod natong dayegon si Jehova sa atong mga pag-ampo ug sultihan siya kon nganong gimahal ug gitahod nato siya. Samtang imong basahon ug tun-an ang Bibliya, matikdi kon unsa nga mga hiyas ni Jehova ang naapresyar kaayo nimo. (Job 37:23; Roma 11:33) Dayon sultihi si Jehova sa imong gibati niana nga mga hiyas. Dayegon pod nato si Jehova kay gitabangan ta niya ug ang mga igsoon sa tibuok kalibotan. Kanunay siyang nag-atiman ug nanalipod kanato.—1 Sam. 1:27; 2:1, 2.

8. Unsa ang pipila sa mga rason nga pasalamatan nato si Jehova? (1 Tesalonica 5:18)

⁸ Pasalamati si Jehova. Daghan tag rason nga pasalamatan si Jehova diha sa pag-ampo. (Basaha ang 1 Tesalonica 5:18.) Puwede nato siyang pasalamatan sa bisan unsang maayong butang nga naa nato, kay ang tanang maayong regalo naggikan kaniya. (Sant. 1:17) Pananglitan, puwede nato siyang pasalamatan sa atong nindot kaayong planeta ug sa makapahinganghang mga butang nga iyang gilalang. Pasalamatan pod nato siya kay gihatagan ta niyag kinabuhi, pamilya, mga higala, ug paglaom. Ug gusto natong pasalamatan si Jehova kay gitugotan ta niya nga makigsuod kaniya.

9. Nganong kinahanglan natong ugmaron ang atong apresasyon kang Jehova?

⁹ Kinahanglan tingali tang maningkamot pag-ayo nga hunahunaon ang mga rason kon nganong angay tang magpasalamat kang Jehova. Daghang tawo karon ang dili mapasalamaton. Sagad, nagpokus lang sila sa kon unsay ilang gusto imbes magpakitag apresasyon sa kon unsay naa nila. Kon maimpluwensiyahan ta niana nga panghunahuna, basin ang atong mga pag-ampo pulos na lang hangyo. Aron malikayan na, kinahanglang padayon natong ugmaron ug isulti ang atong apresasyon sa tanang gihimo ni Jehova para nato.—Luc. 6:45.

10. Sa unsang paagi ang pagkamapasalamaton nakatabang sa usa ka sister nga molahutay? (Tan-awa sab ang hulagway.)

¹⁰ Ang pagkamapasalamaton makatabang nato nga molahutay sa mga kalisdanan. Konsideraha ang eksperyensiya ni Kyung-sook, nga mabasa sa Enero 15, 2015 nga Bantayanang Torre. Nadayagnos siya nga may grabeng cancer sa baga. Siya miingon: “Kini nga sakit nakapaguol kaayo nako. Mibati ko nga nawala kanako ang tanan, ug nahadlok kaayo ko.” Unsay nakatabang niya? Miingon siya nga kada gabii sa dili pa siya matulog, moadto siya sa rooftop sa iyang balay ug mag-ampog kusog  bahin sa lima ka butang nga mapasalamaton siya nianang adlawa. Tungod ana, namenosan ang iyang kabalaka, ug napalihok siya nga isulti ang iyang gugma kang Jehova. Naeksperyensiyahan niya kon unsaon pagtabang ni Jehova ang iyang matinumanong mga alagad panahon sa lisod nga mga kahimtang. Ug naamgohan niya nga mas daghan ang atong mga panalangin kay sa mga problema. Sama kang Kyung-sook, daghan tag rason nga pasalamatan si Jehova bisan pag naa tay giatubang nga problema. Kon atong pasalamatan si Jehova diha sa atong mga pag-ampo, makatabang na nga makalahutay ta ug dili malumsan sa atong mga kabalaka.

