SA KAPANAHONAN sa Bibliya, ang piniyalan maoy magdumala sa panimalay o kabtangan sa laing tawo. Ang Hebreohanon ug Gregong mga pulong nga gihubad ug “piniyalan” usahay magtumong sa usa ka tigdumala o sa mayordomo.

Dihang si Jose, nga anak sa patriarkang si Jacob, naulipon didto sa Ehipto, siya nahimong piniyalan sa panimalay sa iyang agalon. Gani, si Jose maoy gisaligan sa iyang Ehiptohanong agalon sa “tanang butang” nga gipanag-iya niini. (Gen. 39:2-6) Sa ulahi, dihang si Jose nahimong gamhanang magmamando sa Ehipto, nag-asayn pod siyag piniyalan nga modumala sa iyang panimalay.​—Gen. 44:4.

Sa panahon ni Jesus, ang mga tag-iyag yuta sagad namuyo sa mga siyudad nga layo sa ilang uma. Busa nag-asayn silag mga piniyalan nga modumala sa adlaw-adlawng buluhaton sa mga mamumuo nga nag-atiman sa uma.

Kinsay mokuwalipikar ingong piniyalan? Ang Romanong magsusulat sa unang siglo nga si Columella miingon nga ang ulipon nga itudlo ingong tigdumala, o piniyalan, angayng “eksperyensiyado sa buluhaton.” Paneguroon sa tigdumala nga ang mga tawo motrabaho gyod, pero dili siya pintas. Ang magsusulat midugang: “Pero mao niy pinakaimportante​—dili siya angayng maghunahuna nga nahibalo siya sa tanan, ug angay nga andam siyang mokat-on ug bag-ong butang.”

Ang Pulong sa Diyos naggamit sa ehemplo sa usa ka piniyalan aron iilustrar ang pipila ka buluhaton diha sa Kristohanong kongregasyon. Pananglitan, gidasig ni apostol Pedro ang mga Kristohanon nga gamiton ang katakos nga gihatag sa Diyos kanila “sa pag-alagad sa usag usa ingong maayong mga piniyalan sa dili hitupngang pagkamaayo sa Diyos.”​—1 Ped. 4:10.

Si Jesus mismo migamit sa ehemplo sa piniyalan diha sa iyang ilustrasyon sa Lucas 16:1-8. Dugang pa, sa tagna bahin sa ilhanan sa iyang presensiya ingong Hari, gipasaligan ni Jesus ang iyang mga sumusunod nga mag-asayn siyag “matinumanon ug maalamong ulipon,” o “matinumanong piniyalan.” Ang pangunang asaynment sa maong piniyalan mao ang pagtaganag regular nga suplay sa espirituwal nga pagkaon para sa mga sumusunod sa Kristo panahon sa kataposan. (Mat. 24:45-47; Luc. 12:42) Mapasalamaton ta nga apil ta sa makadawat sa makapalig-on sa pagtuo nga mga publikasyon nga giandam sa matinumanong piniyalan ug giapod-apod sa tibuok kalibotan.