11. Nganong ang mga tinun-an ni Jesus nagkinahanglag kaisog human mibalik si Jesus sa langit?

¹¹ Hangyoa si Jehova nga hatagan kag kaisog sa pagsangyaw. Sa hapit nang mobalik si Jesus sa langit, gipahinumdoman niya ang iyang mga tinun-an sa ilang buluhaton nga magpamatuod bahin kaniya “sa Jerusalem, sa tibuok Judea ug Samaria, ug hangtod sa kinalay-ang bahin sa yuta.” (Buh. 1:8; Luc. 24:46-48) Wala madugay, gidakop sa Hudiyong mga lider si apostol Pedro ug Juan ug gidala sila sa Sanhedrin. Ilang gibaoran kining matinumanong mga apostoles nga mohunong sa pagsangyaw ug gibaharan pa gani sila. (Buh. 4:18, 21) Unsay reaksiyon ni Pedro ug Juan?

12. Sumala sa Buhat 4:29, 31, unsay gihimo sa mga tinun-an?

¹² Bisag gibaharan sila sa Hudiyong mga lider, si Pedro ug Juan miingon: “Kamo nay mohukom kon husto ba sa panan-aw sa Diyos nga mamati kaninyo imbes sa Diyos. Apan alang kanamo, dili mi makahunong sa pagsulti bahin sa mga butang nga among nakita ug nadungog.” (Buh. 4:19, 20) Dihang gibuhian si Pedro ug Juan, ang mga tinun-an miampo kang Jehova nga tabangan sila sa paghimo sa iyang kabubut-on. Sila miampo: “Tabangi ang imong mga ulipon nga padayong mosulti sa imong pulong uban ang bug-os nga kaisog.” Gitubag ni Jehova ang ilang kinasingkasing nga pag-ampo.—Basaha ang Buhat 4:29, 31.

13. Unsay atong makat-onan kang Jin-hyuk?

¹³ Masundog nato ang mga tinun-an kon mopadayon ta sa pagsangyaw bisan pag idili kini sa gobyerno. Konsideraha ang pananglitan ni Jin-hyuk, brader nga gipriso kay dili siya magsundalo. Sa prisohan, giasayn siya sa paghatod ug pagkaon ug ubang panginahanglan sa pipila ka piniriso nga gibartolina. Pero wala siya tugoti nga makig-estorya nila bahin sa bisan unsa nga dili konektado sa iyang asaynment, apil na ang bahin sa Bibliya. Nag-ampo siya nga hatagan siyag kaisog ug kaalam aron masulti niya ang kamatuoran dihang naay kahigayonan. (Buh. 5:29) Siya miingon: “Gitubag ni Jehova ang akong mga pag-ampo kay gihatagan ko niyag kaisog ug kaalam sa pagsugod ug daghang pagtuon sa Bibliya, nga tag-lima lang ka minuto diha mismo sa pultahan sa selda. Dayon inigkagabii, maghimo kog mga sulat nga akong ihatag sa mga piniriso pagkasunod adlaw.” Sama kang Jin-hyuk, makapangayo ta kang Jehova ug kaisog ug kaalam. Makasalig ta nga tabangan ta niya nga molampos sa atong ministeryo.

14. Unsay makatabang nato kon naa tay mga problema? (Salmo 37:3, 5)

¹⁴ Pangayog tabang kang Jehova aron makaya nimo ang imong mga problema. Daghan nato ang nag-atubang ug mga kalisdanan sama sa sakit o problema sa emosyon, kamatayon sa minahal, lisod nga situwasyon sa pamilya, paglutos, o uban pa. Ug ang mga panghitabo sama sa pandemic ug gubat nakapasamot pa gyod sa atong mga problema. Isulti kang Jehova ang tanan nimong gibati. Sultihi siya bahin sa  imong kahimtang, nga sama bag nakig-estorya ka sa usa ka suod nga higala. Makasalig ka nga si Jehova “molihok alang kanimo.”—Basaha ang Salmo 37:3, 5.

15. Sa unsang paagi ang pag-ampo makatabang nato nga ‘makalahutay sa kasakitan’? Paghatag ug pananglitan.

¹⁵ Ang kanunay nga pag-ampo makatabang nato nga ‘makalahutay sa kasakitan.’ (Roma 12:12) Nahibalo si Jehova kon unsay ginasagubang sa iyang mga alagad—“iyang dunggon ang ilang pagtuaw alang sa tabang.” (Sal. 145:18, 19) Napamatud-an na sa 29 anyos nga payunir nga si Kristie. Kalit lang nga nakasinati siyag grabeng mga sakit. Tungod ana, na-depress kaayo siya. Sa ulahi, nahibaloan niya nga ang iyang mama nadayagnos nga naay makamatayng sakit. Si Kristie miingon: “Nagsige kog ampo kang Jehova nga hatagan ko niyag kusog nga makalahutay kada adlaw. Naningkamot ko nga padayong himoon ang akong espirituwal nga rutina sama sa pagtambong sa mga tigom ug personal nga pagtuon.” Miingon pod siya: “Ang pag-ampo nakatabang nako nga makaya ang lisod nga mga panahon. Nahibalo ko nga naa pirme si Jehova, ug kana nakahupay gyod nako. Bisag wala dayon mawala ang akong mga sakit, gitubag ni Jehova ang akong mga pag-ampo kay gihatagan ko niyag malinawong hunahuna ug kalmadong kasingkasing.” Hinaot dili nato kalimtan nga “nahibalo si Jehova kon unsaon pagluwas gikan sa pagsulay kadtong matinumanon kaniya.”—2 Ped. 2:9.

16. Nganong kinahanglan nato ang tabang ni Jehova aron masuklan ang mga tentasyon?

¹⁶ Pangayog tabang kang Jehova aron masuklan ang mga tentasyon. Kay dili ta hingpit, kinahanglan tang maningkamot kanunay nga suklan ang tentasyon nga mohimog daotan. Ginahimo ni Satanas ang tanan aron maglisod pa gyod ta nga masuklan ang tentasyon. Ang usa nga iyang gigamit aron maimpluwensiyahan ang atong panghunahuna mao ang dili maayong mga kalingawan. Kini nga mga kalingawan makahugaw sa atong hunahuna, nga  makadaot sa atong relasyon kang Jehova ug puwedeng moresultag seryosong sala.—Mar. 7:21-23; San. 1:14, 15.

17. Unsaon nato pagpakita nga milihok ta uyon sa atong pag-ampo nga malikayan ang tentasyon? (Tan-awa sab ang hulagway.)

¹⁷ Kinahanglan nato ang tabang ni Jehova aron masuklan nato ang tentasyon sa paghimog daotan. Sa modelong pag-ampo ni Jesus, iyang giapil kini nga hangyo: “Ayawg itugot nga madaog mi sa tentasyon, apan luwasa mi gikan sa usa nga daotan.” (Mat. 6:13) Si Jehova gustong motabang nato, pero kinahanglan tang mangayog tabang niya. Kinahanglan pod tang molihok uyon sa atong mga pag-ampo. Mohimo tag praktikal nga mga paagi aron malikayan ang pagbasa ug pagpaminaw sa sayop nga mga ideya nga komon sa kalibotan ni Satanas. (Sal. 97:10) Hinuon, pun-on nato ang atong hunahuna ug hinlong mga butang pinaagi sa pagbasa ug pagtuon sa Bibliya. Ang pagtambong sa tigom ug pagsangyaw manalipod sab sa atong hunahuna. Ug si Jehova nagsaad nga dili niya tugotan nga tentalon ta nga labaw sa atong maantos.—1 Cor. 10:12, 13.

18. Kon bahin sa pag-ampo, unsay angay natong himoon?

¹⁸ Kitang tanan kinahanglan gyong maningkamot sa pag-ampo nga makapabiling matinumanon kang Jehova niining kataposang mga adlaw. Paggahin ug panahon kada adlaw nga makaampo ka nga kinasingkasing. Gusto ni Jehova nga atong ‘ibubo ang atong kasingkasing kaniya’ dihang mag-ampo. (Sal. 62:8) Dayega si Jehova ug pasalamati siya sa tanan niyang gihimo. Hangyoa siya nga hatagan kag kaisog sa pagsangyaw. Pangayog tabang niya nga makaya nimo ang imong mga problema ug masuklan ang bisan unsang tentasyon nga imong giatubang. Ayaw tugoti ang bisan unsa o si bisan kinsa nga makapugong nimo sa pag-ampo kanunay kang Jehova. Pero sa unsang paagi tubagon ni Jehova ang atong mga pag-ampo? Hisgotan nato ang tubag nianang importanteng pangutana sa sunod nga artikulo.